Accueil - sefarad.org

Almendra...parte 6

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

 
Almendra Parte   6
 
 
Dizyendo estas palavras Meri se alevanto i le
trusho a su primika ermana una tovaja mojada para
arefreskarle la kara i sus ojos. Se aviya kalmado
i mirava kon ojos vaziyos a las paredes pintadas
de su kamareta.  Era una ermoza kaza ke su nono
aviya merkado de un grego ke teniya de enstalarse
en una otra sivdad. La kamareta de Almendra era
al sigundo kat (etage, floor, koma, pizo) i dava
a la maraviyoza guerta de los Benezra.  Klara era
loka por flores i plantas...Pasava el mas klaro de
su tiempo en su guerta en enverano. Klara le aviya
dado esta kamerata porke  pensava ke Almendra se
iva bolar de su nido tadre o d'emprano i kijyere
ke tenga muy ermozas memoryas de su chikez.  Ke
sepa kuanto estuvo amada i regalada por su famiya
porke era vedra ke era la mas ermoza kamareta de
la kaza....Las pinturas de las paredes i del
tavan (ceiling, plafond. tikra)  eran echas por
un artisto grego...Las kolores eran klaras i
luminozas...Las otras kamaretas del KOnak eran
mas simples i aviya pokas kamaretas ke no  eran
pintadas del todo. 
 
- Agora yo va abashar ande estan muestras sinyoras
madres prima Almendra. No kedes en kudyado ke vo
pensar bueno komo lo vamos a endrerechar todo esto !
Les vo dizir ke tiyenes dolor de kavesa i kijites
espandirte un poko. No kero verte yorando otra ves
mi ermanika kerida.  Ten konfiyensia en mi i primero
el Dio, seremos  mozotros ke vamos a riir a la fin.
Esto es muy monstruozo, no puede segir ansina...
Trankila agora  si ?
 
- Vate prima Meri i agas komo lo saves...Nada puede ser
mas negro de agora ! Vate i ke el Dio este kon ti...
Lucha por muestra felisitad mi ermanika..Yo esto sin
fuersas...Me se rompiyeron mis alas !
 
Meri estava blanka komo la pared....Le aviya dado koraje
a Almendra ma no saviya del todo komo se iva tomar por
salvar esta masa (pate) yenna de alfinetes ! Komo las iva
arrekojer de aryento sin pincharse i sin tambien kavzar
ke el pan, a la fin no se pueda azer ! Teniya de menester
de muncha pasensya, muncho astusyo i saver avlar i
konvenser....Eya Meri !  Komo....Komo....Komo......

No teniya remedyo...Si amava a Samuel efendi deviya luchar
por el...Deviya avlar kon Mordo efendi en primero !  Si!
Es el ke teniya las yaves en sus manos...Es el ke deviya
luchar kon eya endjuntos por salvar Almendra...Deviya
avlar kon Sauel efendi...Deviya saver de el si se aviya
echo de unas kon la sinyora Graziella para este paso
i la keriya bien a Almendra. Ahhhh esto seriya una dezgrasya !
Se detenyo a la pared por no kayer...Estava aleskuro en
las eskaleras i en su korason....
 
Meri en la kaji oskuritad topo su kamino i entro en la
kamerata de asentar ande su tiya Klara i su madre estavan
avlando.  Estavan eksitadas de plazer i riyendosen kon
alegriya.
 
- Entra sovrinika kerida...Ande esta Almendra ?
Ke izitej ?  Me imajino ke estariya muy emosyonada
mi Almendra antes de espozarse kon el ijo de Grasiella...
Te konto koza ?

- Tiyene un poko de dolor de kavesa tiya Klara, se kijo
echarse i arepozarse en su kamareta.

- Dingun mal..Le va pasar.  No estava asperando una
propozisyon asemejada.  Todo va salir bien primero el Dio.
No ay mijor novyo en Smyrna entera i va estar muy horoza
kon el.
 
Viktoriko se aviya ido allado de los hombres i no le aviya
plazido ni las avlas aya !  Aki espozoryos i bodas aya
el Dio i los hahamim i las parashas, este disho,este bendizyo
i este maldizyo, no eran kozas de su plazer ! Karamela lo
aviya areskunyado entero....Otro un poko i iva yorar...Ya se
keriya ir a su kaza i durmir en su kamika....
 
En esto...Los hombres entraron todos endjuntos  en la kamareta
de asentar.  Estavan soriyendo i al apareser les aviya
plazyido el meldar i los debatos liturjikos.  Ya estava tadre
i Isaac keriya entrar a su kaza. Nisim estava, i el, muy
kansado de tante lavorar por la komenda de Mordo efendi.
Estavan lavorando kon ardor i de pronto ivan terminar lo todo !
Mordo estava mirando a su doredor...Almendra no estava...
Se sintyo triste.  Meri lo yamo :

- Senyor Mordohay, kijyeramos tanto konoser tambien vuestra
kerida espoza.. Ken save ke henoza de mujer deve ser por tener
un marido komo vozotros....

- Grasyas por el komplimento senyorita Miriam ma no tengo mujer
i no so kazado dayinda.  Bivo solo en mi konak de Konstantiniye
porke mis lavoros estan lo mas en la kapital.  Mis paryentes
i mi famiya biven en Bursa i los vo vijitar en pasando por ayi.

- Ken save ke vida ermoza devesh tener en Konstantiniye Mordohay
efendi...Oyi ke tenesh munchos amigos i konosidos en el saray
i ke la paryentes del Sultan mizmo son vuestros amigos muy buenos.

- Es vedra senyorita Miriam.  Mos amamos muncho de parte i de otro.
Sere muy honorado si un diya vuestro kamino pasa por Konstantiniye
i vos puedo aresivir komo mis muy estimados envitados, vozotros,
vuestros paryentes i vuestros konosidos.  Todos seran los
biyenvinidos ande mi.

- Muy munchas grasyas Mordohay efendi...Vos agradesko por vuestra
alta buendad.  Almendra i yo siempre mos sonyamos de esta sivdad
unika en todo el mundo.  Dizen ke la persona ke la ve se namora de
eya i no puede bivir leshos de eya otra vez !

- Senyora madre, abashare en un momento...La kero abrasar a Almendra
antes ke mos vamos i ver si se sente mijor.  Agora vengo.

- No tadres kerida ke tu padre kere ke salyemos.
 
Meri se echo a las eskaleras i empeso a asuvirlas a tres a tres !
Avriyo la puerta de la kamareta de Almendra i la topo komo la aviya
deshado....

- Primika...primika so yo !  Ven mos abrasaremos i mos alegraremos !
La primera partida mos reusho !  Mordo efendi esta libero !
No es kazado...i sus ojos te estavan bushkando kuando entro en la
kamareta de asentar. Esto segura agora ke te kere i el ! Almendra,
es ke esto bolando de plazer....Toda mos salira bien vasa ver...
 
 
(a kontinuar kon Sharope)

- Copyright © sefarad.org - 1997 - 2017

Retour au site sefarad.org -