Accueil - sefarad.org

Almendra...parte 1

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

SO SU BIS-INYETA

A mediya noche un grito largo....dezesperado
No seya ke vinyeron a apanyar a Alfredo ?
Umos de karne kemada kuvijan el sielo
Hombres kaminan por las kayes vistidos de preto !

"No....Noo....Nooooo Apiyadesen de mi, no ize nada !
Apiyadesen de mi famiya, de mi ijo en fasha !
So Espanyol, no tengo otra terra ke Kastilya !
No ago danyo ! So obediente al Rey i a la Reyna !

No me yevesh a la muerte, noooooo no kero murir !
So mansevo i tengo fuersas i dezeyos de bivir !
No me echesh a las flamas, no me kero ir !
Ke es muestro pekado ? Ser djudyo i kerer sigir ?

Nasi en la Ley de muestros padres, bendicho el Di-o
Kreyo en mi fe i la santa Tora ke kon Moshe abasho
Mi alma apartenese a mis raisez, no puedo ser otro
No puedo pekar, trokar i ser un kristiyano !

Los yoros i los lamentos de Estreya su mujer,
De sus tres ijos i su madre, la bivda Esther
En sus orejas deviyan kedar hasta la amaneser
Fina ke vinyeron a atarlo al arvole para siniza ser....

Tres otros akeya noche al Gan Eden asuvieron...
Atados, medyo aogados en las flamas se kemaron !
Sus orasyones en sus gritos se oyeron
Dospues nada....El silensyo...Los umos i el karvon...

El tiempo no paso ! Dias i mezes i anyos...
Las matansinas kontinuaron, muryeron viejos i muchachos.
No miraron proves o rikos, mujeres o hazinos !
En vezes mizmo kreaturas ; solo por ser djudyos !

No les diyeron kaza o lugar para echarsen
Era defendido de lavorar deviyan kayarsen
No teniyan derrito de kedar o de irsen
No saviyan ke azer ande fuir i eskondirsen....

Un dia se oyo....La salvasyon aparesyo !
El Otomano los aksepto i sus barkos embiyo...
Kada uno i uno vino al puerto i se allegro.
Sera vedra ? Empesara otra vida ? Sera un suenyo ?

No teniyan muncho....Un bogo en la mano
Unos bokados, agua i fruta un poko
Djoyas de famiya eskondidos kon el oro
Ken lo teniya...Debasho de fustas o en el kaveyo ...

La kalor kema el kuero, tienen la boka seka
Las madres yoran los bebes en brasos, una vieja kanta
Es un romanse de al tiempo, se akodra de su boda
Sefarad kerida, mi tierra, no te olvidare nunka !

" Ande estan muestras vizinas ? Sin eyos no vo !
Rachelika iva vinir kon mozotros, me lo prometyo !
No la veygo...Ay tanta djente ! Ande se peryo ?
Izak ! Ke va ser de mi perriko ? Yo no lo desho ! "

"Komo se va asuvir Sara a este barko tan alto ?
Ayudame Nahum, yo de un braso tu del otro !
Toparemos un lugar aki, no en el aleskuro..
El tiempo esta kayinte, no kero irme abasho ..."

"Mas djente en este barko ? Ya esta yenno !
Si lo inchen mas, mos vamos a murir en kamino !
Esto riendo ! Salvarse de las flamas djusto
Para eskapar en las olas kuando viene el ayre loko !"

"Ke lingua es esta ! Adonay ! Nada no entiendo !
Komo mos vamos a dar a entender. Me esto espantando
Ken disho ke mos kere salvar el Otomano musulmano ?
Si mos vana matar no era mijor el hristyano ?

"Dizen ke es leshos semanas...Ma hermozo lugar !
Muncha verdura, munchas rikezas i muncha mar...
Tenemos hazinos...Ken se va ir i ken va yegar !..
David...mi novyo...Lo vo ver ? Mos vamos a kazar ?"

La mar, el sielo i la mar..Pasensiya se kere !
Las velas se aunflan kon el ayre..
Los romanses kuvijan la dolor siempre
La dolor de estos ke mas no vere... La mar se los yevo a munchos durante este viaje
No pudyeron yegar a estas tierras kon koraje !
Sus puerpos kansados sin fuersa yamaron la muerte
Ken save puedeser no kijeron bivir en otra parte ...

