Accueil - sefarad.org

Almendra...parte 16

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte   16
 

Se viya ke Bohor Efendi estava kansado ma la kara
la teniya riyendo kuando entro a su kaza.

-  Klarika, ya vino tiempo ke enkomende unas
karruchas.  Parese ke me ize viejo, me se estan
fuyendo las fuersas...

-  De maraviyar komo no pensates a esto fina oy ! 
Muncho mas repozado  va ser para ko vos vaygash i ke
vinish !

-  Mos asentamos a komer ke estamos muy ambiertos tus
ijos i yo !

-  Asentavos, yo esto troyendo las salatas i la
komida.  Almendra, vienes kon mi i me ayudas ?

-  Si mi madre, agora mizmo !


*

Eliyezer i Gabriel yegaron al Han diskutyendo
kalorozamente sovre los detalyos de komo ivan a
lavorar el diya dospues  i felisitandosen de lo
ke aviyan logrado en un diya !  Estavan kansados
ma sus plazeres se puediyan meldar de sus karas !

Kuando entraron aryento, a la sala freska i no
tanto aklarada, kijeyeron tomar una supa kada uno
antes de asuvir a sus kamaretas.  Kon esta kalor
no es ke teniyan tanto ambre ma pensaron ke
puediyan ambrearsen muncho mas tadre avansando
en la noche.  Es a este momento ke vieron MOrdo
en una meza en un kanton, arrimado a la pared,
los ojos serrados i los pies ensima del banko
ensima del kual estava asentado.  Paresiya
durmiendo.  Se aserkaron de el :

-  Mordo, ijo durmes ?

-  Eliyezer ?  Saviya ke tornariyas.  No me sinti
bien... La kalor, la kanserya i todo esto ke tengo
en mi kavesa parese...Ademas no durmi ayer la noche....
 
-  Estas mijor agora ?  Keres arepozarte en mi
kamareta ?  Mos estamos kedando aki fina ke mos
vamos a meter en kamino !

-  Muy bien... No !  Vo tornar a kaza, me
asperan i no kijyera desharlos en kudyado.
Ke izites  ?

-  Te prezento Gabriel, mi moso i mi hombre de
konfiensa.  Era el ke se okupava de los kavayos
de los klientes de este Han.  Agora lavora por mi.

-  Si me akodro de el..

-  Tenemos 17 pewrsonas todos sanos, fuertes i
maestros de armas.  Aminyana mos van a trayer los
kavayos i los gameyos, los mijores de esta rejyon.
Dospues kontinuaremos muestro echo por topar el
resto de los hombres i merkar lo ke vamos a
nesesitar en kamino.  Penso ke el treser diya,
a la demanyana, seremos prontos para salir de
Smyrna kon el ayudo del Di-o.

-  Ekselente Abba Eliezer, bien pensado i bien echo.
Me gusta ke estas avriyendo los anyudos uno por uno.
Sano i bendicho ke estes.... TE vere amanyana a la
tadre aki mizmo. Vos desho agora ...

Blanka de nieves lo estava asperando dospues ke
aviya komido, bevido aguas freskas ke le aviya
trayido el muevo moso del HAn, en las solombras de
la guerta.  Relincho/neighing/kisnemek/hennir
kuando lo vido a Mordo, meneyando su ermoza kavesa
i su novle kola !


*


Esta mizma noche en el kuarto de echar de los
Benezras las kozas no estavan simples del todo
entre marido i mujer.

-  No !  Te digo no Mordo efendi !  Yo biva no
vo embiyar a mi ija a la kapital kon uno ke no
konosko i no puedo saver lo ke le va afitar aya !
De dinguna manera te digo.  No es no !

-  Tu ija lo kere bien me entyendes mujer ? ]
Lo kere a el i no a este pipino sin gueso de
Samuel efendi !  Mi ija save lo ke kere i no es
kreatura !  Ya tiene dizimueve anyos... A su
edad teniyas 2 bebes en tus brasos ! 

-  Si ma estava kon los miyos !  No me echaron
a las sivdades de perdisyon !  ERas mi novyo de
muestra chikes ! Eramos vizinos i muestras
madres eran konosidas de Calatayud en Sefarad
la dulse... Eres bueno, haham, laborioso, buen
judyo ... todo !

