Accueil - sefarad.org

Almendra...parte 32

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte 32
 
 
La Valide Sultan estava enformada por Sumbul Aga de
kuaji kada paso ke su ijo dava ! Le plaziya muncho verlo
i oyirlo en el famozo "Kubbe Alti" , la sala ande todos los
vezires (ministros de al tiempo) se reunisavan para pasar
las leyes i dirijir el Emperyo. Tomava su lugar detras de las
reshas del Harem ma los de abasho no la puediyan ver.
Dospues, kuando el Sultan viniya a vijitarla, le dava su ideya
i le diziya lo ke pensava de lo ke aviya oyido. Le plaziya al
Sultan de diskutir i tomar las ideyas de sus serkanos, lo mas
de su madre i de su grande amigo Ibrahim Pasha.
 
Por seguro ke Sumbul Aga le aviya dicho a Hafsa Sultan
ke el Padishah tomava regularamente novitades de la
salud de Roxelane. Le aviya tambien dicho ke Roxelane,
kon un grande respekto lo reingrasyava ma nunka se
mostrava alegre o orgoyoza de una tala honor. Al kontraryo...
Era komo si su interes la perturbaba.
 
Sumbul le konto tambien la historya de la kayida de
Roxelane komo se lo aviya relatado a el ! Hafsa Sultan
aviya meneyado la kavesa, muy merikiyoza, savyendo
ke si Gulbahar kontinuava de azer lokuras asemejantes,
se puediya ver repudiyada, echada al viejo Palasyo,
leshos de los ojos del Sultan.
 
Una demanyana kuando Roxelane vino para ke estudyen
historya enjuntas, le demando si saviya ke su ijo se
enteresava a eya komo mujer... Roxelane entera
kolorada aboko su kavesa i le disho :
 
- Madre Poderoza, so muy pokita de koza para el Sinyor
del Emperyo ! Ken so yo para pueder interesarlo.
Tiene sienes de mujeres las mas ermozas del mundo.
Yo so feya i muy minuda ! No tengo tanto ambre komo
las otras para ke tenga gudrura ke me de ermozura.
So un pashariko sin muncha alma... Ke va azer de mi ?
 
- Mi kodreriko, la ermozura de tu karika i de tu korason
bastan.. Sos intelijente i saves avlarle, lo ke es muy
importante...
 
De esta manera Roxelane supo ke Hafsa Sultan, ke la
protejava en todo i la keriya kon grande amistad, veriya
de un buen ojo el aserkamiento de su ijo i de eya.
Esto era muy importante para sus planos porke una
aliada komo la Valide Sultan era el mas grande apoyo
ke puediya ser en el Harem i en el korason del Sultan.
 
*
Los diyas pasaron i Roxelane estava puediyendo uzar
su braso firyido grasyas a los egzersizyos diaryos i a
la manseves ke era la mijor kura para las roturas !..
 
Estava partisipando de muevo a los kursos de dansas
organizadas para las djariyes. Su profesora, una
hongruaza bastante aedada i ke aviya pasado toda su
vida en el Harem, ambezando a baylar a las mansevas
i tener grasya i hen, se enkantava de los jestos i de la
manera ke Roxelane saviya uzar su puerpo al ritmo de
la muzika. Las repetisyones se aziyan kon los kostumes
ke vistiyan en las noches de las reprezentasyones, en
las fiestas ke se davan en el Harem.
 
Sultan Selim el gloryozo padre de Sultan Soleiman,
teniya el uzo de eskojer su kompanyera de akeya noche
durante las lisyones de dansa de las djariyes. Es ansina
tambien ke aviyo desinyado a Helga, la judiya poloneza,
mas tadre Hafsa Sultan, entre mas de sien djariyes,
flores arrankadas de las siete partes del mundo para
ornar el Harem del Imperyo Ottomano.
 
