Accueil - sefarad.org

Almendra...parte 27

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

 
parte  27
 
 
Roxelane se aviya por fin auzada a lavarse i
pasar horas de keyf en el hammam.  Los
primeros tiempos estava echando gritos
komo si la estavan degoyando, espesyalmente
kuando las tellakas  (las ke lavan i fregan) se
metiyan a pelarla kon estos pegones echos
kon asukar i limon en todo su puerpo !  Las
odaliskas teniyan solo sus kaveyos en sus
puerpos i dingun otro pelo !  Las fregavan kon
perfumes grasas i pasavan horas enteras
ensima del marmol kayintado kon la vapor
de la agua kayinte ke las alimpyava fina
debasho del kuero !
 
Sus largos kaveyos eran penyados kon finos
penyes de marfil por las manos ekspertas de
las tellakas ke lavoravan kon yervas i perfumes
ensima de estos kaveyos fina ke se aziyan komo
un shal de seda briyando ensima de los ombros.
Roxelane se topava en vezes kon Gulbahar Sultan
en el hammam i se iva allado d'eya para saludarla
kon respekto i demandarle komo estava el chiko
Mustafa.  El fakto ke se puediya adresar a eya la
metiya pishin en un rango superyor a las otras
odaliskas !  Gulbahar le respondiya a penas i la
tratava komo una servyenta sin dinguna valor.
Kon esto, no se le aviya fuyido del ojo de Roxelane
el selo kuaji hazimiento de la Haseki ! 
 
 
Des de kuando ke las otras odaliskas se aviyan
entregado de su manyifika boz, le arrogavan todas
enjuntas de kantarles estas kantikas majikas de su
payis kuando se lavavan.  Roxelane les kantava i
les baylava a vezes en el hammam, segura de la
ermozura de su puerpo i pensando ke esto era una
manera de antrenarse para azer lo mizmo i en
mijor delantre del Sultan, kuando el diya iva vinir  !
 
 
Era el dover de los Agas eunukes/kastrados de
kontrolar las salas del hammam para ke no salga
pletos entre las mujeres o para ayudar i alevantar
una de las mujeres si se arrezvalava i kayiya en el
marmol mojado.  Ademas deviyan servir las
Sultanes imperyalas si teniyan kualker dezeyo.
Se asiguravan ke kaza koza kaminava komo deve de
ser i las odaliskas i las Sultanes resiviyan el servisyo
ke se deviya de darles.  Nunka se puediya saver
de antes kuando el Sultan iva eskojer una, i deviyan
ser siempre prontas para akel momento !
 
 
Normalmente el Padishah metiya una rida suya
ensima del ombro de una djariye/odaliska, lo ke
sinyifikava ke l'aviya eskojido por akeya noche.
SI  era la primera vez, se aziya una fiesta en el
hammam, viniyan las ke tokavan los instrumentos,
las chengis/bayladeras i las ke kantavan i se
trayiyan komidas de boda, dulsuryas kon sherbetes !
 

Dospues,  todas sus amigas se ivan kon eya para
vistirla i la Kethuda le trayiya las djoyas, le travavan
kohl a sus ojos i la penyavan kon perlas i piedras
presyozas en sus kaveyos.  La manseva se parava
komo una prensesa de las miliuna noches para
pasar del " Kamino de la Felisitad"  i ser la mueva
Gozde ke todas veneravan i regalavan a ken mas
i mas...
 
 
La verdad ke Sultan Suleiman no preferava otra i
pasava su tiempo libre seya kon su Haseki seya
kon Ibrahim, su amido de chikes.  Lo mas del
tiempo estava en guerra o okupado kon los echos
del Imperyo. Era un mansevo poderozo i muy aktivo.
Roxelane adorava los diyas importantes ke se
fiestavan a kada okazyon en el Harem.  A las
mujeres les plaziya divertirsen de este modo i era
una manera de vida sosyala ke las aziya salir de la
monotoniya de kada diya.
 
 
Un diya Daye la tomo enfrente de eya i le disho ke
estava bastante grande agora para ser eskojida por
el Sultan i ke deviyan ser prontos si tala koza se
produiziva...
 
-  Ma. el este siempre kon Gulbahar.. Sus ojos no
ven dingunos Daye...
 
-  Kayate !  Esto no es muestra okupasyon ! Kale
ke te ambezes a pensar ke sos la unika en el Harem
i konsentrarte en una sola koza !  Tu relasyon
personal kon Sus Majestades !  No deve de
enteresarte nada a parte de esto !  Es agora ke mi
echo empesa kon ti.  Fina agora te ambezates
kultura, arte, linguas ma no saves ni komportarte
komo yo lo kiero, ni tiyenes ideya de lo ke es ser
mujer !  Te vo ambezar a ser una reyna i la mas kerida !
 
