Accueil - sefarad.org

Almendra...parte 20

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte   20

Samuel estava echado en su kamareta i teniya
los ojos grandes avyertos esta demanyana tan
kayinte d'enverano ! No estava puedyendo
durmir.  Aviya tornado al amaneser a su
kaza deshando Meri a mitad durmida en sus
brasos... Estas nochadas pasadas sin durmir
le estavan azyendo mal.  Ya lo saviya ma no
estava puediyendo no ver a su kerida i no
tenerla en sus brasos, tan dulse, tan
kerensyoza, komo un pedaso de el mizmo
del kual no se puediya pasar !
Se metyo en tino de avlarle a su madre kuando
se iva alevantar para diskutir de su boda i
sus futuro... Almendra, prometida a Mordohay
de Toledo, sus kaminos se aviyan avrido i su
madre no tendriya de formular mas kualsiker
objeksyon.
Se alevanto kuando el sol estava bien alto,
serka del medyo diya, se vistyo i abasho al
salon ande su madre estava otra ves brodando
pezgadas kortinas muy valorozas.. Fue a abrasarla.
-  Buendiya sinyora madre.
-  Buendiya, bendisyones ijo.  Komo fue ke te
alevantates tan presto !  Dainda no es medyo diya !
Ke pashariko te espierto ?
-  Mi senyora madre se esta burlando de su povre
ijo !
-  Mi povre ijo ?! 
-  Si mi madre se burla de su malhorozo ijo !
-  Deke malhorozo mi presyado ?  Ke te manka ? 
No kudyo para todo lo ke dezea tu alma, todo lo
ke nesesitas ?  Ken tengo mas a parte de ti ?
Sos todo mi bueno i mi ojo preto !
-  Lo se mi madre muy kerida ke tanto amo i merese
de ser tan amada !
-  Deke estas malhorozo alora ? Kualo te kale ke
no tienes ?
-  Me manka Meri Aboresi de la kuala esto enamorado
aze muncho tiempo sinyora madre.  La kero por espoza
i si no ves inkonveniensa kijyera ke empesemos kon
las tradisyones de la boda.
-  Aha !  I deke no supe yo de este amor antes ?
-  Porke keriyas lograr Almendra Benezra a todo
presyo sinyora madre, i no saviya komo desmudar mi
korason delantre de tus ojos ke no veiyan mas ke
la ija de tu amiga de siempre !
-  Stupides !  Ivamos azer el mas grande yerro
tomando por novya una ijika, el korason de lakuala
batiya por un otro hombre !
-  No teniya la kulpa mi madre..No es eya ke kijo
kazarse kon mi !
-  Bueno ya paso todo esto agora !  Keres ke avle
kon Julya Aboresi ?  La vedra ke no keriya tener
de dar i de ver kon la famiya de Klara ke mos
izyeron esta busha/verguensa.
-  Mi madre, dingunos no teniyan kulpa en esto, i
tu lo saves ke la sinyora Klara no lo saviya eya
mizma i Almendra tan poko saviya si Mordohay de
Toledo la keriya por espoza o no !  Es yo ke lo
meti a la prova i lo supe el primer ! 
Entremientes Meri i yo sufrimos lo mas porke mos
aviya firyido muncho de pensar ke puedeser teniyamos
ke espartirmos !
-  Te entyendo Samuel, no vamos avlar mas de esto
i vere komo vo tener una oportunitad de enkuentrar
a Julya Aboresi para entender de eya lo ke pensa
de este espozoryo.  Estas seguro ke Meri te kere
i no esta enamorada de otro ?
-  No te burles de mi mi madre kerida !  Somos
muy atados i de muncho tiempo ke mos keremos bien !
-  Kon esto no esto de akordo ke vengas kuaji las
demanyanas a kaza !  Estas peryendo tu salud i
esto me preokupa muncho.  Azeremos esta boda de
pronto i ke tenga yo mi ermuerizika kon mi !
A mi me plaze muncho esta ijika i es mas kayintika
de Almendra ke es muy ermoza ma yelada !
-  Mi madre kerida, me regalas los mundos kon tus
dulses palavras !  Sos la mijor madre del mundo.
Me azes muy feliz !
-  Bueno a lavorar agora !  Toma el moso kon ti
i miraver ke me alimpyen la fuente i el bassino/
pileta de la guerta komo se deve !
Vamos a tener muncha jente en los diyas a vinir
i se ensuzyo muncho !
