Accueil - sefarad.org

Almendra...parte 23

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;


Parte   23
 
 
Kuando Roksana yego a la kaza ande su madre
estava engrandesyendo sus tres kreaturas, fue
arresivida por los gritos de su ija ke s'echo a sus
brasos !

- Mama, mamita, saves ken vino para mi
aniversaryo ?  Papa !  Estava kon mozotros, ma no
me dyo su regalo porke le demandi "Ke me trushites ?"
No saviya ke no se demandava !

- Mis chikitikos.... Mamita esta aki !  Vinid a mis
brasos...

- Mami... Mami
- Mamita.....

- Felis aniversaryo mi anjelito.  Te vere siempre
riza en tu karika.

- Grasyas mamita ma ke manera de aniversaryo
es este ?

- Porke lo demandas ansina Maribella ?
- Nada !
- Komo nada si lo demandates ?
- Granmamita me disho ke no se dize !
- Dimelo a mi oreja i no se lo vamos a dizir a eya !
- Seguro ?
- Si por seguro !
- Yo no resivi regalos de dingunos !

- Porke ?  Dayinda ni empeso tu aniversaryo !
Aspera kon pasensya i veremos si vas arresivir o no.

Kuando los chikos se fueron a jugar entre eyos
Roksana korya a la kozina ande estava su madre,
la abraso i le demando sovre Pietro, el padre de
sus ijos, kontandole  ke era Mirabella ke se lo disho.

Donna Franseska le asiguro ke nada de negro
afito i  Pietro se estava tornando a Venezia.  Estava
muy triste i kijo ver sus kreaturas.

- No me kijo ver a mi ?

- Si por seguro ma lo konvensi ke se vayga
dizyendole ke ansina es mijor.

- I se konvensyo !

- Si mi ijika ! No vaygas mas pensando en esto...
Todo se enderecho

- Kuryozo !

Supito se oyo las bozes de los perros arrazgando
el kalmo de las guertas de serenitad de la villa.
Esto era un sinyo ke aviya jente deskonosida en
la guerta de entrada.    Roksana soriyo i se alevanto
para avrir la puerta de fierro entre la guerta prensipal
i la grande guerta de la entrada al territoryo
ande se topavan los perros.  Lo aviya
pensado ansina para ke sus keridos seyan en mas
sekuritad.  La kaza no se puediya ver de la kaya. 
Sus kreaturas estavan allado de eya. 

Dos hombres estavan asperando para verla i
teniyan allado de eyos un kavayo maraviyozo !
Roksano los saludo.  Los hombres desharon el
kavayo sin akseptar dinguna moneda.  El tiempo
estava demasyado kaynte i parese ke se estavan
indo a sus kazas.  Roksano los reingrasyo entre
los gritos de sus kreaturas lokitos de eksitasyon
de ver este regalo somptuozo de reyes en sus
guertas !  Un kavayo tan ermozo para eyos !
Roksana estava medya ezmayada de plazer de
ver sus ijikos tan kontentes.  Se felisito otra una
vez de si para si por aver pensado a este regalo.
Nada mas de esto puediya plazer a sus kreaturas
engrandesidos kon el amor de los animalitos.
Kaliya pensar agora a trayer un mansevo a kaza
para ke se okupe de este kavayo i les ambeze
a los chikos komo ser buenos kavalyeros.

Se aviya ido ande un  "buen amigo"  suyo ke
merkava i vendiya kavayos de alta kualitad
a los sinyores ke viniyan mizmo de las
provinsyas leshanas para esto.  Lo konosiya
de muncho tiempo  i saviya ke le paseriya
la palavra si le diziya ke keriya el mijor kavayo
para eya, ademas no pensava del todo ke
se lo iva regalar ..  No le mankava dinero a
Roksana i estava pronta a pagar el presyo del
kavayo lo ke siera.  Ma, no lo puido konvenser
i tuvo ke akseptar el kavayo ke un regalo de
su amigo.