 
La primera koza ke deves ambezarte es akseptar
Gulbahar i su ijo, o kualkera otra mujer, i ser muy
dulse kon eyos i avlar kon muncho respekto  i no
importa kon ken avlas....Ademas kon la Valide Sultan
i el Sultan.  Esto es tu primera lisyon.  No importa
del todo kuanto la odyas i no la keres emleskada en
tu vida !  Kale ke sepas ke vas a tener dos personas
en tu puerpo.  La primera  "la muy kerida kompanyera
del Sultan i de su madre, de Gulbahar i del Shehzade,
i la segunda la ke va luchar de todas sus fuersas
por su futuro i su vida i para esto, seras pronta a
TODO, lo bueno i lo malo, absolutamente pronta
para sakrifiar tu propria felisitad, tu plazer i tus
prensipyos porke se va tratar de tu propria vida i
probablemente de las de tus ijos !  Tienes solo dos
kaminos enfrente de ti.  El uno te va yevar a ser
reyna poderoza de este imperyo i te dara la vida,
i el otro es nada mas ke la muerte !  Nunka Gulbahar
te deshara en vida si sos una Gozde o una Haseki
del Sultan !
 
 
Roxelane konosiya esta lisyon por entuisyon ma
dingunos le aviyan dicho la verdad ansina
brutalamente en su kara !  No, esto no paresiya
a un jugo de amor i de poder.  Era mas seryo i
kaliya muncho astusyo, instinktos muy fuertes
para persivir de ande puediya vinir el peligro,
avrir sus ojos en ventikuatro en este malditto
Harem ke era su kaza, kon buenas o de fuersa !
Se desidyo de ser parte de eya dunke komo eya,
kon labirentos en su karakter, de una vanda
briyando komo las estreyas komo el interyor de
oro i de piedras presyozas, i oskura de otra vanda,
yenna de misteryos i de peligros en sus koridores,
o en su kamino a renyar komo Valide Sultan
kuando viendra el diya.
 
 
Roxelane se ambezo esta lisyon de Daye komo su
proprio nombre.  Esta lisyon era eya mizma de
agora en delantre !
 
Daye avlo mas, i le disho ke la segunda lisyon ke
iva tomar muncho tiempo de ambezar era konoser
i kontrolar su puerpo, el puerpo del hombre, el
amor sensual, las hadras i las miradas, saver
demandar de manera a no ser refuzada, saver
komentar i dar sus idieyas, ekspresarse de manera
a lograr un butto.  Teniya tres maestras para yegar
al nivel de la mujer perfekta.  Gulfem Kalfa,
Canfeda Kalfa i Kevser Kethuda, la gardyana de
las djoyas, una Slava ke se topava en el Harem
mas de kuaranta anyos, konsejera de la Valide
Sultan, "en ojo" del Sultan ke la keriya komo una
segunda madre i kuaji una enemiga de Gulbahar
Sultan ke no la puediya ni ver !
 
 
Gulbahar no aviya tenido tiempo de estudyar en
el Harem porke la aviyan embiyado a Manisa, a
Suleiman ke era el Shehzade bohor, dunke el futuro
Padishah, kuando aviya yegado al Saray.  Se aviya
topado en Manisa muy manseva, sin dinguna
eksperiensya i sin kultura, kon su ermozura
agresiva i su amor sinsero por este Shehzade
mansevo, ermozo, bueno i romantiko, todo en
siendo un vayente guerrero !  Sus amores aviyan
empesado del primer diya ke se aviyan visto i
de akel diya en delantre Suleiman no aviya dezeyado
dinguna otra mujer.  Teniya un ijo i Gulbahar le
puediya dar munchos ijos mas...
 
No la aviya dayinda vido a Roxelane...
 
 
Los diyas pasavan asemejante uno detras del otro
en el Harem siempre yenno de sekretos, de
konsejos de entosegamiento , de gritos de mujeres
torturadas para ke avlen sin ke sepan nada, kon
fastyo i un lukso inimajinavle en los kuartos de las
sultanes imperyales, ande Gulbahar i sus servientas
ke no asemejava del todo a los kuartos de la Valide
Sultan, administrado kon muncho mas kalmo, gusto
i savyedura.  Nunka se teniya oyido mujeres torturadas
o battidas, gritos, inyervos en el mas alto nivel del
Harem.
 
 
El Kizlar Agasi, Sumbul Aga, en el primer rango de
unos dozyentos eunukes pretos en el Harem, era
un preto Sudanezo kastrado en kamino para ser
vendido en Konstantiniye.  Teniya solo 10 anyos
kuando aviya yegado.  Mezes entre la muerte i la
vida dospues de su kastrasyon, aviya sobrebivido
mirakulozamente i kon sus instinktos justos i
su eksperiensya, avagar avagar ma kon muncho
astusyo se aviya asuvido en los eskalones de los
rangos del Saray para yegar a uno de los mas
altos postos... El responsavle del Harem entero,
el mesajero entre el grande vezir i el Sultan ets.
El Kizlar Agasi teniya el privilejyo de entrar ande
keriya en el Saray, inkluzo allado del Sultan, al
kualker momento ke nesesitava, sin permisyon.
Es Hafsa Sultan ke lo aviya propozado a su ijo, el
Sultan ke nunka le aviya refuzado kualker koza a
su madre, tenyendo enteramente konfiensya en
lo ke diziya i en sus desizyones.
 