Akel diya, Sultan Soleiman, dospues de su vijita a su
madre i del ermozo dezayuno ke aviyan echo en frente
de las aguas del Bosphor, salyo a dar un torno en el
Harem. Esperava enkontrar Roxelane ande su madre
ma fue dezilluzyonado porke no estava. Esta kreatura
la teniya apegada en su tino ! Se fue al grande salon
ande saviya ke las djariyas s'ambezavan a baylar, a
tanyar, a kantar i todo manera de ambezos ke serviyan
en el Palasyo. Lo vido a Sumbul Aga asentado ensima
de los kavesales de seda korolada i oro i prezidando
a la lisyon del "Sinyo de la Hungaria" komo la yamavan
a Rafet Kalfa, pormodo de su kaminada majestuoza komo
la de un sinyo (cisne, cygne). Las djariyas, la profesora
i Sumbul Aga pishin se abokaron fina embasho al verlo
entrar.. Esto no teniya afitado durante su renyo !
 
- Refet Kalfa, kontinua kon tus ambezos por favor komo
si yo no fuera aki.
 
- Es vuestro orden Sus Majestades !
 
Roxelane, emosyonada ekstremamente, tratava de
eskondirse detras de las otras. Entre si, saviya ke el
Sultan estava aya para eya sola...
 
Las dansas kontinuaron kuando el Sultan se alevanto,
dyo su rida al Kizlar Agasi dezinyando una ermoza
djariye ke viniya de la izla de Chipros. Baylava
maraviyozamente i era muy sensuala.
 
El kizlar Agasi pishin se fue allado de eya i delantre
de todas le pozo la rida en su ombro en sinyo del
dezeo del Sultan de pasar la nochada kon eya.
Se yamava Helena, teniya 18 anyos, era bruna kon
ojos vedres i su puerpo era perfekto. El Sultan salyo
sin mirarla otra vez i todas se abokaron fina abasho
en sinyo de respekto.
 
Instantanamente un grande bruido se oyo en la sala.
Todas las djariyes estavan avlando en d'una ! La
estavan felisitando, abrasando, alavando a Helena,
la mueva gozde del Harem.
 
Poko dospues Gulbahar Sultan aviya tomado el haber
de sus servientas i no saviya ke pensar ! De una
vanda se estava alegrando ke no era Roxelane i de
otra vanda se le estava komyendo el meoyo kon selo
i odyo por esta Helena ! De ande aviya salido esta
agora ! Se disho entre si :
 
"Mi adorado Sultan me kere dizir de esta manera ke
no es vedra todo lo ke se avlo por Roxelane ma se
aravyo kon mi porke me lamenti i esto era un grande
yeroo ! Agora me esta demonstrando ke puede azer
todo lo ke le trava la gana ma es de mi ke esta
enamorado, la madre de su ijo kerido i de la ke lo
adora i se muere por el ! ".
 
 
La Valide Sultan tomo la novitad riendose i
dizyendose ke el Sultan era mizmo mas intelijente
de lo ke lo pensavan ! Dezinanyando a otra djariye
por la noche estava dando el mesaj ke keriye
divertirse i uzar de sus derritos de Sultan i dinguna
mujer teniya un privilejio a sus ojos. Ni su Haseki i
ni Roxelane komo todos lo kreiyan !
 
Daye estava kon la kara preta ! Era una lisyon ke
no se iva olvidar. Agora, todas se ivan a burlar
de eya i se keriya enterrar biva ! Ke dezgrasya
les aviya afitado... Ma komo ?
 
Canfeda diskutyendo de lo de la demanyana kon
Roxelane estava soriyendo i dizyendole ke el Sultan
vino al kurso solo para verla ma se keriya konvenser
de si para si ke no era importante para el... Esto
demonstrava ke Roxelane no se le despegava de
su tino ni un instante !
 
Roxelane estava tratando de analizar lo todo
komo Canfeda ma su korason de ijika de 15 anyos
se le aviya rompido i la tristesa la akaparava.
Keriya durmir i no pensar, mientresen el Harem
una muy grande fiesta se estava aparejando en
el Hamam i para dospues por la "novya" i puedeser
la segunda mujer del Sultan.
 
