Accueil - sefarad.org

Almendra...parte 35

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte   35
 

Hurrem Sultan, dospues del nasimyento de su
primer ijo Mehmet, ke se iva murir mansevo,
paryo a su ija muy amada Mihrimah Sultan i
otros tres ijos, Bayazid, Djihangir i Selim.
No le mankava nada... El amor del Sultan, sus
ijos, el respekto de todos, el pueder, rikezas
fabulozas.  Dospues de la muerte de Hafsa Sultan,
por lakuala yoro muy muncho, Hurrem Sultan fue
la reyna del Harem.  Teniya personas ke lavoravan
por eya en todas las partes del Saray, en
Konstantiniye i mizmo en los lugares los mas
leshos del Emperyo si lo nesesitava.  Hurrem izo
fraguar munchos edifisyos a su nombre.  Hamames,
fuentes, meskitas, un hospital, hanes ets..  Siempre
fue allado del Sultan de su korason, eskrivyendole
letras enflamadas de amor i d'eskarinyo kada vez
ke se iva en guerra a la kavesa de los janissarios !
 
 
Kon todo esto teniya siempre en tino la sola koza
ke le kitava los esuenyos, le komiya el meoyo i no
la deshava gozar de nada...  El Veliaht !  El ke iva
asuvir al trono de su padre, el primer ijo del Sultan !
Un vayente mansevo ke todos amavan, respektavan
i admiravan.  Era un guerrero perfekto.  Saliya siempre
para kombatir lado kon lado kon su padre ke adorava.
Se entendiyan maraviya.  Su armada en Amasya era
nombrada por sus viktoryas gloryozas.  Sus janissarios
se echavan al fuego por el... Se eskriviyan lejendas
sovre sus manyifisensya ....
 
*
Hurrem Sultan teniya de menester agora de una
persona muy spesyal i no kualker serviente stupido
para ke le ayude a realizar su grande projekto !
Esta persona deviya ser el braso derecho del Sultan
i ser amado de el, tener su konfiensya total, komo
si fuera uno de su sangre... Su amigo de chikez, su
amado Ibrahim Pasha era el Grande Vezir, el Sadrazam
i su kunyado, siyendo el marido de su unika ermana
adorada  Hatidje Sultan.  Teniya su sello i un palasyo
ekstraordinaryo en frente del Saray.  Hurrem nunka
se aviya aserkado de Ibrahim Pasha i lo odyava porke
este era un admirator del Veliaht, se eskriviya kon
Gulbahar Sultan para todo modo de koza.  Este
Shehzade ke asperava su diya de asentarse al trono
i el primer orden del kual seriya de eliminar Hurrem
i sus ijos !  Es esto lo ke los asperava !  I esto deviya
trokar ! 
 
*
 
En el Sud del payis, dirijava la rejyon kon muncha
durezsa un Bey nombrado por su krueltad.  Se aviya
echo riko en poko tiempo topando kulpas verdaderas
o no a los rikos para kondanarlos i meter mano sovre
sus bienes.  Una partida se embiyava al trezoro a
Konstantiniye i la otra partida entrava en su aldikera.
SAviya salvarse d'en medyo de los peligros i evitar
todo lo ke puedriya kavzar su kulpabilitad de manera
perfekta.  Era mansevo i un ermozo hombre.
 
 
Rustem Aga no se dutava ke estava espionado por
los hombres de Hurrem Sultan kontinualmente !
Estavan al koryente de kada paso ke echava, de todo
lo ke kavzava kon las personas, sus manipulasyones,
i kuantos assasinatos tambien !
 
 
Hurrem Sultan se muriya del sar de hazinuras !
Dyo orden de bushkar piojos ensima d'el !.... En poko
tiempo arresivyo la informasyon ke asperava.
Aviyan topado un piojo ensima de su penye !  Esto
era la prueva ke el hombre estava sano i rezyo !
Porke piojos nunka se aserkavan de las personas
hazinas... Es por esto ke unos lo yamavan
"piojado i mazalozo"  a Rustem Aga....
 
 
Un diya mesajeros yegaron i le disheron ke estava
yamado al Saray por "una persona muy importante"
i ke kaliya ke se metyera en kamino kon eyos.
Rustem Aga se estava espantando ma saviya ke no
teniya remedyo i kaliya ke se vayga fina Konstantiniye
kon los mesajeros.  Estava muy merikiyozo ma no le
disheron ken le iva avlar i de kualo... Aviyan resivido
el orden de un preto, ke no era otro ke Sumbul Aga,
i no saviyan mas nada !
 
