Accueil - sefarad.org

Almendra...parte 9

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte   9

 
 
- Santo Bendicho ! senyorita Almendra ke manera de
pekado ivamos a kometer los dos ! Kazarmos alora ke
somos namorados de otros ! Ma komodo vamos a aklarar
todo esto ? Va ser un derrokamiyento por muestras
Senyoras madres ke estan tresalidas de esta boda.
Mi madre no me avla ke de esto diyas enteros !
 
- Lo se...Tambien es la misma koza ande mozotros.
Samuel efendi ? Dime por favor.....Ke vamos azer si
no trokan de ideya ? Yo me muereriya i no sere la
mujer del amado de mi prima-ermana !
 
- No penses asina kerida Almendra ! Dingun mal mos va
afitar. D-o mos va mostrar kaminos derechos i va ablandar
todos los korasones duros ma buenos i djustos ! Tengo
konfiensya en mi amada....Sera eya ke va enderechar
lo ke mos preokupa. Ten fe i roga al D-o ! Ma ken
veygo vinir de leshos !!!! No es Mordo efendi este
kavalyero alto kon su kavaya blanko ? Lo asperavas ?
 
- No ! Por seguro ke no ! Esto muy sorprendida de
vedra....Viyene las tadres kon mi padre i mis ermanos
o un poko mas antes....Nunka a estas horas.
 
- Te veygo blanka i tremblando....Ermanika Almendra komo
te puedo ayudar ?  Ke ago ?
 
- Muy tadre...El entra por la puerta delantre. Muestras
madres estan aryento, avlando i riyendo....Por seguro
ke le diran lo ke mas dezeyan ! Muestro kazamiento !
Esto piedrida ....Mi sangre se trava...Estamos aki tu
i yo...Ya va pensar ke estamos de akuerdo....Dio mio !
 
- Le vo avlar ! Le vo kontar....Todo...
 
- No ! No ! Ne tenemos avlado ! El no save lo ke penso !
No save ke lo kero, ke me muero por el ! Por piyadad puede
dizir ke me ama i el ! ...No me disho nada i no konosko ke
son sus sentimiyentos, si me kere por mujer o le agrado
ke la ija de su haver !
 
- Ven kon mi, entraremos...Desha me avlar i kayate !
Ni ke lo mires, nada, aze lo ke te digo, dizele "bienvenido",
despidete de mi madre kon un bezo i deshamos abasho mientres
tu asuves a tu kuarto. Ven agora... Dame la mano ! Kero
ver su kara i savere lo ke pensa ! El hombre no se yerra
de la mirada de un otro hombre kon flama ! Si te ama se va
firyir i si no es esto mos va soriyir . Kale ke lo sepamos !
 
Almendra mete su manizika chika en la mano sudando de
Samuel efendi. Los dos tienen los korasones ke les baten
fuerte. Samuel en d'una Shimshon el gibor, trava Almendra
kon fuersa i entran a la kamareta de asentar de Klara.
 
Las miradas de las dos madres se aklaran i son sorizas
ke les eskure de sus karas viendo a sus kreaturas
mano en la mano entrando los dos aryento...Ke mas puediyan
kerer ! Almendra i Samuel kazados, keriya dizir las dos
fortunas, los dos puederes unidos, las dos mijores famiyas
kosuegros !
 
Almendra disho un "bienvenido" a penas oyido i fue a
bezarla a Graciella para dizirle ke se sentiya muy kansada
i keriya desharlos para asuvir en su kamareta. Gaciella
tambien la bezo la afishugo i le disho ke l'asperava al
mierkoles al vienen kon su madre i ke teniya de avlarle.

Kuando Almendra dezaparese kaji de la kamareta
Klara empesa a ekskuzarse por su ija i de aryento
buye de inyervos no saviendo ke pensar de un
komportamiyento tan no apropriado.  Ke verguensa
por su esuegra i su novyo ! I delantre de la djente !
Ke iva pensar Mordo de asina de una fuyida !
De ande aviya aparesido i el en medyo del diya
i djusto este diya tan importante por los novyos
Graziella i eya ! Kaliya ke le dizyera a Nisim
efendi de eskapar kon esta komanda de Konstantiniye
lo mas presto posivle porke esto no estava komodo
de tener djente en kaza djusto antes de una boda !