Las Kalfas i las Kethudas estavan koryendo en
todas las direksyones para aparejar todo de
manera perfekta...
 
Helena era la reyna del Harem !
 
La fiesta en el Hamam fue muy interesante porke
Gulbahar Sultan estava prezyente tambien.
Estava tratando de amostrarse alegre i amavle i no
rechesada de la fiesta. Le regalo a Helena una maniya
de oro kon piedras presyozas. Helena la reingrasyo i
le bezo la mano en sinyo de respekto. La kantaron a
la novya, uvo bayles i vinyeron ensima de las lajas
komidas i dulses, sherbetes i bonbones sin kedar.
 
Dospues del Hamam las amigas i las Kalfas kon el
kortej de los eunukes la yevaron a la Grande Sala
ande empesaron a vistirla a penyarla i pararla kon
djoyas. Helena estava preparada de manera
maraviyoza i su eksitasyon la aziya mizmo mas
atraktiva. Mas tadre, el Kizlar Agasi vistido de
vedre, de kolorado i de oro aparesyo i todas se
abokaron en su prezensya. Helena estava pronta.
Sumbul lAga le avlo :
 
- Arresivites la grande honor de alegrar Sus
Majestades esta tadre Helena. Tienes el dover de
aplikar en su alta prezensya todo lo ke te ambezaron
en el Harem. Es una grande responsabilitad porke
sus keshas korresponden a ser repudiyada al viejo
palasyo ande nada bueno te asperara ! Al kontraryo,
si se plaze kon ti, las puertas de la felisitad se avriran
i vas a tener la posibilitad de ser su segunda mujer
porke no tuvo otra ke Gulbahar Sultan fina oy ! Todo
va depender de si le das un ijo. No te olvides ke
todos somos sus esklavos i tiene el derrito de vida i
de muerte ensima de kada alma biviente en el Emperyo.
Agora sigeme por favor.
 
Helena se aboko delantre de Sumbul Aga i salyeron
para pasar del "Kamino de la Felisitad" para yegar
a los kuartos imperyales.
 
*
 
La misma noche Roxelane se sintiya muy triste i no
saviya ni mizmo porke ! Teniya ganas de korrer en
los stepes de su payis, avlar su lingua, tener a su
lado su perriko ke le mankava.
Daye estava durmyendo profundamente...
 
Se alevanto avagariko de su kama i los pies
deskalsos sin ke dingunos la veygan, vino delantre
del apartamiento de Hafsa Sultan. Esta vez los
eunukes no la desharon entrar. Ensistyo i les
demando ke metan al koryente ke estava a la puerta.
Los eunukes saviyan ke la Valide Sultan nunka
refuzava Roxelane...Dospues de tomar la permision
la desharon entrar.
 
- Muestra Madre Venerada, grasyas por arresivirme.
Tengo una koza en mi korason i kreyo ke me vo murir.
Tomame entre tus brasos. Deshame yorar en tus
piernas....
 
- Mi kodreriko blanko, nunka te vide triste ansina !
Prefero tus birras i kuando salen flamas de tus ojos
komo la Mar de Marmara ! Ke rizas ermozas ke tienes !
Tu alegriya me alegra. Ke tienes esta noche tan tadre ?
 
Roxelane le aviya avlado en Ruso i Hafsa Sultan tambien.
Estavan komo madre i ija mas de Reyna i su esklava....
 
- No konosko la razon de mi profunda tristesa ma una
koza me kema aki aryento... Puedeser el eskarinyo ke
tengo por mi famiya i los lugares ande me engrandesi..
 
Hafsa Sultan estava soriyendo...Konosiya i komo, la
pezgor ke sintiya Roxelane esta noche... Kuantas
vezes le aviya afitado lo mizmo kuando era eya mizma
un kodreriko blanko i Sultan Selim se divertiya las
noches kon las ermozas djariyes del Harem, todo en
amando su kerida mujer i su ijo presyado.
 