-  Ke es su nombre mamita ?

-  Es vozotros ke le vash a meter su nombre
MIrabella i sos tu ke vas a eskojer un nombre
para el porke es tu fiesta, mismo  si es mi
regalo para ti i tus ermanos en mismo tiempo.

-  Komo lo yamaremos ?
-  Si komo lo yamaremos ?
-  Lo yamamos Roko ?
-  No !  Anjel de los kampos ?

Les toma horas para desidar el nombre del
kavayo ke se viya muy kontente kon toda esta
yerva en su entorno, libero en una grande
guerta i estos chikitikos ke lo karesavan.

Estavan tan eksitados ke ni kijyeron komer
las komidas savrozas i la ermoza torta ke
Donna Franseska aviya preparado por la fiesta,

- Mamita, desidimos del nombre de mi kavayo
i es yo ke le di su nombre !

-  Si ? I komo lo vash a yamar i MIrabella, este
es i sera el kavayo de tus ermanos tambien !
No lo olvides.

-  Si.,..Si lo se !  Ma yo le di su nombre !  Lo vamos
a yamar   Sol de Invyerno porke briya i mos kayinta
el korason komo el sol.

-  Sol d'Invyerno !  Muy poetiko i ermozo Mirabella.
Te felisito.  Le vamos a trayer un Maestro a Sol
para ke lo mire i vos ambeze a ser sus amigos.

Akeya noche todos sonyaron suenyos kon Sol
d'Invyerno.

Roksana  se fue direktamente a la kaza de su
amigo ke le regalo el kavayo kuando desho sus
keridos en el kalmo de su paradizo eskondido,
kon los perros i Sol d'Invyerno ke se aviya ajuntado
a eyos.

-  Roksana !  Ke maraviyoza sorpreza de verte mi
kerida !

- Grasyas Yanko por el kavayo otra vez.  Tus
hombres refuzaron de ser pagados.

-  Olvidate de esto !  Estas kontente ?  Es esto
ke kero oyir !

-  Si si muy kontente.  Estas okupado ?
-  Noooooooo !  Ven tomaremos una kupa enjuntos.
Tengo vinos ke guadro por okazyones spesyalas
i esta es una fiesta !  La mas bella de las bellas
de Smyrna entre mis brasos i vino a vijitarme
porke lo kijo !

Yanko kita las kupas i el vino presyozo d'Espanya
merkado del nave de Alphonso de Avilar, un
pirate Espanyol ke aziya tremblar los mas
vayentes kapitanos de las naves aunflando sus
velas en la Mar Mediterrannea.

Yanko travo Roksana a su lado i la asento ensima
de sus piernas.

-  Bevo a la salud de mi reyna, la ke me
emborracha sin mizmo bever !

-  Salud Yanko !

-  Te plazyo el vino ?  Kome de estos kezos
tambien.. Es yo ke los ize aki.  Te aseguro ke
meresen  tus komplimentos.

- Grasyas Yanko !  Si. Son muy savrozos.  Tienes
siempre los mijores produktos i tengo suerte de
ser tu amiga.

- Sos mi reyna Roksana !  Solo aksepta i mos
kazamos la semana ke viene !  Todo lo miyo sera
tuyo i te prometo ke nunka lo vas a regretar.

-  Lo se mi presyozo Yanko !  Te reingrasyo para
todo  i todas tus buendades ! Sos un grande
Sinyor i mereses lo mijor.  Yo so nada mas ke
una aventuryera i nasi por mi libertad !  No
tolero apartener a un hombre, a dingunos !
Ago lo ke me pasa por la kavesa.  No penses a
esto !  Ven gozaremos de la vida lo ke puedamos.
A kualo mos sierve pensar a las manyanas ?  Ni
savemos si tendremos vida o no i fina kuando...
Es el momente prezente ke konta !