*
 
Rustem Aga yego al Saray de noche.  Fue arresivido
kon honor... Lo lavaron, le dieron vistidos buenos
i limpyos i un pranso lo asperava en la kamareta ke
se aviya preparado por el....  Estava tan kansado
i tan eksitado ke no serro el ojo noche entera.
Sus ojos se serraron de suyos a la demanyana ma
los mesajeros lo espertaron para ke se apareje porke
iva enkuentrar  "la persona"  !  Le ataron los ojos i
eunukes pretos vinyeron a tomarlo para yevarlo no
saviya ande !  Lo empusharon aryento de una kamareta..
 
 
Una boz de mujer muy dulse le avlo  :
 
-  Estas en mi prezensya... Yo so Hurrem !
 
-  La amada del Sultan....
 
-  La madre de sus ijos i la Reyna del Harem !
 
Rustem se echo abasho
 
-  Mi vida es vuestra !
 
-  Por seguro ke si, ma no te ize trayer de tan leshos
tomar tu vida.  Esto lo puediya azer aya mizmo !
 
-  Esto pronto a todo i aspero vuestros ordenes !
 
-  Estas seguro ?  Te puedo demandar kozas muy
komplikadas, kozas ke dingunos pueden imijinar !
Tiyenes agora la oportunitad de dizirme ke no  seriyas
bastante valyente para todo...  I te vo deshar ir...
 
-  Nada seriya imposivle para mi para egzekutir
todo lo ke me dirash de azer.  Me puedesh azer
konfiensya !
 
-  Hahahahaha !  Konfiensya en el mas grande
ladron i assasino del payis !
 
-  ......
 
-  No me importa !
 
-  Deshare vazyar mi sangre para vozotros !
 
-  Si si !  Ma antes te vas a kazar kon Mihrimah
Sultan, muestra ija !
 
Rustem Aga penso ke se estava ezmayando akel
 momento.
 
-  Y...yo  YO  ?
 
-  Si tu Rustem Aga !  Seras muestro yerno bien
amado i el marido de muestra ija regalada...
Mihrimah, ermoza entre las ermozas !  Tiene kinze
anyos !
 
-  Ke ize ke Di-o me regala tanta felisitad esta
demanyana ?!!!!
 
-  No es Di-o, so yo !  Esto es la primera i la
ermoza parte de tu misyon !  El resto lo saveras
kuando la hora va vinir.  Te lo dire muncho mas
dospues.  Mis ojos seran ensima de ti... No vo
tolerar el mas chiko paso kontraryo a mis planos.
A ti de egzekutir  todos mis ordenes.  Te sientes
pronto para esto o devre eskojer un otro ?
 
-  Sere vuestro esklavo i akumplire todos
vuestros ordenes... Sere tambien el mijor marido
para Mihrimah Sultan, vuestra ija i mi espoza..
Vo lo djuro Sultan de los Sultanes...
 
-  Vamos a ver....Agora vate i arrepozate ...
Resiviras muestros ordenes kon tiempo.
 
Rustem Aga le bezo la fusta i salyo de la kamareta
indose atras atras kon el ayudo de un Eunuk.
Teniya dayinda los ojos tapados.
 
Kuando se los avriyeron por fin en su kamareta,
penso ke el aver le estava mankando... Puedeser
ke aviya sonyado ?  Seriya vedra todo esto ?
Por seguro ke teniya de kualo fraguar un chiko
palasyo ma de este punto a sonyar de kazarse
kon la ija regalada del Sultan ?  Puedeser ke se
aviya enlokesido supito i le paresiya kozas
imposivles ?  Se desho kayer ensima del doshek.
 

Estava en el Palasyo... Esto era vedra !  No
puediya tener almadas tan blandas en su Konak !
Esta dulse boz de de mujer en sus oyidos lo
estavan arreskunyando portanto !  Ke dureza ..
Ke asiguransya en si !  Su ija seriya dura komo eya ?
Nono....  Un poyiko de 15 anyos.  Ija del Sultan !
Le iva dar una buena vida i todo lo ke dezeyava.
Esto si !  La iva amar i la iva respektar !  Esto
tambien.... Ija del Sultan !  Komo no !  Estreyas
le estavan bolando delantre de los ojos... Ke le
aviya enkomendado la todo poderoza Hurrem Sultan ?
"Arrepozate !"   Esto es !  Agora no kaliya pensar
ma arrepozarse.... Si..... Durmir i ni pensar...
Arrepozarse.... Serrar los ojos en la blandor del
doshek.
 
