Accueil - sefarad.org

Almendra...parte 7

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte   7

 

 

Almendra aviya saltado de su lugar !  Ke le diziya su prima ?  Tan presto  ?  No antes muncho tiempo estava en la kamareta kon eya...Kuando se aviya ambezado esto ?


- Avla prima Meri....Konta me komo supites esto...
Esto surprendida de vedra !  Kero saver todo ...Por favour dime ke afito abasho...Lo vites ?


- Si i no me demandes komo puide avlar de manera ke me diga si era kazado o no !  Le dishe ke mos enkantariya konoser su mujer tambien i es alora ke me respondiyo ke no teniya espoza i ke bive solo en Konstantiniye porke lavora ayi. 
Me disho ke iva ir a vijitar sus paryentes en kamino.  Biven en Bursa.


- Meri !  Mi ermanika...Sos maraviyoza ! Agora se a lo manko ke no es kazado...Es libre i se puede espozar kon mi si me kere i si mi madre me da a el ! Si no agora me puede kerer bien en los dias a venir...Rogare por esto de todas mis fuersas....Agora mos kale aleshar tiya Grasiella ..Veremos ke puedramos azer...


- No te merikiyes Almendra luzya...Vamos azer todo para salvarmos i lograr los ke amamos tanto.
El Dio mos va ayudar.  Vasa ver !...Tengo ke irme agora.  No yores mas, vamos avlar en unos kuantos dias, te lo aprometo i va venir ande ti kon la kara riyendo.  Dame un poko de tiempo...

 

Meri sin asperar la repuesta de Almendra salya afuera komo una filecha i koryo en el aluskuro de las eskaleras...

 

 

 

A la demanyana Almendra se vistyo de Shabat i se fue al mupak para ayudar a aparejar la seuda.  Los hombres, su padre, sus ermanos i Mordo efendi estariyan para venir...Kito el mantel brodado de flores maraviyozas ke su madre aviya trayido por ashuar de su kaza...
Kuando Klara vido este mantel ensima de la meza una soriza le aklaro la kara !  Su ija parese ke keriya empesar a fiestar su espozoriyo de agora...Aviya pensado i le aviya dado razon a su madre kerida ! 'Djoya miya, mi alma' disho Klara entre si...Komo la iva dar a Grasiella !  Kaliya! No aviya de kualo fuyir..Deviya estar horoza ke sus dezeyos se ivan akumplir.

 

- Almendra, avre la puerta a tu senyor padre i bezale la mano mi kerida.  Ya vinyeron !


- Shabat shalom  Shabat shalom Shabat shalom......


- Shabat shalom


Almendra estava korolada entera kuando dyo su mano a Mordo efendi. Estava mirando abasho de espanto ke iva meldar de sus ojos la kalor ke la estava kemando....
Las manos de Mordo estavan tremblando.  Detuvo la mano blanka de Almendra mas largo de lo ke se deviya.
A Almendra le vino komo si le estava karesando sus dedos. Sintyo un golpo a su estomago i lo miro kon ojos medyos mojados de la emosyon.  Un momento kedaron ansina fina ke la boz de Klara los espiyerto.  Estava yamando a todos a la meza para empesar la seuda.

 

Se asentaron todos al bodre de la meza.  Mordo estava asentando djusto enfrente de Almendra
allado de su ermano grande.  Sus ojos la estavan adorando en mirandola.  Esta demanyana estava komo mas alegre, mas yenna de vida..No se les estava fuyendo las miradas i le estava soriyendo kon una dulsura inkreyivle.  EStava avlando kon su boz de ninya de mil kozas, de sus amigas, de komo pasavan la ora endjuntos, komo riiyan kuando aziyan kozas para inyervar el haham ke veniya a ambezarles tora i alaha....Nisim efendi no le plaziya oyir esto !
Ma no puediya ser seryozo i gritar a su Almendrika !
Se riyiva i el kon todos !
Mordo estava allegre I el tambien kontava kozas fantastikas del mundo de
ande viniya, las kozas ke le aviyan pasado por su  kavesa i sus amigos en el palasyo.

 

-  Un diya, empeso, mos teniyamos ke toparmos kon  un pasha de las armadas de Sus Majestades.  Un hombre muy seryozo i konosido por su krualitad. Un hombre ke muy pokos viyeron riyir ! El mas chiko ensidente puediya kavzar ke embiye a la forka un dezmazalado !
Los enforkavan enfrente de la djente ke miravan este kastigo kon enteres, kon un poko de espanto ma lo mas tomando plazer...  A vezes kortavan las kavesas i las enkolgavan a los muros de la puerta de la entrada del Saray (palasyo).  'ibret-i alem' - ke servya de lesyon a los otros - se diziya.  Aviyamos kedado de akuerdo, kontinuo Mordo, ke ivamos a ir ande Alberto efendi en el Charshi, un kliente i un amigo miyo para ke el Pasha merke unos tapetes i un mangal (brazero) de kovre, muy grande, para su kamareta de aresivir djente, me aviya dicho.  En vedra, vino a la ora djusta kon
unos kuantos de sus hombres i mos dirijimos a la botika de Alberto efendi ke mos estava asperando kon empasyensya en pies, delantre de su butika alavado en el charshi entero por las maraviyas de kozas ke vendiya, lo mas vendidos de mi parte dospues de  grandes 'pazarlikes'  - debatos para bashar el presyo -.
Alberto efendi era un viejiziko kon muncho meoyo, ke le plaziya shakas i sus lirikos de oro sovre todo !