-  Sos una echizera..  Te kero tanto... Te amo tanto !

Yanko tomo la kupa de vino ke la mano de
Roksana deteniya,  la pozo ensima de la mezika
basha a sus lado i empeso a karesarle sus largos
kaveyos  kolor de flama, kon los dalkavos
rayos del sol ke entrava por la chika ventana de
la kamareta....  Sus grandes ojos vedres lo miravan
kon pasyon.  Yanko era un ermozo hombre de unos
kuarenta anyos, mostrozo i poderozo... El uniko
tipo de hombre ke le plaziya a Roksana !   Era
enkapache de namorarse dospues de su negra
eksperyensya kon Pietro, su marido ke aviya
abusado de eya kuando teniya katorze anyos i
se aviya kazado kon el porke aviya kedado prinyada.
Dospues del primer ijo, el segundo i por kavo su
ija aviyan nasido.  No teniya dainda ventisinko
anyos i era madre de tres kreaturas kon el grande
ijo ke ya teniya dies anyos !

Soriyo akodrandose de sus alegriya kuando
aviyan vido el kavayo en sus guertas.  Serro sus
ojos i aksepto el largo bezo de Yanko enflamado de
dezeyo por esta mujer unika en su tipo.
Un anjelo o el diavlo mizmo ?  !!!!

Kayeron enjuntos ensima de los grandes kavesales
de asentar ensima de la estrada basha en los
bodres de la kamareta.  Sus respirasyon se aviya
akselerado debasho de las karesyas i de los bezos
de mas en mas appasyonados.  Roksana en su
lusides keriya regalar una tadrada inolvidavle
a Yanko ke era tan bueno i tan presyozo para eya...
Se dezvistyo eya mizma por el ke no puediya
kontenirse delantre de tanta belleza.  Se amaron
sin limitos kon toda la fuersa de sus manseves
i ni ke se dieron kuento ke la noche aviya tan
avansado !

Estavan muertos ambiertos kuando se alevantaron
i koryeron enjuntos kon alegriya a la kozina para
travar los panizikos ke la serviente de Yanko
aviya preparado la demanyana.  Nunka se ivan
olvidar kon ke savor se las aviyan komido kon las
sarsichas enkolgadas ke aviyan asado enjuntos
en la guerta, debasho de las miles de estreyikas
ke briyavan  komo sus ojos ....

A la demanyana Roksana estava kaminando
en las kalejas vaziyas dayinda de Smyrna.
Su paso alegre i la soriza en su ermoza kara
eran testigos de su buena humor !  Aviya pasado
una noche inolvidavle kon Yanko.  Una noche de
gratitud, de amor, de amistad i de plazer...
Ke mas ?  Reingrasyo el destino de averle metido
en su kamino  este hombre tan bueno, tan generozo,
tan poderozo i tan atraktivo...Yanko era para Roksana
un ermano, un amigo, un padre, un namorado i un
puerto d'abrigo.  Lo amava a su manera, dandole
muncho mas importansa de todos sus "amigitos".
Una manera de respekto, sin olvidar la flama ke
kemava sus puerpos kada vez ke se enkontravan.
Roksana konosiya el plazer del amor en todas sus
formas.  Un hombre ke l'aviya konosido por una
noche nunka se puediya olvidar ni de sus miradas,
ni de sus bezos i ni de la manera total ke saviya
entregarse a los brasos de su namorado de akeya
noche.  Vibrava intensivamente a las karesyas i
todos sus namorados teniyan la impresion ke eran
el uniko en la vida de esta maraviyoza mujer i ke
se aviya, de vedra, enamorado de eyos, ke eyos
solo puediyan prokurarle un tal plazer, ke eran
echos el uno para el otro i ke no puediya egzistir
una harmoniya mas perfekta en la kama  !  Son
por estas impresyones ke saviya dar ke aviya
yegado a tanta rikeza.  Le plaziya jugar kon la
kuantitad de las piesas de oro i de las piedras
i perlas presyozas ke guadrava un poko en kada
lugar eskondido de su kaza, su nido de amor, no
leshos del puerto, ande las "ijas" de los marineros
moravan.