*
 
Des de anyos ke Hurrem echava sus punchones
avagar avagar al korason del Sultan para disgrasyar
Ibrahim Pasha a sus ojos.  No antes muncho tiempo
aviya metido sus hombres en el Grande Bazaar para
ke kiten bruidos ke el verdadero SUltan del payis
era Ibrahim Pasha, ke es el ke desidava de todo,
ke el Padishah nunka kontraryava lo ke diziya, ke
era mas kapache del Sultan i muncho mas riko de
el, ke los festinos ke se davan en su palasyo eran
nombrados en el mundo entero i ke en la dalkavo
guerra en la frontiera del Este del payis se aviya
echo yamar  "Sultan" ets....
 
 
Hurrem saviya ke si todo esto se iva a las orejas
del Sultan, munchas kozas puediyan trokar en el
Saray de Topkapi !  Estava asperando ke estos
bruidos se propajen en todos los lugares.  I no
se aviya yerrado !  No solo el merkado ma mizmo
en las meskitas es solo de esto ke se estava
avlando !
 
*
 
A la demanyana kuando le anonsyaron la vijita de
su yerno fue al Mabeyn i lo arresivyo aya.  El
Mabeyn se topa entre el Harem ke es de las mujeres
i el Selamlik ke es de los hombres.  En kavzos muy
raros, kuando las mujeres nesesitavan de avlar kon
un hombre, komo en el kavzo de un yerno, un relijyozo
o de un kurador ets.. es el Mabeyn ke se uzava para
las entrevistas.  Es en el Mabeyn tambien ke las
Valide Sultanes diskutiyan kon el Sadrazam ets. 
Hurrem kon sus immensos privilejyos uzava el Mabeyn
muy frekamente.
 
 
Kuando entro en el Mabeyn, Rustem Pasha se echo
en basho para bezarle la fusta de su vistido i dospues
su mano.
 
-  Komo esta muestra ija Rustem Pasha ?
 
-  Rogando por vuestra salud diya i diya madre venerada.
 
-  Dizele ke mos eskarinyamos i la keremos ver...
 
-  Oy mizmo le digo de vinir al Saray para estar kon
vozotros por kuanto tiempo ke la keresh aki.
 
-  Ke venga a bezar muestras manos i kudyar su padre
Sultan !   I puedeser vino el tiempo de ver muestro yerno
en lugares mas altos ?  Ke venga a avlar kon su padre...
Le vo ambezarle kualo dizirle...
 
Rustem estava bolando en el aver !  Lugar mas alto ?
Ke mas ?  Estava en los primeros rangos en el Kubbe
Alti !...
 
-  Si Rustem Pasha  !  Pensates justo a este momento
mizmo !  Kijyeramos ver muestro yerno, el espozo de
muestra ija regalada dirijando el payis komo hombre
de konfiensya del Sultan de los Sultanes, tu esuegro,
Rustem Pasha !
 
-  Sa...SADRAZAM  ?
 
-  Si !  Kada koza en su tiempo... te akodras de muestro
pakto no ?
 
La kara de Rustem Pasha se aviya emblankesido....
 
-  Si, mi madre venerada.  Vuestro esklavo akumplira
vuestros ordenes asigun vuestras instruksyones.
 
-  Muy bien.  Para esto kale ke seyas el Sadrazam del
payis...
 
-  Ma.... Ibrahim Pasha ?
 
-  No te emleskes de los echos ke no te konsernan.
Sige mis ordenes i ke mi ija venga a verme oy mizmo !
 
-  Lo dezeyatesh i son vuestros ordenes sovre mi kavesa..
 
-  Buenos diyas muestro kerido yerno !
 
*
 
Madre i ija avlaron horas enteras ...  Hurrem le disho
kuanto estava horoza ke Rustem Pasha la amava
i aziya todos sus kaprichios.  Le disho ke lo mas
importante en su vida era la felisitad de sus ijos i ke
Mihrimah teniya el primer lugar en su korason....Lo
ke no era falso seguramente !... Le avlo de lo
intelijente ke lo topava a Rustem i ke meresiya todas
las honores los mas altos pormodo de sus kualitades,                        
i sovre todo pormodo ke era su yerno kerido !
 
 
Mihrimah no puediya ser mas kontente ! Oyir de su
madre kerida i poderoza  elojios sovre su marido ke
adorava... Estava prinyada... Kuando lo anunsio a su
madre Hurrem salto de alegiriya !  Este bebe estava
viniendo justo a tiempo...La abraso i la bezo a su ija
i le ambezo komo uzar esta felis novitad para demandar
a su padre de enalteser su marido, el padre de su
inyeto !  Meresiya ser Sadrazam por lo bueno ke era
por el payis i por eya, por kuanto era attado al Sultan
i a los enteresos del trezoro, su buendad en ayudando
a todos ets...
 