-  I Mordo ?  Ke le ves de negro a Mordo he ?
No es bueno bendicho ?  No me pago fina el
sentado d'alkavo i kon su demaziya ?  Es feyo ?
Es prove ?  Es goy hasve halila ?  No save Ley
i tradisyon ?  No es, el mizmo, de Toledo, esta
grande sivdad de los savyos ?  El Di-o ke le de
todo bueno ke lo merese.... No es un hombre de honor
i de palavra justa ?  Dime.....

-  No se...No kero saver...Almendra no es por el.
Ke vaya ke seya el ijo del Rey !  Mi prinsipesa
se va espozar kon Samuel efendi, el ijo de Graziela
Habenyakar i dingun otro ! 

-  I yo te digo, mujer, ke mi ija, Almendra de
su nombre, i Benezra de mi nombre, la di al hombre
Mordo de Toledo, kon honor i el kavod de mis
padres i los padres de sus padres ! Este pipino
sin gueso no la va tokar i de mi al Di-o ago
siniza todo lo ke fragui fina agora si te metes
en mi kamino... Dicho i echo !

-  Guay de mi !  Guay de mi sangre......
Me muryera mijor !  Me desharas ambierta mijor !
Me aharvaras i no me dizyeras todo esto !

-  Ke te ize ?  Siempre no fuites mi flor bien
amada, la reyna de mi kaza ? No me kedi kayado
delantre de todas tus echos i desizyones ? Te
kije bien, te respekti, te di todo lo ke dezeyavas
kon su demaziya i nunka manko !  I tu ?  Vienes
kon furya kontra de mi malgrado ke saves ke tengo
razon i ke no ay de espartir estos mansevos ke
se keren pormodo de tener tu ija a tu lado !
Va ser de su marido !.... Entyende Klarika...
Kuando una ija se kaza apartenese a la kaza de
su espozo i no a la de su padre !  No seyas
kreatura mi reyna.... Saves ke no azeriya nada
nunka si no era por el bien de Almendra ke es mi
ojo preto, mi luz i mi bueno. 

-  No me la embiyes leshos... Te rogo no me la
des a Konstantiniye, esta sivdad ajena, yelada
i sin fe....

-  La di a Mordo de Toledo ke la va honorar i
protejar kon su sangre si es de menester !
Kalmate mi amor, mi vida....Konosko tu dolor
i tus espantos ma ten fe en mi...Sus destinos
se kruzaron i no es a mozotros de espartirlos !


-  Nisim efendi, ayuda me.... No lo suporto...

-  VA pasar mi sol, estare a tu lado kon muestros
ijos...  Te vas a uzar a esta ideya savyendo ke
muestra Almendra esta horoza, kontente i reyna
en la kapital, ande merese ser allado de su amado !

*

Klara estava abatida, su fuersas le mankavan. No
saviya komo reaksyonar. Keriya gritar, yorar, riyir
en mizmo tiempo. Se asento ensima de la kama, blanka,
los ojos sekos, mirando enfrente de eya a
un punto fikso sin meneyarse del todo ! Nisim
efendi se fue a su lado i karesandole los kaveyos
le avlo fina la ameneser....Le konto sus chikes,
komo se aviyan enamorado eyos mizmos, komo les
aviya nasido sus sinko ijos i Almendra, kon ke
karinyo los aviyan engrandesidos todos, ke esperavan
de la vida, ke importante eran el uno por el otro...
La tomo en sus brasos i le disho kuanto la amava
dayinda malgrado los anyos pasados enjuntos i lo
importante ke le era la felisitad de kada uno de
las kreaturas ke teniyan.... Aprometyendo de yevarla
a su ija kon barkos repozados ke viajavan fina
Konstantiniye dospues de azer eskala en Smyrna.
Klara saviya ke Bohor efendi no le iva dizir kozas
asemejantes si no lo teniya en tino.

- Mi alma, te lo aprometo ke bastara ke me digas
"M'eskarinyo de mi ija, yevame a eya..." i yo
vo prokurar un barko para ke seyas kon tu ija lo
mas presto posivle.

- Bohor efendi.... Oyes ? Ay un bruido afuera !

