Accueil - sefarad.org

Almendra...parte 37

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte   37
 
Los diyas estavan pasando kon las preparasyones por
la guerra... Sultan Soleiman aviya desidido de marchar
sovre Iran ke les aziya mizeryas en la frontiera Este
del payis.  Shahzade Mustafa ke era muy attado a su
padre i a su ermano chiko Djihangir, nasido flako i
hazimyento, aviya mandado mesajeros a Konstantiniye
kon una letra a su padre dizyendole  :
 
"""
Muestro Sultan venerado i mi kerido Padre,
 
So vuestro ijo Mustafa ke bive leshos de vuestro
lado en Amasya.  Mi eskarinyo por vozotros i mis
ermanos i lo mas por Djihangir, no tiene limitos.
So fuerte i en buena salud grasyas al Di-o.  Me veygo
rechesado en este palasyo sin la possibilitad de
kombatir por mi payis i servirvos.
 
Vos rogo ke me deshesh vinir para pueder vervos i
bezar vuestras bendichas manos....  ets..
 
"""
 
Lo ke Mustafa no saviya i no se supsonava es ke su
letra iva ser interseptava i kayeriya en manos
enemigas i muy poderozas.  Se iva eskrivir de muevo
i de otra manera por seguro !....
 
 
"""

Kerido Padre,
 
So vuestro Shehzade Mustafa, eredero del trono
Ottomano.  De muncho tiempo ke no salimos a kombatir..
Sera ke mi padre se envejesyo i prefera la dulsura
de las mujeres de su Harem ?  Mis janisaryos aki,
todos vayentes i kon fuersa ke pueden abatir
montanyas, keren viktoryas i un emperyo fuerte.

Yo mizmo me veygo enfasyado de Amasya.  No mos plaze
espandirmos a muestra edad i muestra espada grita
"Eskriveremos kon letras de oro muestro nombre a
los livros de historya  ....ets...
 
"""
 
 
Kuando el Sultan resivyo esta letra kon el selyo de
su ijo, ke el mizmo le aviya regalado, no supo ke
pensar... Esta letra refletava una arrogansya de la
parte de su ijo a lakuala  no era akostubrado del
todo !  Ke keriya dizir kon esta letra ?  Mando a
bushkar el Sadrazam.  Rustem Pasha vino koryendo i
bezo su djuppe.
 
-  Rustem ke se pasa en Amasya ?
 
-  No seya ke el Sultan de los Sultanes oyo tambien
los bruidos ke sirkulan en el payis ?
 
-  Ke me dizes !?  Avla !  Ke es esto ?
 
-  Mintiras mi Senyor ! Nada mas ke mintiras !
Komo vuestro ijo tan kerido i tan bueno puede trokar
a este punto ?  Yo no kreyo nada de lo ke se avla !
 
-  Ke tiene mi ijo ?  De kualo se trata ?
 
-  Malavlar, Sultan poderozo !  Dizen ke el Shehzade
Mustafa desidyo de asuvirse al trono de sus nonos i
governar el payis dospues de alesharvos de fuersa
kon sus janisaryos !  Estos djuran por su kavesa i
no saven mas ande meterlo !
 
-  Mi ijo tiene sus ojos en mi trono ?  Antes de
murirme yo ?
 
-  El Di-o ke no mos trayga... Ke bivas mil anyos
en tu glorya Sultan de los Sultanes..
 
-  Tu komo lo saves esto ?
 
-  Son mis hombres en Amasya ke me raportaron la
situasyon.  Fueron flajelados por avlar mintiras
tan desgrasyadas !!!!
 
-  I si no son mintiras ?  I si el ijo de esta
madre desmeyoyuda tuvyera planos de una abominasyon
asemejante ?  No es koza mueva en la historya de
los Ottomanos !...  Rustem.. Kero ke embiyes el
mijor hombre ke tienes a Amasya i ke te diga preto
sovre blanko kualo es la vedra !
 
-  Vos ordenes sovre mi kavesa mi Sultan, mi
padre por el kual dare mi vida... El nono de mi
unika ijika tan presyoza...
 
Rustem se echo embasho para bezarle la djuppe...
Soleiman estava pensando  "Ke mujer inkomparavle
tengo !  De su kashika de oro de pasharo en
kaptivitad, eskojyo el mijor hombre del Emperyo
por muestra kerida Mihrimah Sultan tambien tan
intelijente !  Tiene instinktos de leona mi
Hurrem !  No es en vano ke me dize  "Te amo komo
mi propria vida porke no tendremos vida mis ijos
i yo si, no trayga el Di-o, te afita koza negra...
Bivimos kon tu reflo... "  El ke me kere matar
para este trono, no tiendra piedad de mi mujer
i de muestros ijos... Veremos de vedra lo ke se
pasa en Amasya.. Rustem lo va aklarar !...
 
