Accueil - sefarad.org

Almendra...parte 22

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte  22
 
Es Almendra ke koryo para avrir la puerta a
su bienamado !  Por este Shabat d'alkavo
antes mezes i mezes ke teniyan de pasar
leshos uno del otro, se aviya preparado komo
una novya para su boda !  Tanto,  ke Zeliha, la
serviente, le aviya dicho  :
 
-  Si te ve agora tan ermoza, tan rikamente
vestida, no va tener dinguna sorpreza el diya
de vuestro kazamiento porke no se puede
azer la persona mas bella de esto !
 
-  Grasyas Zeliha,  es porke me keres bien
ke me ves ermoza !  Ademas no te olvides
ke mi sinyora madre por segura ke va kerer
ke tenga un fistan de boda muy alavado i de
leshos mas riko ke este ke visto.  Ma es
vedra ke oy esto mijor preparada ke nunka
por Shabat !  Kije ke me yeve kon el en su
miente i no solo en su korason !  Ke se akodre
ke tiene una namorada ermoza i ke le importa
ser bien mirada por el !
 
-  Mi kerida... Lo vas a kemar por toda su vida !
I no solo kon tu ermozura ma  kon tu entelijensya.

Mordo, viendola kon sus kaveyos klaros
arrekojidos de la manera de una flor ensima de
su kavesa kon sien kokitas delgadikas  dekoradas
kon perlizikas chikas, sus grandes ojos de gato
ke paresiyan mas profundos kon la kohl de Arabiya *
http://en.wikipedia.org/wiki/Kohl_(cosmetics)
delikatamente sulinyando sus parparos i su chika
boka pintada de un korolado muy muy klaro, penso
ke teniya la vizyon de una belleza irreal delantre de
sus ojos.
 
Yevava un fistan rikamente brodado kon ilos de
kolor i de oro ke le kayiya de los ombros fina sus
pyes, deskuvriyendo sus kovdos fina sus
manos i su garganta fina de pasharo.  Su talya
estava metida en valor kon un  kushak  (sentura
de talya en ropa ancha, aboltada munchas vezes
en la talya, serviya de aldikera tambien) de kolor
turkiz de seda terminando kon pishkules ke
kayiyan fina abosho. 
 
A su mano el aniyo ke le aviya regalado su
apprometido kon las eskularichas de esmeralda
kon las mismas piedras ke su aniyo, la
asemejavan a una prinsesa salida de las agadas antiguas.
 
Mordo kedo mirandola sin pueder retirar sus
ojos d'eya.  Eliyezer tambien estava enteramente
sorprendido por tanta belleza.  Era inkreyivle...
Nunka aviya vido una mujer tan ermoza !
 
-  Bruhim Abayim !
 
-  Sinyorita Almendra esto muy honorado de
konoservos.
 
-  Ke seyash el bienvinido a muestra kaza.
Vinitesh a la hora buena.
 
-  Mi palomita, kedo sin boz delantre de tanto
ermozura !
 
-  Por favor entrad a kaza, no kedesh afuera..
Bienvinido Mordo efendi...
 
Sus karikas aviyan trokado de kolor i paresiyan
a las mansanas ke saliyanen los primeros
diyas de otumno, koloradas muy klaras, freskas,
duras, ke dvan ganas de moryer mas i mas..
 
-  Shabat shalom sinyorita Almendra,
bendisyones de los Sielos sovre vuestro
ogar bendicho.  Kero ke konoskas mi
kompanyero de viaje, Abba Eliyezer, un
hombre santo ke Di-o me embiyo kon Su
Alta Piyadad.
 
-  Enkantada de konoservos Abba Eliyezer.
Espero ke tendrash kaminos de leche i de
miel i puedesar toparash alguno ke va
viajar de Konstantiniye a Smyrna i puedra
dizirme ke todo esta bien i yegatesh sanos
i rezyos.  Estare mis ojos en los kaminos...
 