Su kaza era muy simple, kaji prove !  Una koza muy
importante ke la diferensiya de las  "otras"  era
la limpyeza a lakuala dava tanto importansya en su
vida.  No teniya amigitas en este serklo porke era
diferente de eyas.  La metiyan aparte por su
intelijensya remarkavla, su ermozura i su
"profesyonalitad".  La importansa ke dava a su
puerpo i a su entorno era deskonosida de las
"estreyas del puerto"  komo las yamavan los
marineros.  Estas, la veneravan i saviyan no meterse
en su kamino porke era la "reyna" sin korona del
puerto.  Su fama se aviya ekstendido en los tres
kontinentes i los marineros saviyan ke kaliya ser
muy  "espesyal"  tambien para pasar una noche
kon eya i ke el oro no teniya ke un rolo segundaryo.

Tadre la noche, antes de kedarsen  durmidos en los
brasos el uno del otro, Roksana le aviya demandado
a Yanko si konosiya un muchacho ke pensava
engajar para kudyar Sol d'Invyerno, su muevo trezoro.
Yanko , komo todos los otros, no saviya nada de la
vida eskondida de Roksana, de la egzistensya de
sus ijos ets..  Roksana se aviya ambezado en su
profesyon, de avlar lo manko posivle d'eya, de sus
konosidos i de personas en jeneral !  "Boka serrada,
manos avyertas, sorizas i ermozura "  era su deviza
i la yave de la reushitad en su vida.. 

- Konosko uno !

le aviya respondido Yanko i kontinuo ...

- Es un mansevo muy joven.  Deve tener puedeser
unos kinze anyos, no mas !  No tiene dingunos en
la vida.  Es un muchacho muy intelijente i por el
kual puedo dizir ke no ay mijor d'el para mirar i
dresar kavayos.  Es un mirakolo la manera ke se
entyende kon eyos !

- Ande lo puedo topar Yanko ?  Lo kijyera engajar
por Sol d'Invyerno.

- Es a esto ke estava pensando justamente ! La
dalkavo vez ke lo vide me aviya dicho ke se keriya
ir a Konstantiniye i ke aviya justamente una karavana
ke deviya meterse en kamino en poko tiempo para
la kapital.  Kontava salir de la sivdad kon eyos.
Pietro es su nombre...

-  Pietro ?!!!!

-  Si.  Oyites de el ?  Se dize por el ke es un
ladron i un minitirozo !  Kale ke lo sepas i
esto !  Es alto i bruno, parese bien alimentado
ma kale embiyarlo al banyo kaynte i trokarle
los vistidos !

Roksana estava riyendo...ESte chiko kale ke lo
lograra !  Estava segura ke era el mansevo ke le
kaliya.  Este i no otro !  Sus entuisyones eran muy
fuertes i una koza le diziya ke este Pietro,
( i pensava trokarle de nombre el mas presto
posivle !)  era absolutamente el mansevo ke
nesesitava por sus kreaturas i eya, i no solo
para kudyar i dresar  Sol d'Invyerno  !

Roksana estava pensando a la konversasyon ke
aviya tenido kon Yanko antes de durmirsen por
unas kuantas horas... No saviya si lo topariya
ma por seguro ke azeriya todo su posivle....
Ya se aviya metido esta karavana en kamino ?
Puedeser ke Pietro estava kon eyos ?  Si lo
puediya enkontrar, lo konvenseriya a no ir i
kedarse en Smyrna... No teniya duvda ke puediya
lograr todo lo ke keriya de kualker manera ke
seya.... Mismo uzando una de las yaves del
sukseso en la vida... "La mano avyerta !" 
El oro teniya siempre razon....

