Accueil - sefarad.org

Almendra...parte 40

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte 40
 
Solo Rustem, no leshos de la entrada de la tenta
imperyal puediya sospechar lo ke se pasava aryento ..
Fue seguro kuando oyo los gritos de Mustafa...Kedo
sin meneyarse, blanko, tremblando delantre de lo
ke aviyan preparado tam minusyozamente kon su
esuegra, la reyna a las manos en sangre, komo la
yamavan a Hurrem Sultan munchos de sus enimigos..
Poko dospues los gritos no se oyian mas... Nunka
aviya passado una demanyana tan sinistra en su
vida !..
 
 
Djihangir, kuando oyo ke su ermano grande ke
adorava vino al kampo i estava kon su padre,
koryo para verlo i abrasarlo. El Sadrazam estava a
la entrada de la tenta. El mansevo flako i kon
korkova lo saludo respektuozamente :
- Oyi ke mi ermano Shehzade Mustafa esta kon
mi padre. Lo kijyera saludar i darle la bienvinida.
 
- No kreyo ke seriya una buena ideya de
dezrepozarlos agora mi Shehzade. Dales un poko
de tiempo endjuntos, por seguro ke tienen de
dizirsen munchas kozas... Ademas el Sultan no
kijo la prezensya de dingunos en la tenta imperyal.
Lo aspero aki afuera komo lo ves...
 
- Si, entyendo... Bueno. Estare i yo en el
deredor. Le avlare dospues de mi padre.
 
- Por seguro !
 
Djihangir se alesho del lado de Rustem Pasha ke
se le aviya entravado la sangre enteramente.
Se estava espantando de la reaksyon del mas
chiko Shehzade del Sultan savyendo ke Mustafa
era su idolo, todo lo ke amava en la vida dospues
de su madre i de su padre.
 
Buen karar de tiempo paso antes de oyer la boz
del Sultan ke paresiya vinir de un otro mundo !
 
- Rustem ! Entra...
 
Rustem entro blanko i tremblando...
 
- Eskapo ! Ize mi dover de Sultan !
Mati el ijo i su padre... Soleiman no bive mas !
 
- Entyendo vuestra dolor majlestad... Destino syego ke vos
ovligo a dar un orden fatal !
- Ke preparen los funerayes.. LO vamos a enterrar
en Konya.
- Lo dishites.. Vuestros ordenes sovre muestra
kavesa. Vozotros ke bivesh numchos anyos.
Ke somos mozotros mas ke los medyos para
akumplir la voluntad digame ! Di-o no permetyo
ke el ijo detrone a su padre i esta rebellion kontra
vuestra vida se pago kon su propria vida !
- No se... No esto seguro de nada... La manera
ke entro i me yamo, su kara kon soriza, su alegriya
ke se persiviya, no eran el de un enimigo ke vino
para matarme ma el de un mansevo yenno d'amor
por un padre.... Rustem esto konfundido, tengo un
remorso terrivle... Me parese ke me yerri i tu i
Hurrem teniyash razon kuando me konvensiyash ke
es innosente....Agora no lo se i es muy tadre...
Mi ijo no bive mas ! Lo mati... So yo ke lo assasini...
Deke bivo !!!!
- So el Sadrazam de este grande Emperyo i el
esklavo al servisyo del mas poderozo i savyo
monarko del mundo ! Inkontavles almas, dirijentes,
janisaryos, todos saven ke no egziste persona en
la kuala se puede tener mas konfiensya ke en vuestra
majestad. Sosh invensible i nunka vos yerratesh fina
oy, en nada ! Esto mos da la sertitud ke si datesh la
desizyon de tomar la vida de un ingrato, mismo si
este es vuestro ijo, no vos yerratesh i es ansina ke
teniya de ser.... Vuestro orden era la desizyon divina
ke se manifesto en vuestros biervos. No izitesh
dinguna error i devemos ser prontos agora por las
horas i los diyas difisil ke mos asperan enfrente de
muestros janisaryos komo los suyos ke son tan
atados al Veliaht. No es hora de mostrar flakeza.
Esto pensando de embiyar un hombre al palasyo de
Amasya para amatar toda esperansa en sus ijos ..
- Si ! Evidamente !
- Mi Sultan poderozo, so vuestro ijo i yo ! Ke ariyan
Mihrimah Sultan i mi venerada madre Hurrem Sultan
si vos vieran tan abattido i tremblando de aver komettido
una injustisya ke pensash solo ke es una injustisya ....
Porke es vuestro ijo. Saviyamos sus intensyones...
Tuvimos mazal de arresivir pruevas muy kategorikas i
es por esto ke vozotros, solo, datesh la desizyon, sin
ser influensado por dingunos... Los ke partyeron de
este mundo no tornan i no seriya posivle de demandarles
kualsiker koza... De toda manera ke ay ke no seya klaro ?
Yo estava kontra un tal akto pormodo de mi grande
afeksyon por el Veliaht, i me duele agora komo una
espada arriento de mi korason, ma tenemos de ser muy
fuertes, tomar muestro koraje entre muestras manos
para enfrentar enimigos i sus soldados.
- Okupate de todo Rustem... Diles lo ke keres...
Yo estare en mi tenta rogando al Di-o por este pekado
ke kometi... La verdad es ke no me importa murir...
*
Rustem avlo kon el komandante de los mudos i
estos se enkargaron de aparejar el puerpo de Mustafa
sin vida a los funerayes. Lo kuvriyeron de una ropa
de seda i Rustem Pasha arekojo todos los janisaryos
kon los del Veliaht tambien. Kon sus proprias fuersas
detras de el, ensima de su kavayo i bien situado
ensima de un chiko monte kon rokas en su entorno
les avlo empesando, komo siempre, kon alavasyones
al Di-o i al Sultan. Dospues les avlo del enemigo ke
ivan afrontar en poko i de la vayensya inkomparavle
de sus kompanyeros, los janisaryos.
No es dospues de todo esto ke les disho ke un
ensidente muy regretavle aviya okurrido i de el ke se
esperava lo manko se amostro un komportamiento
i se disheron biervos ke dingunos puediyan imajinarsen.

Les konto una historya imajinarya de mankura de
respekto, de arrogansya, mensyonando el amor de
los janisaryos por el, de demanda de abdikasyon de
la parte del SUltan en favor del Veliaht, dizyendo ke
se izo viejo, peryo sus fuersas i preferava el repozo
del Harem... La furor del Sultan delantre de tanta
temeritad i mal komportamiento aviya eksplozado
sin tardar i es delantre de la violensya del Shehzade
Mustafa ke los mudos aviyan salvado el Sultan,
tomando la vida del ingrato. El Sultan se estava
arrepozyendo agora en su tenta, abattido al punto de
no pueder avlar kon dingunos i rogando al Di-o por
las perdonansyas de pekados de su ijo bien-amado !
En nada de tiempo el kampo se torno a un infierno
 

de bruido, de polvo i las espadas se alevantaron kon
lops brasos deznudos de los janisereyos...
"Mintiras !...." "No es vedra !..." "Shehzade Mustafa !"
Kada uno estava gritando a su manera kon ekspresyones
feroses en sus karas !
 
 
(a kontinuar kon Sharope)

- Copyright © sefarad.org - 1997 - 2017

Retour au site sefarad.org -