-  Mi amada, por seguro ke te embiyare mis
letras kada vez ke sera posivle de topar
un mesanjero i esperare lo mismo de tu
parte si tus ermanos o tu sinyor padre
tendran algun konosido ke viajera a
Konstantiniye.
 
Mentres ke estavan avlando asentados en
la kamareta de asentar en la mezika de la
kuala se aviyan metido sherbetes de
almendra, de roza i de uvas kon delisyozos
biskochos  muevamente salidos del orno,
sharope blanco, muezes, avyanas, uvas de
la guerta,  Almendra estava grasyozamente
inchendo los vazos para darles a bever.
Saviya  ke tendriyan muncha sed dospues
del kamino en el sol !  Justo en este
momento aviya entrado Klara Benezra para
saludar  sus envitados.  Los dos hombres
se alevantaron pishin  :
 
-  Shabat shalom.  Bienvinidos... No vos
dezrepozesh por favor.
 
-  Vos prezento sinyor Eliyezer, sinyora madre.
Es mi kompanyero de viaje.
 
-  Baruh aba sinyor Eliyezer.. A la hora buena..
Ke tengash kaminos  dulses i derechos.
 
-  Grasya sinyora Klara.  Mos vamos aprovechar
de vuestras bendisyones sin duvda.
 
-  Sinyor Eliyezer, ke Almendra vos mostre
vuestra kamareta.  Vash a topar todo lo
menesterozo.  Muestro hammam abasho
esta kayinte para vozotros i Mordo i dospues
vana entrar mi espozo kon mis ijos.  Tenemos
muncho tiempo para la entrada del Shabat.
Por favor sintivos en vuestra kaza. Arepozavos
bueno.  El pranso de Shabat sera pronto
kuando vash a tornar del kal todos enjuntos.
Esperamos, esta noche santa, a komer kon
mozotros a mi ermana Julya kon su marido
Isaac Aboresi i sus dos ijos.  Yo estare
arrepozandome un poko en la guerta.
 
-   Munchas grasyas sinyora Benezra.
Bendicha seyash por arresivirme kon tanta
buendad i korason ancho en vuestro
bendicho ogar !
 
-  Munchas grasyas sinyora madre.
Estaremos prontos kon Abba Eliyezer
para la yegada de mi sinyor padre i
keridos ermanos.
 
A la salida del hammam i dospues ke se vistyeron
por Shabat los hombres se fueron al kal.
Julya i Meri estavan kon eyos. Aviyan vinido kon
Isaac Aboresi justo a tiempo para salir todos
enjuntos dospues ke Nisim efendi aviya eksplikado
a su kunyado ken era Eliyezer efendi.
Nisim efendi i sus sinko ijos, Isaac Aboresi kon
Viktoriko, Mordo de Toledo i Eliyezer efendi fueron
resividos kon munchas honores en el kal. Todos
vinyeron a saludarlos i a konoser mijor el yerno
de Bohor efendi el sapatero. Lo estavan felisitando.
Kada uno keriya saver un detalyo i lo mas kuando
se iva azer la boda. Nisim efendi estava tresalido
de su yerno i estava kontando a ken lo keriya oyir
ke maraviya de karavana iva salir en kamino
el Alhad a la demanyana i ke haham de yerno ke
teniya, guadrado de nazar, o komo la aviya
konvensido a su espoza para ke deshe ir a su ija
a la kapital ets. Es justo a este momento ke
Samuel Abenyakar entro al kal kon su padre i
viendolo a Mordo se aserko de el. le suheto
Shabat shalom i lo abraso. Mordo tambien lo
abraso... Samuel le konto lo ke aviya pasado akel
diya kuando Mordo los aviya visto en la guerta kon
Almendra. Le konto sus amores kon Meri i ke
manera de feliz ke estavan kuando todo se aviya
aklarado i arreglado de la mijor manera para todos.
Antes del servisyo, Samuel efendi topo un minuto
de mas para dizirle a Mordo ke ivan empesar de
pronto a los aparejos de su boda kon Meri i ke
despues ke se kazariyan eyos, Mordo i Almendra,
seriyan enkantados de ir a vizitarlos en
Konstantiniye. Mordo le arrespondyo ke seriya un
plazer por eyos de arresivirlos ande eyos, kuanto
tiempo ke keriyan. Samuel lo reingrasyho muncho
i todos tornaron a sus lugares porke el servisyo
estava por empesar.
 