No le disho esto a Roxelane porke estava segura ke
eya mizmo no saviya la razon de su tristesa.
Roxelane teniya el korason godro porke Soleiman
iva amar Helena esta noche.. Es la primera vez ke
sintiya la flama del amor kontraryado i pensava ke
es un mal ke iva matar !
 
 
Hafsa Sultan la abraso i le kareso sus largos
kaveyos kuvijando toda su espalda i ke asemejavan
mas a la kolor del kovre kon la luz de las kandelas
en la kamareta de asentar de la Valide Sultan.
 
- Kieres kantar Roxelane ? Mete toda tu fuersa
i tu tristesa en tus kantos...Ansina te va salir el
mal de tu korason ! Kanta para ke las flores en
la guerta se espierten i te embiyen sus golores,
para ke la mar te oyga i te akompanye kon sus
olas ke chaftan a las rokas... Kanta para tus
amados en tu puevlo i ke tu boz les trayga felisitad !
 
Roxelane fue muy sorprendida ke la Valide Sultan
le diga de azer lo ke eya mizmo keriya lo mas en
este instante. Kantar i gritar su tristesa deskonosida
fina este diya ! Se fue a la ventana kon reshas de
madera lavorada ma de ande se puediya ver fina
muy leshos, fina las kostas danteladas i
enkantadoras de Konstantiniye...
 
En el silensyo de la noche una muy dulse boz incho
las guertas, abraso las paredes i asuvyo al sielo
fina las estreyas... Munchas personas oyeron esta
boz klara, kuaji majika i ke penetrava en los
korasones.
 
Hafsa Sultan en el sofa ande estava espandida,
serro sus parparos i le paso delantre de sus ojos
toda su chikes, su manseves en los brasos de Selim
ke tanto amava i sus noches de amor
inkreyivlamente ermozas kon el....
 
*
 
Sultan Soleiman en sus kuartos kon Helena, mas
ermoza de una deesa grega, estava tratando de
olvidarse de miliun problemes del Emperyo ke
deviyan ser solusyonados de una manera o d'otra...
No teniya ni friyo ni kalor, ni ambre, ni esuenyo ni
kualkera koza ke lo dezrepozava... Todo se estava
desrolyendo komo lo keriya i le agradava. Ademas
teniya una madre kerensyoza i intelijente ke estava
a su lado siempre ke la teniya de menester, una
mujer muy ermoza ke lo adorava i un ijo ke
prometiya de ser mijor mizmo de su padre !
Una armada de servitores i un Harem kon las
mijores rozas del mundo ke solo asperavan de
darle plazer i alegriya... Esta noche aviya eskojido
una de estas ermozas ! Aviya avlado en grego i la
aviya nombrado "Gulistan" ke es guerta de rozas
porke de vedra la persona se puediya sintir en una
guerta de rozas a su lado. Su golor i su soriza eran
la de una roza ! Estava durmyendo en el grande
lecho de ande se aviya alevantado sin espertarla
porke no le entrava esunyo i se
sintiya komo vaziyo, sin dinguna ardor, sin dingun
entuziyazmo i sin motivasyon dinguna...
 
Salyo de sus kuartos. Sumbul Aga estava a su
puerta kon los eunukes.. El Sultan le enkomendo
de deshar una bolsa yenna de liras de oro para
"Gulistan Hatun" a la demanyana i le disho ke era
una roza ke le aviya plazido muncho. No teniya
dinguna kulpa de su dezeyo de tomar aver en las
guertas. Dospues salyo afuera ma munchos eunukes
detras de el lo estavan sigiendo komo una solombra,
prontos a todo lo ke puediya okurir !
 
I... Es alora ke le toko al alma esta boz enkantadora
ke no se aviya olvidado des de la demanyanada ke
la aviya oyido ! Teniya lagrimas en los ojos a oyir los
biervos de enamorados ke nunka puediyan
alkansarsen... Un largo tiempo kedo oyendo los kantos
de Roxelane fina ke una fuersa deskonosida lo forso
a ir a la fuente mizma de esta boz... Tokarla !
 
