Accueil - sefarad.org

Almendra...parte 19

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte   19
 
 
 
Akeya tadre dospues de la beraha, todos pasaron a la
kamareta de asentar i Cemile les servyo los sherbetes.
Mordo i Bohor Efendi avlaron de los aparejos de la
karavan i de la boda ke kontavan azer en dies mezes
de tiempo.  Mordo kontava vinir mueve mezes despues
kon sus paryentes a Smyrna i tomar parte a los
aparejos de las fiestas el mez antes del grande diya.

Bohor efendi estava enkantado de su yerno ke saviya
tomar tantas responsabilitades, era una persona tan
savyo i tan poderozo, de una famiya tan noble de
Toledo i ke amava a su prensesika tanto !  "Ah Klarika,
otr'un poko me la ivas a dar a este pipino sin gueso !"
penso entre si, sin mostrarlo de afuera....

-  Esto kansado i me kero arrepozar ven Klarika !
Mozotros no tenemos sus edades.  Los mansevos se pueden
kedar i diskutir de sus planes i de sus avenir si lo
keren mas.

-  Yo me kedo un poko mas kon eyos Nisim efendi !

-  Mujer ven ! No te otorizo a entrar en la kamareta
dospues de mi ! Agora ! Leyes muevas en esta kaza ?
Ke es esto !

Klaro se alevanto de su siede sin kerer i echando una
mirada preta a su marido kamino detras de el...

Kuando se asuvyeron a sus kamaretas MOrdo no puido mas
kontenirse i empeso a riyir, mostrando sus foyos en
sus dos karas ke le dava un ayre de kreatura i ke
gustavan tanto i tanto a Almendra....Mordo paresiya
muy dulse i muy innosente kuando riyiva o soriyiva.

- Mi kerida, tu padre mos kijo deshar solos, savyendo
ke en muy kurto tiempo tuvre ke separarme de mi
ermoza por un tiempo bien largo..  Se lo so rekonosido.
Ven mi kerida abasharemos a la guerta i te kontare otra
vez komo te kero bien i ke presyoza ke sos por mi....
I tomandola por la mano abasharon los unos kuantos
eskalones ke separavan la sala de la guerta enkantadora
en esta noche de enverano debasho del lunar i de las
miles de estreyikas.

Se asentaron debasho del grande arvole, en el banko
i Mordo la travo a el, metyendo su delikada kavesa
ensima de su korason..

-  Mi dulse paloma, mi Almendra, va ser muncho tiempo..
No te vas a enfasyar de asperarme mi kerida ?  Kero ke
sepas de agora ke estare kontando kada diya ke me
separan de ti... Te tiendre en mi tino siempre fina
el diya ke no mos vamos a separar mas !  Puedras
asperarme sin enfasyarte mi dulse amiga ?

-  No tenemos remedyo Mordo de mi korason !
Te apprometo ke te vo asperar kon pasensya fina el diya
de muestra boda.  Mi Sinyor Padre te apprometyo mi
mano i me izo la muchacha la mas feliz del mundo. 
Lo savemos ke no bivimos en las mismas sivdades i
tenemos una prueva de pasar antes de aunirmos por
siempre, fina ke la muerte mos apartara.

-  Mi amor, mismo en el otro lado te asperare,
estare a tu lado.  Si me muero antes de ti, mi amor
te alkansara de ensima de mi tomba.  Me sintiras i
saveras ke no estas sola...Te kudyo de ande esto,
te amo de una fuerza eterna.

-  Deke avlamos de muerte Mordo !Tenemos una vida
entera delantre de mozotros.  Somos mansevos i al bodre
de muestros diyas enjuntos solo..Seras el padre de mis
ijos i de mis ijas.

-  Kon la Luz del Di-o Santo en muestro kamino, te
apprometo ke sere tu marido fidel i el padre de muestros
ijos, ke dedikare mi vida entera a mi ogar, a mi
Almendra i a mis ijos karne de muestra karne i sangre de
muestra sangre.

-  Kuantos vamos a tener Mordo ?

-  Vamos a tener todos ke el Di-o mos dara !  Seran los
bienvinidos en sus kazas, en los brasos de mi ermoza
mujer !

-  Ke tus biervos son dulses mi Amigo !  Me inches de
felisitad.

-  Te amo Almendra mia, te kero miya de agora mismo i
sos mi unika flakeza....Ma asperare muestra boda kon
pasensya pensando a los diyas feliz ke tendremos delantre
de mozotros , mi vida, mi amor...

-  Te amo Mordo i estos mezes seran una prueva de amor
entre mozotros.  Dospues de esta aspera seremos seguros
ke meresimos muestra felisitad a kada momento.

-  Te kero bezar... No pensaremos mas a nada...