Tomo el kamino ke entornava las kazas estrechas
serka del puerto.  Se estava dizyendo ke le iva
azer fraguar una chosa allado de ande iva kedar
Sol d'Invyerno.  La guerta d'entrada era un
lugar maraviyozo para esto.  Muy grande, kon
agua freska en el pozo i lugar mismo para sembrar
verduras, ande se topavan los arvoles de fruta i
unas kuantas vinyas ke Donna Franseska uzava
para azer unos kuantos bokales de vino para las
fiestas.  Lo importante era de toparlo ! 
Entro al Han ande las ijikas de los marineros
se enkuentravan para ganar klientes i atarsen
de amistad las unas kon las otras.  Lo mas eran
gregas, , albanezas, jenovezas i
tambien cherkesas a vezes.  Eran nombradas
por sus ermozuras ma lo mas eran hazinas i
disparesiyan komo viniyan, no se save ande,
dospues de lavorar dos, tres anyos en los
puertos.  Roksana lo saviya i es por esto ke
buyiya yervas ke la protejavan de las hazinuras
i se lavava kada diya, koza a la kuala no se
dava importansya entre los kristyanos.  Saviya
ke los muzulmanos se lavavan a kada vez ke
aziyan el amor i ke los judyos se lavavan los
Viernes.  Teniya tambien klientes de los judyos.
Eran hombres intelijentes i kultivados lo mas.
Aziyan muncha atensyon para ke sus vijita no
se supyera por dingunos i Roksana era konosida
por yevar los sekretos fina la tomba.  Eran
jenerozos i la respektavan.  Los albanezos i
los janisaryos Otomanos eran los mas eskasos
ma kon loskualos se divertiya lo mijor !  Eran
ambiertos de mujer i si no saviyan pagar bien,
saviyan renderle miliun servisyo ke nesesitava
a vezes.

Tan presto la demanyana, no aviya dingunos
dayinda en el Han.  La puerta estava avyerta
ma la serviente no se viya.  No le plaziya a
Roksana eskapar el tiempo fina el medyo diya
en la kama.  Preferiya kaminar al bodre de la
mar kuando todo estava kalmo, sin dingunos
i naves de kolor durmiyan trankilamente, attados
kon kuedras o kavenas pezgadas a las kolonas
bashas ma muy solidas del puerto.  Eran tan
innosentes estas naves deshandosen kunar
kon las dulses brizas del enverano de Smyrna !
Komo si no fueran eyas ke arreventavan fuegos
en la mar, attakando otras naves enemigas,
arrankando los ke estavan aryento para venderlos
en los merkados d'esklavos, rovar todo lo de
valor, matar los ke keriyan defendersen ets...
Aviyan naves ke transportavan jente i produktos
simplamente i ke ivan de puerto en puerto,
dinyos, ma kon hombres ke saviyan kombatir
i defender sus bienes si el kavzo se prezentava.
Lo mas de los kapitanos se konosiyan i se
respektavan seyan piratos seyan komandantes
de naves merkantilas.

Roksana amava la golor de la mar i asentarse
kuando se kansava ensima de una roka de ande
mirava el horizonte, sonyando al verdadero
amor..   Lo konoseriya un diya ?  Eya ke jugava
kon el amor i era una maestra, nunka se aviya
enamorada !  Kual iva ser su destino ?  Ke la
asperava mas en la vida ke no konosiya dayinda ?...
 
*

El diya de Alhad a la demanyana muy demprano
todos los ke se topavan en el koNak de los Benezra
estavan en pies.  Viniya de amaneser a penas i
ya se oiya de la kozina los bruidos a loskualos las
orejan ya eran akostumbradas.  Los pasos se oiyan
tambien en todas las partes del konak.  Arriva en
las kamaretas, en las eskaleras, en las salas abasho.
Mizmo de ande los kavayos se topavan, kuryozamente,
les yegava el relincho de Blanca de Nieves, komo si
keriya espertar Mordo de su esuenyo, komo si ya
saviya ke el grande diya  aviya yegado ! 