 
A la torna del kal tomaron todos sus lugares en el
entorno de la meza. FUE Nisim efendi ke izo el
Kidush.... Todos se abrasaron, los chikos bezaron
las manos de los grandes, los maridos reingrasyaron
las mujeres por todo lo ke aziyan para la famiya i se
metyeron a komer. Empesaron por la supa de gayna
komo kada Shabat i dospues todos los otros platos,
uno mas savrozo del otro ! Estavan alegres ma se
puediya meldar la tristesa en la kara de Almendra
i de Mordo, asentados uno allado del otro. Se
miravan en vezes kon una medya soriza i kuando
estavan seguros ke dingunos no lo remarkariya,
se davan las manos apretadamente, komo la mas
fuerte karesya ande todo el amor i el dezespero del
uno pasava al otro. Eliyezer efendi estava avlando
alegramente kon Isaac efendi i le estava kontando
su vida en Konstantiniye, el estado de los judyos en
la sivdad enkantadora, los privilejyos ke teniyan en
el saray del sultan, la manera ke el komersyo se
aziya, lo muncho de ajenos ke biviyan aya i komo
las rikezas puediyan trokar de mano en nada de
tiempo... De una parte estava alavando el sultan
por el justo ke era kon su puevlo i de otra parte
lo akuzava de siempre salir en guerra para ajuntar
mas tierras al emperyo, mas payises ke le davan
impuestos. Eliyezer efendi kontava ke Ibrahim
Pasha, el grande vezir del sultan, siendo un
donme el mizmo, protejava los derechos de los
minoritaryos i los de los kristyanos lo mas.
Diziya ke el payis se aviya enrikesido muncho
i el sultan era djenerozo kon los savyos, las
personas ke kontribuavan al progreso del emperyo,
a los grandes architektos ke fraguavan maraviyozas
meskitas, fuentes, hammames, hanes ets. Diziya
ke era un sultan alavado, grande de korason, komo
no se teniya visto en toda la historya, dayinda mas
grande ke su venerado padre, el Sultan Yavuz Selim !
Su madre era Hafsa Sultan, una judiya de Polonya
ke se yamava Helga i por seguro ke era muy
enfluensyado por eya. Una mujer de una
ekstraordinarya belleza i muy buena edukada en
el saray mizmo ande aviya entrado en sus dodje
o tredje anyos. Saviya todo lo ke se pasava en la
sivdad kon el intermedyo de sus eunukes pretos
ke se kastravan en Afrika antes de ser enviyados
a los grandes merkados de esklavos por ser
vendidos. Lo mas del tiempo los chikos no
rezistiyan a las dolores de la operasyon, a las
infeksyones i se muriyan antes de salir al kamino.
Eran muy bushkados en el Emperyo Ottomano
porke no siendo hombres, los maridos les puediyan
konfiyar sus haremes ande biviyan sus espozas
kon sus kreaturas, sus preferidas, las odaliskas
pretas i blankas, seya resividas komo regalos seya
merkadas en los merkados i todas de una
grande belleza. En el palasyo ande biviya el sultan
una armada d'estos, ke lo mas teniyan nombres de
flores, guadravan el harem, kudyavan ke todo este
en orden, ke las mujeres seyan bien servidas, ke
no ayga pletos entre eyas, ke se laven kada diya i
ke sigen al program de edukasyon en el palasyo
mizmo ke era la mijor eskola de mujeres ke
puediya ser. Por empesar las esklavas eran pishin
konvertidas al Islam en dandoles nombres ottomanos.
Deviyan ambezarsen la relijyon i la lingua, meldar,
eskrivir, pintar miniaturas o muzika, kantar, baylar
i sovre todo, saver komo komportarse kon el
uniko hombre ke puediyan renkontrar en sus vida,
el Sultan mizmo, el hombre el mas poderozo del
mundo entero ! Un amante ke de una mirada
puediya kavzar sus felisitad o sus muerte. El
palasya era un lugar ande leyes striktas eran
observadas i la obediensya al mas grande era
total por todos, a la eksepsyon de la Valide
Sultan, la madre del Sultan, el Padishah, el mas
grande de todos, el Khalif, la Solombra de
Allah en el mundo, el Duenyo de las siete mares
i siete partes del mundo, el Uniko a ken todo
apartenesiya, bienes i personas....
 
