Accueil - sefarad.org

Almendra...parte 44

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

PARTE 44
 
El Sultan se alevanto kansado, dezganado i
nerviyozo a la demanyana de su noche sin su
amada a su lado ! Ke le aviya dicho el Sheyhulislam ?

- Es tuya... Le puedes tomar la vida si keres. Ma no
te puedes meter entre eya mizma i sus kreyensyas !
Lo izo porke lo kijo i oy es muzulmana komo tu i yo
mizmo ! No tienes derrito de desvelarla si no es tu
mujer porke una mujer muzulmana no puede ser la
djariye de un hombre. Esto era posivle todo el
tiempo ke era kristiana Rusa. Oy no lo es mas !
I no importa si tuvites 10 kreaturas de eya....!

Ke iva azer agora ? El Sheyhulislam le aviya kortado
todos los kaminos ke lo yevavan a Hurrem. La
nesesitava. La keriya a su lado para diskutir de
los echos del Emperyo, tomar su opinion, amar enjuntos
sus kreaturas, jugar kon eyos, arrepozarse las noches
en su dulse kayntor, desharse kunar por su amor
maraviyozo, immenso al kual era tan auzado !...

Lo yamo a Sumbul Aga i le disho de ir ande su madre
en primero i ande su ermana i ande Hurrem dospues
para anonsarles ke las estava asperando en el grande
salon, immediatamente dospues de la komida del
medyo diya.
Dospues se espandyo ensima de su doshek i serro los
ojos kon una soriza de kreatura felis..
Dinguno lo desropozo fina verso el medyo diya kuando
komyo kon grande gana todo lo ke le trusheron.
El sol briyava afuera i le paresiya ke el mundo entero
kantava kon los pasharos raros en libertad en las
guertas i akeyos de todas las kolores, en sus grandes
kajas muy elaboradas ke ornavan las kamarates del
Saray/ el palasyo.
Dospues entro al hammam, se lavo i lo vistyeron de
sus rikos vistidos de seremoniya, lavorados de ilos
de oro i de plata. Le metyeron a su kavesa el grande
kavuk dekorado kon una egretta echa de una enorme
esmeralda, perlas,i diamantes.
Hurrem estava inchida de espanto dospues ke Sumbul
Aga le aviya anunsyado ke el Sultan la asperava en el
grande salon. Saviya ke esta envitasyon era konnektada
a su trokamyento de relijyon i por seguro ke le iva
demandar de kitar su velo i si refuzava la iva entregar
a los mudos para ke la echan a las aguas de la Marmara
a los pies del Saray. No egzistiya mas grande delito por
una djariye de salir kontra la voluntad del Sultan, no
egzekutir immediatamente sus ordenes o defiarlo !
Ke iva azer ? No puediya trokar agora... Era demasyado
tadre... De dinguna manera iva akseptar de kitar su velo.
Si iva enkontrar la muerte en este kamino, no iva azer
grande diferensya porke se iva murir de toda manera el
diya ke Mustafa iva asuvir al trono.

