Accueil - sefarad.org

Almendra...parte 21

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte   21
 

- Esto no lo se, ma supito vino a mozotros
i se echo a los pies de Gabriel avlandole en
Bulgaro, un Bulgaro grosyero emleskado de Turko
i de Grego ke me arreskunyavan los oyidos !
Disho ke sus paryentes lo aviyan abandonado,
lo ke por seguro es mintiras, i ke teniya de
bushkarlos en Konstantiniye ande estava su
ermana kazada, ke mos puediya dar oro mizmo
para ke lo tomemos kon mozotros, ke estava
pronto a azer todo lo ke le demandariyamos,
ke teniya muncha fuersa i ke saviya
perfektamente montar a kavaya, lo ke es vedra,
ke save maneyar kuchiyos i englenear/divertir
a la jente. Pavlo avla kon los kavayos, i les
ambeza kozas ke dingun kavayo save azer !
Es ansina ke pensa ganar su vida en Konstantiniye.
Komo maestro de kavayos de un riko pasha del
palasyo del Sultan ! Ke dizes ? A esta edad
tener ansina de meoyo ! Yo digo ke esta kreatura
sera alguno de muy importante un diya ! Palavra
de Eliyezer ! Entremientes kave en todos los
lugares i en todos los lavoros. No ay koza ke
no le kuadre o ke no kera ambezarse ! Todos lo
keren bien i es amigo de los mas vayentes en
3 diyas ke esta kon mozotros. Se antrena kon
las armas las noches, pensando ke dingunos no
lo ven. Tiyene talento este Pavlo !

Te lo alavo mi ijo !.... Agora me puedes dizir
si akseptas ke venga kon mozotros o no. Por
seguro ke no le pagamos nada i el mos va servir
para la valor de tomarlo a la kapital Ottomana
i komer kon mozotros ets..La desizyon es tuya
Mordo.

- Me averguenso de dizirtelo Abba Eliyezer ma
esta kreatura mos puede mismo degoyar kuando
estamos durmyendo i rovarmos fina las bragas !
No tiene espanto de nada i me parese ke toda
su vida fue luchando para sobrebivir ! Este
mansevo no kere solo sobrebivir ma reushir i
ser muy riko i poderozo un diya ! Tiene la
intelijensya afilada de una espada. Puede ser
un amigo muy fidel i un enemigo muy danjorozo
en mizmo tiempo ! Muncho mas danjerozo de un
Goliath de persona ke solo sus muskulos i su
fuersa lavoran. No se de vedra.....
No kero tener de pensar a lo ke se esta
pasando en medyo de mi karavana tambien,
ke dizes ?

- Estaremos vijilados de la manyana a la noche
i de la noche a la manyana por muestros hombres
ke saven oy ken es Pavlo. Lo keren bien ma saven
ke no se puede fiyar en el. De otra parte prefero
enemigos intelijentes ke me pueden servir a amigos
bovos ke kon sus estupides mos pueden antrenar a
sirkuenstensyas difisil de salir d'aryento, alora
ke uno komo Pavlo puede servir a munchas kozas.

- No se Abba Eliyezer ! Este chiko viajador kon
mozotros no me gusta. No me gusta el dar i aver
kon ladrones ke paresen muy naturales mentre ke
te estan rovando ! Este sera ladron todo su
vida i nunka se le va pueder azer konfiensya.
Oy ladron, amanyana un assasino ! Ademas
mintirozo. Frankamente kero ke me entyendas
Abba Eliyezer.... Konosko tu korason de oro i
kuanto keres ayudarlo a este chiko ma no es
posivle ke venga kon mozotros. Te rogo no me
tengas rankor ma kero ke me kreyas ke lo esto
azyendo por el bien de todos i no kijyera del
todo ke lo regretemos kon amarguras el diya ke
lo trushimos en medyo de mozotros !

- Es tu desizyon ! So lo vo dizir dospues de
komer ! Va tener ke tomar su bogo en la mano i
irse a su kamino !

- Grasyas por akseptar mis palavras..

El patron mansevo i su hombre de konfiensya
bastante aedado se asentaron debasho de un
arvole de igos kon ramos yennos de igos ke
no se aviyan echos dayinda. Estavan muy
chikitokos i de un vedre oskuro. Smyrna era
nombrada de siempre kon la abundansya de sus
uvas i la kualitad de sus igos. Se puediya
entender ke el tiempo de los igos aviya
empesado, solo al mirar a las firyidas ke
el leche de igo kavzava en los mushos
i en los lados de la bokita de las kreaturas..
Ma... No se ezvachavan de asuvir a los arvoles
i komer los igos dulses komo miel.

