Accueil - sefarad.org

Almendra...parte 24

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte   24
 
 
En los koridores del Harem del Palasyo de Topkapi
en Konstantiniye se estavan oyendo los gritos de las
mujeres, unas dando ordenes, otras yamando a los agas
en kargo de las mujeres del Harem.
 
Las muevas vinidas, traumatizadas dospues de  largos
viajes en mar kon tantas restriksyones i vendidas en
kondisyones desgrasyadas  en el merkado de esklavos
de Konstantiniye, tratavan de eskondersen para ke los agas
no las maltraten por no entender dayinda la lingua i no saver
kualo azer si les demandavan una koza ! 
 
Los bruidos i las boz de las mujeres resitando versetos del
Koran viniyan de ariva ande se topavan los kuartos de las
gozdes  (las mujeres ke aviyan konosido la honor de la
kama imperyal),  las hasekis  (gozdes ke aviya dado kreatura
al Sultan)  las sultanes, ermanas i ijas del Sultan i la Valide
Sultan, la reyna del Harem, la madre del Sultan.
 
Las Cariyes (djariye /odaliskas), las Kalfas  (las mujeres en
karga de ambezar todo lo ke se nesesitava de saver en el
Palasyo a las muevas vinidas) i todas las otras mujeres de
servisyo i de profesyon, las kantaderas, las bayladeras, las
ke se entendiyan de medisina i las komadres, las ke konosiyan
los sekretos de las yervas, otras ke kuziyan los vistidos i 
brodavan, las ke tisavan ropa i tapetes dirijadas por las
Kethudas, akeyas ke se okupavan de la norseriya imperial ke
puediya alkansar fina kuarenta kunas (!) en mizmo tiempo,
las ke eran en karga del hamam i de la limpyeza, del mirado
i de la ermozura de las mujeres i otras kargas sin fin en el
Harem, teniyan sus kamaretas i salas komun en el primer
etaj/kat.    Es de este kat ke viniya munchas  vezes gritos de
arazgar los oyidos !  Los gritos de las djariyes aaharvadas,
torturadas i mizm aogadas si se pensava ke lo meresiya ! 
Lo mas eran viktimas de las sultanes, kadines o hasekis
ke se selavan de una enemiga potensyal, mas manseva,
mas ermoza i ke aviya attirado de una manera las grasyas
del Sultan.  A vezes eran las aguas profundas de la Mar
Marmara ke las attirava a eyas porke las echavan
emburujadas aryento de un sako attado a una piedra
pezgada.  Lo mas kuando kedavan prinyadas !  El primer
ijo nasido era el ke iva asuvir al trono dospues de su padre,
ma,  afitava ke una djariye no tanto meresyente de la honor
de ser una Valide Sultan un diya, se topava en el reynado
de los pishkados ke mas tadre fiestavan la vinida inesperada
de esta  komida savroza !
 
Un otro peligro era el venimo... Afitava ke la muerte
chaftava a la puerta de una gozde o del shehzade bohor,
erredero del trono, kon un polviko o un likido ke se mesklava
a la komida o a la bevyenta de uno o una dezmazalada ke
se muriya en una lenta agoniya, gritando fina ke dava la alma !
 
Los koridores medyo aleskuros del harem davan  espanto
a las mujeres ke puediyan toparsen supito kon los mudos
egzekutando el orden de alguno o alguna, aogando sus
viktimas pasandoles una kuedra grassa a sus kuellos. 
Lo mas del tiempo  no se topava ken era detras del krimen. 
Puediya ser un aga, la Valide Sultan, una gozde o una haseki
i mismo el Sultan, el mizmo !  Las vidas de estas mujeres no
valiyan koza grande i estas se muriyan del sar de echar un
paso yerrado o mankar de respekto, dezobeyisar a una otra
ensima d'eyas  en rango...
 
Normalmente eran muy bien miradas.  Se lavavan kada diya,
se vistiyan ermozo, komiyan bueno,  se ambezavan linguas,
eskrivir i meldar, relijyon, broderiyas, kuzir, muzika, kantar,
miniaturas i todo para kualo teniyan talento.  Tomava minimum
tres anyos para darles una enstruksyon bastante avansada
para pueder salir enfrente del Sultan, servirlo, divertirlo i
mizmo pasar por el koridor kon ornamientos de oro, el
gloryozo  "kamino de la Felisitad"  komo lo yamavan i a la fin
del kual se entrava al salon de echar del Sultan, guadrado
por los Agas, los mudos i la mujer ke se okupo de el, le dyo
su leche i lo egrandesyo en su chikes.  Es eya ke arresiviya
las djariyes/odaliskas i las kontrolava si todo estava bien, l
es dava las d'alkavos instruksyones de komo komportarse
kon el Sultan i kualo se asperava d'eyas.  No deviyan avlar
sin ke se les demande koza,  deviyan bezar la kolcha de la
kama emperyal kuando entravan.  Deviyan siempre akseptar
todo i no durmir antes del Sultan.  Deviyan servirle bevyenta,
la komida i las frutas, nunka kesharsen, nunka mostrar ke
estavan mekontente de la vida del Harem o de las ke biviyan
en el Harem ets.

