Accueil - sefarad.org

Almendra...parte 25

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;


 
parte   25
 
 
Hurrem aviya yegado al palasyo de Topkapi
kuando teniya manko de 13 anyos.  Se yamava
Roxelane, era mostroza i teniyauna karita de
porselena  muy muy luzya.  Una chikitika nariz
en el ayre, una boka chika kon mushos karnudos,
ojos kolor de mar ke davan la impresion ke
siempre riiyan.  De fakto, mizma kuando estava
muy inyervada, dava la impresyon ke se estava
riyendo al d'enfrente.  Su puerpo prometiya de
ser perfekto fina kuando se iva engrandeser.
 

El buen mirado i las komidas savrozas  del Saray
la ivan engodreser un poko porke estava
demazyada delgada i malgrado su ermozura
asemejava mas a un gatiko de las kayes ke a
una odaliska !  Sus largos kaveyos kolor de flama
estavan suzyos i ken save kuanto tiempo no se
aviya penyado !  Firyida en los brasos i en su
espalda, se veiya ke le aviyan maltratado
bastante antes de yegar al palasyo.  Sumbul Aga
ke la aviya merkado del merkado de los esklavos
konto a Hafsa Sultan ke la estavan aharvando i
eya se estava echando ensima de las personas
para moryer i arreskunyarlas !
 
-  La vide komo una tigressa, i mizmo ke teniya
kadenas ke le atavan las manos estava saltando
ensima de los hombres ke la keriyan desmudar
para venderla...No teniya la dosilitad de las
otras i se viya un karakter ke pensi vos va plazer
Honorada Valide Sultan !
 
Hafsa Sultan kijo karesar la karika roz de la
chika ma esta le moryo la mano !  Sumbul Aga
immediatamente kito su kuedra para matarla
aharvandola !  Hafsa Sultan se oppozo !
 
-  Es un kodreriko dayinda.. Bushka su madre
i su hogar.  No la aharves Sumbul Aga.  Dala
entre las manos de Daye Kalfa.  Ke se okupe
d'eya kon karinyo i ke la prepare lo mijor posivle
para mi servisyo.
 
-  Lo dishites i ansina sera Hafsa Sultan! 
Vuestros ordenes ensima de mi kavesa.
Kuando salyeron afuera de los apartamentos
de la Valide Sultan, Sumbul Aga, no puedyendose
mas detener, estava avlando de si para si komo
un gayo loko !
 
-  Malditttttta, maldita gato mal kriyada ! Sere
yo ke te vo embiyar al otro mundo, salvaje
tigressa del infierno !  Ke me se tomaran las
pachas i no ayegariya a irme akel diya al
merkado !  Ke teniya de merkar esta loka ija
d'otra !!!!  Echarse ensima de la Sultana de
las Sultanas ! Di-o santo i alavado !  No vinyera
yo al mundo para ver esta dezgrasya !  I ken
se la trusho allado de su Honorada Prezensya ?
Yo !  El preto Sumbul ni hombre ni mujer ,
dezmazalado entre todos !  Esta tigressa sera
la fin de mis diyas !  Vana demandar de ke
Gehennom  vino i todos me van a apuntar a
mi, al povre Sumbul !  Esto en disgrasya.....
Eskaparon mis diyas !  Guay guay ke ize yo !!!
Kuando estavan kaminando, la gata salvaje
metyo su piye al paso ke iva echar Sumbul, i
este se topo abrasando el tapet entre mushos
i karas !  Embasho....  I antes ke se alevante
Roxelane koryo a los apartamentos de ande
salyeron, de la Valide Sultan i arrepushando
a todos se echo en sus brasos yorando,
bezandola, abrasandola...  Sumbul koryo
detras de eya i se topo en frente de la Valide
Sultan ke de una boz muy yelada le estava
dizyendo  :
 
-  Sumbul Aga, me sorprendites muncho de
vedra !  Ke kijites de una chikitika no mas
grande ke tu dedo !  Ya te dishe ke no la
maltrates i ke la des entre las manos
karinyozas de Daye, i mira en ke hal me viene
esta dezmazalada, loka d'espanto.  Ken
save lo ke le izites ! Ke kijites d'eya !  Es una
palomika blanka ke sufriyo ken save ke
torturas.... MOs vale ser su famiya i no sus
tormentadores !  Vate i trayeme a Daye agora !
Se la vo entregar yo mizma... No tengo mas
konfiensya en ti !  Sal afuera !
 
 
Los ojos blankos de Sumbul en su kara preta
estavan boltando d'espanto !  No le estava
salyendo ni la boz !  S'echo a los piyes de la
Valide Sultan arrogando su perdon i salyo
indo atras atras de la puerta.  Se metyo las
manos en su kuello para ver si su kavesa
estava dayinda en su lugar i komo un attavanado
se metyo a korrer para topar a Daye Kalfa,
appiyadandose por eya... Infortunada de Kalfa
por lo ke le iva abashar de los Sielos en su
kavesa !  Una dezgrasya, una koza ke nunka se
teniya visto en el Harem fina akel diya...
El guerko ke aviya chaftado a sus puertas. 
Esta puediya moryer mismo el puerpo santo
del Sultan un diya !  El Di-o ke no traygaaaa...
Iva ser la fin de todos ! 
 