Tantas kreaturas tramblando de kayintura
Sin kamas i kuvyertas i sin una kura
Gomitando i embatakando la ropa entera
Las madres soflamadas no saven ande dar la kavesa !

Horas de tefila...Los hombres estan endjuntos
Dan grasyas al Dio i rogan por la salud de los suyos
Bendizen el Kreador por kedarsen todos djudyos
Sienten la allegriya i la pezgor en sus ombros !

Los barkos mas se van....Sefarad kedo leshos
No se ven sus montanyas ni sus rios
Dulse tierra en las manos de los negros
Sus kazas, sus guertas i sus rekuerdos...

Una palomba blanka hoy mos akompanya
Parese ke la tierra esta bastante serka
Kito mi rida limpya de mi aldikera
Miro las broderiyas echas por mi kerida tiya.

Si, Vinimos....Munchos estamos sanos i rezyos
Vemos munchos barkos i los palasyos blankos
Mos alevantamos, mos bezamos i mos abrasamos
El Emperyo mos avre sus puertas..estamos salvados !

Orasyones, grasyas al Santo Bendicho kon palavrasv De muestros korasones asuven a muestreas bokas
Grasyas a este Sultan grande de nombre ..Grasyas
Bendichos seyan el i su famiya, sus ijos i sus ijas.

Sharope blanco

 

 

ALMENDRA  -   por Sharope blanco
Un roman historiko a kontinuasyon !

 
 
PARTE   1
 
 
Nisim efendi i la senyora Almendra  eran vizinos
buenos. Nisim efendi era kazado kon una kola de
ijos detras, todos de su mujer Rivka ke se aviya
enfasyado de engrandeserlos uno detras de otro...
.De ke se aviya kazado no teniya visto ni un dia
de bueno.  Un marido ancho ke no le importava
nada, a parte de sus amigos i las paras ke guadrava
el Dio save solo ande.  De ande le viniya estos
mecidiyes (moneda Otomana) dingunos no lo
puediyan dizir !  Unos pensavan ke emprestava
paras kon faiz (entereso) alto a los lavorantes
del Saray  (palasyo) !  Otros diziyan aver oyido ke era
el amigo de un pasha (grado el mas alto en el palasyo)
muy muy riko i era el ke lo aviya deshado
su bueno i inchodo de parayikas de oro ma su vizina,
muestra Almendra la dulse saviya eya sola la  verdad
i de  ande aviya metido mano al oro ! Se guadrava de
dizirlo porke saviya ke este sekreto puediya salvarla
de la ora mala si has ve halila un diya tendriya
menester. Entremientes le echava miradas  dulsez
kada ves ke lo viya, se le arezvalva (!) de sus kaveyoz
largos i ermozos komo seda el yemeni  (la ropa ke se
metiya ensima de la kavesa) i alimpyava la entrada de
la kazika djusto kuando el saliya de su kaza...Una
soriza aki, otra palavra aya lo aviya kitado loko i
Nisim Efendi aviya yegado a no pensar ke en eya
diya i noche ! No saviya kome aserkarse de eya ke
biviya frente kon frente de su propriya kaza i se
avlavan i se frekuentavan kon su Rivka....
Se diziya entresi  "Una mujer sola ! No tiyene dingunos !
No tiyene hombre en su vida...Me da a entender ke
le plazgo i yo me muero por su ermozura i su
hatishinazlik.  (hatirsinaz - en lingua otomana ke
plaze kon suz biervos, los muestros no prununsyan
el "r"  de en medyo)  Komo ke aga para dizirle ke la
kero biyen...Me akseptara ?  Dia va, dia viene Nisim
tostandose i Almendra azyendo todo lo posible para
kitarlo mas loko fina el diya ke una tadre, kuando Almendra
se estava aparejando para echarse se 
abatyeron a su puerta komo punyos unos detras del otro ....
Se le arevento la fiel !  (espanto muy grande) 
No supo ke azer,  kedo entezada en medyo de su
kamareta ma los punyos a su puerta no estavan
kedando ! Miro por la ventano i vido el ijo bohor de
Rivka ke viyendola a la ventana empeso a
gritar  "  tia Almendra    tia Almendra  ven...korye....

