Accueil - sefarad.org

Almendra...parte 8

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte   8
 
 
Asperimos sin meneyarmos i sin dizir una palavra
fina ke el pasha empese a avlar o azermos un sinyo..
No me akodro kuanto tiempo paso fina ke oyimos
Leon, el sovrino peltek de Alberto efendi gritando
en la puerta :
 
-  ti ti ti tih tih ooooo  (tiyo ke keriya dizir !)
ke ke ke ke z estooooooo ? ke kek ekek ke kerrren
es ses ses ses tos ? pa pa pa pash pash aaaaaaa !!!
 
i le toma una riza loka al pasha !  Su tripa estava
saltando de arriva abasho i estava dando puntas de
piyes en el ayre !  Empesimos a riir i mozotros..

Todo bueno Leon ke mos salvo !  Ni kero pensar kualo
puediya afitar si no viniya kon su  kekke kekke keke
i ti ti tiii ti hoooo  !!!!
El pasha diyo sus manos a los hombres ayi i se metyo
en pies. Me disho a mi kon una boz allegre i dayinda
riyendo
 
-  ke me lo embiyen todo lo ke me mostraron a mi
palasyo i ke no se olviden del vazo....Lo vo regalar
a mi yerno. Mi ija viene de kazarse i no les embiyi
un regalo para sus kaza mueva...Aki tienes dos bolsas
yennas de liras de oro...Me parese ke va kovrer el
presyo de las kozas ke merki. 
 
Echo las bolsas ke kito de su kushak  (ropa ke se
embolveva al doredaor de la talya) ensima de los
kavesales embasho.  Alfredo se boko i las tomo kon
una soriza, los ojos boltando de plazer ! Le estava
bezando sus vistidos dizyendole ke siempre va ser el
bienvenido en su botika i ke iva ser honorado de
servirlo i verlo..ke puediya trayerle todo lo ke
su alma le travariya ke...ke....
 
Almendra estrava riyendo i todos en la meza de la
manera ke Mordo efendi estava kontando lo ke le
aviya afitado kon el pasha akel diya !
 
- Lo vitesh dospues a este pasha ? demando Almendra.

- Por seguro ke mos vemos ma la vedra es ke no me
plaze ser muncho kon el...Ven veras ke no se lo ke
ize ke le plazyo tanto i siempre me envita a  su
meza i kuando tiene ajenos en su palasyo. Me diyo
orden de ser prezente  mizmo la noche ke el shehzade
(ijo del SUltan) teniya de vinir ande el. Akeya noche
fue muy enteresante....Vo los kontare otra ves !
Klara estava allegre i le disho a su marido
 
- Nisim efendi, kale ke aprontej la komanda de Mordo
efendi lo mas presto posivle porke en poko tiempo vasha
tener otros echos importantes!

- Si mi kerida ?  I se puede saver ke son estos echos
importantes ?

- Nisim efendi, sosh el padre de una ija ermoza entre
las ermozas i ya mos vino el tiempo de darla a un
mansevo ke la va mereser !

- Tienes razon mi kerida ...ya esto pensando a esto.
Mordo se iva ezmayar otro un poko !  Keriya echarse
a los piezes de Klara i rengrasyarla de todo su alma...
Almendra ke saviya lo ke su madre keriya dezir teniya
las lagrimas en los ojos...Lagrimas ke no fuyeron del
ojo de Mordo !  Fue komo si aviya resivido un golpe !
Sera posivle ke Almendra estava namorada de un otro ?
Puedeser ke no se keriya espartir de sus paryentes i ir
leshos a Konstantiniye ?  Deviya dizirle lo ke teniya en
su korason o sera mijor de avlar kon su padre en primero ?
Puedeser kon la senyora Klara ke parese aviya presentido
lo ke sintiya por Almendra  ? Ma keriya en primero saver
ke eran los sentimiyentos de su amada....
 

