Accueil - sefarad.org

Almendra...parte 2

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte   2
 
 
Mientre ke Mordo, el marido kerido de Almendra
estava pasando dulses horas kon sus amigos, su
mujer, djilveliya (hadroza, koketa) entre las
djilveliyas, se estava aparejando para resivirlo,
mizmo muy tadre, i amostrarle ke puediya tomar mas
plazer afilu kon eya ke en este pranso kon sus amigos ! 
Estava tan sigura de su ermozura, de su dulsura i de
su amor por el ke estava soriyendo de plazer en
pensando a los momentos ke ivan a pasar endjuntos
kuando iva vinir a kaza !  Aviya metido uvas i
igos de su guerta ensima de la meza kon un bokal
de vino ke le aviya embiyado su madre de Smyrna
(Izmir), la kerida sivdad de su chikez, fina ke
Mordo, ke aviya vinido aya para echos, la kijo
por el solo, se aviya kazado kon eya en una boda
alavada dayinda....

Almendra, para ke las horas pasen presto, se metyo
a pensar espandida en el doshek  (kanape) de la
kamareta de aresivir  (el salon)  a estos diyas ke
nunka puediya olvidar.....

Era la mas chika de 6 ermanos.  Todos mostrozos,
buenos muy amistozos kon eya.  Sus paryentes eran
bastante rikos i nombrados en la sivdad por el
ayudo ke aziyan a la kehila i a los proves, por
lo djusto ke era el sinyor Bohor, su padre, i la
balabayta akumplida ke era su madre la sinyora
Klara, de una mishpaha (famiya) muy konosida de
Calatayud en Sepharad. Bohor era sapatero komo todos
los hombres de su famiya de munchas jenerasyones.   
Se vendiyan a presyo de oro sus sapatos famozos i
mismo el Saray (palasyo) le enkomendava munchos
sapatos para los mas grandes del puevlo en
Konstantiniye.  Sus 2 grandes ijos ya aviyan empesado
a lavorar kon el para azersen sapateros famozos
tambien.

Almendra era la unika ija de Bohor i de Klara.
La aregalavan kon karinyo i dezeyavan por eya
lo mijor ke puediya ser !  Teniya un ashuar ke
ni ijas de reyes puediyan tener ! Las tellakas
en el banyo la fregavan kon las mas karas azetes
de roza i diziyan ke ansina de puerpo no se
teniya visto dayinda .... Su madre Klara no se
haravaneyava de penyarle fina ke se kansava
los kaveyos kada demanyana i antes ke se echara
para ke siyempre seyan i keden komo sedas de Buhara...
Le aziya en diyas de fiesta inkontavles  kokitas 
parsemadas de perlas ke veniyan a Smyrna de los
leshanos payises del oryente...
Su padre, Bohor, diziya ke era la djoya suya i el
bueno de la famiya. Sus ermanos nunka ivan pensar
dos vezes para dar sus vidas para esta ermanika
tan kerida i al korason de oro. Almendra tambiyen
era muy kerensiyoza i respektuoza kon sus paryentes.
Le veniya de la mano azer broderiyas, las mizmas
komidas i dulses de su nona...Era amistoza i buena
kon los menesterozos i los lavorantes en su kaza.

Por ser nombrada, de muy chika,  todas las madres
la keriyan por ernuera ma Klara no se estava
aserkando de espartirse de su ija kerida dizyendo
siempre ke era muy manseva dayinda.

Un diya vino a Smyrna un joven (mansevo) de KOnstantiniye.
Alto, ermozo, kon vistidos rikos i akompanyado de
serviyentes todos kon sus kavayos ke se viyan muy
sanos i artos. Por ser ajenos, todos se keriyan
informar de eyos i saver ken eran, porke vinyeron, ande
estavan kedando...La vedra era ke eran los musafires (envitados)
del konak (kaza muy grande i rika) de un Bey (sinyor) ke
teniya paryentes en el Saray.  El joven era de Toledo
i se okupava de trayer al Saray ropa de muy alta kualitad
i rara para venderlos a los muy rikos i personas de alta
pozisyon, mizmo a la famiya del SUltan.  Su nombre era Mordohay,
Mordo para sus amigos.  La djente lo konosyeron ke uno ke
siempre riye i nunka se mostra furyozo.  Buen djudyo ke
va al kal por rogar kon la kehila i dar punyados de Medjidiyes
a los proves ke se aserkavan de el. Hombre de respekto i de
konfiyensya i seheludo  (haham)  por ser tan joven.

(a kontinuar kon Sharope blanco ) 

- Copyright © sefarad.org - 1997 - 2018

Retour au site sefarad.org -