 
Sumbul aga no saviya mas kualo azer para entrar
en las grasyas de Roxelane.  Ya aviya entendido ke
esta ijika no era del todo komo las otras ke puediya
azer lo ke keriya de eyas !  Era muy fuerte i saviya
obtener  todo lo ke keriya de kualker manera ke
seya.  Kuantas vezes le aviya embiyado djariyes para
ke avlen en su favor, le aviya dado sakos de oro a
Daye Kalfa para ke endereche las relasyones entre
eyos, dizyendo ke estava pronto de yevarla ensima
de su kavesa porke era la perla del Harem, todo en
muryendose del sar ke le  iva vinir a las orejas de
Gulbahar Sultan, ke si oiya esto le puediya kitarle los
ojos o kortarle la lingua !  Guay guay !
 
 
Tanto peno i tanto peno ke Roxelane aksepto de
tener buenas relasyones kon el, savyendo tambien
ke era el konfidente del Sultan en los echos del
Harem i kapache de munchas kozas ke tendriya
de menester.  Se aviya ambezado munchas kozas
entretiempo i saviya ke Sumbul Aga puediya ser
su mano i sus ojos en la sivdad de Konstantiniye..
Saviya ke kon el siempre se puediya embiyar
unos biervos al Sultan, a la Valide Sultan i a todos
los lugares en el Saray i afuera del Saray.  Teniya
un pueder enorme i eya lo nesesitava.
 
 
Un diya, dospues del pakto entre eyos, grasyas a
Daye, Sumbul entro ande la Valide Sultan, savyendo
ke Roxelane i eya estavan estudyando enjuntas, i
a la grande sorpresza de Hafsa Sultan, Roxelane
no aviya empesado a gomitar i echar gritos
inhumanos, pushando la histerya a echarse embasho
i todo !!!!  No disho nada i le soriyo a Sumbul Aga
demandandole si su ijo aviya vinido al Harem.
Sumbul Aga le respondyo ke lo aviya embiyado
para demandar a su madre si lo puediya arresivir
antes de midi.
 
 
-  Ke mos venga a la hora buena !  Sumbul Aga,
dizele ke mi korason de madre siempre lo aspera
kon grande karinyo i ke el es la luz de mi vida !
 
 
-  Lo dishites, muy honorada, i los mizmos biervos
el Sultan oyira de mi boka.
 
 
Dospues ke Sumbul salyo afuera, Roxelane se kijo
ir para deshar la madre i el ijo solos.  Hafsa Sultan
le demando si no keriya konoser a su ijo.... Si !
Por seguro ke lo keriya ma se estava espantando
de kometer una error.... Kon esto se kedo !  Se tapo
los kaveyos i la kara... Estava vistida de vistidos de
kolor lila en tonos mas klaros i mas sostenudos,
delikatamente brodados kon motifes de ramos i de
flores.
 
 
Sultan Soleiman entro solo a los kuartos de su madre,
le bezo la mano i la tomo en sus brasos dospues.
No teniya su kavuk, el muy grande chapeyo arropado
de los  Padishahes Ottomanos.  Dingunos diriyan ke
era el manyifisente Sultan de este emperyo sin kavo !
Era un mansevo ermozo i alto kon ojikos intelijentes
i un puerpo sin defekto.  
 
 
Estavan konversando de todo kuando Soleiman le
demando a su madre ken era esta mujer tapada
meldando manuskritos en el kanton, dospues ke
lo aviya saludado abokandose i kon un muy grande
respekto !  Hafsa Sultan soriyo :
 
 
-  Esta es Roxelane.  Mos ambezamos munchas
kozas endjuntas, me tiyene kompaniya i diskutimos
de munchas kozas.  Es Rusa ma se ambezo muestra
lingua i munchas otras kozas.  La guadro aki por
ke es presyoza.  Ven a muestro lado Roxelane !
Roxelane se presipito a sus lados i otra vez se
aboko en sinyo de grande respekto.
 
 
-  No mos vas a deshar ver tu kara Roxelane ?
 
 
-  Kita tu velo Roxelane !  Mi ijo kero ver tu kara !
Roixelane vido de serka la kara del hombre ke sin
konoserlo aviya eskojido para ser su marido...
 

Estava tremblando entera... Dospues de munchos
anyos, iva pensar ke es en akel momento ke se
aviya enamorado de el !
 
 
(a kontinuar kon Sharope)
 

- Copyright © sefarad.org - 1997 - 2017

Retour au site sefarad.org -