 

Entrimos todos en el magazen i dospues de dizir lo ke keriya egzaktamente merkar, el pasha izo 'bagdash' - se asento kon las pachas kruzados travados a el, a la anchor - en basho, ensima de un grande kavesal de seda kon broderiyas ke le dyo un empyegado de la botika i pishin trayeron narguilas i chayes buyendos, enfiyeh - este polvo ke se trava a la nariz por 'keyif' - sherbetes de todas las savores i dulses para alavar el Pasha, muy kontento de esta arresivida. Se estava karesando su larga barva blanka mirando a kada uno i uno de alto kuando sus ojos persivyeron un vazo chino
de muy alta valor ke le aviya vendido a Alberto efendi al empesijo del anyo pasado.  Frankamente lo keriya  este vazo para mi konak ma dospues me dishe ke en una kaza sin mujer puediya romperse komo nada este vazo i mijor era venderlo a su presyo ! 
'kero ver esto, trayedmelo '  disho kon kalmo i una boz grava.

Los empyegados del magazen koryendo se fueron al kanton ande estava el vazo presyozo i kon attensyon lo trusheron delantre del pasha.  Este lo kareso kon sus dedos entravados por la edad, meneyo la kavesa I no disho nada.  Alberto efendi le demando si kijyera ke le trayeran los tapetes ke keriya merkar. 

El pasha no digo nada i kontinuo a meneyar la kavesa. Alberto efendi demando de sus empyegados ke traygan el mijor mangal (brasero) de su botika.  Dos de sus hombres vistidos de un shalvar (pantalon muy ancho) blanko de seda i un djepken  (modo de vest kurto sin mangas i brodado de kolores vivas i de ilo dore) apanyaron de sus manos fuertes un mangal de kovre lavorado kon grande arte i ke les veniya kaji fina el pecho i lo pozaron enfrente del pasha.  Todos lo estavan mirando kon kuryozitad i un poko de espanto si kale dizir la verdad !  Estavan prontos para oyir sus komentos i azer todo asigun su orden.  El pasha kijo otros kavesales i no disho mas nada.  Le metyeron avagariko los kavesales a su espalda i a sus lados... Alfredo i yo estavamos asentados a sus dos lados I mos estavamos mirando sin saver ke azer.....


Muestro balabayt dio orden ke traygan los tapetes de Buhara, de Semerkand, de Persiya i de Anatolya para ke su kliente de granda fama pueda eskojer los ke le plaze.....En un sigundo los tapetes se desrolaron enfrente del  pasha ke estava mirando a los muros de la botika, a los hombres kon grande respekto delantre  de el, afuera por la puerta sin dizir ni un biervo !
Alfredo kijo  atrevirse i demandarle  'otra koza  puedeser ke vos gustariya ?'  El pasha lo miro de una mirada preta kon ojos duros ....Se kedo kayado el dezmazalado de Alfredo ke estava rogando una sola
koza !  Ni sus liras de oro ni este pasha atavanado ke puediya azerles kortar sus kavesas debasho de su proprio techo !  Se kayaron todos.  Los yenicheris (janissarios **) kon el bork de lana blanka en sus  kavesas i las manos en sus espadas estavan asperando  en la puerta de la botika.  La kayades i el silensyo mos estava pezgando al korason.  Se puediya oyir bolar mizmo una moshka !  De ande topi esta bela en la kavesa ! Es vedra ke yo no lo kulpava porke era este pasha maldicho ke se aviya aserkado de mi i me aviya dicho ke lo yeve ande un konosido para ke merke sus kozas !  Maldito pasha !

Sera ke estava durmyendo kon los ojos avyertos ? Por siguro ke le estava pasando kozas por la kavesa ma kualo ?  I teniya una entuisyon ke lo ke le estava pasando por su kavesa tuguerta no era koza ke mos plazeriya del todo ! I asperimos......


(a kontinuar kon sharope)

 
AKLARASYON  :
------------------------

**  Los janissarios eran los soldados de la armada ottomana.  Esta armada era formada (1362) de ijikos non-muzulmanos ke se trayiyan komo esklavos de los  payises kon loskualos los Ottomanos gerreyavan. 
Los aziyan muzulmanos i les ambezavan a gerreyar. No teniyan el derrito de kazarsen.  Esta armada teniya  munchos privilejyos i munchas vezes se revolto i kavzo  dezgrasyas en el emperyo. La majoritad de los janissarios  fueron matados,  i enforkados (Vaka-i Hayriye) en 1826   kuando el Sultan Mahmut II fondo la armada mueyva.

 

 

 

- Copyright © sefarad.org - 1997 - 2017

Retour au site sefarad.org -