Se vistyo de blanko, muy simplamente, sin dingun
artifisyo i aksepto en su miente la muerte ke iva vinir
de la voluntad de su amado... Es kon la frente alta,
preparada a todo i roganda a los santos de su chikes en
su korason ke entro a la grande sala ande los eunukes
la yevaron direktamente detras de un paravan burakado
i de ande se puediya ver el salon entero. A su grande
sorpreza vido los pashas del Divan-i Humayun kon el
Sadrazam entre eyos ! Hurrem penso "Kere kastigar
la madre de sus ijos en frente de los mas grandes del
Emperyo.... La Reyna Madre Hafsa Sultan i la Prensesa
Imperial Hatidje Sultan estavan, i eyas, asentadas
detras del paravan. Estavan alegres i muy rikamente
vestidas. Le demandaron komo fue ke desidyo de irse
ande el Seyhulislam i komo se sintiya agora ke era
muzulmana.. La abrasaron, le soriyeron.. Hurrem
keriya yorar ! Ni saviya la razon !
Los eunukes entraron todos vistidos de vestimyentas
echos kon ilos de oro i de plata i sus shalvares kolorados.
Anunsiaron el Sultan ke entro detras del Seyhulislam kon
su enorme kavuk ensima de su kavesa. Hurrem no
estava viendo nada mas... Sus ojos se aviyan enganchado
al hombre ke adorava i del kual le viendriya la muerte en
este salon mizmo. Bushko de sus ojos los mudos. No
estavan. Puedeser estavan asperando afuera i no se
les aviya permetido de entrar aryento... Es kuando el
Seyhulislam empeso a meldar los versetos del Koran ke
se sintyo mas kalma i empeso a arrogar de toda su alma
a la Santa Madonna komo lo aziya siempre des de su
chikes. La estava arogando para ke le de fuersas para
enfrentar la muerte sin espanto i akseptar su destino
kon su ayudo... Eya ke aviya tenido el koraje de ver su
ijo enklavado para murir ensima de la kruz.... Kontrolo
de sus manos su garganta...No ! No iva sufrir muncho..
Era fina !
Dospues, los eunukes vinyeron a tomarla i la yevaron
allado del Sultan.. El Sheyhulislam le demando tres vezes
la mizma kestyon :
- En frente de estos dos testigos, Hurrem mi ija, akseptas
a Soleiman, ijo de Hafsa i de Selim por marido ?
Dospues se bolto al Sultan i le demando tres vezes la
mizma kestyon :
- En frente de estos dos testigos, Soleiman, akseptas
tu djariye Hurrem, madre de tus ijos, komo tu mujer delantre
de Allah i de tu puevlo aki prezente ?
Los " Si!" de los amantes se oyo komo si viniya de muy
muy leshos... Des de una tierra ke no egzistiya.. Se sintiya
en sus boz una delivransa profunda.
El Seyhulislam se aboko delantre del Sultan i fue el
primer a felisitarlo :
- Ke envejeskash endjuntos vuestras kavesas en un mizmo
kavesal. Ke Allah mantenga vuestro ogar rezyo i leshos de
hora mala. Ke konosesh la felisitad fina la fin de vuestra
vida.... Hurrem mi ija, lo vas a kudyar a tu marido i
someterte a su voluntad i tu, Soleiman, mi ijo, la vas a
oyer a tu mujer Hurrem porke es eya ke te va yevar en su
espalda a la Puerta del Ganeden.. En dandole vida buena
Allah te va regalar sien vezes mas. No la vas a deshar
ambierta i en la nesesitad. Vas a kudyar ke siempre tenga
vistidos i sapatos a sus pies. Te vas a mostrar dulse kon
eya kuando te va servir. Ke seyash horozos.
Hurrem i el Sultan le bezaron la mano. Dospues vino el
Sadrazam los felisito, Sumbul Aga i los pashas, el korte
del Sultan, los komandantes, los eunukes. Kuando todos
pasaron Hurrem i el Sultan fueron allado de Hafsa Sultan
i le bezaron la mano.. Las mujeres detras del grande
paravan los felisitaron todas kon grande respekto.
Esta seremoniya fue una grande sorpreza para todos ke
no saviyan ke iva afitar en el grande salon.... Nunka mas
uvo otro kazamiento de un Sultan Ottomano. Hurrem
fue la unika mujer kazada a un Sultan en el Saray Imperyal.
Hafsa Sultan teniya diffikultades a kreyer lo ke aviyan
vido sus ojos i oyido de sus propriyas oyidos !
Soleiman se aviya kazado kon una esklava, mizma si esta
era la madre de sus ijos ! No era la ija de un rey
ni una reyna de un payis ke konveniya de kazarse para
lograr paz o adjuntar mas tierras... Era un kazamiento
de amor !!! Mizmo Sultan Selim, el padre de Soleiman
ke la aviya tanto amado i al kual le aviya dado a sus
brasos un eredero al trono Ottomano, no se aviya kazado
kon eya... Los felisito i los bendizyo dizyendose a
si mizma "Mi inyeto bohor, Mustafa, va enkontrar munchas
diffikultades para yegar al trono de sus nonos ! Hurrem
va azer todo su possivle para impedir esto i nombrar
uno de sus ijos Veliaht al lugar del ijo de Gulbahar Sultan !
Povretika de Gulbahar ke fue sakrifikada pormodo de su
amor i el selo ke la komiya...Puediya reingrasyar los Sielos
de kedar en vida ! "
Lo ke no puediya imajinar la Valide Sultan es ke kuando
Hurrem se metiya en tino una koza era echo de vida o de
muerte i este kazamiento era una faza solo de su plano
para yegar a la unika koza ke le importava... Kedar en vida
en eliminando el Veliaht.
 
(a kontinuar kon Sharope)

- Copyright © sefarad.org - 1997 - 2018

Retour au site sefarad.org -