 
Todos estavan oyendo kon atensyon lo ke Eliyezer
efendi estava kontando de la kapital. En primero
lo kontava solo a Isaac efendi ma immediatamente
dospues todos empesaron a interesarsen i demandaron
kestyones ke Eliyezer efendi respondiya lo mas kon
justesya... Le afitava de egzajerar o ajustar
kozikas aki o aya  no por mintir, ma por dar savor i
interesar mas esta buena jente ke komparava
a las famiyas ke aviya konosido en Tarragona.
De una parte no se keriya akodrar de las noches
blankas ke pasavan kon el espanto ke kada momento
iva afitar lo mizmo de akeya noche kuando los
goyim se aviyan alevantado kontra los judyos i
kozas horribles aviyan okurrido ! De otra parte
se akodrava de sus juegos kon sus amigitos, la
plasa de la eglisya ande todos viniyan a pasear
los Alhad en la demanyana, kon vistidos ermozos,
todos soriyendo, famiyas enteras enjuntas i no
solo los hombres komo ande eyos ! Eliyezer amava
entrar en la eglisya i ver las seremoniyas ma
nunka trokariya de relijyon. Esto era sierto !
I ke afitariya si su sinyor padre se entregava
ke entrava en la eglisya i aziya todo komo los
kristyanos ayi ? Lo espedaseriya ! Ma el
saviya en su fondo ke no lo aziya porke kreiya ke
el hombre krusifiado ensima de l'altar era Di-o !
No ! Hasve Shalom, saviya ke es una statua
simplamente echo por mano de hombres i era
defendido para el, un judyo, de adorar una statua !
Su padre le aviya ambezado ke sus Di-o aviya
dicho ke era una aborasyon de adorar statuas de
madera o de barro i ke no se deviya asemejar a
nada su santo rostro! Ma esta era muy ermoza !
I las otras tambien eran ermozas ma no komo
la grande ensima de l'altar. Eliyezer era fasinado
de ver este hombre enklavado ke todos adoravan
komo Di-o kon una grande adorasyon. Unas kuantas
vezes i a el le aviya salido de su boka dezeos
innosentes ke aviya demandado al Dio de los
kristyanos i lo mas ermozo es ke se aviyan
realizados ! Lo aviya reingrasyado a la statua
azyendo komo los grandes, a rodiyas, kruzandose
i todo ! Oy si su padre lo viya, lo iva mashkar
bivo entre sus dientes !
 
Se aviya fuyido i nunka metido los pies en la
ermoza eglisya un diya ke el saserdose aya, le
aviya demandado ken eran sus paryentes i deke no
los viya !... Guay guay de el ! Ni ke le aviya
respondido ! Korrer leshos para ke no lo apanyen
era la unika koza ke le importava en akel momento !
Le dueliya solo ke no iva ver mas este Dio
enklavado i tan bueno !
 
Otros rekuerdos le kemavan el korason tambien.
Se iva akodrar toda su vida del diya de los
funerayes de su nonika, tan buena i tan dulse
kon el. No se enfasyava de kontarle su propriya
chikez i los kuentos ke le kontavan a eya kuando
era chika.
 