 
*
 
La tadre en la intimidad del doshek ande estavan
espandidos abrasados Soleiman i Hurrem, los dos
eternos namorados, estavan avlando de lo ke
estava preokupando el Monarko Ottomano...
 
-  No es posivle Sultan de mi korason... Vash a
ver ke el hombre de muestro kerido yerno va tornar
dizyendovos ke muestro ijo Mustafa es innosente
i nunka penso a esta abominasyon.
 
-  No lo savemos Hurrem.  Tu mizma tremblates
en meldando la letra arrogante ke me mando !
Su tretriza se siente entre sus linyas !  Di-o
santo i piadozo !  Komo yegi en mis diyas en
este mundo mintirozo a tener sospechas sovre
mi propria sangre, mi ijo bohor... Deke no puede
asperar la desizyon divina para asuvir al trono
de sus nonos ?  Ke va ganar en siendo el assasino
de su padre ?..
 
-  No avlesh ansina mi Sultan presyozo...  Estash
torturando vuestra djariye Hurrem ke no tiene ke
vozotros en su vida sin dinguna valor....
 
-  Lo se, lo se Hurrem..  Tu amor es grande i mi
konfiensya en ti no es manko grande !  Si ay
vedra en estas avlas, sere el Sultan i no mas un
padre !..
 
-  Vamos a ver ke todo esto no son ke bruidos
emetidos por bokas malas i sin dinguna fundasyon.
 
 
*
 
Mientres en el palasyo de Amasya madre i ijo
estavan diskutyendo kaminando en las guertas
nombradas por sus ermozuras en el payis entero.

Mahidevran Gulbahar Haseki Sultan aviya dado
todo su amor a las bestias ke aviya ordonado
ke le traygan al palasyo i a las plantas ke
kudyava komo sus kreaturas ! El rezultado no
aviya tadrado i las guertas asemejavan al
Paradizo !  El Shahzade Mustafa, su ijo, lo
bueno de su vida, adorava akompanyarla en sus
paseos entre las flores de todas las kolores,
los basinos kon fuentes de laskualas se
vazyavan aguas freskas, pasharos egzotikos en
libertad ke viniyan a pozarsen en los ombros
de la Haseki Sultan....
 
-  Toparon tu aniyo ke era el selyo ke tu
padre te regalo ?
 
-  Kuryoza koza sinyora mi madre ... No esta
en dingun lugar.  Se volatilizo!  Esto seguro
ke no lo kiti de mi dedo kuando me echi.
 
-  Ken te lo puede rovar de tu dedo ?
 
-  Dingunos !  Ademas mis hombres i mis mujeres
daran sus vida por mi !  No tengo sospechos de
dingunos en mi entorno...
 
-  Tu innosensya te yeva a la tonteriya !
No konoses el pueder de la korrupsyon.  Yo
tengo sospechas ke te endurmesyeron profundamente
kon medisinas i yervas poderozas i te tomaron el
aniyo de tu dedo kuando estavas durmyendo a
mitad ezmayado !  SI !
 
-  Madre muy kerida, solo ves espiones,
komplotos i personas ke mos keren danyar en
todo los lugares... No es sierto !  Mi padre me
ama i todos lo saven ke so su eredero al trono.
 
-  Hurrem ! No la konoses.... Es un serpiente
venenozo !
 
-  Mi madre por lakuala dare mi vida...Entyendo
tu odyo, tus espantos ma kreyeme, aki, en
muestras forteresas i en medyo de mi armada i de
todos muestros keridos, ni un vento malo se
puede infiltrar... Mi padre esta felis kon eya i
su famiya en Konstantiniye.  Esto no kere dizir
ke esto en peligro i todos me keren matar !
Efasa de tu tino este espanto ke no te desha
repozo ni de diya ni de noche... Ademas so grande,
poderozo, bastante fuerte, i amado por todos !
El Di-o ke de vidas largas al Sultan mi padre
i a ti mi madre, para ke me veyas un diya
Padishah de este Emperyo de mis nonos.
 
-  El Di-o ke mos oyga, Luz de mis Ojos !
Kon esto, este selyo no se volatilizo... Ken lo
tiyene i para kuala maldad ?  Mandates letras
importantes estos diyas ?
 
-  Nada importante... Una letra de eskarinyo
a mi padre i a mi ermano Djihangir.
 
-  Bueno... Ke no enkolgen las bushkadas.. Kale
ke este selyo se tope !
 
Ni las sorizas i ni los bezos de su ijo no
puediyan kalmar Gulbahar Sultan en sus duvdas...
Teniya razon !  El selyo estava entre las manos
de Hurrem Sultan...
 
 
 
(a kontinuar kon Sharope)
 


 

- Copyright © sefarad.org - 1997 - 2017

Retour au site sefarad.org -