Accueil - sefarad.org

Almendra...parte 42

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

ALMENDRA
----------------------------------------------------------------------------
Parte 42

Era la primera vez ke Soleiman i Hurrem avlavan
i teniyan diferentes manera de ver la koza sovre
el eredero del trono agora ke el Shehzade Mustafa
no estava mas. Hurrem keriya su ijo Shehzade
Beyazit alora ke Soleiman pensava ke era Shehzade
Selim ke deviya asuvir al trono !
Hurrem saviya ke Beyazit era muncho mijor por
el Emperyo. Selim (nombrado Selim el blondo
o Selim el borracho) no teniya las kualitades ke
deviya tener un monarko, ademas un monarko
Ottomano ! Era un poeto i es la musika ke lo
interesava. Lo viyan diya entero kon la kupa
del vino en la mano i los mijores eskritores i
kompozitores de su tiempo a sus lados. Se aviya
enamorado de una ijika de una ermozura perfekta
ke su madre le aviya embiyado al Palasyo de Manisa,
ande los Shehzades aprendiyan el ofisyo de governar
el payis. Era judiya komo su nona Hafsa Sultan.
Hurrem la aviya eskojido kon muncha attensyon i
kon la esperansa ke puedeser iva reushir a alesharlo
del vino i de sus amigos ke le aziyan danyo.
Tuvo razon ! La belleza i la dulsura de Nurbanu
lo aviyan kitado loko por muncho tiempo i Nurbanu
le aviya dado un eredero al trono, el Shehzade Murat,
komo todos lo asperavan.
Muy grandes fiestas se aviyan organizado en todas
las sivdades Ottomanas ma por seguro ke Manisa
i Konstantiniye se aviya alegrado lo mas.
Shehzade Beyazit, el ermano de Selim se keshava
allado de su madre de la grande injustisya... Pensava
ke era el ke meresiya el trono. Hurrem aviya
ententado munchas vezes de avlar kon el Sultan ma
el no trokava de ideya.
Un diya Beyazit i sus hombres kaminaron ensima
de Manisa i fue una guerra muy sanglante entre los
dos ermanos. Son las fuersas de Selim ke derrotaron
las de Beyazit ke no tuvo otro remedyo ke fuyirse a
Iran ande fue abattido kon orden del Sultan. No
aviya kedado dingun otro pretendente al trono i es
effektivamente Shehzade Selim ke paso a la kavesa
del grande Emperyo de los Ottomanos en 1566, a
la muerte de su padre.
Hurrem se estava aflakando den diya en diya i
no se sentiya tan rezya. Los kuradores del Sultan
le konsejaron de bivir un sierto tiempo en Edirne,
la vieja kapitala del Emperyo, no muy leshos de
Konstantiniye. El Palasyo aya era mas averozo i
puedriya pasar muncho tiempo en lo kalmo de las
grandes guertas.
Una demanyana kon todas las personas debasho
de sus ordenes, unos 150 se dize, se metyeren en
kamino para Edirne. El Sultan aviya akseptado esta
separasyon por su salud ma se viya muy triste de
kedar sin eya en el Palasyo de Topkapi. Teniya
echos importantes de azer en Konstantiniye i no
puediya deshar estos aleshandose de la Kapital.
Hurrem de vedra ke se sintyo mas rezya en Edirne.
Mesajeras trayiyan i yevavan sus letras i los del
Sultan....Kuaji kada diya. Hurrem se sintiya alegre
i manseva otra vez. Pasava horas enteras kon su
amiga Marzuka, tambien de Krimea i ke aviya vinido
a Konstantiniye kon eya enjuntos.
Los anyos aviyan solo konsolidado sus amistad.
Se akodravan del diya inolvidavle de la boda del
Sultan kon Hurrem !