Klara yamava su espozo " Nisim efendi " al lugar
de Bohor efendi a vezes. Su nombre era Nisim Bohor
Benezra i todos uzavan su nombre komo les viniya !
Nisim efendi no estava kontente de esto ma nunka no
aviya puedido enderechar la boka de su mujer i menos
la de los otros !  Mordo estava auzado tambien a
yamarlo Nisim efendi o Bohor efendi komo le saliya..
A los ottomanos les paresiya ke eran dos personas
diferentes i afitava munchas vezes ke entravan a su
negosyo personas ke le demandavan  "Bohor efendi no
esta ?"  o  "kuando va vinir Nisim efendi ?" Se aviya
enfasyado de dizirles el yerro i kontar les la istorya
otra vez i otra vez....A vezes se avlava entre si komo
si era dos personas diferentes i se riiya porke al
apareser le plaziya tener dos personajes en un puerpo !
Akel diya yamo " Bohor, Bohor....Ven a mi lado ke te
kero avlar  !   Ven asentate aki enfrente de mi i oye me !
No se ke tiyene esta mujer miya en su kavesa i avla de
darla a mi Almendra a unos  !   A ken te parese ?  Deke no
me dize frankamente lo ke esta kozinando en su meoyo ?
Sera a Mordiko ?   Noooo No kreyo ke akseptara de desharla
ir a Konstantiniya!   Deke no?  Buen ijiko de oro por mi
vida !  Ke le manka ?  Yo, ya esto viyendo komo me la
mira a Almendrika !!!   Ma Klara esta en las nuvlas !
Ken tiyene en su kavesa esta mujer ????   Tiyene uno !!!
Le vo avlar yo i vo entender ke es..." 
 
 
Karamela, el gato de Almendra estava arrodeyada en
la kamareta de Almendra los ojos fiksados a todos
sus djestos.  Almendra se estava vistyendo un fostan
i dospues lo estava kitando kon ravya para meter
otra koza, i esto unas kuantas vezes fina ke se
asento al bodre de su kama i empeso a yorar kon
sanglutos.  Karamela pishin salto ensima de eya i
emposo a lamberle la kara kitando chikitikos
bruidos de kudyado.  Almendra arrondjo Karamela, lo
ke no le afitava nunka i al kontraryo la kareseva
i le avlava dulsamente, i empeso a boltar en redondo
en su kamareta.  Karamela detras ! 
 
- Almendraaaaaa ! Ande estas mi ijika ? No estas
pronta dayinda ? 
 
Se oyiya la boz merikiyoza / en kudyado  de Klara.
No resivyendo repuesta, Klara asuvyo a la kamareta
por ver ke su ija kerida estava medya desnuda i los
ojos en sangre !
 
- Ke me muera yo no !  Ke es este hal /estado kukla
miya ? (poupée)   Deke no te vistes ?   Ya estaran vinyendo
de un momento al otro....Prestooooo lavate la kara
i pasate un fistan ensima...Kuala keras !   Todas son
ermozas i tu sos la mas ermoza de todas.   Estas triste
porke no le vas a plazer  ?   No no mi kerida, el te va
adorar !
 
- Basta mamita...Basta por favor! No lo kero ni ver !

- Ke ?   Ke es esto ?   Komo no lo vasa ver !  Vos vash
a espozar i pensi djusto ke vos veyash antes del
espozoryo !  Lo ago por ti, para ke lo konoskas un
poko de antes.  Ize negro ?  Deviya  darte a una
persona ke no konoses del todo komo lo azen los otros
paryentes ?  Almendra !   Vistete i ven abasho !
Te esto asperando i no tadres...Agora !
- Si mama.. 
 

Kuando Klara salyo de la kamareta de Almendra sintyo
un apretamiyento de korason.  No saviya ke le estava
pasando a su ija.  No lo keriya a Samuel efendi ?
Komo puede ser !  Mansevo, ermozo, riko, bueno, konosido,
amado de todos.... Ke mas ?  Namorada de otro ? 
Se metyo a riir de si para si.....No !  Su Almendra era
la innosensya mizmo.  No estava en las kayes arrastando
komo munchas mansevikas en sus doredores.  Klara saviya
kada paso i paso de su prinsesika i no era posivle koza
asemejante.  Alora, deke no lo keriya NI VER ?  Ke teniya
Almendra ke Klara, eya, no saviya ?  Kaliya ke avriyera
este anyudo...
 