- No oyi ! Ke manera de bruido Klarika ?

- Ay alguno afuera !

- Es puedeser Mordo ke vino. Penso ke estariya
muy okupado para aparejar la karavana a Konstantiniye

- Guay guay Bohor efendi.... Se la va yevar a mi
Almendra agora ?

- No mi alma ! Komo agora ?! Tenemos de azer fiestas
i bodas de reyes antes ! Todo komo se deve kon honor
komo manda el Di-o i ke din i dat de Moshe i de la Kasa
de Israel, lo mismo de las tradisyones de Calatayud.
Aparejate a arresivir su mishpaha ke tienen de vinir
de Bursa a Smyrna para kerer muestra ija. Los de
Toledo no son manko de mozotros i vana kerer todo
lo mijor i nada manka de esto !

- Komo saves ke Almendra dezeya irse kon este
yerno ke mos kayo de tan leshos ? Te lo disho a ti ?
Puedeser ke lo kere a Samuel efendi ?

- Klarika, no te enganyes de ti para ti ! Almendra
es mi ija. Konosko kada batimyento de su korason !
No tiene de menester de avlarme...La vedra es ke
tu lo saves tambien.... Lo arronjas de tu miente
porke preferiyas ke se kazara kon el ijo de tu amiga
Graziela, porke los Abenyakar eran vuestros vizinos
keridos en Calatayud i una famiya por seguro dinya
de la muestra... Los de Toledo no son manko de
eyos mi reyna, kon la diferensya ke Mordo vale
mil vezes este pipino sin gueso de Samuel efendi ke
no tiene ganado un sentado fina agora ! Todo lo
ke save es es kaminar su alta persona por las
kayes de Smyrna, kada diya kon un otro kavayo i
kon un otro shalvar ! Yo no tengo ni ija ni oveja
de darle ! Mi yerno deve de tener responsabilitad,
ser vayente i de sangre buena. Mordo merese
muestra prensipesa.

- Ke le vo dizir yo agora a Graziela ?

- Ke yo Nisim Bohor Benezra preferi dar mi ija
a Mordo de Toledo porke lo konosko i penso ke mi
ija sera mas horoza kon el.

- Nisim efendi, ay alguno ensima del arvole !
Mos esta mirando !

- Klarika mi alma...Ke me dizes ? No ay dingunos...

- Te digo ay alguno. Mira ver..Toma tu kuchiyo !

- .........

Unos puntos dospues Nisim efendi entra a la kamareta
kon Karamela, entera suzya i arrazgada en sus patas                     en sangre.....

- Klarika, ven kudyaremos muestro gatiko ke esta
para murir... Guay guay... Mos vino atras malgrado
ke la abandonimos tan leshos... Povretika ke no save
dingun lugar mas ke la kamika de Almendra i muestra
guerta !

- Karamela ! Almendra sera tan kontente ! Damela
Bohor efendi.. La vo alimpyar i vo kurar sus patas
firyidas...Dezmazalado de mi gatiko...Ven pisika,
ven a Klara...Perdoname... Nunka mas te vo deshar.

                                                            
*

Almendra en su kamareta se estava demando
kualo aviya afitado kon Mordo i su padre...
Mordo le aviya dicho una tadre antes ke iva ir
ande su padre i demandarle su mano i dayinda
no aviya tornado a kaza.  Su padre i sus ermanos
aviyan vinido solos i la komida de la noche
(la sena)  se aviya terminado kuaji sin avlar.
Ni un biervo sovre Mordo o su vijita al lugar
de su lavoro. 

Es posivle ke le aviya paresido solo la kara
kontente de su padre esta noche ?

Konosiya bien su padre kerido.m Kuando teniya una
koza en tino se kayava lo mas del tiempo i
saviya ke no diriya nada antes de avlar kon su
madre en sus kuartos.  Komo su madre iva akseptar
de desharla ir... ?  Komo se iva ezvachar de
darla a Samuel efendi ?  Teniya dolor de kavesa...

