Accueil - sefarad.org

Almendra...parte 12

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

ALMENDRA
 
Parte  12
 

Pensando al largo kamino de la buelta a
Konstantiniye i,  mas de esto,  al kuanto duro
le vendriya de no ver los ojos riendo de su
kerida, Mordo penso ke teniya de azer un paso !
Kaliya ke le dishera a Almendra todo lo ke teniya
en su korason i asperar ke eya mizma le diga ke
amava a un otro i ke no se puediya kazar kon el.
Le iva ser mas fasil de akseptar este aleshamiento
si seriya rechesado. A lo manko iva tener su
konsiensya limpya, savyendo ke el aviya echo todo
lo ke era posivle de azer para lograrla !
Si, teniya ke de avlarle i agora mizmo porke no
saviya si puedriyan tener otra vez la oportunitad.

Se vistyo i salyo de su kamareta por chaftar a la
puerta de la kamareta de Almendra, frente la suya.
Chafto....No aviya dingun bruido...  Chafto otra
vez i otra vez...Un silensyo total le arespondiya !
Yamo a Karamela.....El mizmo silensyo...Avriyo
la puerta !  No estavan ni Almendra, ni Karamela !
No puediya kreyerlo !  Penso ke abasharon a la
kuzina por tomar una koza.  Karamela por seguro
ke aviya salido detras de su Almendrika !
Abasho avagar avagar las eskaleras sin azer bruido
i espertar los ermanos i los paryentes de Almendra.
Vido ke la puerta de salida a la guerta estava a
medya avyerta....El lunar estava aklarando kada
kanton de esta maraviyoza guerta i las aguas de la
estanka/pond/bassin/havuz/breha al lado del pozo
estavan briyando komo si miles de estreyas aviyan
kayido en su pecho ! Los nenufares en las aguas
komo azeyte de la estanka estavan pujando el efekto
majiko de este kanton de la guerta de los Benezras,
nombrada por ser una de las mas ermozas de Smyrna !

Almendra no estava en el banko ke siempre se asentava
al lado de su madre kuando brodavan endjuntos i
rizas lokas se sintiyan del doredor...Mordo abasho
los eskalones i se fue de la parte de los arvelos de
fruta.  Es aya ke la vido abrasada al arvole de
almendras sovre el kual le aviya kontado un diya una
historya inkreyivle de amor !  Almendra keriya bien a
este arvole ke se aviya plantado en la guerta el diya
de su nasimyento ! Diziya ke sus almas eran atadas i
si un diya uno de eyos deviya murir el otro no iva
pueder segir a bivir ! Mordo aviya sintido una yelor
en su espalda en akel moment i no aviya supo ke dizir !

Se kedo en su lugar sin mover para inchir sus ojos
de esta vista kuaji irreal de ermozura. Almendra estava
vistida de una kurta kamiza blanka muy fina i sin mangas.
Su puerpo se puediya ver komo la de una gazela fina i
de una grasya majika.  Sus kaveyos estavan kayendo
desatados, liberados de toda manera de artifisyos,
eskuryendo en grandes ondas fina abasho de su espalda.
Su kara estava apegada al arvole komo si le estava
kontando sekretos a su oreja i de sus brasos a su doredor
lo estava deteniyendo serka a eya en karesandolo kon
dulsor. 

Mordo teniya lagrimas en sus ojos....Nunka le aviya
afitado esto antes.  No se akodriya kuando por la
dalkavo ves aviya tenido sus ojos mojados de emosyon
o de tristesa....Ni saviya la razon de estas lagrimas
kayendo en sus karas,i la savor salada en su boka
no le era konosido del todo !  Kito una rida de su
aldikera i se akodro ke esta rida se la aviya echo
regalo una vizina, o mas djusto, la ija bohora
de una vizina de su madre en Bursa.  Saviya ke le
plaziya i ke teniya sentimientos para el ma el le
aviya dicho a sus paryentes ke no teniya dayinda la
entisyon de kazarse i ke mizmo si esta senyorita les
konveniya, el teniya otros pensamientos para su futuro.

- Almendra !.... Senyorita Almendra....

Almendra rekonosyendo la boz de Mordo se
kruzo los brasos ensima de su pecho i empeso
a bushkarlo de sus miradas.