Era kostumbre ke el Sultan deshe ensima de la kama una
joya o piesas de oro si la novya de akeya noche le aviya
plazido ! 
 
A la torna en su bivyenta, la djariye resiviya el titro de gozde,
 se le trokava la kamareta, se le dava servientas a su servisyo,
resiviya regalos de las otras mujeres ets.  Gozde kere dizir
"entrada en ojo"  i ser una amiga de una gozde era honor por
seguro, todo el tiempo ke el Sultan estava enteresado en su
kompaniya i en su ermozura !
 
Sultan Suleyman el Manyifiko estava en el poder des del anyo
1520.  Era un grande imperador  ke saliya a la kavesa de sus
armadas en guerra.  Aviya engrandesido el Emperyo, tomando
territoryos en los Balkanes i sus armadas forsaron fina las
puertas de Vienna.  Relasyones diplomatikas  egzistiyan entra
la Fransiya i el Imperyo Ottomano i munchos mesajeros aviyan
echo el kamino, seya  embiyados por la Reyna de Fransya, 
Catherine de  Medicis i seya de la parte del Sultan Ottomano.
 
Es en esta epoka ke la Aliansa Franca-Ottomana  se aviya
sinyado en 1536 entre el Rey Francois I  i Suleyman.   Fue
valido por mas de 250 anyos.

El famozo Carlos V (Charles Quint), inyeto de la parte de su
madre de los reyes Izabella i Ferdinand   de Espanya, ke
aviyan ordenado la ekspulsyon de  los judyos,  teniya un
grande espanto de los Ottomanos i no le konveniya del todo 
konfrontar la mas fuerte armada del mundo seya por tierra
i seya por mar, malgrado ke sus soldados kontavan el dopyo
de los soldados del Sultan.  Sus naves sembravan la terror
i la Mar Mediterrannea se  aviya boltado a ser un lago
Ottomano dospues ke nombrados marineros kom Piri Reis 
(1465-1555) Turgut Reis  (1485-1565)  Oruc Reis (1474-1518)
i su ijo  Barbaros Hayrettin Pasha (Hizir Reis) (1478-1546) 
fueron a la kavesa de las fuersas navalas Ottomanas.  El
Norte de Afrika se aviya konkistado enteramente.  En Rhodes,
el Sultan se aviya battido el mismo kon los shovalyes  del
famozo kastilyo assiejado por mas de tres mezes.

Se aviya tornado kon grande glorya a Konstantiniye para
abrasar su kerida mujer, Rokselan, Hurrem Sultan o la
famoza Haseki Sultan komo la yamavan, ke lo asperava
kon grande karinyo.  Rhodes era su prezente a la ke amava
mas de todo en el mundo !
 
La primera gozde i haseki, dospues ke le aviya  dado un
ijo bohor, eredero del trono Ottomano dospues de el,
el Shehzade Mustafa, era Mahidevran Gulbahar Sultan.  
Estavan namorados de kuando su padre Yavuz Sultan Selim 
(1465-1520) biviya i lo aviya nomado Governor de Manisa,
ande los Shehzades asperavan, leshos de la kapital, sus 
tornos de ser el Padishah,  Sultan del Emperyo Ottomano,
Khalif del Islam,   el Khan de los Khanes, el mas poderezo i
la Solombra del Di-o en el mundo..
 
Gulbahar era cherkeza i de grande ermozura. Puediya ser
una Valide Sultan perfekta kuando Di-o iva desidar ke aviya
vinido el diya por su ijo de tener el pueder supremo i el
destino del Emperyo Ottomano en sus manos. 
 
Fueron grandes festinos kuando paryo un ijo i en la kapital
tambien.  Seya el Sultan i la jente en el Palasyo, seya el
puevlo en las kayes se alegraron i fiestaron.
 
Un diya vinyeron dos mesajeros del Saray dizyendo ke el
Sultan su padre se aviya muridoen la sivdad de Tekirdag,
no leshos de la kapital, de  una enfeksyon ke aviya
kontraktado en su kuero.   Aviya ajustado a los teritoryos
del Imperyo el Imperyo Safavid de Persya, el reynado de
los Mamelouks en Egypto, Syria, Palestina i los lugares
santos del Islam,  la Mekka i la Medina.

