Accueil - sefarad.org

Almendra...parte 17

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte   17
 
ESta misma noche Karamela, sin fuersas del todo
durmyendo la boka avyerta ensima de su kavesal,
embasho, en la kamareta de Klara i de Bohor
efendi, estava viendo suenyos dezgrasyados de
perros ke korriyan detras de eya... Estava
 sintyendo la dolor de sus patas arazgadas i esta
sed ke le estava sekando el garon...  Karamela
estava saltando en  su esuenyo muy profundo.....


*

Eliyezer i Gabriel s'espertaron a l'amaneser. 
 Saviyan ke deviyan toparsen detras de la iglesya en
el grande kampo ande deviyan yegar los kavayos i los
gameyos ke les aviyan aprometido.  Se vistyeron i
abasharon para bever un chay/te kaynte kon pan fresko
 miel i kaymak/ krema de leche.  Esperavan pueder pasar
el diya fina la tadre kon esto i un poko de fruta ke
ivan a toper en el kamino.  La mujer mostrozo ke
serviya los klientes no aviya vinido dayinda.  Se
 asentaron allado de una meza i se metyeron a asperarla
para empesar el largo diya de akel Mierkoles.  La
sivdad estava durmyendo a estas horas i a parte de unos
kuantos perros ambiertos en las kayes no se enkontrava
 alma biva.

Estavan dezayunando kuando los kuatros hombres de Mordo
yegaron al Han.  Dospues de azer konosensya i diskutir
sovre lo oke teniyan de azer akel diya salyeron del Han
para ver si los kavayos aviyan yegado.  La kayntor se
 estava azyendo sintir mismo a estas horas de la
demanyanada.

*

Almendra se espierto kon las yamadas flakas, los
"miaou miaou" de Karamela a los kualos era tan auzada. 
Se alevanto pishin para avrirle la puerta de su kuarto.
 Estava aya mirandola kon sus ojikos tristes i kansados.
La tomo en sus brasos i medyo riendo medyo yorando,
yamandola  " Karmi, karami miya, karamela miya "  la
yevo a su kama.

Su madre abasho estava aparejando el dezayuno kon Zeliha.
 Una golor savroza estava inchendo la entrada fina ande
los hombres estavan asentados al doredor de la vieja
meza familyal echa antes muncho tiempo kon los arvoles
mizmo de la grande guerta del konak de los Benezra.
 
Almendra teniya sus kaveyos arekojidos alto en su kavesa.
Mordo allado de su padre no estava puediyendo fuyir sus
ojos de su ermozura natural i su puerpo fino i grasyozo.
La aviya mirado kon una soriza kaynte ke diziya todo
 kuando aviya entrado en la sala de komer.

-  Mi ija, kero ke me digas esta demanyana, allado de
tu senyora madre i tus keridos ermanos si seras horoza
kon Mordohay de Toledo ke te kere yevar a Konstantiniye
 komo su espoza, a ser la madre de vuestros ijos....
Avla mi presyada, sin espanto, i dizeme lo ke dezea tu
korason porke nunka vo kavzar ke seyas mjalhoroza i te
veygas en embaraso pormodo de mozotros.

-  Pensa mi roza blanka, i respondemos solo si lo keres
 a Mordo efendi ke mos demando tu mano i disho a tu
padre ke esta seguro ke te va azer horoza mas de todos ;
ma pensa ke vas a bivir en una grande sivdad, ajena i
friya, sin dingunos mas ke tu marido a ken vas a abokar
 tu kavesa toda tu vida, seras su kompanyera, lo vas a
servir kon amor i obediyensya.

-  El Di-o vos bendigami padre i mi madre keridos ke
respekto sovre todo.  Vo akseptar todo lo ke avlash por
mi.

 -  Almendra,lo keres este novyo mi ijika ? Te dare a el ?

-  Mordohay de Toledo me honoro en demandando mi mano.
Le so rekonosiente mi padre.

-  Lo keres ?

-  Puedes espartirte de mozotros mi flor i ir kon el ?
 
-  Vo azer lo ke es mi dover.  Si Di-o mos amostro este
kamino ansina va ser.

-  Lo keres ?

Almendra estava tremblando entera.  Saviya ke no le
gustariya a su madre ke se vayga tan leshos ma no se
 puediya tambien kazar kon el namorado de Meri, su prima !
Ademos lo amava tanto... Tanto a Mordo !

-  Me duele desharvos i partir ma si es mi destino de
espartirme de mi famiya por ir detras de mi espozo, no
 tendre remedyo porke es mi dezeo tambien de kazarme kon
el.

-  Esto es !  Es tuya Mordo !  Mazal tov ! Empesaremos
las fiestas oy mizmo i kero ke todos se alegren kon
mozotros...

-  Mazal tov mi ijika !  Vo rogar para ke seygash muy
 horozos komo te senyor padre i yo. i ke enviejeskash
enjuntos, ke el Di-o vos de vidas largas i bendiga
vuestra union.

Mordo i Almendra bezaron las manos de Nisim efendi i
Klara i resivyeron sis bendisyones.  Mordo abraso en
 la frente su aprometida i muy muy avagar a su oreja
le murmuro

-  Mi amor, asperame....Te amo !

Almendra abraso todos sus ermanos i se asentaron a
dezayunar kon rizas i alegriyas.  Mordo les disho ke
 iva pasar por Bursa por avlar kon sus paryentes para
ke se aparejen a salir en kamino i vengan a Smyrna
para la boda...