Un grando sako yenno de de borekitas, boyos,
biskochos, pitas, pan d'espanya, pasteles de
varios tipos se aviya aprontado allado de la
puerta d'entrada del konak.

La meza estava pronta kon leche buyendo, dulses,
pan fresko i manteka, burekas, kezos i gueyvos
haminados, frutas de la guerta i la domat mundada
i kortada en kuartikos, kon azeyte de oliva i
asezonada kon espesas venidas del oryente.

Nisim Bohor efendi estava muy eksitado.  Se estavan
preparando a kitar al kamino el apprometido de su
unika ijika kon la enorme karavana para yegar, kon
bueno, a la kapital del mas grande emperyo del
mundo.  Una karavana kon rikezas fabulozas de mas
de sinkuenta kavalyeros i kuaji el mismo nombre
de gameyos kargados de los trezoros i de todo lo
ke puediyan tener de menester en kamino.

Almendra estava tratando de guadrar sus lagrimas
i su kara blanka en pinchando sus karikas.  Se
aviya vistido del fistan roz ke yevava la primera
vez ke se aviyan visto !  Sus largos kaveyos estavan
arrekojidos ensima de su kavesa i kayiyan en
buklas libres ensima de sus ombros.  A su dedo
briyava la splendida esmeralda ke Mordo le
aviya regalado kon las eskularichas asemejantes.
Paresiya a una prinsesa salida de akeyas lejandas
ke las nonas kontavan a sus inyetizikos antes de
durmir.  Deviyan espartirsen para aunirsen dospues
de mueve mezes, otra vez, i ser felises fina la fin
de sus vidas, dospues de una ermoza boda ke su
sinyora madre iva aprontar en pensando al mas
chiko detalyo i kon kantes i alegriya.  Eya  mizmo
aviya inchido los kuvos de agua, metidos a la
entrada de la guerta.  Todos los ivan a vazyar en
el kamino kuando los kavayos i sus kavalyeros
ivan a salir del konak.  Una vieja kostumbre para
ke los ke se van tornon presto atras i ke tengan
kaminos avyertos i mazal bueno.

El sol no se aviya dayinde alevantado kuando
todos se arrekojeron al doroedor de la grande
meza en la sala...

-  Sinyorita Almendra, no tenemos menester del
sol kuando vos vemes ansina a la demanyana
tan bella ke se ensyegan los ojos para toda otra
koza..!


-   Me enkuentro triste mi dulse Amigo !  Es mi
korason ke segna, todo en savyendo ke kale ke
vos vayash para ke mos topemos otra vez para
siempre.

-  Lo prometo.  Vo boltar i serash mi adorada
espoza, la reyna de mi kaza i de mi korason, la
madre de muestros ijos, kon la voluntad del
Todo Poderozo.

-  Mordo, mi yerno kerido ! Estash prontos
todos para dezayunar ?  Asentavos !  Ah
Klarika ! Ke savrozas kozikas ke aparejatesh
esta demanyana !  Sinyor Eliyezer, durmitesh
bien ?  I tu mi ijika ?  Te veygo palida ..
Kome domat i ke te se agan koroladas tus
karikas mi presyoza... Pasame el jarro de
leche aki !  tengo ambre yo !

Dezayunaron kon grande alegriya i Mordo i
Eliyezer fueron muy sorprendidos de ver ke
un grande sako de biskochos i kozas savrozas
se aviya preparad para eyos, para ke se los
yeven kon eyos i se los koman dospues,
en kamino.

Aviyan tan inchido sus estomagos ke no
kreiyan ke puedriyan komer de muevo antes
el diya sigiente... Solo frutas puedeser !