Es kuando todos los bruidos dezaparesyeron i la
luna estava en lo mas alto ke oyo ke la puerta
del kuarto de Mordo se avriyo i se serro.
Estava muerta por verlo i oyir de su boka
lo ke se aviyan avlado kon su padre.  Saviya
ke no era justo ir a su kuarto i se bolto en
su kama por tratar de durmir malgrado ke
saviya ke esto no seriya posivle.  Sintiya en
su pecho el amor ke la estava kemando komo
un fuego !

*

Mordo, dospues ke aviya deshado Eliyezer i
Gabriel en el Han, se aviya dirijado al konak
de Kasim Efendi, ungrande i riko senyor
turko kon ken aziya echos.  Aviya deshado
en el muy grande konak de su amigo kuatro de
sus hombres ke lo akompanyavan en todos los
lugares ke se iva. Eran su guarda personal
i nunka se espartivan de el kuando saliyan
a kaminos largos o MOrdo los nesesitava.
Eran los mijores maniadores de armas ke aviya
konosido i les aziya konfiensya los ojos
serrados.

Aviyan senado kon Kasim efendi enjuntos.
Esklavas pretas los estavan servyendo.  Las
komidas, unas mas pezgadas de las otras, no
estavan del todo al gusto de Mordo auzado a
las komidas judiyas simples ma savrozas.  De
la otra parte saviya ke refuzar de komer en
la meza del Bey no seriya visto de un buen ojo !
Kasim efendi lo puediya tomar ke una ofensa a
su jenerozitad, lo ke ekivaliya a azerle entender
ke no eran amigos mas !  Izo todo su posivle
para englutir las komidas echas kon verduras
i no gostar del todo a las komides de karne
porke estas  no eran kasher !  Kasim efendi
vido su kara palida i le demando si estava
hazino o no sintyendose bien.

-  Es la kalor Kasim efendi.  No tengo nada
solo un poko kansado i esto preokupado porke
mi karavana, verdad a este momento, no esta
pronta para salir en kamino.

-  Ke te manka ? Deshame ayudarte si tienes de
menester de alguna koza....

-  Grasyas Kasim efendi ! MOs estamos organizando
los aparejos avansan bien.  Amanyana vamos a
aresivir los kavayos i los gameyos.  Darles a
arrepozar un diya.  Entremientes mis hombres van
a arrekojer unos kuantos otros guerrieros por
el kamino.  El diya siguente, si kere el Di-o,
kargaremos i saleremos de la sivdad.

-  Mordohay de Toledo !  Siempre te admiri por el
hombre ke sos.  Nunka puediya imajinarme ke de
estos judyos ke arresivimos porke no eran
keridos en sus payis leshos, saleriya un
hombre kapache i vayente, savyo i grande
merkader komo lo sos !  Ademas avlas muestra
lingua komo tu propria lingua kuando los otros
no lo pueden, lo mas !  Ven te azeremos turko i
olvidate ke fuites uno de estos.....
Te dare mi ija i azete mi yerno presyozo. 
Te alavare a mi primo el Sultan, ke Allah le
alarge su vida, i ke siete sivdades tremblen
delantre de tu nombre !  Lo mereses !

-  Kasim efendi ! Tu jenerozitad i tu buendad
no tienen limitos i sos alavado mismo en
Konstantiniye... Bendicho seyas !  Esto seguro
ke tu kerida ija, Gulbeyaz hatun, la ermozura
de la kuala es alavada en los kantos de los
kantadores del puevlo, se va kazar kon un grande
Bey kon fama en siete sivdades.  Yo so judyo
en mi sangre i en mi alma.  Los miyos vinyeron
en tu payis por no akseptar de inyegar muestra
Ley, la Tora ke Di-o mos mando kon Moshe muestro
profeto.  Komo puedo trokar ?  Nunka lo azere
mizmo si me toman mi vida....

-  Negras penseryos !  No estas en en el kamino
justo ! Ma.... Sos mi amigo !  Te kero bien..
Ke Allah te de savyedura.

Mordo avlo dospues de la sena kon sus hombres
i les disho ke se topen en el puerto, delantre
del HAn, a la demanyana, para ayudar i azer
lo ke les diriyan Eliyezer i Gabriel.  Los
kuatro hombres saviyan ke los diyas de repozo
aviyan terminado i ke horas duras los asperava
fina ke yegaran a Konstantiniye.


*


- Samuel !

