Accueil - sefarad.org
Loading

Con bien bos entre Hanuka. 11-12-2008

    MENU    

SEFARAD.org
El palacito de Sonia
RESHETAS
Ayudarnos
LA PÁGINA ANTERIOR

Con bien bos entre Hanuka

Ewa entrai a mi palacito encenderemos las mechas de Hanuka ! A ma que hiba …La hanukia sta chaâleteando, la fregui con alma y corasson. Daca que la mirara la descansada de mi abuela, mama Raquel, que su alma ste en gan êden ! Ella la gustaba todo como y como. Me dichera : La y âtik sahha, a imma, ansi t’ensegni. Wa mi, no me tires de la mano, baâda todas las âdas, me desmiro n’ellas. Que no falte una. Mi famiya me dizze : tu eres chequita y moderna pero pareces viejja de los tiempos de hazzeman carbon. En mi palacito ; diras que stas en Marruecos en los anios de yahasra. Alai los madraques farchados,las zzarbiyas, las seniyas con sus tippades, las lampas de assofar, las estormias, el rabuzz, el mehrezz, el tas para enchauarse las manos y hazzer la netilat yadaim. Cada cozza pertenecia a una abuela, gran tia, bizzabuela, hatta de Maine, la abuela de mi abuela.
Todas las generaciones estan cabe mi. Bendicho ste el amo del ôlam, uno se mette en el follo pero se mos quedan sus atuendos y sus hnotes. Y cada vez que mis ojjos miran una hhajja, es como si miraran la persona.
Aiwa, no bos quedis en pie, sentaibos, sentaibos, ya parejji l’azzeite de oliva y las mechas de algodon. Alaqui los mistos pa’nsender el shamash. Poni las kippas. Baruj ata …… A nerot alelu, anu madlikim …..
Que alegria, se haga’l mazzal por esos piyutim muestros.
Los hijjitos stan jjuando con los trompos, alegres y contentos. Ya los fecheimos y los merquimos unos alconfites.
La hanukia en medio del palacio, con las llamas bailando.
Que esas luzzes mos aclare el mazzal y mos deche sempre soleados. Quel Dio no mos mostre escurania !!
Segui pitnando y taniendo, dechaime bos meknare los binuelos, stan cayentitos. Echar miel o assucuar.
Yak estan luzzidos ? Bebi un bazzito de te pa que no bos tsakfeis.
Con bien pasis los ocho dias de Hanuka, con alegria bos quedis y dulce lo bibas.

- Copyright © sefarad.org - 1997 - 2017

Retour au site sefarad.org -