Es dospues de esto ke reklamo el Kalifat.  Su mujer era
Ayshe Hafsa Hatun Sultan, la madre del Grande Suleyman,
una esklava judiya poloneza de  una muy grande belleza
ke  aviyan  vendido al Saray kuando era muy chika.
 
Los mesajeros le aviyan dicho ke el Grande Vezir le
enkomendava de yegar lo mas presto posivle  a la kapital. 
Suleyman yego al palasyo dospues de galopar tres diyas
i tres noches !  Fue konsakrado el diezen Sultan Ottomano
i la primera koza ke izo fue de organizar los funerayes  de
su padre, de todos sus ermanos i sus ijos ke  aogaron a su
 yegada komo era de kostumbre en  la Ley Ottomana para
ke no ayga dingunos otros  reklamando el pueder.  Esta Ley
aviya empesado kon su bis aguelo Mehmet II, Fatih Sultan
Mehmet, el konkeror de Konstantiniye ke aviya tenido
grandes guerras kon sus ermanos.
 
Suleyman desho al pueder el Grande Vezir Piri Mehmet Pasha,
 un hombre savyo,  de grande hohma  i justo para su puevlo. 
 El dolyo i las fiestas fueron mesklados i los ke se gustaron
 lo mas, por seguro ke eran los janissaryos, los soldados de
la  armada ottomana, ke resivyeron el "ulufe", una retribusyon
de un sako de oro por persona.
 
El Sultan era un ermozo mansevo. Kuando se fue a bezar l
a mano de su madre, Hafsa Sultan,  i tomar su bendisyon,
las mujeres del Harem se namoraron todas de este Sultan
asemejando a la skulptura de los dios gregos !  Aviyan
transferado al viejo palasyo todas las mujeres de su defunto
padre, gozdes i hasekis kon sus ijas i solo la Valide Sultan
se aviya kedado en reyna poderoza del Harem entero. 
Fraguo un mueyvo paviyon para su kerida madre, komo lo
dezeava, dando ensima de la Kuerna de Oro, del Bosphoro i
de la Mar Marmara kon vista a las izlas.   Suleyman embiyo unos
kuantos de sus vayentes hombres para akompanyar su mujer
Gulbahar Hatun i  Mustafa, su Shehzade presyado para ke agan
sus entradas gloryozas al Saray.
 
El segundo hombre mas poderozo dospues del Grande Vezir,
el Sadrazam, por seguro ke era su kompanyero de jugos des
de su chikes.  Su amado Ibrahim, el amigo intimo del Sultan,
ke mas tadre se iva yamar Damat Ibrahim Pasha, el Yerno
Ibrahim Pasha, porke el Sultan lo iva kazar kon su propria
ermana Hatidje Sultan.  Ibrahim era de orijin albaneza i era
un esklavo ke se aviya vendido al Saray kuando teniya 6
anyos solo.  Era muy intelijente i un grande dirijente del estado. 
Fue nomado Grande Vizir en 1523  dospues ke era el  falkonero
attitrado del Saray.  Ibrahim akompanyava  el Sultan en todos
los lugares i guerreyavan espalda  kontra espalda... Lo yamavan
 "Frenk" por su serkor a  la kultura okosidentala i por la ermozura
de hombre ke era. 
 
Fue ekzekutado kon orden del Sultan en 1536 por aver avlado
de su poder mas de lo ke era permetido, por dizirse mas riko
mismo del Sultan i por darse a si mizmo el titro de Sultan
durante la kampanya kontra los Safevid en Iran.  Se muryo
dospues de ser tredje anyos Grande Vizir/el Sadrazam del
Imperyo Ottomano.  Todas su rikezas fueron konfiskadas i se
dize ke el Sultan fue enfluensado de la parte de su mujer
Hurrem Sultan ke lo odyava por suportar el Shehzade Mustafa
al lugar de sus ijos.  En fakto Hurrem Sultan fue toda su vida
motivada por el grande espanto de ver su ijos, uno dospues
del otro aogados por los mudos el diya mizmo ke el Sultan se
 iva murir i dar paso al trono a su ijo bohor Mustafa.  Alora es
Mahidevran Gulbahar Sultan ke iva azer la entrada al Harem
komo Valide Sultan i se veriya eya siniza i sus ijos aogados ! 
Era a eya de azer todo su posivle i uzar su fina intelijensya de
manera perfekta para evitar esta katastrofa !

Lo ke izo sin dinguna piadad !
 
(a kontinuar kon Sharope)

- Copyright © sefarad.org - 1997 - 2017

Retour au site sefarad.org -