Accueil - sefarad.org

Almendra...parte 28

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

 
 
 Almendra parte   28
 
 
-  Ke edad tienes Roxelane ?
 
-  Entri en mi kinzen anyo Sultan de los Sultanes.
 
-  Nunka te vi en el Harem i en las fiestas de
Gulbahar Hatun.
 
-  Ago todo asigun los ordenes de su majestad la
Valide Sultan i mi tutora Daye Kalfa.
 
-  Ah !  Es Daye ke te mostra kaminos ?  Muy bien !
I komo te tomo Daye ?
 
-  Es la Valide Sultan ke me dyo a eya.
 
Soleiman se metyo a riir !
 
-  Madre, no saviya ke te okupavas de las djariyes...
Pensava ke era el echo de Sumbul Aga.
 
-  Lo es !  Fue una eksepsyon i no lo regreto.
Roxelane es muy intelijente i mos plaze estudyar
endjuntas.
 
-  Portanto no konosko en el Emperyo entero una
persona mas instruida i mas savida de ti Madre
Venerada...
 
-  So kuryoza i me plaze ambezarme kozas muevas
siempre.  Roxelane...kantamos kon el oud unas
kantikas para ke se alegren muestras orejas !
 
-  Son tus ordenes Sultan venerada..
 
Dizyendo esto Roxelane se dirijo para tomar el oud i
se asento en frente de eyos, kitando enteramente la
ropa ensima de su kavesa i deshando ansina sus
largos kaveyos kolor de flama kayendo ensima de
sus ombros komo kortinas pezgadas...
 
Una boz divina de ninya muy muy dulse incho el
kuarto i es en este mirakulozo momento ke el
Sultan serro sus ojos i se arimo a los kavesales
ke le aviyan aranjado en su espalda.... Roxelane
estava pasando de una romansa a una otra sin
asperar i no kijyendo desrepozar los momentos
majikos ke se aviyan kriyado entre su boz i el
plazer del Sultan....  Paso una eternitad fina ke
todos tornaron de sus viyaje enkantador en las
propfoduras de l'alma... Hafsa Sultan teniya
lagrimas en sus ermozos ojos...
 
-  Mos izites felis Roxelane ! Tengo ke irme agora
porke me asperan los echos del payis ma tendramos
mas okazyones de asentarmos los tres aki i savorar
el kalmo ke prokura tu prezensya.
 
-  Te estaremos asperando mi ijo kerido !  Vate agora
a la buena hora i ke todo te salga komo lo dezea
tu korason.
 
-  Madre, espero ke mos traygas Roxelane en las fiestas
i en las nochas organizadas.  Es una flor rara ke mos
gustariya ver en muestro Harem.
 
-  Sera komo lo dishites mi ijo Sultan, alma de mi alma.
Soleiman bezo la mano de su madre ke lo bendizyo en
biervos ebreos de una boz ke se puediya oyir a penas...
 
 
*
La muerte de Naz Hatun, la kerida amiga de
Hatidje Sultan de kuando ke eran muy chikas,
supito, dospues de una desgrasyada fievre ke
dingun doktor en el Palasyo puido azer abashar,
toko profundamente a todas en el Harem.  Naz
Hatun era yenna de vida i Hatidje Sultan, la presyoza
ermana del Sultan, ija de la Valide Sultan tambien,
se izo hazina de la pena ke le kavzo esta disparisyon
inesperada.  Naz Hatun teniya su edad, a penas
16 anyos.  Su madre se estava espantando ke le
afitariya una koza a su ija i no keriya desharla sola
en sus kuartos, malgrado la armada de servientas
i de tutores i damas de kompaniya  ke la akompanyavan.

Todos la keriyan konsolar, su ermano el Sultan tambien.
Kuando vino a ver a su madre i vido su ermana aya,
yorando i blanka entera, se le partyo el korason i le
disho ke teniya unos planos por eya !  Hatidje estava
kuryoza i Hafsa Sultan keriya tambien oyir kualo le
estava pasando por la kavesa de su ijo !
 
Es alora ke el Sultan deklaro ke keriya ver las dos
personas las mas amadas de su vida aunados por
el kazamiento !
 
-  Penso darte a el mas ermozo mansevo de mi
Emperyo...  Mi bueno i seheludo amigo Ibrahim.
Vos vo fraguar un palasyo en frente del miyo i las
fiestas seran las mas fastuozas ke se oyeron fina
oy ..... Kero vervos horozos !
 