-  Mos pueden ver ?

-  No mi amor...No pienses mas a nada..


*


-  Me avlates ansina delantre de mis kreaturas !  Del
novyo de mi ija !  Me avlates komo a una esklava ! 
A una sin dignitad !

-  Komo no ?  De kuando por aki la mujer entra en la
kamareta dospues del marido ? 

-  YA yevamos 25 anyos enjuntos !  No so mueva kazada
i ni so tu konkubina !  Del diya ke fui novya fina este
diya no tengo entrado dospues de ti en muestra kamareta !
No me deshas gozar de mis ijos...Mi ijika se va ir !

-  No Sinyora !  MI ijika no se esta indo dayinda. 
Tienes diez mezes mas de gozar de eya !  Estos estan
enamorados i son eyos ke se van a espartir en estos
diyas !  Yo se ke les kosta i les duele...

-  No es de uzo de deshar los novyos solos !

-  Uzos, auzos !  Mi chapeyo !  Akodrate de mozotros...

-  Bohor Efendi !  Es tu ija !

-  I tu no eras ija de tu padre ?  Te akodras komo te
abrasi en el patio, la noche ke tu padre te apprometyo
a mi ?

-  Nisim Efendi !  Sos kreatura !  Este Mordo Efendi
no lo konosemos !  Si va i no torna ?  Si le afita koza
en kamino ? Si se ezvacheya ?

-  Mujer kaya-te ! Ke tienes kontra este mansevo i
este kazamiento ?  No te entyendo del todo !

-  Me la va yevar leshos !

-  Klarika ! Basta kerida kon esto..Se keren bien. La
va yevar a su Konak a la Kapital.  Es un hombre
responsavle i bueno.  Almendra va ser su mujer, la
madre de sus ijos.  Es un buen judyo de una buena
famiya, vayente, savyo, dulse persona... Mira los
regalos ke le trusho a muestra ija... Yo no so dingun
hombre de los de akeyos... De kavesa vieja !  Penso
en mi tiempo, agora i te digo ke este mansevo me kaye
muy bien !

-  Mi innosente ijika !  Mi prensesika tan pura....

-  Klarika basta !  Ven a mi lado mi kerida.  Deshalos
ke logren pasensya para los diyas ke seran separados,
leshos uno del otro.... Mezes...No va ser fasil para
eyos !

-  Tienes razon Bohor efendi...

-  Ven a mi lado mi alma !

-  Esta muy kayinte !..

-  Si mi dulse.. Ven durmeremos.. Amatare esta kandelika..
Suenyos de seda Klarika.

-  Repozo bueno Nisim efendi.

*
 

Donna Franseska teniya muncho echo i estava
ordonando a las dos mosas ke lavoravan en la
Villa Miranda kon una boz kalma ma muy
desiziva.  Roksana le aviya enkomendado de
aparejar una meza de las mas ermozas por el
aniversaryo de su ijika regalada Mirabella.

Mirabella asemejava de manera ekstranya a su
nona Franseska i a su madre.  Los mismos ojos
vedres komo esmeraldas, los mismos kaveyos
de miel, ondulados, kon grandes buklas ensima
de sus ombros delgadikos dayinda. Era la mas
chika i era auzada a jugar kon sus dos ermanos
de sinko i siete anyos.  Su madre la yamava
ijika ijo !  Muy kaprisyoza i segura de
ser muy amada de todos, les kitava las ganas
de bivir kon sorizas i bezos !  Roksana se
diziya entre si ke esta ijika iva ir detras
de sus pasos i seriya mismo mas echizera ke
su madre ! No le desplaziya pensar ansina
porke saviya la vida dura ke era de ser attada
a un hombre, lazrando en kaza sin ser rekonosida,
engrandesyendo ijos, gizando, alimpyando,
resivyendo famiya i jente i azer lo mizmo ke
aziya, sin ser pagada, sin konoser el plazer
i sin mismo ser estimada !  No keriya una vida
asemejante por Mirabella ! Sus dos ijos, todo
el kontraryo de sus ermana chika, eran anjelikos,
mahos i kon korason de oro.  Roksana los
estimava malgrado ke eran muy chikos porke
saviya ke ivan a ser dos hombres muy elegantes,
muy seryozos i admirados por todos kuando
ivan engrandesersen.  Roksana nunka se enganyava
kuando "veiya" el futuro !  Saviya las kozas
instinktivamente i todos diziyan ke era una
grande endevina !  A vezes uzava sus talentos
i tomava bolsas yennas de liras de oro para
"ver"  lo ke seriya de sus klientes. Estos
tornavan ande eya porke todo lo ke les
predikava saliya de manera inkreyivle !
Roksana se demandava si efektivamente teniya
un talente asemejante !!!! Eya diziya solo
lo ke le enspirava las piedras ke echava embasho
o la mano de la persona asentada enfrente de eya....
Le aviya afitado tambien de "ver" su propriyo
destino unas kuantas vezes i siempre rechesava
lo ke "viya" porke le viniya imposivle, demasyado
fantezisto, demasyado triste, demasyado ermozo,
inkreivle....Inkreivle sovre todo !

