Accueil - sefarad.org

Almendra...parte 41

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

ALMENDRA
__________
Parte  41

I uno grito  "Keremos la kavesa de Rustem Pasha!"
Todos empasaron a menasar i a gritar mas i mas.
Rustem se torno kon sus hombres al kampo, savyendo
ke ivan a vinir detras d'el.  Keriya assegurarse del
appoyo i de la proteksyon del Sultan.

El kampo estava komo durmyendo a medya noche.
Si una moshka bolava se puediya oyir.  Rudstem entro
en la tenta imperyal sin mizmo demandar si se puediya.
Soleiman estava asentado en basho.  El Koran estava
avyerto delantre d'el i meldava meneyando sus mushos
solo.  Rustem espero abokandose delantre d'el dospues
de aver bezado la cuppe.

-  Deke me deranjas en medyo de mi tefila Rustem  ?

-  No tengo novidades buenas i me vide sin otro
remedyo ke de vinir implorar vuestro ayudo.

-  Ke aviya de tanto difisil en organizar un simple
funeray ?

-  No se avla de esto... Esto esta reglado i el hombre
ya esta en kamino por Bursa i Amasya.  Espero ke en
dos, tres diyas no le va kedar un suksesor de su
sangre !

-  Bueno !  Deshame solo agora..

-  KE sus Majestades me permiten de eksplikarle la
situasyon kon los janiseryos....

-  No me interesa Rustem Pasha !  Aze komo lo ves
justo.  Te do el poder de komandarlos i de ser a
sus kavesa.  Mi dolor es muy profunda i no es en
los janiseryos ke esta pensando.

-  Keren mi kavesa poderozo Sultan !

-  Ke ?  Komo ?  Ke tienes tu kon esto ?

-  Pensan ke so yo ke di el orden de aogarlo...

-  No, es mi dezgrasya !

-  No es muestra kulpa... Afito de manera ke
dingunos puediyan evitar lo ke estava eskrito. 
Shehzade Mustafa esta muerto i kale ver komo
bivimos kon esto !  Kale kalmar sus soldados i los
muestros.  No se komo lo  vamos a lograr. 
Parese muy difisil a estas horas.

Los dos estavan pensando ke azer kuando los
janisaryos yegaron al kampo i empesaron a
alevantar kalderas.   Esto era sus tradisyonal
revolta en batyendo las grandes kalderas ande
se gizavan.  Estavan gritando todos endjuntos
demandando la kavesa del yerno del Sultan.

El Sultan salyo de su tenta i empeso a avlarles.
Se kayaron en d'una i se metyeron a oyir sus
biervos.  Eran la konfesyon de un padre loko de
dolor por el orden ke aviya dado porke el destino
no le aviya deshado otra solusyon !  Les demandava
de respektar su dolyo i el muerto ke dayinda no se
aviya enterrado. 

No se kalmaron !  Les kaliya la kavesa de Rustem !
El SUltan deklaro ke el Sadrazam se aviya trokado
i era Kara Ahmet Pasha ke iva tener su selyo.
Entremientes Rustem Pasha viendo ke los
janiseryos no teniyan entisyon de kalmarses antes
de azerlo pedasos delantre de todos, tomo la fuida
por la puerta sekreta de detras de la tenta emperyal.

Shehzade Djihangir ke aviya entrado a la tenta
kuando su padre i Rustem estavan avlando, aviya
oyido todo i saviya ke era su padre ke aviya dado el
orden a los mudos para ke aogen su ermano.   No
puediya suportar esta ideya.  Su povre puerpo
hazimyento s'eskayo den diya en diya mas i mas i es
en rogando al Di-o ke lo tome al lado de su ermano
ke bolo i desho este mundo demasyado krual para su
entendimyento.  Era no solo hazimyento ma demasyado
sensible..

El Sultan arresivyo el haber de la muerte de su ijo
muy kerido, el ojo preto de Hurrem, su d'alkavo nasido,
kon una dolor muy grande...  Le aviya vinido komo una
vengansa del Shehzade Mustafa !  Lo aviya yamado a
su kerido ermano a su lado i kastgando ansi su krual
padre.  Soleiman aviya peryido dos ijos de su sangre
en manko de un mez.  Fue terrivle para el.

