Accueil - sefarad.org

Almendra...parte 39

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte 39

 

La noche el Sultan no puido durmir, portanto estava kansado de
diyias i diyas de viaje ensima de su kavayo. Malgrado ke era muy
auzado, sintiya una pezgor ke no le plaziya del todo en su espalda.
Kuando era chiko, le kontavan historyas a vezes sovre personas
viejas i se muriya del sar ke un diya iva ser viejo i el, deskayido,
sin fuersas para salir i abatir el enemigo... Penso a Hurrem tan leshos.
La teniya de menester.. Antes, kuando iva a guerreyar no teniya
kuaji tiempo para pensar. Era durmir i maniar la espada en meneyando
siempre el braso kon esta arma tan pezgada i tan grande ! Puediya
kombatir kon tres guerreros en mizmo tiempo. Su fuersa i su talento
kon su espada eran lejandaryos. Es el, a la kavesa de los janisaryos
ke les dava koraje i los arrastava a la muerte o a la viktorya, detras de
el. Es pensando a sus diyas de manseves, a sus pruesas ke por finir
kedo durmyendo.
 
 
A l'amaneser, ya estava espertado, vistido i a la kavesa de sus ijos
i de sus komandantes, dando ordenes a kada uno. Una luvya fina
estava dando una ermoza freskor a la vale de Konya ande pensava
enkuentrar su ijo Mustafa kon sus guerreros. Deviyan de estar serka
del kampamiento agora. La pensada le dyo muncha dolor. Kaliya
eskapar kon este echo porke era difisil de tolerar esta pena.
 

Konvoko el responsable de los mudos i se retiro un buen momento
kon el en la tenta imperyal. Kuando el hombre salyo afuera, lo vieron
blanko en su kara i komo se iva kayer en kada momento. El hombre
se fue mas aya, debasho de los arvoles i gomito, portante no aviya
komido o bevido nada dayinda tan temprano.... Ni aviya amanesido
enteramente..
 
Dospues la luvya kedo i el sol aparesyo banyando kon su dulsurya
los entornos. Los janisaryos preparando el the de la demanyana i
asperando ke los panes salgan de los ornos ke aviyan fraguado
kon prestor, kuando unos de eyos estavan okupados a dresar las
tentas, deskargar las bestias ets.... Se aviyan ambezado a azer
estos echos diaryos i no les viniya difisil komo era al empesijo !
Estavan muy bien organizados i kada uno de los responsavles
saviya ke azer i kuando egzaktamente. Uno de los meritos del
Sultan era de no deshar ambiyerto dingun de sus janisaryos i
dinguna bestya porke saviya ke esto era uno de los sekretos para
salir viktoroyozos de las batalyas. Rompiya el pan kon eyos, lo ke
los inchiva d'amor por el. Es a sus kavesas ke rogava al Di-o antes
de kombatir i rendiya grasyas por tornar bivos a la tadre. Nunka se
olvidava de reingrasyar sus janiseryos i las viktoryas aparteniyan a
todos. Estos eran prensipyos ke no egzistyeron antes i ke nunka
ivan egzistir dospues d'el.
 
 
Las horas estavan pasando i estavan prontos para salir de muevo
en kamino kuando mesajeros de la guardia adelantre entraron al
kampo i le disheron a Rustem pasha ke las fuersas del Shahzade
aviyan aparesido kon el a sus kavesas. Estavan avansando kon
la bandyera del shehzade i en rangos de seremoniya de guerra !
 
Rustem koryo al lado del Sultan kon el hombre ke le trusho el mesaj
i le disho ke repetyera al Sultan lo ke viniya de dizirle !
 
 
Soleiman se detuvo del ombro de Rustem, aviya sintido el mizmo
mareyo ke aviya sintido kuando aviya meldado la letra ke le aviyan
dado.... Esta malditta letra ke no le deshava mas remedyo de
eliminar su eredero ! Matar kon su propriyo orden su ijo.... Un ijo
ke marcha a la kavesa de su armada kon bandyera deployada i
en rangos de guerra ensima de su padre ! Le disho a Rustem ke
lo iva arresivir solo en su tenta.
 
 
Rustem embiyo el mizmo mesajero al Shehzade para dizirle ke
el Sultan le demandava de parar/aretar sus janisaryos ande se
topavan i vinir solo a la tenta de su padre el Sultan ke lo asperava
kon karinyo i eskarinyo !
 
 
Mustafa al oyir esto kijo saltar de alegriya komo una kreatura.
Su padre se aviya eskarinyado de el ! Ke mas grande djoya
de esto puediya egzistir !

Alevanto su mano i paro/areto su armada. Se sintyo orguyozo
de mostrar a su padre ke puediya kontar sovre el i su armada
para appoyarlo komo se deve en sus batalyas. Se aviya preparado
komo en una grande seremoniya para enkantar su padre i azerlo
felis en mostrandole ke kadar de importansya dava a este enkuentro !
 
 
Galopo ensima de su kavayo blanko kon grande asurensya fina el
kampo, entre los gritos fina el sielo de todos los janisaryos de su padre.

- Shehzade Mustafa, bive mil anyos para mozotros !

- Guadrado de nazar.... Mashallah !

- Mustafa Khan muestro orgulyo, muestra esperansa !

Esto fue la gota d'alkavo ke kito loko el Sultan. Le disho a Rustem
a su lado

- Muestros janisaryos me enterraron antes ke Di-o me yame a su lado !

Entro a su tenta solo i izo un sinyo al komandante de los mudos.

El Shahzade entro en la tenta, sus ojos briyando de plazer yamandolo

- Mi padre Sultan, mi padre Sultan.... Esto aki. Tu ijo Mustafa...

Es en akel momento ke los mudos aparesyeron de todos los lados i
s'echaron ensima d'el. Se estavanda defendyhendo gritando
 
- Mi padre, mi padre kerido ! Estan matando a tu ijo ! Ande estas ?
Mi padre... Salvame de sus manos !
 
Soleiman al fondo, se estava tapando sus ojos i sus orejas kon sus
manos ! Estava para ezmayarse !

- Mi padre ! Padre, salvame ! Padre....Padre...

Fue muy difisil de aogarlo porke teniya muncha fuersa ma a la fin no
se meneyo mas i rezinyado se desho a las manos de los mudos para
ke eskapen sus suzyo echo komo les aviya enkomendado su kerido
padre. Agora saviya ke era su orden ! Deke...Deke....
 
Los mudos dezaparesyeron majikamente komo aviyan entrado,
deshando el Shehzade sin vida en basho, solo kon el Sultan ke no
se viya....

*

Soleiman se fue allado de su ijo i le serro los ojos tomandolo en
sus brasos i karesandolo, bersandolo kontra su pecho.
 
- Mi ijo, mi ijo, me yevas kon ti ande estas... No bivo mas !
Deke izites esto ? Deke kijites el trono antes del tiempo ?
No te di bastante mi karinyo komo les di a mis otros ijos....
Perdoname... Seriya por selo ke me kijites matar ? Te ami
siempre.. Eras mi eredero ! Lo saviyas .... Para kualo no
asperates... Mi ijo kerido.... Mi chikitiko.....
 
Soleiman se asento en basho i empeso a yorar, El puerpo sin
vida en sus brasos, karesandolo, bezandolo...

( A kontinuar kon Sharope)


 

- Copyright © sefarad.org - 1997 - 2017

Retour au site sefarad.org -