Kada mez de Elul, des de los primeros diyas,
kuando los igos maduravan i yegavan a sus
savor maksimala, los mansevos i los lavorantes
arrekojiyan el fruto ke se vazyava ensima de
anchas savanas estiradas en las guertas, en las
tarasas o en los tejados para sekarlas al sol
ke tosta en Smyrna. Estas guertas, terasas o
tejados estavan yennos de toda manera de
alimento ke se aparejava para los diyas del
invyerno. Eran dulses, vinos, likores, salsa
de tomat, turshi de pipinos de berendjena i de
pimientones, bamyas pasadas al ilo i sekadas
enkolgandolas a los klavos para esto...
Berendjena seka, menta, prishil, otras yervas,
todo lo ke se puediya konservar... Se merkavan
en enverano tambien, el trigo i el maiz ke se
yevavan ande el padre Marko para ser molinados.
Los ke moravan en frente del puerto se los
yevavan ande el sovrino de Alberto el nalbant
(herrador/blacksmith/maerchal ferrant)
el mansevo Pepe (Joseph ).

Las naves ke veniyan al puerto eran muy
enteresadas a merkar estos, spesiyalmente, el
igo seko ke se inchiya en grandes sakos,
seya para komer durante el viaje, seya para
vender en los otros payises.

Se teniya oyido mismo ke los padres de las ijas
davan este igo presyozo komo dota tambien, komo
el azeyte de oliva, el vino i otros produktos de
la tierra...

Aviya muncho tiempo ayinda para la entrada
de Shabat kuando Mordohay de Toledo i
Eliyezer efendi chaftaron la puerta del Konak 
de los Benezra.  Estava en el bodre de la  
kolina dominando las vedres guertas de las  
mas ermozas kazas de los judyos de Smyrna.
Estas  se aperseviyan en medyo de sus guertas
todas, fraguadas leshos las unas de las otras.
Eran diferentes de las kazikas chikas kon una
sala abasho i una kamareta ariva konektadas
kon una eskalerika estrecha  i ke se topavan
serka del puerto.  Biviyan famiyas munchas
mas modestas en estas, al kontraryo de las
otras un poko leshos de la sivdad ke eran las   
moradas de las mas grandes famiyas de
Calatayud en Espanya.  Eran jente de ofisyo
ke aviyan reushido a tener sus negosyos i sus
aktividades en Smyrna tambien.  Aviyan
fraguado una de las mas ermozas Sinagogas
de Smyrna ande aviyan bastante Sinagogas,
mismo si no tantas komo en la kapitala Otomana.

Es en esta sinagoga ke Nisim Bohor Efendi i  
sus ijos ivan kada Shabat i rankontravan ayi
todos sus konosidos, sus klientes, su kunyado
Isaac Aboresi i el Rabino Rafael ke era uno de
sus buenos amigos.   El Hazan de la Sinagoga,
el Rabino Moshe Algrante, teniya una boz de
enkantar i era siempre un plazer de oyirlo.
Mordo se iva ido kuantas vezes kon Nisim Bohor
efendi, el padre de su aprometida, su palomika
blanka, Almendra de su korason.

Le aviya kontado esto todo en kamino a Eliyezer 
efendi ke lo oyiva kon atensyon i admirasyon.
Keriya muncho bien su patron mansevo dayinda
ma ke teniya la hohma de uno ke aviya bivido
los diyas de una vida entera.  Apresiyava la
konfiensya ke dava a sus hombres, su vayensya,
su saver, su justisya, i sus valores...  A sus ojos
no egzistiya persona mas respektavle i haham !
Dariya su vida por el, mismo dospues de si poko
de tiempo ke se konosiyan.  De si para si se
demandava komo esto puediya ser i se  
enkantava  de sus relasyones kon el i komo
aviyan puedido desvelopar ansina de amistad
en si poko de tiempo !  Eliyezer efendi, en
unos kuantos diyas solo se aviya trokado de
un hombre sin sentado en su aldikera,  
mendiyando para komer de su moso de agora,
Gabriel, durmyendo ambyerto kon los kavayos,
en un hombre poderozo, limpyo i bien vistido,
en karga de una grande karavana kon muy  
munchos hombres ke le abokavan  kavesa, kon
su espada i indo kon su kavayo alegramente
trotando allado de Blanca de Nieves i el
grande Patron...  Mordo le aviya echo
konfiensya lo mas kon entuisyon i porke era
judyo !  No saviya ken es Eliyezer de Galata !
Es vedra ke lo aviyan rovado de negra manera
i se aviya topado sin dingun konosido i sin
paras en Smyrna ets. ma  en Konstantiniye
las kozas teniyan una kolor diferente i por
seguro ke sorprezas asperavan Mordo a la
fin de este viyaje si todo se pasava bien.