- Esto aki Almendra serka de ti
- Di-o mio Mordo efendi...Ke estash azyendo
aki a estas horas...Estan todos durmyendo
en kaza i pensi ke estavash durmyendo tambien !
No esto vistida i....
- No importa del todo. Vide tu ermozura kuando
le estavas kontando tus sekretos a tu arvole..
Me seli Almendra de tu karinyo...De tus brasos
ke lo abrasavan i lo karesavan komo si fuera
una persona, un hombre serka de ti...Nunka
tuve sentimyentos asemejantes en mi vida...
Kije ser este arvole ...Sintir tu amor....
Saver ke me keres komo te kero yo ati ! Te kero
bien komo dingunos no pueden kerer bien ! De
la fuersa de la rokas de las montanyas, de la
puresa i de la freskor de las aguas de las fuentes
i kon los fuegos ke keman todo mi ser kuando no
te veygo.... No puedo ser sin ti...No puediya mas
kayarme !.... Di-o Santo i Bendicho...Fuyes tus
miradas ! Me odyas Almendra ? Dizemelo para ke
sepa ke me sos defendida..Ke nunka puedre
alkansarte.. Avlame i dime ke me kaye, ke no keres
mas oyirme !
- No
- No ke ? Dime lo ke es en ti..Diyas ke te veyo
triste i kayada..Asemeja a la disparisyon de tu
alma en tu ermoza kara...Dime lo mas malo ke seya
sera mijor de tu kayades, de tus miradas ke me
fuyen, de tu espanto kuando me enkuentras i te
salvas...Almendra, no puedramos mas avlarmos.
Tengo ke boltar a Konstantiniye i no se si te
vo ver otra vez...Arrebivame o matame...
- TE amo...
- Ke me dizes !  Almendra me keres matar !
Di-o Todo Poderozo ! Ansina tan simple es el
soplo de la vida ? Un biervo i el korason
muryendose empesa a batir, se kayintan los
kaminos de la sangre,  Me mareyo !
- Te amo komo tu me amas....
- Dimelo mas no kreyo mis orejas ! Mi Almendra !
- Si te amo del momento ke vide tus ojos ma no
so libre dayinda..So prometida a
- Kayate ! Sos miya ! Dingunos te pueden arankar
a mi si me amas...No lo vo permitir. No konosko
fuersa ke se pueda meter entre tu i yo ! Esto
pronto a abatir las montanyas i sekar la mar
por ti ! Mi fuego azeriya siniza ken se aserka
de ti...Ven en mis brasos mi andjelo, te kero
tener kontra mi i sintir los batimyentos de tu
korason ! Kero sintir ke baten lo mizmo i sos
un pedaso de mi ! Aminyana demanyana gritare
al mundo entero ke Mordohay de Toledo es el
hombre el mas riko de la tierra, ke no egziste
mas fortunado de el en todo el Emperyo este
i en la dulse Sefarad....Ni en Kastilya ni
en Aragon ni en Granada i ni en las tierras
de la Katalunya ! Ni en Toledo i ni en Kalatayud !
Mi amor mi amor, mi dulse Almendra...
Lo areglaremos todo amanyana a la demanyana !
Boltare loko de alegriya a Konstantiniye i
de presto tornare kon mis padres, muestra djente
i muestras tentas blankas i lavoradas, la muestra
kon ilos de oro i entera brodada por las mansevas
de Toledo en Bursa porke se fiestara aki, en tus
tierras i kon todos los tuyos muestra boda a
lakuala todos los djudyos de Izmir seran envitados.
Las mandolinas no kedaran de tanyar i los tambures
se oyeran de todas las kalejas de la sivdad !
A mi reyna le regalare su barko kon 40 ramas
de  kada parte i 6 velas kon las armas del AMOR !

A  Por Almendra  i MOR  por Mordohay  i muestro
AMOR  para los dos, unidos para siempre !

Un largo bezo dospues de estos biervos de Mordo
loko de passion i de alegriya los yevo leshos
ande dingunos los puediyan alkansar.....
Se kedaron en los brasos el' uno  del' otro
horas enteras, lo mas kayados o dizyendosen
sus nombres i biervos d' amor, Mordo karesando
los kaveyos de seda de su amada, Almendra, los
ojos serrados, no kreyendo a lo ke le estava
afitando i, kada vez ke teniya dudas, modriyendose
sus mushos, miles de vezes abrasados por Mordo.