- So yo mi madre.. Estash espierta ?

- Si ! Muerta de kudyado la noche entera. Ande estavas
ijo miyo presyado ?

- Sali !

- Kada noche sales i durmes de diya...

- Esta muy kayinte madre kerida.

- KE pensariya de ti tu novya ?!  Un novyo ke sale
kada noche i entra a l'amaneser... Durme diya entero
sin azer nada !

- Para kualo lavorar ? No tenemos bastante oro ?
Ademas el revinido de muestras tierras mos basta
i mos sovra.  No seya ke me yerro mi senyora madre ?

- No es de esto ke kero avlar yo ! Me preokupa ande
te vas !

- Salgo...

- Ande te vas ? Es esto ke te demando !

- hmmmm

- Ande ?

- Ande me trava la alma !  No es un lugar presizo

- Me mientes Samuel ! Tevieron en las guertas de los
Aboresi kon Meri !

- Si madre.  No kije dizirvolo antes. Es vedra...

- Ke tienes kon Meri Samuel ?  Sos el novyo de Almendra
i eya es su prima !

- Es Meri mi novya muy kerida i ay anyos ke le aprometi
ke me vo kazar kon eya.  Mos amamos.

- Komo  !!!!!!

- Es la vedra.  Perdoname madre. Muestros korasones
desidaron de otra manera.  No mos demandatesh ke
pensavamos de este kazamiento ! Ni a Almendra ni a mi !
Eya tambien ama un otro !

- Elokim she ba Shamayim !  Ke estash azyendo ?  No se
tiene visto ansina de skandalo en dinguna kaza judiya !
No en Calatayud i no en Smyrna ! Kale ke avle kon Klara.
Dezmazalada de klara el golpe ke va aresivir..Samuel ke
vamos azer agora kon tu boda ?

- Kero kazarme kon vuestra permision kon Meri Aboresi,
ke amo de siempre.

- Si Almendra ama a un otro no es mas dinya de muestra
famiya !  Ken se puediya imajinar ke la ija de Klara i
de tan buena famiya puediya komportarse komo una ija de
kayes !

- Madre !

- BEndicho el Sielo ke me lo dishites ! La tomava por
una ni toka ni peka !

- MAdre la sinyorita Almendra es innosente komo un
pashariko !  No tiene kulpa !  Su korason ama el sinyor
Mordohai de Toledo i me lo disho a mi kara Se van a kazar.
No es perdida komo lo dizish !

- No lo saviya su madre ?

- No todo fue en supito.  Almendra kuando me lo disho
ni saviya ke MOrdo efendi la amava.  Es yo ke lo entendi
en entrando mano kon mano en la kamareta d'asentar de
los Benezras kuando mos fuimos ande eyos, vozotros i yo.
Fue mi plano para entender sus sentimyentos.

- I deke no me lo dishites akel diya mizmo i me deshates
kontinuar kon este jugo de espozoryo ?

- Porke la sinyora Klara i vozotros no estavash del todo
dispuestas a oyirmos Madre ! Porke no estavash prontas a
akseptar dingun argumento a este sujeto ! Teniyamos
muestras manos i muestras bokas enkadenadas !

- Klara lo save ?

- Meri viene de kontarme esta noche ke Mordo efendi
deviya demandar la mano de Almendra de su padre oy mizmo
i penso ke Nisim efendi le konto todo a su mujer esta
noche pasada.

- I yo m'entrego de lo ke se pasa detras de mi espalda
la dalkavo !  VAte a tus kuartos agora Samuel...
Durmeremos... Aminyana, kero dizir kuando mos vamos a
espertar va ser un muevo diya i rogo para ke el Di-o
mos mostre el kamino derecho a segir... No kero mas
pensar.. Nesesito durmir i kalmarme...

- Suenyos kon los anjelos mi madre kerida...Sosh muy
presyoza i amada por vuestro ijo... No lo olvidesh..
Vos kiero bien mas de todo en este mundo i no ize nada
kon la intensyon de darvos pena.

- Suenyos kon los anjelos para ti tambien Samuel.
Avlaremos despues...


(a kontinuar kon Sharope)

 

- Copyright © sefarad.org - 1997 - 2017

Retour au site sefarad.org -