Accueil - sefarad.org

Almendra...parte 36

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte 36
 
 
El Sultan durante el kamino de retorno al Palasyo
teniya en sus orejas estas bozes ke diziyan :

" Avlar todo esto de una persona ke te aksepto
komo un ermano i te asuvyo tan alto ? No se aze !
Ay limitos ! " "Nunka tengo kenfiensya en los
Albanezos !"
 
Alora ke Hurrem asemejava solamente preokupada
a eskojer la mijor joya de la koleksyon ke le aviyan
prezantado, Soleiman se estava akodrando komo se
estavan keshando del "Albanezo" dizyendo "No es
el mizmo ! Su nariz yego a las nuvlas ! " Emperyos
no se regalan ensima de una tavla de plata !"

"No es su mansevo de yerno ke iva azer esto. Lo
tiene por un padre !" "Si ! Ke hombre dedikado a su
payis i a su famiya !" "Mi opinion es ke kale enforkar
los ke trahisionan para ke seya de egzemplo a todos !".
Dospues del insidente en la meskita diya de Viyernes
oyir esta konversasyon lo aviya kitado loko ! Se aviya
aserkado de eyos i dospues del saludo les aviya
demandado si aviya entendido justo i se efektivamente
se tratava del Sultan i del Sadrazam..

- Ande bives ? Se aviya burlado el uno ! La Sivdad
entera avla solo de esto..

- No lo oyi ! De kualo se trata ?

......... I le aviyan kontado todo lo ke Hurrem keriya
ke se le vayga a los oyidos.... Aviya pagado sin diskutir
el presyo de lo ke Hurrem aviya eskojido, lo ke no era de
kostumbre en el Bazaar i aviya tomado el kamino del
ritorno.

En kamino el Sultan teniya miradas pretas i el kalmo de
antes la tempesta.

Kuando yegaron Soleiman le disho a Hurrem ke la estava
asperando en su kuarto... Hurrem estava asperando esta
envitasyon !

Se vistyo komo una odaliska mueva vinida al Harem, muy
simplamente i se prezento delantre del Sultan sin dingun
artifisyo. Le bezo la cuppe komo lo aziya siempre.

- Entra entra Hurrem ! No se mas lo ke tengo de azer.
Esto frente a una situasyon terrivle i Konstantiniye
entera se esta burlando de mi !

- Komo lo disesh esto, sol de mi vida, ken puede
burlarse del hombre el mas podereso, el mas bueno i
el mas kapache de la Tierra ?!!

- Portanto si !

.......... I le konto todo lo ke aviya oyido delantre de
Hurrem eskandalizada i echando chikos gritos de
sorpreza komo si era koza de no kreyer !

- Komo todos avlan de las dezgrasyas de muestro
Sadrazam si nada d'esto es justo ?

- Yo siempre kije ensinuar ke vuestro esklavo Ibrahim
Pasha aviya ganado demazyado assurensya, al punto
de, el Di-o ke no trayga, trespizar vuestros derritos de
Sultan i yegar a selarse de vuestra glorya !

- Ma Hurrem, esto attado a mi honor kon una palavra
ke le di ! No keriya akseptar de ser el Sadrazam porke
me diziya ke un diya lo puedriya regretar i tomarle de
sus manos muestro selio. Es alora ke le apprometi ke
nunka lo iva abashar de rango. Pormodo de esta
promesa miya, no puedo nomar un otro Sadrazam !

- No lo abashesh de rango !

- Desharlo avlar i komportarse de esta manera ?
Ke me dizes Hurrem ?

- No digo esto. Le apprometitesh de no kitarle sus
responsabilitades ma no de ....

- Termina ! No de.... Kualo ?

- Perdonadme mi Sinyor ! Es ke so muy emotiva
kuando se trata de vuestra honor i todo lo ke vos
toka ! No puedre ser imparsiala..

- Avla ! Dime ! De no... KUALO ?

- De kondanarlo al silensyo perpetual, komo lo
merese !

- Matarlo ! Torna a tus kuartos Hurrem ! Tengo de
kedar solo i pensar...