Agora era su torno de kontarles a sus keridos inyetos.
Era una de las mas ermozas de su puevlo i Eliyezer
efendi dayinda teniya enfrente de sus ojos komo se
vistiya i se pinchava las karikas fina ke se agan
koroladas antes de ir a las fiestas i a las bodas....
La nochada se eskapo komo kada Viernes a la tadre
en la kamareta de meldar de Nisim efendi. Los
hombres se fueron kon alegriya a lo ke les plaziya
i las mujeres se asentaron para diskutir esta vez,
la boda de Almendra dospues de mueve mezes.
Meri i Almendra se estavan mirando savyendo ke
antes de la boda de Almendra kon Mordo ivan a
fiestar la boda de Meri kon Samuel efendi...
El diya de Shabat paso en nada de tiempo por
Almendra i Mordo. Al ritorno del kal, dospues de
la seuda de Shabat, Mordo aviya prezentado a su
esuegra las ropas ke aviya trushido un diya antes.
Klara no kreiya sus ojos de la ermozura de estas
ropas rikas i de tanta valor !
 
- Son mis regalos a mi apprometida Sinyora Madre.
Pensash ke este blanko kon ilos de oro puedriya ser
uzado por el fistan de novya ?
 
- Mordo ! Estos son un trezoro ! Nunka tengo visto
ropas tan ermozas. Mismo las prinsesas no tienen
fistanes kon ropas tan ermozas. Por seguro ke le
vamos a azer de este blanko el fistan de novya !
Ken save komo te va plazer akel diya !
 
- Esto feliz de oyer vuestras palavras. Grasyas.
En mis ojos no egziste mas ermoza de Almendra,
sinyora Madre, i no por los fistanes ke se viste,
ma por lo ke le dyo el Di-o kuando nasyo i
su korason ke es mismo mas ermozo ke su kara
de anjelos.
 
Almendra estava oyendo todas estas palavras ke
estavan dichas komo si eya no fuera en la kamareta !
 
- Grasyas Mordo efendi por vuestros regalos. Son
muy apresiados de vedra. Va ser mi plazer de vistirme
akel diya kon lo ke me regalatesh mismo si eran las
mas proves de las ropas.
 
- Son fortunados de ser plazidos por vozotros mi amada.
Espero pueder siempre arregalarvos kon ermozos regalos.
 
- Tengo todo lo ke nesesito kon su demasyado Mordo
efendi...Es vuestro kudyado i el plazer de tener ensima de
mi lo ke me trayesh ke me aze felis.
 
- Vos kudyare siempre i serash la korona de mi kavesa i
de mi kaza sinyorita Almendra.
 
Klara embiyo ariva las ropas para l'ashuar de Almendra
kon Zeliha. Karamela las estava mirando a kada uno
kon grande interes komo si keriya saver kualo se estava
pasando en esta kamareta !
 
- Almendra, mi ijika, komo te vas a espartir de tu gato ?
Pensates a esto ?
 
- No lo vo deshar kerida madre ! Karamela se va ir a
Konstantiniye kon mi si mi espozo lo permete..
 
- Komo no mi kerida ! Puedrash azer todo lo ke keresh
en vuestra kaza i todo lo ke vash a trayer va ser yevado
kon el mas grande kudyado fina muestra morada.
 
- Grasyas, munchas grasyas mi sinyor. No teniya dudas.
 
- Presyoza i mazaloza Karamela !
 
- Siempre lo fue madre kerida. No ?
 
- Si por seguro ke lo fue ! Komo no !
 
Mordo la estava mirando kon una grande kerensya.
Almendra estava komo siempre jugando, tokando
i aboltando en su dedo su aniyo de esmeralda,
regalo de su apprometido. A vezes, lo keriya sintir
mismo mas serka de eya i yevava el aniyo a sus
mushos, lo bezava...
 
Motsaey Shabat, dospues de la avdala, todos se
echaron sin tadrar muncho para ke Mordo i Eliyezer
puedan arrepozarsen antes de salir en kamino a
l'amaneser.
 
 
(a kontinuar kon Sharope)

- Copyright © sefarad.org - 1997 - 2018

Retour au site sefarad.org -