Accueil - sefarad.org

Almendra...parte 43

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

ALMENDRA
----------------------------------------------

Parte   43

-  La primera vizyon ke tuve fue el diya de la sirkumsizyon
de muestros Shehzades.  Estava asentada kon la Valide
Hafsa Sultan i la prinsesa imperyal Hatidje Sultan, su ija..
A mi espalda estava asentada la Haseki Mahidevran
Gulbahar Sultan, ke komo lo savesh aviya vinido de
Amasya por la sirkumsizyon del Shehzade Mustafa.
Dospues de las fiestas ize dos diyaz tanid....


-  Ke te seya kontado...


-  Grasyas... La segunda vizyon la tuve durante los diyas
santos del Ramadan...


El Sheyhulislam empeso a meldar versos del Koran
meneyando su kavesa kon el sarik enorme ke le kuvriya
la kavesa, ensinyo de su alto rango.  Se estava
komportando komo si estava solo.  Hurrem aboko su
kavesa i kedo silensyoza..


-  Allah piadozo te embiyo sinyos...


-  Si !  Ke ago ?  Devo boltarme a la relijyon verdadera...
Komo lo savesh, nasi kristyana...


-  Si, por seguro !  Muestro Padishah lo save ?


-  No.  Vine a vozotros, el mas alto de muestra fe
muzulmana, la konsiensya i los mandamientos de
Allah.  No ize lo justo ?


-  Si, si !  Por seguro....Ma ke pensa el Padishah de
vuestra konversyon al Islam ?


-  Ken puede meterse entre Allah i su servitor ?


-  Nunka !  Dingunos !


-  Mi uniko dezeyo i mi konviksyon no bastan ?


-  Si, si !  Por seguro.... Ma....


-  Si basta es mi responsabilitad, seya lo ke seya i
esto pronta de dar mi vida en kambio !


-  Resivites la yamada divina... Mi dover es de avrirte
el kamino de la Verdad.


-  Agora mizmo !


-  Si tal es tu voluntad....


-  Lo es...


-   Bueno.... Alora.....


Es ansina ke Hurrem se aviya echo muzulmana.....Ma
esto era solamente el empesijo i lo mas fasil de su
plano.....


*


La tadre mizmo el Kizlaragasi vino a dizirle ke el Sultan
la estava asperando.  Se topo en frente de una mujer
emburujado en los velos blankos, mirando a un lugar
ke no egzistiya en sus kuartos !  Ande aviya bolado la
ermoza de las ermozas, la alegre, la mujer la mas
atraktiva del mundo entero ?  La ke puediya tornar en
siniza un hombre kon su sola mirada ?  Se aviya
enlokesida ? Ke era esto en medyo del Harem del Sultan !


-  Vine a dizir a la Haseki Sultan ke el Padishah la esta
asperando agora mizmo...


-  Dizele ke no puedo !


-  Le digo ke refuzash su envitasyon ?


-  Me oyites !  Dizele ke no puedo mostrarme a el.
Vate agora i dizeselo komo te lo dishe !


-  Lo oyi i lo entendi... Vuestro orden sovre mi kavesa.


Salyendo de los kuartos de la Haseki Sultan, el
dezmazalado eunuk estava tremblando komo una oja...
Komo le iva dizir al Padishah  "No va vinir!"   Se aviya
boltado loka por sierto !  Ke eran akeyos vistidos enteros
blankos ?  Hurrem ke adorava vistirse kon tules
transparentes, los vistidos los mas ekstravagantes en
el Harem, kon las kolores las mas bivas i ornados de
djoyas manyifisentes... Komo los aviya eskondido estos
kaveyos kolor de flama ke se le kayiyan ensima de su
espalda fina debasho de su talya fina ?  En su furor,
el Sultan lo iva echar a los pies de los mudos !  Esto es !
Ahhhhhhhh !  Su povre vida era fina esta tadre malditta ..
Ah mujer del infierno !  Ke aviya de peryer la kavesa ansina ?
Ke le mankava ? Dizir  "NO!"  al Sultan !


Kuando entro al kuarto del Sultan, vido el monarko okupado
a eskrivir.  Le paresyo ke era Hurrem ke entro.


-  Entra mi kerida.. Mira los ermozos versos ke te esto
kompozando !  " No tengo repozo en....


-  So yo, vuestro esklavo Sumbul, Sultan poderozo ..


-  Ah !  Ke ay ? Ande esta Hurrem Sultan ?


-  Es ke....


-  Ke ?


-  No puede vinir.


-  Komo no puede vinir ?


-  No puede... Ansina me disho de dizirvos... No puede !


-  No me kites loko !  DEKE no puede ? Esta hazina ?
Afito koza ?


-  No esta hazina...


Entresi estava pensando "Hazina atavanada !"


-  Avla hombre.... Ke tiene Hurrem ?


-  La vide entera aryento de velos blankos !


-  Me demando ken peryo el meoyo ! Yo, tu o eya....


El Kizlaragasi estava gritando entresi  "Malditta loka !
malditta  Rusa atavanada !"


-  Te vo sigir !  Yevame ande eya !... Vamos !


-  Vuestro orden sus Majestades...


*

-  Ande esta mi Haseki ?


-  Esta aryento.  Es la hora de la orasyon.  Esta rogando..
Namaz !


Soleiman travo las kortinas i vido Hurrem entera de
blanko vistida abokada ensima del tapet, arogando kaji
a boz alta... Soleiman la aspero sin tener remedyo !


Hurrem tomo todo su tiempo i ni bolto la kavesa.  Estava
enteramente absorvada por la tefila de la tadre..
Soleiman la estava mirando sin kreyer a sus ojos !
Aspero fin a la fin de la tefila i kuando eskapo i s'alevanto
d'enbasho la travo por el braso para yevarla afuera de
esta kamareta ke lo estava aogando.


-  Hurrem te yami i no vinites !


-  Mi vida te apartenese Sultan de los Sultanes... So
poka koza sin valor... No me importa agora.. Oy
finalmente esto en paz kon mi mizma.  Mis ojos se
incheron de Luz.  Esto felis i la muerte no me espanta
mas...


-  Hurrem no entyendo nada.  Ayer eras otra, eras yenna
de vida i oy me avlas de la muerte... Te veygo emburujada
aryento de estas savanas.. Kita esta vistimyenta de
fantazmas i ven kon mi.


-  No lo puedo Sinyor.


-  Komo no ?


-  So una mujer muzulmana.  No puedo dezvelarme
en frente de un hombre ke no es mi marido.


-  Ke dizes ?  Tu sos kristyana.  Yo mizmo te yevi a
las eskondidas a la iglezya en Noel.


-  Oy avri mis ojos a la verdadera relijyon.  La tuya i
la de mis ijos..  Todo lo ke posedo en mi vida.


-  No es ansina ke se bolta al islam.


-  Es el Sheyhulislam ke me avriyo el kamino.


-  Sin mi permisyon ?


-  Es un akto entre la persona i Allah solo.


Soleiman se torno i salyo de la kamareta sin dizir otro
biervo. En sus kuartos estava boltando komo una
bestya  enserrada.  Izo yamar el Sheyhulislam.


-  Hodja...Entra....Kualo es lo ke afito kon la Haseki
Sultan ?  Me dize ke me es defendida porke no
somos kazados...


-  Es la verdad... Kijo tener la relijyon de sus
krekaturas i la vuestra seya por amor para vozotros
i seya porke resivyo la yamada divina....



(a kontinuar kon Sharope
 

- Copyright © sefarad.org - 1997 - 2017

Retour au site sefarad.org -