Accueil - sefarad.org

Almendra...parte 11

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte 11

- No..No te vaygas !  Kedate aki !
- Si esto a tu lado Klarika.
- I ke va ser si no puede ir este gato
engrinyado ?
- El gato !  Mallahim she ba Shamayim !
Klarika, ven desha este gato agora
mos iremos a durmir presyada i amanyana
demanyana Elohim gadol !  Todo se va
enderechar en un soplo i te vas a
espertar kom un sapato muevo ! Ven mi
alma...
- No ! No me keres oyir !
- Komo no ? El gato si ! Barouh Ata
Adonay Ba....
- No me estas ayudando Bohor efendi !
- Yo !!!! Shema Yisrael Ad...
- Basta ! Oye me !
- El gato....Si, no se va ir kerida !
- I komo no se va ir ?  Ke va ser kon
Almendra ?
- Amanyana demanyana...
- No agora ! Kale topar un remedyo !
- Al gato ....Si.....
- Lo vo dar...A alguno
- Si a Graziella !
- Noooooooooo ! Bohor efendi bastaaaaa !
- Si mi alma ! Komo keras...
- Este gato se tiene ke ir agora !
- Agora mi reyna ?  Amanya.....
- Agora dishe !
- Ande lo vamos a kitar de noche...
Estariya allado de Almendra...Se va
espiyertar ...I...
- Ven veremos...

Kuando Almendra abasho a la kamerata de
asentar vido ke la puerte dando a las
eskaleras de la guerta estava avyerta !
Komo puediya ser ?  Siyempre serravan
bueno esta puerta de fierro para durmir
mas repozados ariva. Ken la aviya avierto ?
Ken puediya estar en la guerta a medya
noche ?  Sus ermanos ?  Mordo efendi ?
Se eskondyo kuando oyo patadas en las
eskaleras.  Eran sus paryentes !
Aviyan abashado a la guerta por tomar
un poko de freskura deve de ser i
agora estavan tornando a echarsen ! Si,
esto deviya de ser !
KUando entraron a kaza se toparon frente
kon frente kon Almendra en su delgada
kamiza de noche, los pies desnudos !
- No durmes kerida ? Porke abashates ?
- Esta muy kayinte senyora madre. Tuve
ganas de komer uvas i de arefreskarme
un poko en la guerta.
- Abashates agora ?
- Si agora mizmo.  Ma no vos vide fina
agora.  Me estava demandando ken avriyo
esta puerta.
- Ande esta Karamela ? En tu kamareta ?
- BUeno...
- No embarasa....Sales a la guerta ?
- SI me permetes si mi madre...No tengo
esuenyo en esta kalor.
- Sal mi ijika  ma no kedes tadre....

Mordo asentado ensima de su kama teniya
penas de durmirse.... Nunka aviya sentido
una kalor asemejante komo si no estava
puediyendo respirar !
Su larga kamiza blanka de seda de Bursa
(o Prussa, komo siertos Gregos dayinda
la yamavan) ke su padre le aviya regalado
la dalkava vez ke se iva ido ande su ijo 
en Konstantiniye, le estava vinyendo
demaziya ensima de su kuero sudando i
mojando la kamiza fina.  Las puertas de su
balkon estavan aviertas ma ni un soplo se
estava puediyendo sintir.... Mordo estava
pensando a las avlas ke aviyan pasado la
tadre entre el i  Nisim efendi . 
Komo se aviya detenido de demandarle la mano
de su ija kuando estava komo un padre kon el,
tan kerensyozo i tratando de konvensorlo para
ke se kaze !  Si no aviya visto de sus ojos 
Samuel efendi kon Almendra mano en la mano i
no aviya oyido de sus orejas lo ke la Senyora
Klara i la Senyora Graziella aviyan avlado
sovre el espozoryo de sus ijos, lo iva azer...
Se iva echar a sus piezes i le iva demandar de
azerlo el hombre el mas horozo de la tierra
en dandole  Almendra, su ija kerida, ermoza
entre las ermozas de Smyrna !  Le asuvyo las
lagrimas en los ojos en pensando de muevo a
todos estos detalyos ke estavan komo apegados
a su miente porke no se estava puediyendo
fuyir de eyos.  Siempre estavan delantre de
sus ojos !
Se alevanto i salyo al balkon redondo i ancho
ke estava dando a la guerta de enfrente de la
kaza. Los dos grandes arvoles de manolyas
estavan kuvyertas de sus flores anchas i
presyozamente perfumadas.  El lunar tan grande
esta noche estava azyendo briyar las grandes
ojas de un vedre tan eskuro ke paresiyan komo
pretos. La luz de la luna  blanka i palida se
estava puediyendo ver en estas ojas i kon la
blankura de las grandes flores los dos arvoles
se estavan transformando en unos djiganteskos
seres nunka vistos antes de esta noche majika
de esplendor ma tan pezgada kon esta kalor ke
no iva olvidar....
Mordo teniya de akodrarse de esta noche majika
fina su dalkavo soplo no solo pormodo de los
arvelos kon las manolyas, parfumando la guerta i
la kaye fina leshos de la kaza !