Afuera, en el "Kamino de la Felisidad" akompanyada
de sus eunukes Hurrem teniya pena en el korason por
el Sultan.. No era fasil de tomar la vida de un amigo
entimo de su chikes i ademas el marido de una ermana
regalada ke adorava su espozo. Ma su plano era perfekto
i Soleiman no teniya otra alternativa...

*

La kondanasyon a muerte del Sadrazam (1523 - 1536)
i la nominasyon de Rustem Pasha a su lugar eran kozas
ke se asperavan i todos se demandavan mizmo deke se
aviya tadrado tanto a azer justisya ! Ibrahim Pasha de
vedra ke era mas riko del Sultan. Todos sus bienes fueron
konfiskados i Hatidje Sultan i sus ijos se installaron al
Saray. Ibrahim Pasha aviya guerreyado kon el Sultan
en la konkista de BELGRAD en la konkista de
RODOS aviya metido orden en EGYPTO i lo
aviyan nomado BEYLERBEY (Bey de los Beyes) en la
konkista de la HUNGARIA - Mohach, en las konkistas
de lugares en la ANATOLIA , en la segunda guerra kon
los hongruazos, en la konkista de TEBRIZ kontra los
Safavis i en la konkista de BAGDAD.

Rustem Pasha, malgrado ke fue el ke introduizyo el
sistem del bakhshish/propina/pourboire/tip al payis
i teniya una inkreyivle rikeza, fue un buen Sadrazam
para el puevlo Ottomano i para los minoritaryos tambien.
Hurrem dirijava el payis de su braso ensima de el.
Sus hombres okupavan los puestos los mas importantes.
Sultan Soleiman estava sovretodo okupado a ajuntar
muevos territoryos a su payis.

Hurrem saviya ke no le kedava mas muncho tiempo i
la dalkavo partida de su plano deviya ser realizado.
Un plano, de vente i mas anyos, del kual las tres
primeras partidas aviya reushido ! La dalkavo parte
era una kestyon de vida i de muerte ! Kaliya ke
reushka !

En un diya yelado de luvya, en el kual todos estavan
appegados a las chemineyas o abokados ensima de
los braseros, Hurrem embiyo a yamar el Sadrazam.
Rustem Pasha sintyo komo el modrisko de un serpiente
en su pecho. Esta vez, el saviya ke Hurrem lo aviya
konvokado para la sola koza ke lo aviya engajado al
empesijo. Ya se dutava i saviya del primer diya ke
se tratava de trasar el muevo kamino del puevlo
Ottomano. Es el ke aviya sido eskojido por la unika
koza ke puediya preokupar, mas, terrorizar la mujer
la mas puederoza del mundo ! No teniya remedyo..
La historya lo aviya mostrado del dedo ! Iva jugar
una parte en el mas grande komploto de su tiempo.

.... Se fue a la yamada de Hurrem Sultan la muerte
en la alma... Entro en el kuarto los ojos embasho,
se aboko para bezarle la fusta i la mano.

- Espero tus ordenes madre venerada... So tu
esklavo komo te lo aviya dicho el primer diya ke
me yamates.

- Rustem, sos mi yerno... El padre de Ayshe Sultan,
mi unika inyeta. Tu vida, la vida de tu famiya, de mis
ijos i la miya va depender de tu reushitad en este
plano. Se va tratar de sentimientos muy fuertes,
de mintiras abominavles, de tretriza, trahisones,
muncha sangre va korrer, grandes pekados se van
a kometer, la historia del puevlo se va trokar i
jenerasyones a vinir mos van a juzgar ! No kero ni
puedo abokar la kavesa a lo ke mos aspera mis ijos
i yo ! Tu destino esta attado al muestro....
Te ordono la muerte del Veliaht, el ijo de Mahidevran
Gulbahar Haseki Sultan i el ijo bohor del Sultan
Soleiman, el Shehzade Mustafa !

- Lo dishites madre venerada, son tus ordenes
sovre mi kavesa.

( a kontinuar kon Sharope)

- Copyright © sefarad.org - 1997 - 2018

Retour au site sefarad.org -