Hurrem Sultan era la sola mujer ke se aviya
ofisyalamente kazado kon un Sultan Ottomano.
Era un kuento inkreyivle i dayinda mas i mas era
lo ke les gustava avlar entre eyas !
*
Era en los diyas ke Hurrem veiya monstros las
noches en su esuenyo ! La Reyna madre, Valide
Hafsa Sultan biviya dayinda ...Esto no era ke su
espanto ke se iva tornado en una obsesyon
pensando solo a akel diya ke los ivan aogar eya i
sus ijos, el diya mizmo de los funerayes del Sultan,
kon la asuvida al trono del Shehzade Mustafa !
No saviya komo salir d'aryento de esto fina ke un
diya penso ke si era la mujer del Monarko i Reyna
del Emperyo, seriya en mijor pozisyon de topar un
remedyo a esta dezgrasya !
Si, ma komo ? Las leyes del Palasyo defendiyan el
kazamiyento de los Sultanes Ottomanes.

Esta Ley aviya pasado por el Divan dospues ke el
bis-aguelo de Sultan Soleiman, el Sultan Beyazit
(el nombre de ken le aviya dado a su povre ijo) aviya
perdido la guerra i los enemigos aviyan abuzado de
su mujer delantre de sus ojos antes de espadasarlo
i a el tambien dospues ! (La Batalya de Ankara 1402).
Kazarse kon el paresiya koza imposivle. El Sheyhulislam,
la unika persona ke deteniya la otoritad absoluta de
todo lo ke tokava a la relijyon, se oppozariya kon
fuersa a esto ! Kaliya ke topara un remedyo...
Un remedyo absolutamente..... Un remedyo !
I desido otra vez de jugar lo todo por lo todo komo
kada vez ke se sintiya en una trampa.
Un diya se vistyo entera de blanko, tapada entera
sin nada en su kara i sin dinguna djoya i embiyo uno
de sus eunukes al Sheyhulislam para solisitarle una
entrevista.... Nunka una djariye, mizmo Haseki Sultan,
aviya avlado fina akel diya kon un Sheyhulislam !
Ma este saviya la fuersa de esta mujer sovre el
Sultan i kuanto poderoza era en el Palasyo. Aksepto,
i lo mas por kuryozitad !
Era un charlatan de grande klasa ma kon immensa
enfluensya en el Emperyo. Hurrem dyo orden a sus
serviyentas i a sus eunukes de vistirsen tapados
enteramente kon vistidos blankos i kaminar deskalsos
komo eya mizmo ! Salyeron todos estos a los
koridores del Harem delantre de los ojos grandes
avyertos de todos ke se abokavan kon venerasyon
delantre de tanta santitad !!!
Kuando yegaron a los kuartos del Sheyhulislam, sus
serviyentas i todos sus esklavos, kedaron afuera i eya
entro sola al lado del grande de la fe muzulmana...
No se le viya la kara... Teniya una boz de ijika i muy
dulse...

Se aboko delantre d'el i le bezo los pies ! Kedo
ansina fina k'el hombre le disho de asentarse enfrente
d'el i de dizirle de kualo se tratava... El Sheyhulislam
saviya ke Hurrem era de una ermozura divina i lo
aviya echizado al Sultan. Se sintyo inkomodo delantre
d'eya ma por seguro ke no le amostrava sus sentimientos.
- Kon el ayudo del Di-o te topas en frente de mi...
Avlame i dime ke te yeva aki mi ija...
- ......
- Puedes avlar mi ija....
- ....
- Komo te puedo ayudar ?
- Hombre santo ! Penso a la muerte ! Vide la Luz
divina frente a mis ojos ke kon un mirakolo no se
ensyegaron delantre de Su Glorya ! Me yamava a El !
Mi lugar no es este mundo !
El Sheyhulislam se sintiya muy muy inkomodo ! Guay !
Ke iva afitar agora ? Si esta era de vedra santa, se
iva enterrar ke el es un charlatan ! Le asuvyo sudores...
- Kontinua...

(a kontinuar kon Sharope)

- Copyright © sefarad.org - 1997 - 2017

Retour au site sefarad.org -