*

Almendra dospues ke komyo munchas uvas para
mojar su garon del dulse sumo de su fruta
preferida salyo a la guerta para asentarse en
el mizmo banko ke sus parientes estavan asentados
unos minutos antes. Estava mirando a estas
estreyas tan leshas demandandose si un diya
estavan mas serka, komo la luna !  Ke ermozo
iva ser si aviya unas kuantas lunas las noches
o estreyas serkas serkas ... Eya amava tan
las estreyikas en el sielo ke envezes le paresiya
ke le aziyan ojiko para eya sola !

Su madre le aviya ambezado ke kuando se
viya la luna delgadika delgadika la
primera noche ke se mostrava en el sielo,
kaliya pishin tokar al oro i pensar a
un dezeyo.  ESte dezeo se aziya verdad
absolutamente !  Si su madre lo aviyo
dicho es ke era vedra.... Penso ke el
otro mez iva asperar la primera noche
ke la lunika flaka flaka se amostre
en el sielo. Iva aparejar su aro de
oro para sus kaveyos, regalo de su
kerida tiya Julie, la madre de Meri la
Blanka, su primika i la ke Samuel efendi
adorava.  Samuel efendi ke kon un yerro
dezgrasyado del destino iva ser su espozo !
Almendra penso kon alegriya ke el mez a
vinir iva dezeyar ser amada de Mordo efendi
komo lo amava eya, de toda su alma i la
lunizika mueyva los iva espozar en los
sielos de manera ke su madre i la Tia
Graziella no ivan a pueder dezazer este
espozoryo.  Almendra sintyo supito el
dezeyo de abrasar su arvole de almendras
para sintir su karinyo i su fuersa ke le dava
fuersas a su puerpo mizmo.
*
Mordo, arimado a las paredes blankas i
lavorados de su balkon estava pensando
ke teniya de boltar en unos kuantos diyas a
Konstantiniye, visto ke su komenda de
sapatos a Nisim efendi ya estava kaji
pronta de mismo estavan eskapados sus
otros negosyos en Smyrna.  Estava buen
kargado i esta ves !  Teniya muncho de
yevarse en los kaminos bastante peligrosos
del ritorno.  No iva ser fasil de pasar las
montanyas kon tanto kargo i los bandidos
eskondidos en las grotas de estas montanyas !
Sus hombres eran eskojidos uno i uno por el
mismo i no aviya ensima de eyos ken puediya
maniar las grandes i pezgadas espadas de la
muerte.  Marko se akodrava siempre ke su
reushitad dependiya enteramente de la
vayiensiya de sus ombres, de su suerte de
no enkuentrar fuersas mas grandes
de las suyas en los kaminos del ritorno lo mas.
El peligro nunka durmiya en los kaminos
montanyozos de Ege  dominados por los
hombres ke refuziyan de kombatir por el sultan
i metiyan mano ensimo de las trezoros  de
los merkaderes. Eran djente dura i sin piedad.