-  No se puediya pensar mijor marido para la
prinsesa imperyal !  Te felisito mi ijo de aver pensado
a esto.  La verdad es ke siempre teniya un espanto
ke mi ija tendra de kazarse kon un viejo pasha de alto
rango o un rey de muestro emperyo en los leshos,
porke esto konviendriya a los intereses del payis...
Agora esto trankila porke konosko Ibrahim de kuando
era chiko  i se ke tiene un korason de oro, es justo
i no ay maldad en el.
 
Hatidje teniya la boka serrada ma saviya ke su ermano
la iva dar a la mijor persona, al ke la kereriya i la
azeriya felis i no a kualker otro !  La ermozura de este
mansevo se konosiya por todos.  Lo yamavan  "frenk"
porke no asemejava a un Turko.  Teniya kaveyos
blondos buklados i ojos bleus.
 
-  No dizes nada mi ija ?
 
-  Mi ermano, el Sultan, pensa siempre lo mijor por
mi, su ermana ke diya i noche roga por su bien, i
si esto es su desizyon ansina sera !
 
-  Le vo avlar oy mizmo mi ermana regalada .....
Mazalozo Ibrahim !
 
Akeya tadre Ibrahim se echo a los pies del Sultan,
no puedyendo kreyer a ansina de honor ke se le
aziya... La ermoza de las ermozas, la unika prinsesa
del Emperyo su mujer ?!!!!  I el tambien aviya oyido
las kualitades de Hatidje Sultan ke era el brilyante
del Harem.  Esto lo iva azer el Yerno Imperyal i, de
vedra, es ansina ke se nombro en la historya
"Damat Ibrahim Pasha"
 
 
El Sultan estava kontente de dar agora otras kozas
de pensar a su kerida ermana i alesharla de este
dolyo de su amiga tan amada....
 
 
*
 
Fue bastante difisil para el karakter de Roxelane
de pueder metrizar kozas ke le paresiyan justas
i ke Canfeda diziya 'No !'  Se estava abezando
kon eya a ser un jugetto de plazer, para kuando
le iva dar puedeser gana al Sultan de tomar una
djariye en su kama i iva eskojerla a eya entre
sienes de ermozas entre las mas ermozas  !...
Saviya ke teniya de oyir i de asimilar todo lo ke
le diziyan i le ambezavan.  Komo servir el Sultan
en la meza, komo kudyar por sus kavesales para
ke se asyiente konfortavlamente, komo lavarle los
pies, mundarle frutas, vazyar la bevyenta, vistirlo,
desmudarlo...  Le estava vinyendo kuryozo ke un
mansevo tan joven i yenno de vida  (teniya 30
anyos)  i de fuersa, se deshe manipular ansina
por las mujeres.... Su servisyo era asigurado
por dos gediklis ke son djariyes muy ermozas i
savidas, apartadas para servirlo asigun un program
preparado por el Kizlar Agasi, Sumbul Aga, ke las
eskojiya el mizmo entre las blondas, dospues ke
se les ambezava komo servir el Sultan, fina el
mas chiko detalyo.  Por seguro ke el Sultan
puediya tomarlas a su kama i en este kavzo,la
gedikli asuviya de rango i se aziya gozde.
 
 
Las mujeres del Harem resiviyan una mezada
asigun sus rangos. Eran libres de azer todo lo
ke keriyan kon esta moneda.  Era el Kizlar Agasi
ke desidiya kuanto darles a kada una.  Mismo la
Valide Sultan teniya un 'salaryo'  ke su ijo el
Sultan desidava.  Lo mas aziyan fraguar meskitas
a sus nombres, hammames, fuentes, medreses
ke eran eskolas relijyozas ets.  Enkomendavan
djoyas, ropas, todo lo ke keriyan a las mujeres,
lo mas djudiyas i gregas ke viniyan al Harem
para vender sus kozas... Estas eran muy
privilejiadas i la mas nombrada de todas era
Kira Esther (Kiraze)  una judiya ke se aviya
tanto enrikesido ke mizmo el Sultan le emprestava
a vezes para pueder pagar los Yenicheris, los
soldados de la armada imperyala.  Verso la
fin de su vida se vido kondanada a ser espedasada
por los perros i sus ijos fueron matados tambien !
No era bueno de tener tanta rikeza i poder...
Se pagava kon la vida !
 