 
Mihrimah Sultan estava pronta para avlar kon su padre !
Dospues de midi Soleiman vino a ver su ija en los
kuartos de Hurrem.  Mihrimah le bezo la cuppe i la mano
kon grande respekto i kerensya.  El Sultan la abraso en
la frente i le disho ke presyoza era para el i ke mizmo
bivyendo tan serka, se eskarinyava de eya ! 
 
 
Avlaron largo tiempo antes ke Mihrimah Sultan empese
a dizirle todo lo ke aviya ambezado su madre.. El Sultan
le respondyo kon dulsura, eksplikandole ke esto no iva
ser difisil si el payis teniya de menester un Sadrazam
ma ke no era posivle por el momento, porke Ibrahim
Pasha ya teniya este puesto, estava sano i rezyo i era
amado por el puevlo, ademas menajava muy bueno sus
responsabilitades.
 
 
Hurrem no teniya menester de oyer mas de esto.
El Sultan se fue a sus okupasyones felis i su korason
yenno del amor de su ija i de su amada Hurrem...
 
*
 
El Viernes, a medyo diya, el Sultan salyo komo kada
semana para irse a la meskita kon todos en su korte.
Los hombres de Hurrem aviyan lavorado noche i diya
enkuentrando miles de personas de todos los niveles
para inchir bruidos sovre el Sadrazam, el kunyado
del Sultan.  Dospues del servisyo, la gente ke saliyan
de la meskita estavan inyervados i eksitados. Supito
se oyeron bozes gritando al Sultan  "Bive mil anyos !",
"Bive a la kavesa de tu payis !",  " No mos mankes !",
"Muerte a los ke trahisionan!" ,  "Abasho el Sadrazam!"
El Sultan no supo ke pensar !  Embiyo sus hombres
en medyo de la gente para entender  lo ke se pasava.
Oyo de sus bokas las akuzasyones por Ibrahim Pasha.
Estava muy sorprendido.  No disho nada.
 
*
 
Unos kuantos diyas dospues de este insidente
Hurrem se aserko amorozamente del Sultan i
abrasandolo le disho ke keriya merkar un ermozo
regalo para su ija ke teniya su aniversaryo en unos
kuantos diyas i ke kijyera muncho ir kon "el sol de
su vida"  al Bazaar para ke le ayude a eskojer un
regalo... Soleiman no teniya razon de refuzar esta
demanda echa tan dulsamente i enteramente
innosente. 
 
 
El Lunes a la demanyana Sumbul Aga prokuro
vistidos de sivdadinos rikos i Hurrem i el Sultan
salyeron klandestinamente de la puertap de detras
del Saray kon un Eunuk esklavo ke Sumbul Aga
les dyo para estar mas seguro.  De vedra ke dingunos
puediyan dutar ke este era el Sultan i la mujer entera
tapada a su lado era la Haseki Sultan !
 
 
El Bazaar estava yenno de gente komo siempre.
Pasaron las botikas de los kuereros ke vendiyan
toda manera de vistimyenta i objetos de kuero,
los ferreros i los kovreros, los tapeteros i los sederos
para yegar al  BEDESTEN  ande estavan las botikas
ke vendiyan kozas de muy alta valor, objetos de
plata, de oro i de marfil, de madera lavorada, i
joyas por seguro !  Se diziya ke el trezoro del payis
mizmo se guadrava en  kashas de fierro en el
Bedesten, porke era el lugar el mas fortifiado i
seguro del Emperyo.
 
 
Supito Hurrem apersivyo uno de sus hombres en
una grande botika del Bedesten i kijo entrar i ver
kon el Sultan kualo les puediyan ofrir aryento !
El merkader pishin demando en kualo se enteresavan
i el Sultan le disho ke kijyeran esakojer un ermozo
regalo para sus ijas.  Los izo asentar i les kito sus
mijores joyas en una tavla de katifa/velours korolada.
 
 
Las unas kuantas personas ke estavan en la botika
estavan avlando i a boz fuerte.  No entendiyan
komo el Sultan del payis puediya taparse las orejas
a este punto !  Soleiman estava oyendo las diskusyones
i se metyo i el a avlar kon los hombres aya.  Hurrem
estava riendo debasho de sus velas !  Los hombres
incheron el Sultan kon estas kalomniyas ke paresiyan
verdaderas por seguro.  A la fin salyeron de la botika
kon una ermoza maniya lavorada muy delikatamente
kon una multitud de piedras presyozas i la kavesa
de arriva abasho del Sultan !

(a kontinuar kon Sharope)
 

- Copyright © sefarad.org - 1997 - 2018

Retour au site sefarad.org -