-   Te lo vamos azer komo lo kijyeras ke seya
mi madre kerida, ke no tengas duvdas !  Me vo
agora mizmo para okuparme de la guerta...

*
Dospues del dezayuno durante el kual los
namorados se miravan amorozamente, Mordo
teniya ke renderse al kampo ande su chika
armada, sus bienes i las bestias se topavan.
Kaliya eskapar todo fina la noche para ke kede
solo de kargar los gameyos a la hora buena i
muy demanyanika el yom Rishon/Alhad.
Antes de tomar muy respektuozamente la
permission de irse de Klara, de Nisim efendi
 i de los sinko ermanos de Almendra,  les
demando si puediya envitar para pasar kon
eyos el Shabat a Eliyezer efendi, su hombre
de konfiensya, porke lo aviya ayudado muncho
en los aparejos i no le estava dando la alma de
desharlo solo en el kampo este diya santo. 
Se lo estava demandando komo se deve a la
Sinyora de la kaza kuando fue Bohor efendi ke
arrespondyo kon su kara riendo de siempre   :
-  Por seguro ke lo puedes trayer mi ijo.  Aki es
tu kaza i tus envitados son los muestros.  La
avriremos una kamareta al sinyor... Klarika no
te importa otr'una boka en el pranso de Shabat
vedra ?
-  No, es zahut de tener un judyo en la meza por
Shabat !  Ke venga i se arepoze antes de salir
en kamino.  Va kerer ir el tambien al kal.  Lo
tomash kon vozotros ! 
Mordo los reingrasyo de todo el korason.
Almendra akompanyo Mordo a la puerta i
kuando torno a la sala ande toda la famiya
estrava dayinda asentada  al doredor de la
meza su madre le soriyo  :
-  Asenta Almendra, tus chorekitos salyeron muy
savrozos, kome i tu ! No komites nada mi ijika !
-  Si mi madre, los eskaparemos todos porke
peryen sus savor si kedan...
-  No peryen nada ! Bendichas manos mi ijika !
Mazalozo de Mordohay de Toledo ke se va
kazar kon ti.  Lo ke keda de los chorekitos los
vamos a tomar al echo kon mozotros !  Un
bokado, un dukado !  Klarika, metemelos en
mi sako d'espalda i saleremos en kamino antes
ke se aga medyo diya !  Ijikos alevantavos !
Tiempo de lavorar.  Tendremos bodas i fiestas. 
No es la hora de espandir las piernas !
*
El lugar estava vaziyo kuando Mordo yego al
kampo ande aviya deshadoo sus hombres.
Le paresyo ke paso muncho tiempo kedando
aya, no savyendo ke pensar, fina ke vido
Gabriel vinior a el ensima de un maraviyozo
kavayo kolor de muez.
-  Buen diya Sinyor de Toledo.
-  Hola Gabriel, ande estan todos ?
-  Ni kijimos estar en lo avyerto debasho del
sol i sin solombra, pensando a las bestyas. 
Mos retirimos a los bodres de los arvoles ande
esta muncho mas fresko, i ansina attiramos
manko la attensyon en mismo tiempo...
-  Bien pensado... Ken lo desidyo ?
-  Es mi sinyor Eliezer, Sinyor de Toledo !
-  Yevame a su lado Gabriel !
-  Si Sinyor, vos mostro el kamino.
Uno detras del otro en nada de tiempo se
toparon en el chiko bosket ande los hombres de
Mordo estavan kada uno i uno okupado kon los
aparejos.
Eliyezer a sus kavesa les estava dando ordenes
de una boz komo si toda su vida no aviya echo
ke esto ...  Los hombres estavan lavorando kon
ardor, fuersa i muncha voluntad.  Se sentiyan
prontos i dispuestos a salir en kamino dospues
del Shabat, el grande patron mansevo siendo
judyo.  Eran akostumbrados a lavorar  duro i
kombatir enemigos kon sus spadas.  Estavan
pasando estos unos kuantos diyas kon plazer
i buena humor.
Mordo saludo a todos en su kamino,
dezeyandoles un buen diya i reushitad en lo ke
estavan azyendo.  Mordo teniya su soriza
enkantador kuando yegaron kon Gabriel allado
de Eliyezer efendi ke los apersivyo de leshos
i estava vinyendo koryendo a sus vandas.
Los dos hombres se abrasaron.
-  Buenas entradas de Shabbat !
-  Buenas... Buenas Abba Eliyezer ! Te veygo
kontento i satisfecho.