 
Solo la Valide Sultan estava puedyendo kalmar
Roxelane... Kon eya era la palomika blanka i
adorava meter su karika roz ensima de las
manos de la madre del Sultan. Daye diziya ke
era muy intelijente i se ambezava todo al
momento mismo ! Dospues de tres mezes
saviya eskrivir i avlar un poko kon un aksento
muy savrozo i charpeyando lo mas de los
biervos ! Brodava i aziya kuklas ! No dava estas
kuklas a la norseriya del Harem para ke jugen
las kreaturas. Diziya ke los guadrariya para
sus proprias kreaturas kon el Sultan ! No la
kontradizivan porke la Valide Sultan lo aviya
defendido. Guadravan las kuklas ke aziya en
los apartamentos de la Valide Sultan para ke
dingunos no las arroven ! Penyava los
manyifikos kaveyos largos de Hafsa Sultan i
la bezava en los ombros, en los brasos
mirandola amorozamente, yenna de kandor
i de konfiensya. Era defendido tambien ke
Sumbul Aga venga a su lado ! Kada vez ke lo
viya se fuyiya detras de la Valide Sultan,
pasava krizas histerikas, gritava i gomitava !
 
 
Los diyas i los mezes pasaron por Roxelane
en el Harem, yennos de estudyo i de karinyo de
la parte de Daye i de la Valide Sultan. Nunka
aviya visto el Sultan Suleiman. Saviya ke
entrava muncho en los apartementos de la
primera Haseki, Mahidevran Gulbahar Hatun,
su mujer i madre del Shehzade Mustafa.
 

Adorava su ijo i jugava kon el. Roxalane se
sintiya seloza ! " El va ser mi marido.. I ke va
ser de esta kreatura ?" se diziya i se metiya
a estudyar para saver mas de todos. Sus
maestras no puediyan kreyer a los talentos
ke teniya... Lila era la kolor ke le plaziya lo
mas ! Todo lo ke brodava, su vistimyenta
era de esta kolor ! Teniya una boz enkantadora
i le afitava de kantar las noches las kantikas
populares de su puevlo, lo ke su madre le
kantava i oyiya de las mujeres en su chikes.
 
 
Kuando la oyo kantar, la Valide Sultan fue muy
sorprendida i le disho ke eya tambien se
aviya engrandesido kon estas kantikas ke le
kantavan i las aviya kantado i ambezado a su
ijo el Sultan i a su ija Hatidje Sultan kuando eran
chikos. Avlava perfektamente la lingua de
Roxelane, el Ruso, ansi ke sus ijos ke avlavan
kon eya el Ruso i tambien kon la Inciser Kethuda
ke los engrandesyo i ke eya mizma era Rusa !
La Valide Sultan no preferava avlar el Ruso kon
Roxelane ma a vezes se olvidavan i pasavan
de la manera la mas natural del mundo a esta
lingua !
 
 
Kuando se entrego ke el Sultan konosiya estas
kantikas se le aklaro la kara de Roxelane ke se
disho : " Todo lo ke yo se, lo va saver i todo lo,
ke save el, yo lo vo saver !"
 
Le disho a la Valide Sultan ke keriya ambezarse
todo de la historya i de la politika del Emperyo
kon los otros payises... Esto no era fasil porke
las mujeres nunka se emmleskavan en estos
echos... Hafsa Sultan peno muncho i a la fin
logro ke un maestro de historya les ambeze a
las dos, enjuntas, detras de un paravan, sin ke
se pueda ver ken aviya detras ! El Sultan no lo
saviya ! La Valide Sultan teniya el derrito tambien
de oyir las seansas del Divan, ke eran los debatos
diarios de los echos del palasyo, del payis, del
govyerno i de las relasyones etranjereas kon otros
payizes.  Se votavan las muevas Leyes, kurto todo
lo ke aviya  de menester para administrar el
Emperyo. Munchas vezes se iva akompanyada
por Roxelane ke adorava esto. Topava solusyones
a los problemes mijor ke un Pasha del Divan !
Hafsa Sultan a vezes le diziya a su ijo, komo si
fuera su ideya, ke azer sovre tal o tala koza i el
Sultan la reingrasyava por pensar tan justo i tomavan
el desayuno enjuntos. El Sultan admirava su madre
pensando tan justo sovre los echos del Govyerno i la
felisitava por su fina intelijensya ! No teniya ni las mas
chika ideya ke detras de estas rekomenendasyones
se topava Roxelane ke no konosiya del todo !
 
Los diyas pasavan lentamente....

 
 
(a kontinuar kon Sharope) 

 

- Copyright © sefarad.org - 1997 - 2017

Retour au site sefarad.org -