 
Roxelane, mismo a sus kinze anyos, era una
chika appasyonada i muy konsiente de su
belleza, de sus talentos, de su arte de kantar i
baylar, brodar i tissar tapetes, desinar miniatura
ets..  En la segunda partida de sus estudyos,
dospues de lo ke todas se ambezavan, Canfeda
empeso kon su eleva ambezos klandestinos de
otra natura !
 
 
Al empesijo de estas lisyones la primera koza ke
le aviya ambezado  (savyendo ke era danjorozo
i era la primera vez ke estos biervos se pronunsiyan
allado de una djariye)  era konoser i amar su proprio
puerpo... Puediya peryer su propria vida si esto se
le iva a los oyidos del Sultan o de Sumbul Aga !

Las lisyones se davan en pensando al plazer del
Sultan solo... Canfeda, una rafinada 'psikologa' de
su tiempo i kon su immensa eksperiensya kon todas
las mujeres del Harem, aviya yegado a la konviksyon
ke no se puediya dar plazer a un hombre, sin ke la
mujer tome plazer tambien !  Esta pensada era una
revolusyon en el Harem ande las mujeres se
konsideravan viktimas del hombre, abuzadas,
konsentantes por no tener otro remedyo... Tomar
plazer de una relasyon seksual era una abominasyon
para una mujer i una grande verguensa !
 
 
Canfeda enspirada del karakter muy spesyal de su
eleva, la indomptable Roxelane, jugo lo todo por
lo todo !  Le iva ambezar a ser la reyna del Emperyo
o las dos ivan a peryer todo !  Keriya ke Soleiman
se namore de esta djariye unika en sus instinktos
i en su voluntad!  Canfeda iva kreyar una mujer
komo no se teniya visto fina akel diya.  Yenna de
grasya malgrado todo lo ke le ambezavan diya i
noche !  Una mujer ke le iva agradar al Sultan
fina la fin de su vida porke iva topar en eya
l'amistad, l'amor, el temperament seksual, la
intelijensya i el saver, la finessa i el respekto,
una voluntad de fierro ke ni se iva remarkar
detras de su inkreyivle dulsor, una madures de
sentimyentos i de komportamiento ke ni se
puedriya entender debasho de una mujer-ninya
ke nunka iva engrandeser !  La belleza....Todas
la teniyan !  No valiya a nada kuando se engodravan
i no saviyan enteresar el sultan en nada a parte de
servirlo komo una esklava, kon kayades, ojos
espantozos, muryendosen del sar de kontraryarlo !
Roxelane iva ser servida por el mismo i es el ke
iva murirse del sar de desplazerla !!!
 
Estos eran los planos de Canfeda ke pensava
obtener todo de Roxelane kuando iva yegar a ser
la reyna todo poderoza de los Ottomanes.
 
....  estavan lavorando !  Canfeda le eksplikava
kada reaksyon del puerpo i de la miente del ser
humano !  Kada sensasyon, kada sirkunstensya,
kada soriza, kada biervo, kada mirada, kada sospiro,
kada hadra, kada refuzo, kada orden, kada ravya,
kada suplikasyon (nunka por su interes ma por
el bueno del Sultan i de los suyos solo !) , kada
manera de envitasyon al amor, defendiyendole
de nunka demandarle  ' me amas ?'  i de dizirle
'te amo !'  koza ke  se repetiya en  munchas lisyones
de sar ke lo puediya olvidar i kayer en esta trampa
ke todos las mujeres non seguras de eyas-mizmas
kayivan !  Al kontraryo le ambezava de uzar sus
ojos d'almendra del bleu oskuro de la Mar Marmara...
Kuando serrarlos, kuando mirarlo en sus ojos, kuando
abokar las miradas, kuando mirar a los leshos, kuando
azer un ojiko, kuando mirar tristamente i kuando
abashar en eyos todas las estreyas del firmamento.
Roxelane embibava todos sus ambezos avidamente,
no se olvidava de nada i se perfeksyonava d'en diya
en diya a ser una mujer sin igual.  Mizmo la Valide
Sultan se estava rendyendo kuento del trokamiento
gigantesko de su protejada ma resiviya siempre la
misma repuesta de Roxelane kuando le demandava

'ke estash lavorando kon Canfeda ?'
 
-  Komo darle plazer i ser sometida a el Sultan de
los Sultanes, Madre muy Honorada !
 
Hafsa Sultan ni se puediya imajinar de lo ke Roxelane
se estava ambezando en realitad.... Transformar su
ijo en un esklavo de amor !!!

(a kontinuar kon Sharope)
 

 

- Copyright © sefarad.org - 1997 - 2017

Retour au site sefarad.org -