Almendra no se estava mas puediyendo kontener.  Keriya
avlar kon Meri sovre todo !  Dizirle ke la mitad de
 sus ansyas se les aviya alivyanado i lo ke kedava
agora era konvenser la sinyora Graziella i su tiya
Julya para ke se kazen kon Samuel efendi...Meri seriya
loka de alegriya kuando iva oyir ke Almendra se iva
ir a Konstantiniye kon Mordo i eya tendra sus kaminos
 libros !

Bohor efendi le estava kontando a Mordo ke iva
enkomendar dos pares de karuchas porke keriya ir i
vinir al echo de manera mas komodo i ya aviya entrado
en edad..Avlaron de los kavayos de komo Mordo iva
 kargar todo lo ke aviya merkado i logrado para ser
vendidos kon altos presyos en Konstantiniye.  Dospues
del dezayuno se espartyeron para ir kada uno a sus
echos.  Mordo le tomo la mano de su aprometida i la
 yevo a su kara antes de bezarla dizyendo ke iva tornar
no muy tadre a la noche. Sus ojos estavan briyando ...
Almendra sintyo ke su korason estava saltando de su
lugar !
 
*

- Gabriel los ves ? Yegaron ! Ohhhh ! Tantos ?

- Kuantos le enkomendates Abba Eliyezer ?
La verdad es ke no le dishe kuantos ma ke tenemos
una grande karavan i serka de sinkuenta hombres.
Unos 10 o 15 gameyos mos abastaran kreygo.
 Tenemos menester de komanya, agua... Veremos...
Kijyera eskapar lo todo en dos diyas. Mos arepozaremos
el Shabat santo, ir al kal i todo i mos meteremos en
kamino al amaneser el diya de Alhad. Oy es Miyerkoles..
 Tienemos tiempo para todo si lavoramos komo se deve.

- Primero el Di-o ! Lo azeremos i saleremos de Smyrna
a la hora buena. Esto muy eksitado de este viaje
Abba Eliyezer.

- Va ser duro Gabriel..Tendremos ke pasar por
 montanyas altas i danjorozas, rios, kampos, puevlos
i sivdades, tendremos puedeser de batirmos kon
bandidos en los kaminos yennos de estos mallogrados.
Los soldados del Sultan no estan puedyendo alimpyarlos
todos i estos estan kontinuando a arrovar los karavanes
 i los viajadores.

- No tengo espanto ! Seramos muy bien defendidos kon
los hombres ke angajimos ayer i los ke angajaremos oy,
los hombres de Mordo i...

- Lo se ! Yegaremos sanos i rezyosd kon toda muestra
 karga a Konstantiniye. Ven veremos al Efendi ke mos
trusho estos manyifikos animales... Mira ermozura ke
estan Gabriel !

- Enkreyivle ! Deven kostar una fortuna ! Ke los va
azer al patron dospues ?

 - Los va vender o los va guadrar... No se !

- Estos pueden siempre valer una fortuna..Nunka vide
tantos i tan buenos kavayos en d'una !

- Tuvimos mazal !

- Viene el Efendi !

*


 - Ken es ?

- So yo tiya Julya ! Almendra.. Avre la puerta !

- Bienvinida ijika miya... Ande esta tu madre ?

- Va vinir i eya en poko.... Ande esta Meri ?

- Arriva... durmyendo ! Durme diya entero !
 
- La vo espertar !

- Dezayunates ? Ize burekas ! Estan kayintes..
Keres ke te trayga unas kuantas ?

- Vengo de komer kerida tiya ! Dospues puedeser...


- Meriiiiiiiiiiii.... Meri ! Espertate !
 
- Ke ?

- Espertate te digo ! Esto alegre !

- Almendra ?

- Si ! Alevantate !

Meri salto i se asento en un momento ensima de la kama.
Los ojos se le estavan avriyendo a penas ! Se lavo la
 kara kon el jarro i el resipiante ke teniya en su
kamareta, la miro a Almendra radiante esta demanyana !
Le estava soriyendo kon dulsor.

- Durmi muy tadre la noche... Estava amanesyendo...
Ekskuzame primika.
 
- Otra vez la noche entera kon Samuel efendi ?

- Si !

- Vos van a apanyar un diya !

- No. Estavamos en la guerta. Si uno se alevanta en
kaza lo vemos primero mozotros i Samuel se puede fuyir
 de la guerta afuera. Ansina estamos kada noche enjuntos.
Ma tenemos esuenyo el diya..Klaro !

Almendra estava riyendo riyendo....

- Meri ! Mi padre me aprometyo a Mordo efendi !

- Vedra ? Es por esto ke te esto viendo tan radyante ?
 
Almendra le konto todo lo ke se paso a Meri..

- Agora mos manka una koza para ser felises enteramente.
Pensas ke Samuel efendi va avlar kon sus paryentes ?

- Si. Estavamos asperando para ke tu situasyon se aklare
 en primero. Agora va ser posivle i kon el Nombre del Di-o
mos se va enderechar todo !

- Vash a vinir a kedarvos ande mozotros tambien. Mordo
efendi tiene un grande konak en Konstantiniye i munchos
amigos... Vo ser orgulyoza de prezentar mi prima-ermana i
 su espozo a sus amigos i sus konosidos.

- Si mi kerida Almendra... Por seguro ke Samuel efendi va
topar remedyos para ke mos vayamos a vervos. Dizen ke la
kapital es muy ermoza i muy rika.

 - Alevantate Meri.. Le vo dizir a mi tiya Julya ke keremos
ir a la mar.

- Oh ke keyf ! Dizes ke mos yevan oy al bodre de mar ?

- Deke no ? Mi madre va vinir tambien.


(a kontinuar kon Sharope)
 

- Copyright © sefarad.org - 1997 - 2017

Retour au site sefarad.org -