- Nisim efendi avre la puerta !
- EStas segura mi alma ?
- Avre avre....Presto !
Klara i Bohor efendi entran en la kamareta de
Almendra ke ya saviyan ke estava en la guerta.
Karamela no estava durmiyendo i kuando los
paryentes de Almendra entraron, salto de la
kama ande estava asperando a Almendra para
durmir i vino a los piyezes de Klara para
ke la tome en sus brasos i la karese.
Klara se aboko i la tomo.
- Ven agora Nisim efendi !
- Ande mos vamos mi alma ?
- Ven te digo ! PResto !  Mo la vamos a yevar
este gato de aki !
- Es pekado ! Mira komo te mira ! Ande se va ir
negra d'eya ! Almendra se va azer hazina si le
manko su gato presyozo.  Klara por mundo tuyo
no seyas loka !
- Esta gato no va mas kedar kon eya !
Le esta ambezando kozas negras i ademas no tiyene
lugar ande Graziella i ke va ser kuando se va
kazar kon Samuel efendi ?  Tu no saves ansina de
kozas.
- Kennnnnnnnnn ?  Ke me dizes Klara ?
Kuando se esta kazando mi ija ?  Kon Samuel ?
- Te va kontar dospues....agora ven mo la
yevaremos en un lugar leshos...Es muy ermozo
gato.  La vana tomar otros.  Se ve ke es gato
de kaza, fina la demanyana va tener otros ke
se okupen de eya !  Presto solo !
Klara i Bohor efendi se visten en prestor i
salen por la puerta d'entrada dospues de
asegurarsen ke Almendra estava en la guerta.
- Ande mos vamos agora ?
- Lo mas leshos posible ! Ay un ayriziko maraviyozo
i el lunar mos aklara todo komo el diya.  Muy
ermoza nochada Nisim efendi, es bueno de kaminar
un poko ansina.  No ?
- Ya me la pasava yo d este paseo ! 
No me esta kuadrando nada ! No me esta plazyendo
este echo !  Avla agora ke es este kazamiyento !
- AVlimos kon Graziella i me demando la mano de
Almendra.  Dayinda no estamos prontas para avlar
kon muestros maridos.
- Si ?  I ke avlatesh mas ?
- No keremos dizirlo a dingunos para no tener ojo
malo i ke todo se termine komo manda el Di-o. Les
vamos azer una boda de reyes i no ay mijor partido
para muestra ija en Smyrna i ni en otro lugar.
- Kuanto keren de dota ? TE lo disho ?
- No avlimos de esto. Dishimos ke ivamos avlar a
muestros maridos para ke se enkuentren i ke ayga
negosyos formales kon todo djusto.  Almendra lo
tiyene todo pronto.  Unos kuantos fostanes mas
si keres...No kreyo ke los Abenyakar vana tener
demandas para ashuares, dota alta, terenos i
palasyos ! Son muy rikos !
- Yo no so ani ! Yo tengo una ija i la kazo kon
kavod ! I fostan le ago i sapatos le do !
- Si Bohor efendi.
- Ke echo aze este Samuel efendi ?
- Va lavorar kon ti o kon su padre !
- Yo no kero !  Mis ijos me bastan a mi ! Tengo
sinko, ke mos bivan,  i no tengo menester de otro !
- Alora lo toma su padre allado...Le manka echo a
Samuel efendi ?  I si no lavora deltodo le basta
i le sovra para sus bis-inyetos !
- Esto no se ! No me importa a mi ! Almendra save ?
- Si se lo dishe.
- Lo kere ? Ke te arespondyo ?
- Nada.  Saves es kayadika tu ijika... No se estava
asperando a un espozoryo dayinda...Es muy innosente !
- Kuando vana vinir a demandarla ?
- Dayinda no eskapimos kon Graziella.  Antes ke las
madres i las tiyas eskapen saves ke los maridos no
deven de metersen !  No te apures para esto. 
Apronta todo lo de Mordo efendi...Ke te page kon
bueyno i ke se vayga....Dospues Elohim Gadol !
Azeme konfiyensya Bohor efendi.  MI ija me es muy
presyoza i no azere nada ke no mos konvenga a todos.
- Lo espero bien mujer ! Ande mos estas yevando agora ?
Klara en un braso el sesto ande estava Karmela el
otro debasho del braso de su marido se aserko de
el i le dyo un beso, kon una soriza ke siempre lo
kitava loko por eya.

(a kontinuar - sharope)

- Copyright © sefarad.org - 1997 - 2017

Retour au site sefarad.org -