Mordo abraso a kada uno de los ermanos de
Almendra i dyo unas kuantas piesas de oro
a la servienta, Zeliha, para todo la pena ke
aviya tenido, kudyandolo durante el tiempo
ke kedo en el konak.  Bezo las manos i tomo
las bendisyones de Bohor efendi i de su
senyora, Klara.  La tomo en sus brasos a
Almendra i le dyo un bezo en su frente,
dizyendole a la oreja  :

-  Te amo, te amo, te amo...   Asperame..
Roga para ke todo salga bien mi amor, mi
trezoro... Ke el Kadosh baruh Hu  seya kon
ti i kon mi i ke en pronto mos auniremos
sin mas espartisyon...

-  Kaminos de leche i de miel mi amado !
Vate a la hora buena i torna a Smyrna  sano
i rezyo komo lo dezea mi korason !
Adios mi Amigo...Mordo... Te amo !

Dospues Almendra le dyo un bezo en la kara
de Blanka de Nieves i la kareso murmurandole

-  Blanka de Nieves, te entegro todo lo ke
tengo de mas presyozo.  Kudyalo al presyo de
tu vida i ke tengas muncho mazal en kamino....
Suerte a los dos !

Elyezer les disho a todos  "Adios" ...Lo
embiyaron tambien kon palavras dulses de
grande amistad. 

Los ke kedaron vazyaron la agua de los kuvos
detras de los pasos de los kavayos ke
estavan repozados, artos i kon grande keyf
para el kamino.  No se tornaron para saludar
en sinyo ke no estavan amargos de partir
ma teniyan la kreensya ke todo iva salir bien
i era para el bueno.

Klara abraso su ija i tomandola por la talya
la entro en kaza.

-  La flor de Mordo !  Mueve mezes pasan
presto mi ojo preto...I.... Estaremos muy
okupadas tu i yo i todos para tu boda...
Ven kon mi mi alma....

*

En el kampo en frente del konak del Bey 
los gameyos ya estavan kargados i los
hombres los asperavan ensima de sus kavayos.
La karavana estava pronta para meterse en
kamino i Gabriel a sus kavesa aviya aparejado
todo de la mijor manera.  Los hombres lo
respektavan i admiravan la buena i justa
persona ke era, su saver i su amistad para
todos. 

Mordo i Eliyezer fueron arresividos kon gritos
de viktorya i alavasyones.  Se metyeron en
kamino kon el shofar ke Mordo suono.
Gabriel estava indo el primer kon los hombres
de Mordo a sus lados.  El ensinyo de Mordo,
una chika bandyera triangulara kon la estreya
de David, los dos sables otomanos  i los
sinyos enlasadas de su nombre MDT  Mordohay
de Toledo en letras arabas, estava yevado  por
un albanezo indo  al paso  detras de Gabriel.
Las personas ke enkuentravan en kamino se
kedavan i los saludavan kon grande respekto
i admirasyon.

Mordo kedo atras i los desho avansar.  Se dirijo
al konak del Bey para espartirse de el i
reingrasyarlo para su hospitalitad a sus hombres
i todo lo ke aviya echo por el.  Le disho ke su
kaza estariya siempre avyerta para su grande amigo
kuando se iva topar en Konstantiniye i le disho
tambien ke se aviya apprometido kon una
sinyorita de su relijyon i kontava boltar a Smyrna
dospues de mueve mezes si todo iva bien para
su boda.   El Bey lo felisito i lo bendizyo.
Kuvos de agua se echaron detras de Mordo kuando
se abrasaron kon el Bey i Blanka de Nieves se
metye en kamino, galopando enerjikamente para
ratrapar la karavana.

El sol se aviya eskondido detras de las nuvlas
grizas, el ayre estava fresko esta demanyana del
7 de Augusto 1560.

(a kontinuar kon Sharope)

- Copyright © sefarad.org - 1997 - 2017

Retour au site sefarad.org -