-  Si Mordo estamos prontos. Tenemos la mijor
karavana de las Afrikas, de la Evropa i de la
Asya ! Mismo Avraham Avinu no tuvo una
asemejante, malgrado todas sus rikezas, kuando
salyo en kamino para Eretz Kanaan !
-  Grasyas a ti Abba Eliyezer !  Nunka me
imajinariya ke eras un hombre tan kapache i
tan de konfiensya ! Me ire los ojos serrados
kon ti fina las Indias !
-  Ay i mas aya mi ijo ...
-  Ande mas aya ?
-  Ay....  Ay.... Yo lo se.
-  Ande biven los ojos estirados ?
-  Si !  Es muy grande.....
-  Ay te vere sano i rezyo abba Eliezer  ! 
Mozotros tenemos ke yegar a Konstantiniye i
kreyeme ke no es aki serka.  Ademas vamos a
pasar por Bursa.  Le vo embiyar dos de mis
hombres a mi padre kuando mos aserkaremos
porke le kero avlar i mientre ke estaremos
ayi, deke no mandar a dizir a los Beyes de
Bursa ke yegamos kon ropas rikas, kedaremos
2 diyas en la sivdad i seremos dispuestos, 
si tienen entisyon de merkar algunos de
muestros trezoros.
-   Muy buena ideya Mordo. Lo pensates muy
justo mi ijo. Mas poka ropa i mijor es... 
Tenemos en kamino Afyon i Magnesya (Manisa)
dominada fina un sieglo antes por los Beyes
de Saruhan,  Hargush (Kutahya)  kon sus
kastilyos aryento de las muralyas,  las
forteressas de los Selchoukes i akeyos ke
apartenesiyan no antes muncho tiempo a los
Beyes de Germiyan i......
-   No no Abba Eliyezer....  No kijyera
aserkarme muncho de estas sivdades de vedra...
Mismo ke konto pasar i kontornar de leshos en 
kortando el kamino.  Sigeremos en linya derecha.  
Konosko bien los lugares ke tenemos de pasar.
Logrates buenas bestias i no kreyo ke vamos a
tener difikultades ke no se pueden surmontar. 
No esto dezesperado para vender lo mas posivle. 
Tengo tiempo i mis klientes me van a asperar
en Konstantiniye.
-  Lo dishe porke estavas dispuesto a vender
en Bursa.
-  Si ma akeyos los konosko i son mis klientes
de muncho tiempo.  Ademas son amigos de mi
sinyor padre el kual vo vijitar de toda manera.
-  Entyendo mi ijo...  Oy pensava abashar  al
puerto para  ir al hammam. Kijyera kedar en el
han la noche i pasar el Shabat serka d'el kal
antes de metermos en kamino Yom Rishon d'emprano.
-  Te iva dizir justamente de deshar Gabriel kon
mis dos hombres para kudyar la karavana i vinir
kon mi a pasar Shabat kon mozotros Abba Eliyezer.
Puedes lavarte tambien ande mis suegros. Tienen
un grande konak i por sierto ke ay lugar de
echarte por la noche.  Ya les demandi si puedo
envitar por Shabat mi hombre de konfiensya i
me akordaron la permisyon kon muncha grasya.
-  Muy munchas grasyas mi ijo.  No kijyera
molestar dingunos de vedra...
-  No no !  Vamos a pasar un Shabat repozado.
No kero desharte al kampo o en un Han.  Todos
los echos estan kuaji terminados i Gabriel kon
mis dos hombres se van a kargar de todo en
muestra absensya.
-  Si ansina lo dezeyas... Te reingrasyo mi ijo
por la buendad ke me azes i la konfiensya ke
me tienes.  Mi ire kon ti kuando lo diras.
-  Va bien, esta reglado !   Ven iremos agora
a ver lo ke izitesh i komo arreglatesh la
karavana..
-  Si sinyor !
*
Gabriel yevo Blanka de Nieves allado de los
kavayos i de los gameyos para darle agua i yerva
freska..
Mordo i Eliyezer se fueron por ande todo lo ke
teniyan de yevar se topava. La ropa se aviya
metido en grandes sakos. La manera ke los
sakos se aviyan inchido era un lavoro de arte !
Lo muy valorozo formava el kueshko i los
tapetes i las ropas emburujavan lo todo.
No se puediya ver lo ke konteniyan las balyas,
todas de la misma grandor i kuzidas de las
dos vandas kon maestriya.
Sinyos sekretos se aviyan metido, pintado,
kuzido ensima de las balyas para saver mas
tadre ande se topava kada koza. Mordo tuvo ke
akseptar de si para si, sin dizir nada, ke nunka
se aviya aparejado de manera tan perfeksyonada
antes, en sus otras ekspedisyones. Lo reingrasyo
a Eliyezer efendi kon muncha sinseritad.