Estava vinyendo de los kuartos de su madre..
Se vyo pasando los koridores del Harem kon prestor.
Los eunukes ke guadravanel Harem se echaron
embasho kuando lo vieron pasar, no savyendo ke
azer i ke pensar.. Ke aviya afitado ? Soleiman disho
a los eunukes de la puerta de la Valida Sultan de no
azer dingun bruido. Le avriyeron la puerta i entro
aryento.
 
Las servientas ke no durmiyan dayinda a la entrada
estavan tan sorprendidas ke una se ezmayo !
El Sultan les aviya echo el sinyo del silensyo.
Se fue a la kamareta de asentar de su madre.
La vido en su sofa, espandida i los ojos serrados..
Estava durmiyendo ?
 
Roxelane, arimada a las reshas de la ventana
estava dainda kantando de su dulse boz i no se
puediya apersivir del todo de una kanserya. Era
komo si mil luzes briyavan en sus kaveyos..
Vino fina eya i kuando se torno sorprendida, la
tomo en sus brasos. No disheron nada... Kedaron
ansina abrasados.. El karesando i dando bezos a
sus kaveyos, a su frente, a sus ojos... Eya los brasos
kon fuersa enserklandolo..Los dos kon las karas
mojadas de sus tivyas lagrimas..
 
La Valide Sultan avriyo sus ojos kuando el kanto
se aviya kayado.. Los vido delantre de la ventana
abrasados en el silensyo. Estavan solos en el mundo,
nada mas no kontava para eyos. Ni el pasado ni el
futuro ma solamente este momento...
 
No era pasyon, no era dingun dezeyo ma un
sentimiento de aver yegado a un lugar muy difisil
de yegar dospues de muy munchos esfuersos...
Se estavan arrepozando ! No keriyan nada mas...
Solo kedarsen abrasados en el kalmo, sin dingunos...
Solos... Ken eran, ande eran, nada teniya importansya..
 
Hafsa Sultan se alevanto kudyando a no azer bruido i
se fue a echarse en su kama, soriyendo, savyendo ke
a este momento su ijo aviya yegado al repozo de
korason i a la felisitad. Reingrasyo el Uniko de ver
esto de sus ojos. Por eya era mas importante de
renyar ensima del Emperyo.
 
 
Kedaron ansina sin nada dizir. Dospues el Sultan
la bezo en la frente una dalkavo vez i komo vino,
ansina se fue sin dingun bruido. A medya noche
Roxelane torno al lado de Daye. El bulto en su
korason no estava mas. No pensava ke se iva murir...
No teniya el eskarinyo de su puevlo i no era
del todo nesesaryo de yorar en las piernas de la
Valide Sultan ! Sintiya en sus orejas i en su korason
los kantos... Era komo si angelos blankos kantavan
solo para eya.. No penso mas a nada, serro sus ojos
i durmyo en paz.
 
El Sultan torno a sus kuartos. Helena estava
durmyendo. La miro kon kerensya.. Komo un ermano
ke la keriya protejar.. Era innosente. Arrankada d'en
medyo de sus keridos, de su ogar... Sintyo pena.
No entendyo deke estava viyendo las kozas de un angulo
diferente. Se arimo a los kavasales del sofa i se durmyo
kon la golor del perfum de Roxelane. Sus vistidos se le
aviyan emprenyado de la ermoza golor kuando la aviya
detenido ensima de su korason... Largamente.
 
A la demanyana Gulistan Hatun avriyo los ojos en el
lecho emperyal. El Sultan no estava. Al lado de eya
en pies estava Inciser Kethuda, la ke aviya
engrandesido a Sultan Soleiman.
 
Tomo kon kudyo la savana manchada de la innosensya
de Gulistan Hatun, la mueva gozde del monarko..
La kostumbre mandava ke se deviya de guadrarla
kon las kozas personalas ke apartenesiyan a la gozde.
 