Kuando Pietro entro en la Villa Miranda vido
sus dos ijos jugando kon los grandes perros ke
immediatamento empesaron a azer un bruido del
diavlo kuando lo apersivyeron !  Estos no
estavan jugando i lo keriyan espedasar de vedra !

Donna Franseska salyo a tiempo de la sala para
yamarlos i evitar una matansina segura si kedava
mas tadre !  Pietro estava para kayer si no se
deteniya al chiko arvole de abrikotas i toda
la sangre de su kara se le aviya retirado del
espanto ke aviya tuvido. 

Unos kuantos minutos se kedaron silensyozos.
Dingunos de los dos keriyan avlar... Komo si
solo sus prezensya era sufisyante i todos los
biervos eran demasyados.... Fue Mirabella ke
rompyo el silensyo i de la altura de sus sinko
anyos lo yamo  "Papi ! Ven jugar kon mozotros !"

El hombre, dayinda detenyendose del arvole la
estava mirando no kreyendo sus ojos. "Roksana"
le salyo de sus lavyos sin kolor, una mano en
el garon. 

-  Mamita no esta.  Oy es mi aniversaryo. 
Por seguro ke va vinir.  Ke regalo me trushites ?

Pietro no se estava asperando a oyir esto !
Es Donna Fransiska ke lo salvo de una repuesta
a la kuala no estava preparado del todo.

-  Mirabella !  Nunka se demanda a una persona
su regalo !  Esto es ser deskarada i no kave a
las maneras de una sinyorita ke se respekta !
Por no pensarlo, no vas a arresivir dingun
regalo de tu padre !

-  Si no me trusho regalo, yo no vo jugar kon el !

-  Mirabella basta !  Si no, te vo embiyar a tu
kamareta i vas a pasar tu aniversaryo aya i sola !

-  Grasyas Donna Franseska !  No saviya  ke era
su aniversaryo de vedra.  No tengo nada a mi
lado, ke pekado.

-  Porke vinites Pietro ?  No kijyera ke Roksana
te veyga aki i otra vez kavzar pletos i
malentendimientos ke vos deshan hazinos el uno i
el otro !

-  No..No vine a peleyarme o komportarme negro
komo lo ize antes.... La kije ver, ver a mis ijos,
abrasorlos antes de tornar a Venezia.  Desharles
una kuantidat de oro para kuando van a tener de
menester, kuando seran grandes i puedeser
navigatores komo yo.  Kije ke se akodren de mi
komo une buena persona ke los kere bien i
pensa en eyos.  Ke sepan ke tienen un padre ke
siempre va ser asperandolos para kuando  lo vana
kerer ver un diya. 

-  Va bien. Vate a sus lados.  El grande es
Andreas  i el chiko Frederiko.  Los yamamos
Andi i Fredi.  Mirabella es un fuego ! Ya la
vites.

Pietro se fue allado de sus ijos i los abraso
todos en d'una.  Lagrimas le estavan koryendo
de sus karas flakas.  Les estava avlando kon
kalmo, kon sorizas i muncha dulsor.  Los chikos
lo estavan oyendo kon una grande atensyon i era
komo si estavan konsientes ke una koza muy
importante se estava desrolando agora, en sus vidas.

*
 

Mordo i Almendra kedaron abrasados ensima del
banko fina kuaji la demanyana, kontandosen sus
amor, la vida ke keriyan tener dospues de la boda,
los ijos ke ivan a tener i los nombres ke les ivan
a dar, el muevo arvole de almendras ke Almendra
keriya plantar para akodrarse de su entrada al
konak ke la espoza adorada de Mordohay de Toledo.

-  Mi palomita me salto a los ojos kuando te vide
esta noche ke estavas entera kolorada..

-  Es el sol mi amor.

-  Estava muncha kalor..Deke te kedates debasho
del sol mi roza ?

-  Mos fuimos al bodre de mar kon mi sinyora madre
i mi tiya Julya, Meri i Viktoriko.  No mos asentimos
al sol ma parese ke kuando estavamos jugando en la
mar kon Meri, el sol abasto a kemarme de esta manera !

-  Komo jugando en la mar ?  Aryento de la mar ?