Kontinuaron a kaminar fina ke yegaron a las
tentas del fondo, no leshos de los dos rios
estrechos  de ande korriya la agua alegramente.
Eliyezer efendi se aboko para bever i dospues
le disho a Mordo :
- Ijo, ven beve ke estas aguas son vida !
Reelamente Mordo sintyo todo su puerpo
arrebivirse kuando bevyo, i el, de las aguas
kuaji yeladas del rio.
Por sus mazal, en el kamino de retorno a
Konstantiniya ke Mordo se estava preparando
a sigir aviya munchos lugares kon abundansya
de agua. Solo de este punto de vista la
ekspedisyon se fasilitava konsideravlamente
seya por no yevar kon eyos grandes kuantidades
de agua, seya por lavarse i lavar los vistidos
i tanbien para las bestias tan nombrozos kon
eyos.
Unos kuantos hombres estavan asentados al
doredor de la tenta ke serviya de kuzina para
la karavana entera. Afuera estava kozyendo una
kaldera immensa. Mordo se aserko, los saludo
kon soriza i les demando kualo estava kozyendo
en la kaldera. El hombre kargado de dar a komer
a los otros disho ke aviyan tomado la leche del
gameyo i estavan gizando aroz i siertas yervas
golorozas kon espesas i sal. La golor de la
komida estava maraviyza.
Unos hombres se estavan antrenando kon sus
espadas briyando al sol. Los ke estavan
asentados, riyendosen en vezes, se estavan
kontando lo ke aviyan bivido en variyos viajes ke
aviyan echo antes. Eran kuentos ekstraordinaryos
de bravura, d'espanto. d'amor, de kombatos duros
i evenimientos inesperados ke despyertavan la
atensyon de los ke los oyivan, les davan a pensar,
susitavan sus kuryozitad i lo mas les davan plazer
de oyir. El tiempo pasava agreavlamente i dava en
mizmo tiempo una ideya de lo ke puediya afitar,
komo los guerreros reaksyonavan en sirkuenstensyas
asemejantes i ke manera de stratejiyas se puediyan
aplikar ets.
Un hombre debasho d'un arvole estava kuzyendo
mas sakos ke se teniyan siempre de menester.
Un manseviko de unos 14-15 anyos estava allado
de el i estava mirando kon interes a el ke estava
kuzyendo la ropa dura ma floshamenta tisada.
A Mordo se le avriyeron los ojos komo si no se
estava kreyendo a lo ke estava viendo !
- Abba Eliyezer ?
- Si mi ijo ?
- Tenemos entre muestros hombres kreaturas ?
- Por seguro ke no ! Deke me lo demandas ?
- Ke aze este chiko en el kampo ?
- Ah ! Heheh.... Este es Pavlo ! Es una istorya
muy interesante ! Kon tu permisyon va vinir kon
mozotros ma antes de dizirme si akseptas o no
kijyera ke oygas komo fue ke esta kon mozotros.
- Abba Eliyezer...Es una kreatura ! No puedemos
tomar la responsabilitad de una kreatura de....
Tienes razon, tiene solo 13 anyos a lo ke me disho !
Mostra un poko mas porke es bien kresido i nunka
kedo ambyerto... Ma oye komo afito ke esta aki...
- Kontame !
- Estavamos kon Gabriel en el kampo allado de la
guerta ande s'asentan todos los merkaderes, los ke
bushkan echos, los marineros, los pirates...
Konoses el lugar !
- Si ! Ya se...
- Estavamos observando el puerto i la jente ke
ivan i viniyan para tratar de topar los ke mos
konviendriyan.. Avlando kon unos, kestyonando
otros, kuando mos apersivimos de un ijiko rodeyando
allado de los kavayos, no leshos de mozotros.
Fue Gabriel ke me lo mostro riyendo ! Me disho
ke es el ladron el mas savido i kapache de toda
esta rejyon ! Dizen ke puede kitar la eskularicha
de un marinero sin ke este se apersiva del todo !
- Hehehe
- Si yo lo vide al echo i ni kije kreyerme de
lo ke vieron mis ojos ! Es un majisyano.
- Merese una buena haftona para ke sepa kedar
trankilo dospues, toda su vida !
(a kontinuar kon Sharope)

- Copyright © sefarad.org - 1997 - 2017

Retour au site sefarad.org -