Era una noche enkantadora para los dos
i tan estranya para Klara i Bohor efendi kaminando
de noche por las kayes polveyadas de Smyrna !
Klara riendo al braso de su marido, en el otro
el sesto ande estava Karamela i Bohor efendi,
la kara muy seryoza, no savyendo ke mas pensar
de lo ke le estava afitando kon su lokita de
mujer !  Sera vedra ke Klara lo aviya fuyido ?
Ande estavan indo ansina a medya noche kon el
gatiko presyado de Almendra i Klara ke no
estava entendyondo razon ! Kaliye ke le demandiera
konsejo a Mordo efendi a la demanyana ! El, por
seguro ke saveriya ke azer en ansina de kavzos !
Era de Konstantiniye i muy savyo.  En Tora, en
medisina i en los negosyos.  Teniya konfiensya
en el.  Le kaliya un yerno asemejante !  Ke
aviya de darla a Almendra a este Samuel efendi
ke no saviya ke es echo i provecho i no teniya
dingun saver seryozo !  Klara !  Ah Klara !

*

Estava kaji por amaneser kuando Almendra se
espartyo de su kerido Mordo Efendi para asuvir
en la punta de los pizes a su kamareta.  La puerta
del kuarto de sus paryentes estava serrada i penso
ke estavan en sus mas profundo esuenyo. Su korason
estava batyendo komo en sus oyidos !  Ni se estava
puediyendo kreyer a las dalkavos horas ke veniya
de pasar...  Ke emosyon !  Ke dulsura de horas..
MOrdo la keriya i la iva demandar de su padre...
Se ivan a ir a esta Konstantiniye de oro i de marbro,
la mas bella sivdad del mundo entero !

Serro la puerta de su kamareta sin azer bruido i
s'espandyo a su kama.  Sin kererlo sus manos empesaron
a bushkar en el aleskuro la blandor de los pelos komo
seda de Karamela.  No estava.  Penso ke en avriyendo
la puerta se aviya salido de la kamareta por abashar
a bever agua.  No penso mas i kon una ermoza soriza
serro los ojos para sonyar de su amado.  Su kamiza
delgada teniya dayinda la golor de los vistidos de
MOrdo ke l'aviya aprezado horas en sus brasos,
bezandola, karesandola en dizyondole ke karar de
horozos ivan estar enjuntos.

El sol aviya amanesido de muncho tiempo kuando
avriyo si ojos. El diya estava otra vez kayinte komo
un orno mismo en las horas de la demanyana.  Se akodro
de la noche ke aviya pasado kon Mordo en la guerta,
mirando el lunar i sintyendo el profundo silensyo ke
los estava envelopando.  Se aviyan dicho kozas lokas,
aviyan aprometido miliun bavajada ke ni se akodrava !

-  Karamela !  Ande se fuyo este gato ? !  Karmiiiiii,
Karmiiiiiiiii  !

Almendra se vistyo presto i abasho las eskaleras komo
arezvalandose ensima de una nuvla.  Su madre estava
en el salon gostando las burekas ke aviyan salido
freskos del orno.

-  Buenas dias Senyora mi madre.

-  Buenas...Buenas....Komostas mi keridika ?  Puedites
durmir kon esta kalor ?

-  Kedi bastante tiempo en la guerta i durmi muy tadre. 
Madre, vitesh mi gato Karamela ? No esta.  Kuryozo !

-  No lo vide mi kerida ! Nada mas ke un gato !
Ke te preokupa tanto !

-  Es mi gato ke amo mi madre... No lo veyash demasyado..

-  Esta bien....esta bien...Ven kome borekitas, estan
muy savrozas Almendra.

-  La topare i tornare en unos minutos ! Estariya en la
guerta.

-  No se ke te pasa kon este gato !  Va vinir !

-  Mi padre i mis ermanos se fueron al echo ?

-  Por seguro.  Ya esta kaji medyo diya.  Durmites tadre.

Almendra salyo a la guerta, bushko su gato aya, en la
entrada de la kaza, en todos los burakos  !  Karamela
no estava en dingun lugar.  Las lagrimas le estavan
kayendo, ande puediya estar este gato ?  Se asuvyo otra
ves arriva, bushko en su kamareta, en todas las kamaretas,
ande sus ermanos i sus paryentes.  Nada !  Karamela no
estava en kaza.  Entro en el kuarto de Mordo.  Aviya salido
d'emprano al pareser.  La golor de la kamareta asemejava
a la golor ke le aviya tan plazido una noche antes, kuando
su kara estava tan serka de la suya i  la nariz kaji
enterrada en su kamiza.  Soriyo, sin kererlo sus manos
karesaron la grande kama de musafir ande s'echava su bien
amado.  Le plazyo de ver ke Mordo era un hombre ke metiya
todo a su lugar, no le plaziya embarasos i era limpyo.

(a kontinuar kon sharope)

 

- Copyright © sefarad.org - 1997 - 2017

Retour au site sefarad.org -