De la otra vanda se estava akodrando de su
konversasyon kon Pavlo dospues ke Mordo
no se aviya del todo aserkado a la ideya de
tomar el manseviko kon eyos !  Le dueliya la
alma ma esto teniya ke ser komo Mordo lo
aviya desidado.  No es ke Mordo era negro i
no keriya ayudar al chiko,  ma se sentiya
responsavle de todo i todos i no puediya ni
deviya tener konfiensya en un ladron, un
mintirozo i un aventuryero !  Es kon estos
sentimientos ke lo aviya embiyado a Gabriel
para dizirle ke le keriya avlar. Kuando Pavlo
vino es el mizmo ke avlo en primero  :

-  Patron, es vedra ke el Sinyor no kere ke
venga kon vozotros  No ?

Lo aviya sorprendido de negra manera a
Eliyezer efendi ke se aviya sintido stupido
supito !

-  No es ansina enteramente Pavlo !  Ay reglas
en una karavana i no puedemos tomar kon
mozotros una kreatura de tu edad.  Es esto !

-  No es esto !  Ma ke seya !  Te entyendo a ti !
No es tu kulpa ni la de Gabriel !  No vos va
nunka olvidar i estuve muy bien kon vozotros
estos 3 diyas.  Te reingrasyo Patron.  Akodrate
del guerfano Pavlo por el diya ke puedremos
enkontrarmos de muevo.  Ken save !  Mos
enkontrimos una vez... Deke no la segunda ?

Eliyezer efendi sintyo una yelor en su espalda !
No estava komodo i era komo si esta kreatura lo
teniya entre sus manos !  No puido detenerse
de dar razon esta vez a Mordo !  Era haham
Mordo !  Este ladroniko teniya la miente de
una espada afilada ke puediya echizar una
persona kon una ekstranya personalitad !
Se kedo kayado gromelando palavras de
biyenestar al chiko, adios ets kuando Pavlo
se aboko i eskojo una piedra , lo miro soriyendo
a Eliyezer i kon todo su fuersa echo al aver
esta piedra, torno su espalda i se alesho de
su lado sin mirar atras.   "Ijiko de las kayes !"
penso Eliyezer sin estar muy seguro de lo
ke diziya !.... Se aprometyo de presto olvidar
esto i de no dizirle nada a Mordo.  Para kualo
avlarle de una koza ke no inchiya ni una avyana !

Es ansina ke Eliyezer efendi estava molinando
en su kavesa otra vez las kozas, alegre de ir
ande los Benzra para pasar un Shabat
maraviyozo kon una de las mijores famiyas
judiyas de Smyrna.  Se viya i se entendiya de
las palavras de Mordo ke los respektava muncho
a esta famiya i la amava muncho a su novyizika.
Estava seguro ke el solo buto de Mordo seriya
de terminar sus echos en la kapital i korrer para
vinir aki en Smyrna ande azeriyan ken sava
komo de boda alavada !  Eliyezer efendi se
aprometyo de akompanyar Mordo  atras a esta  
sivdad enkantadora para la boda si todo saliya
bien.

Mordo aviya tomado unas ropas de seda de una
grande valor de entre las kozas ke se estava
yevando para vender en Konstantiniye.  Una de
las ropas era blanka lavorada kon ilos de oro
i le aviya soriyido a Eliezer dizyendole :

-  Abba Eliyezer, pensas ke le va plazer esto a
 mi esuegra  para azer el fostan de novya de
mi  aprometida ?

-  No tengo visto ropa mas rika de esta mi ijo !
Komo no le va plazer ?  Me imajino ke la
Sinyorita Almendra sera kom'un anjelito aryento
de estas sedas maraviyozas en vuestra boda.

-  Su ermozura vale todos los trezoros del mundo
enjuntos.  Nada es bastante ermozo para mi
Almendra !

( a kontinuar kon Sharope)

 

 

- Copyright © sefarad.org - 1997 - 2017

Retour au site sefarad.org -