-  Si, seguro !  Me plaze muncho.  No mos fuimos
en lo profundo muncho.  La agua estava fina muestra
talya solo.  Mi madre i mi tiya JUlya tambien les
plaze entrar un poko a la mar i se asentan al bodre
ensima de la arena, el puerpo en la mar porke les
viene fresko i divertido.  No leshos del puerto ay
un lugar muy ermozo i es perfekto para entrar i
jugar aryento de la mar.

-  Muy ekstranyo esto !  Nunka oyi ke se juga ansina
aryento de la mar.  Los egypsiyanos antiguos se
banyavan en las aguas de Nil i en la mar ! MA judyos ?
Nunka !  I si vos viyan sin vistidos ?

-  Komo sin vistidos !  Estavamos vistidas !

-  Kon tu fistan ?

-  Por seguro !  No me lo iva kitar en la kaye !
Komo lo pensates !

-  No se, me vino komo si estavash en el hamam,
lavandovos kon las aguas saladas de la mar.

-  No, no entramos por lavarmos, ma para divertirmos.
Los ijikos nadan ma mozotros no savemos nadar.

-  Lo mas de los marineros saven nadar mi palomita,
ma yo no kijyera ke nadaras i el Di-o ke no trayga,
ke te aoges en las aguas.  No se juga kon la mar.

-  Estava muy kalma.  Las aguas freskas i klaras de
un bleu maraviyozo.

-  Deve de ser ermozo a lo ke me kontas.  Si te plaze
tanto, i yo te yevare a jugar en la mar.

-  Si si mi kerido.  Va ser maraviyozo kon ti !

-  KE mas izites oy kuando yo estava okupado kon muestro
viaje, ovligado de estar leshos de ti, malgrado ke
tendremos de espartirmos en dos diyas ?

No, no mi alma !  Ne seyas triste ansina supito !  Yo me
muero por ti !  No puedo verte kon tu karika attristada.
Kale ke seyamos fuertes i no peryemos pasensya.  En
mueve mezes, komo la prinyada, vo vinir por muestra boda
i vamos a naser de muevo a la vida !

-  Komo un bebe ?  Vamos a kontar los diyas komo una
mujer prinyada...Deke te vino al tino los mueve mezes de
la prinyada ?

-  Porke kero verte prinyada de muestro ijo mi palomita ....
Seras la mas ermoza mamita del mundo, i yo el padre el
mas feliz !

Es ansina ke estavan avlando en los brasos el uno del
otro, olvidando ande se topavan, olvidando el mundo en
el ke biviyan, yennos enteramente de sus amor i rendyendo
grasyas al Sielo por averles regalado esta felisitad sin
inkonvenientes en sus kaminos a parte de los primeros
mueve mezes ke deviyan asperar para el kazamiyento.
Almendra teniya konfiensya en su bienamado i saviya ke
Mordo bivo, nada lo puediya detener leshos de eya.

Las horas estavan avansando muy presto... Ya iva amaneser
i Almendra no keriya ke a este tiempo avansado sus
paryentes la veiyan dayinda ensima del banko en la guerta,
e los brasos de MOrdo i sin ser kazados !

Fue difisil de espartirsen.  Mordo saviya ke su palomita
teniya razon i no keriya ke egziste negros sentimyentos
entre sus suegros i el mizmo.  La desho alesharse de entre
sus brasos, sintiendose supito asolado komo vazyado de
sus bienes i de todo lo ke posedava. 

Karamela no aviya durmido de la noche, estava asperando
a Almendro, espandida entre la puerta de la kuzina i
las eskalerikas ke abashavan a la guerta.  Kuando Almendra
avagariko asuvyo las eskaleras, Mordo detras de eya,
vino a fregarse a sus pachas avlandole dulsamente en su
lingua de gato.  Almendra la tomo en sus brasos i
entraron MOrdo i eya kada uno a sus kamaretas dospues de
un largo bezo...

Almendra estava karesando Karamela, kontandole su felisitad
de esta noche i aprometyendola de yevarla kon eya a
Konstantiniye dospues de la boda.  Karamela deviya irse
kon eya a su mueva kaza ande biviriyan todos muy feliz.

Se kedo durmyendo kon la ermoza golor de Mordo ke aviya
pasado a sus vistidos, Karamela espandida ensima de eya.

En sus suenyos estava luchando kon guerreros barbares
ke la kijiyan tomar kon eyos, kitarla a Mordo i yevarla
ken save ande...

Se despierto entera sudando i kon espanto.  El diya viniya
de empesar... No teniya esuenyo i prefero abashar al mupak
para aparejar eya misma los chorekes ( Boyos blandos) del
desayuno este diya.


(a kontinuar kon Sharope )
 


 


 

- Copyright © sefarad.org - 1997 - 2017

Retour au site sefarad.org -