Eya teniya de dedikarse enteramente a su ija
ke estava asemejando de mas en mas a Karamela su gato !
Teniya ke avlarle seryozamente i eksplikarle ke no
era mas una kreatura i deviya ser responsavle en sus
aktos i djestos i la manera ke se komportava kon
sus padres i kon su futura famiya ! Es Karamela ke
lo kulpava todo ! Es de eya ke se estava ambezando
de irse sin mirar atras i no dar metellik (moneda
Ottomana) a los ke deviya respektar ! Kaliya dar
este gato a alguno antes ke Graziella empese a
formalizarse, dizir ke gatos no era bueno en kaza
i kavzar una yelor entre eya i Almendra !  Por sedaka !
" Ken ken a ken ! " estava pensando djustamente
kuando Graziella le disho ke i eyos se keriyan ir
djustamente pormodo de la dolor de kavesa de Samuel
ke parese no le aviya pasado. Iva intentar de buyirle
yervas para atarlos de manera apretada a su kavesa  i
dizirle a la Nona ke lo aprekante para ke todos los males
se vaygan i alivyaneye su ijo. Le disho a Klara ke se
kudyen muncho todos de ojo malo tambien  i ke incha la
kaza kon ajos i pishkados sekos enkolgados a las puertas
para ke la golor aga fuyir los espiritos malos i
traygan mazal bueno, atzlaha i braha a la mishpaha
kosuegra los Benezras de Kalatayud i de Smyrna,
bendichos seyan Amen ! Klara tambien bendizyo a Samuel
efendi i les rekomendo de no dizir nada a dingunos
antes del espozoryo dospues del akuerdo  i las
konversasyones rituales de los padres, la sinyatura
del akto de remisyon de la dota i el montante de oro ke
seriya eskrito en la Ketuba.
 
 
Se aviyan alevantado todos ensima de estas palavras.
Solo Samuel estava mirando a la kara blanka i los ojos
mirando al vaziyo de Mordohay de Toledo ke asemejava
enteramente aleshado de esta kamareta, no sintyendo i
no viyendo nada, su mano detenyendo su kavesa,
ajeno a todo i todos ke se topavan a su doredor.
 
Si....Estava siguro agora...Mordo keriya a Almendra
komo Almendra, eya mizma lo keriya ! Komo se keriyan
kon Meri la Blanka, su ojo, su alma i su adorada....
 

Dospues ke Graziella i Samuel se fueren Klara
se torna a Mordo i le demando si estava kansado
siendo ke  se aviya tornado antes de kada diya a kaza
i lo viya un poko dezganado.  Mordo le disho ke estava
preokupado un poko pormodo ke los negosyos para merkar
el navo del venisyano no se estavan desroliendo komo
lo kijyera i ke se aviya metido en tino de ser el
duenyo de este navo porke lo teniya de menester en
su echo....Mas tadre se despidyo de la senyora de la
kaza i se fue a su kuarto. Sus ojos estavan korolados
de ravya i de dezespero....
 
Se espandyo ensima de su kama...La vizyon de Almendra
mano en la mano kon Samuel efendi entrando a la kamareta
de asentar no se le estava indo de los ojos ! No ! No
estavan soriyendo.  Almendra no teniya esta ekspresyon de
manseva namorada, alegre de estar kon su amado. Samuel
efendi lo estava mirando a el komo si keriya oyir o
dizir un koza.  I dospues.. Esta despidida de Almendra,tan
sin sensyo, immediatamente dospues ke aviyan entradon en
el kuarto. Le aviya dicho "Shalom" en un soplo, sin mirarlo !
La kavesa se le estava partyendo i keriya liberarse de este
kadena de fierro al rodedor de su frente !

Se alevanto i penso ke salir afuera, puedeser ir ande
Nisim efendi para tornar dospues kon eyos a kaza le iva
dispersar las ideyas un poko... En salyendo de su kamareta
la vido a Almendra ke eya tambien se estava indo abasho.
No lo estava mirando. Sus ojos en basho komo si aviya
echo una koza negra...
 
- La felisito por su espozoryo kon Samuel efendi Senyorita
Almendra.
- ...
- Estamos aravyados ? No me mirash ? Almendra ?

- Si ?

- Una koza vos tormenta... Vos puedo ayudar ?
- ....
- Es yo ke vos dishe una koza ke no kaliya puedeser ?

- No..nada

- Almendra, por favor, kero saver ke es este yelor ke
no egzistiya entre mozotros. Me siyento mal ansina.

- No vos preokupesh Mordohay efendi. Esto bien.
Grasyas por vuestro kudyo.  No me siento tanto biyen.
Va pasar...Vo ayudar a mi madre. Kon permiso !
I se iva ido...Kom'un vento....Arezvalando de las
eskaleras komo bolando !
 
 
 
Meri estava asperando Samuel efendi al fondo de sus
guertas debasho del arvole de moras.  Ya se aviyan
echado todos en kaza.  Es aki ke se topavan syempre
las noches de enverano kon la luna i las estreyas
briyando ensima de sus kavesas.  Se amavan komo lokos
des de syempre, des de ke eran kreaturas parese !

Julia era tambien amiga muy serka de Graziella  i
los chikos djugavan siempre endjuntos...Los ermanos
de Almendra, Almendra, Samuel, Meri i Perla, la ija
de la tiya Esther Gormezano.  Viktoriko no aviya nasido
dayinda. Djugavan aki debasho de este arvole ke les
serviya de kaza kuando se asuviyan ensima i komiyan
moras fina azersen hazinos ! Meri estava muy enkudyado
de lo ke Samuel le iva kontar. SAviya ke deviyan
irsen kon su madre ande la tiya Klara por avlar de
este kazamiyento i todo en savyendo el amor de Samuel
por eya, no se estava pudyendo aresentar i estar kalma

(a kontinuar - sharope )
 
 
 

- Copyright © sefarad.org - 1997 - 2018

Retour au site sefarad.org -