El muevo Sadrazam era un hombre muy fuerte i
saviya ke no puediya kontar del todo en el Sultan.
Soleiman se desenteresava kompletamente de lo ke
aviya i afitava en su deredor.   Eran solo las letras
de Hurrem ke trayiyan un poko de luz a su kara de
hombre eskayido... No komiya i no durmiya.

Hurrem de su parte aviya resivido el haber de la
muerte de Djihangir kon gritos ke espadasavan la
alma de todas las mujeres del Harem.  Ya aviya perdido
un ijo, su primer, Shehzade Mehmet, i agora este,
Djihangir, su bien amado !  Aviya dado orden de azer
halva, un dulse de semolina ke se eskudya para rogar
detras de un muerto, para la sivdad entera.... Yoro
por el dezmazalado Shezade Djihangir, i tambien el
Shehzade eredero Mustafa kada persona en Konstantiniye.
No uvo alma ke no komyo de la halva ke se preparo
kon miles i miles de sakos de semolina i miles i miles de
sakos de asukar i leche tambien sin kavo !  Todos
rogavan por el i dos meskitas se fraguaron a su
nombre.

*
Soleiman torno mezes dospues a Konstantiniye a la
kavesa de su armada gloryoza komo siempre..
Es en ganando guerras ke el trezoro ottomano se
inchiya... Sin este revinido no se puediya kovrer los
immensos gastes de este Emperyo i el lukso inkreyivle
del Palasyo de Topkapi ansi ke el mantenimyento de
la armada lejendarya de los janiseryos.

Komo siempre, la entrada de la armada a la Sivdad
fue okazyones de grandes fiestas i los bruidos ke
aziyan la gentoria assuviyan fina los sielos.

-  Muestro Padishah, bive mil anyos sovre tu puevlo !
*

Hurrem kalmada por fin sin la menasa de la muerte
sovre su kavesa i la de sus kreaturas, astava asperando
el Sultan kon su soriza de ijika de kinze anyos.  Estava
sano i rezyo i era esto lo prinsipal....El resto estava en
sus manos...Lo iva sanar en su puerpo i en su miente.

Beyazit, durante todo el tiempo ke su padre s'aviyo
ido a kombatir, aviya ermozeyado la sivdad i aviya
renyado kon los konsejos de su madre de una manera
perfekta.  Los  "levent"  ottomanos (marineros
kombatatantes) debasho de los mas grandes
komandantes de la flota ottomana estavan ganando
batalyas formidavles.... El Mediterranneo no era mas
ke un lago turko i todos los puevlos en su deredor
pagavan taksas muy altas al Emperyo kada anyo.

Kuando el Sultan entro en los kuartos de Hurrem la
primera koza ke vido era la flakeza de su amada !
" Porke esta flakor ? " s'estava demando entre si !
La abraso pasionamente.

-  Ah Hurrem !  Si saves kuanto me mankates en los
kampos de guerra.. Uvyeron dias i dias ke no puide
dormir del todo...  Te teniya menester a mi lado
komo la lagua, komo el aver....

-  Kualo ke diga vuestra djariye a ken datesh todo
ma no le vale nada sin vuestra prezensya...

-  Esto aki mi alma.  No kreyo ke tendre fuersas para
salir a la kavesa de mis janisaryos  otra vez en mi
vida.  Es echo de los mansevos i vino el tiempo de
arepozarme.  Peryimos tres ijos... Me dates otros
dos !  Veygo ke Beyazit reusho a dirijir bien el payis
i no tengo dudas ke estuvites detras de kada koza
i koza.  Yo mizmo estuve muy kontente de Selim
ke te akodriya  kuando me mankavas !  Es
inkreyivle komo este ijiko te asemeja Hurrem !

-  No, no en todo !  Tiene sus manyikas i no me
plazen del todo.  Beve, le gusta los plazeres i las
mujeres !

-  Te entyendo mi kerida ma es el ke probablamente
sera mi eredero !

-  Deke no Beyazit ?

-  Porke no tiene dinguna fleksibilitad !  Kale ser
i humano.  Beyazit asemeja a mi padre kon su
durezza !

(a kontinuar kon Sharope)

- Copyright © sefarad.org - 1997 - 2018

Retour au site sefarad.org -