Se echo un shaliziko largo ensima de eya i fue
a avrirle la puerta kon un sikinti en el garon....Koza
aviya afitado por siguro !  El chiko se le echo en sus
brasoz  " tia Almendra.. Mi mama...No esta buena...
Se le tomo el soluk (la respirasyon)  ven
ayudamos..."  "Agora mos vamos no te merikiyes
(no te espantes) se va azer buena..Ven kon mi "
 
Entraron en la kaza i viyeron ke Rivka estava espandida
en la kama...Blanka, los ojos aviertos, la
boka avyerta ma no estava respirando. Allado de
eya sus ijos estavan yorando i Nesim Efendi estava abatido
sovre la kama yamando su nombre sin kedar !
A Almendra se le tomo el carsamba i el Persembe !
(carsamba = Miyerkoles  Persembe = Djueves  es la manera
de dizir "soflamada al punto de no saver ke
azer)... Trato de arebivirla en sakudyendola i darle
dadas a la espalda ma nada ayudo i la povretika
Rivka se les bolo de las manos en medyo del
dezespero de todos....Dulse Rivka ke aviya bivido solo para trayer
al mundo i engrandeser sus sinko ijos.. 
Almendra empeso a yorar en tomando a
Pepiko, el mas chiko de las kreaturas en sus brasos....

Almendra les ayudo en estos diya muy tristes,
en los siyete, kudyo por la djente ke vinyeron de l
as kuatro partes de la sivdad, en los meldados,
kurto izo todo lo ke era posivle de azer.  Los diyas
pasaron..  Los ijikos de Rivka viniyan munchas vezes
a la semana ande Almendra ke los aresiviya a brasoz
aviertos, les dava supa i  frutas de su guerta,
aremendava los vistidikos.

Les aviya topado  una lavandera ke veniya ande
eyos tres vezes a la semana por alimpyar sus kazas
i azer el lavado i todo. Los keriya bien a estos ijikos
de su dulse amiga i se sintiya averguensada por
azer miradas a Nisim efendi savyendo ke sus
jugos inosentes puediyan kavzar yelor entre este
marido i mujer, ya no atados i leshos uno del otro
ma unidos por sus kreaturas i el sakro del
kazamiyento.... I no eran buenos partidos ke le
mankavan a Almendra ! 
 
 Se aviya enbivdada a los 20  anyos i no teniya
kreaturas. Le aviya kedado bastante  paras i la kaza
de su marido ke se aviya murido de las manos de un
grupo de borrachos, a medya noche, kuando estava
tornando de un pranso dado por su amigo en honor de
aver resivido buenas palavras i liras de oro del Sultan !
 
Mordo, el marido de Almendra, le aviya dicho akeya tadre
a su mujerika  "hanumika, no me asperes..Esto
envitado ande  Rafael.  Avra solo hombres aya...Va
fiyestar una koza ma no me demandes kualo ke ni yo
lo se !  Si no vengo sepa ke me mataron !   Shakas
shakas (joke) kerida miya !  Esto  era para dizirte ke
solo muerto yo no tornare a mi kazika i a la mas
ermoza de las mujeres ! "  Malhorozamente la
shaka se aviya echo vedra i kuchiyos de estos
mallogrados le aviyan tomado la vida sin razon, solo
por averse topado en la misma kaleja de estos ugursuzes
(de mazal basho) bandidos a una hora
muy tadre de la noche, dospues ke se aviyan
engleneado kon munchos amigos, aviyan komido todo
lo mijor i  bevido vinos de Portugal mismo ! 
 Las djariyes  (mujeres servientes/esklavas) ke los ke
no eran muzulmanos no puediyan merkar del merkado,
estavan serviyendo las komidas, baylando
i kantando por eyos porke eran un regalo del Sultan
a Rafael ke le aviya salvado la vida del shehzade, su ijo,
kuando se aviya kayido a la kama porke aviyan
ententado de entosegarlo !  Rafael se aviya ambezado
la siensya de las kuras i las yervas i saviya meter en piyes,
mizmo los muy hazinos !

(a kontinuar kon Sharope blanco )
 

- Copyright © sefarad.org - 1997 - 2018

Retour au site sefarad.org -