Klara se fue eya mizmo a avrir la puerta kuando su kerida
amiga vino kon su ijo detras de eya kon un grande sesto
de las uvas maraviyozas de sus guertas.  Sorizas en la kara
las dos amigas se abrasaron i se bezaron i pasaron a la
kamareta de asentar. 
 
Samuel efendi estava blanko komo la pared... 
Kuando Klara le demando komo estava i le disho ke
kontente ke estava de arresivirlo en su kaza Samuel empeso
a eskuzarse i dizirle ke le aviya tomado una dolor de kavesa
muy fuerte djusto unos kuantos minutos antes de vinir ande
eyos.  Almendra entro a la kamareta kuando Samuel estava
dayinda avlando i empeso a siervir el sharope blanko kon la
grande tavla de oro i de plata i la agua friya ke se guadrava
en el pozo del patio.  Zeliha,  la serviyenta, empeso a trayer
biskochos de muez, frutas,  otros dulses i manteka freska,
panes de Espanya i sherbetes i diyo a kada uno tovajas
blankas brodadas finamente en los bodres kon ilos de oro
i de plata.
 
Almendra estava silensyoza i no estava avriyendo su boka
ni para avlar ni para komer.  Samuel kaji lo mizmo !
Estava respondyendo a penas kuando le estavan demandando
una koza.  Las dos madres empesaron a preokuparsen del
friyo entre sus ijos i Klara le disho a Almendra de
mostrar a Samuel el kavayo ke Bohor efendi aviya trayido
antes ke tres semanas... "Vento" lo aviyan yamado i los
ermanos de Almendra estavan tresalidos de pasear kon el
por la kampanya, no leshos de sus kazas.
 
Los dos mansevos se alevantaron i salyeron por la puerta
de detras del konak para salir a las guertas por ande
Vento estava gozando de la yerva freska. Se aserkaron de el
i Samuel empeso a karesarle la frente....
 
- K' ermozo kavayo senyorita Almendra !

- Si, mis ermanos salen a pasear kon el i dizen ke es un
muy buen kavayo. Me plaze la kolor de su pelo preto
briyando al sol...De vedra ke es ermozo.

- Vozotros sosh tambien muy ermoza senyorita Almendra i
no tengo dudas ke vuestro korason es bueno i vozotros
sosh una djusta persona.

- Grasyas Samuel efendi...Solo..

- Vos kero avlar senyorita Almendra ma me espanto de
ofensarvos...Meresesh lo mijor en el mundo por ser tan
vertuoza i kon kualitades de una mujer akumplida...No
kero ke me entendesh mal...Todo manera de hombre seriya
muy honorado i feliz fina el sielo de tenervos por espoza
ma mi korason apartenese de muncho tiempo a una senyorita
ke amo de todas mis fuersas....Pensi ke no me kijyerash
ke vuestro espozo saviendo mi dolor...Lo teniya ke dizir
i no enganyarvos todo en savyendo ke muestras senyoras
madres dezean muestra union sovre todo. Es ke....

- Bendicho el Dio, Bendicho su Nombre ! No ay de menester
de konvenserme mas Samuel efendi!  Vos kero komo un ermano
mio dospues de lo ke venish de dizirme porke penso ke yo
se ken es la amada de vuestro korason... Mi prima-ermana
Meri la blanka, la mas meoyuda de todos...Mi ermana d'alma !

- Senyorita Almendra...Vos rogo ke me perdonesh...

- Nada de perdonar...K'El Todo Poderozo en los Sielos vos
bendiga i ke seyash muy horozos fina la fin de vuestras
vidas.  Rogo mi felisitad  tambien kon el ke kiero irme,
el Senyor Mordohay de Toledo...
 
( a kontinuar kon Sharope )

- Copyright © sefarad.org - 1997 - 2017

Retour au site sefarad.org -