Gulistan le bezo la mano i arresivyo su bendisyon en su
kavesa i en su tripa. Inciser Kethuda le metyo la bolsa
inchida de liras de oro en su mano i le dyo un par de
eskularichas de perlas suyas komo regalo, en sinyo
de su aprobasyon a la mueva gozde. La ayudo a vistirse.
El Kizlar Agasi entro i le disho ke el Sultan estava
kontente de su nochada kon eya. Estava soriyendo
lo ke era un buen sinyo ! Dospues salyeron. Helena
echo una dalkavo mirada a todo kon un sentimiento
de profunda felisitad i fue detras de Sumbul Aga para
instalarse en su mueva morada en el Harem ! Una
espasyoza kamareta para eya sola i un kuarto para
dos de sus muevas esklavas servientas i un eunuk
soriyendo kon sus dientes blankas ke asemejavan
mizmo mas blankas en su ermoza kara preta. Era un
mansevo alto i se veiya muy forsudo. La arresivyeron
abokandosen fina abasho en agurandole la bienvinida,
muncha suerte i diyas de felisitad por una vida entera !
Gulistan Hatun les dyo una piyesa de oro a kada uno i
se desho en sus manos para ke la desmuden, la yeven
al hamam i le agan masajes ets.. Sus amigas la abrasaron,
vinyeron a vijitarla kon regalikos chikos ke puediyan
ofreserle. Les disho su muevo nombre i les enkomendyo
ke se olviden del nombre de Helena. Kuando se kedo
finalmente sola, se apersivyo ke lo keriya mas ver....
Ke iva afitar agora ? La iva yamar esta noche tambien ?
Penso ke una vida de lukso i de amor la estava asperando
i deviya esfuersarse de darle, lo mas presto posivle, un ijo
a este monarko majestuozo ! Ser gozde no le abastava.
Kaliya ser Haseki Sultan komo Gulbahar. Estava kansada
de tantas emosyones... Serro los ojos i durmyo.
 
 
*
 
Kuando los eunukes le kontaron a Sumbul Aga ke aviya
tornado kon Gulistan Hatun al Harem lo ke se paso a
medya noche, la vijita del Sultan a su madre ande
Roxelane lo estava asperando (!) Sumbul Aga penso
ke aviya perdido la razon i ke siertamente aviya mal
interpretado lo ke los eunukes aviyan tratado de
eksplikarle ! O eran eyos ke viyan halusinasyones !
Le tomo tiempo para realizar lo ke aviya afitado...
I la mueva gozde ? Ke iva ser agora ? Todo estava
d'arriva a basho ! Era su kulpa. No saviya menajar
este Harem loko. El Sultan por seguro ke lo iva
kastigar i todos ivan a pensar ke era su kulpa !
Guay guay !
 
Roxelane ! Otra vez eya ke no deshava en paz el
Padishah mizmo en su primera noche kon su mueva
gozde ! Gulistan Hatun povretika d'eya, tan buena,
tan innosente i mas ermoza de una roza ! Esta Russa
era el diavlo en persona... Si si, teniya fuersas
majikas ke attiravan a eya todos, mismo a el mizmo,
el preto Sumbul ni hombre ni mujer, del fondo de su
Sudan ambierto... No era el ke aviya obeisado al
orden de esta loka ija d'otra ?
 
"Azeme un sinyo kuando estare en el Hamam i
Gulbahar Sultan tambien, i el Sultan se topara en
mizmo tiempo en el Harem !"
 
Esto es... Aya durmiya el gato ! Dospues de este
sinyo malogrado todo aviya trokado i las lokuras
aviyan empesado !
 
Era su kulpa i iva pagar su bovedad kon su kavesika
enkolgada a las muralyas del Saray.... Entremientes
teniya mareyos ... Yamo los eunukes, se espandyo
kon su grande puerpo, le trusheron a bever limonatas
freskas para ke venga en si.. No aviya durmido de la
noche ! Empeso a ronkar i lo desharon arrepozar.
 
Varios espesas de pasharikos en las guertas del Saray
estavan alegrando los ke los oyiyan kon sus melodias
ke davan ganas de soriyir i ser felis.
 
(a kontinuar kon Sharope)

- Copyright © sefarad.org - 1997 - 2017

Retour au site sefarad.org -