Dunque, dela lectura de este texto mi vino la inspiracion de escrivir i adaptar un resumen i del cual travi los elementos necesarios para reconsituyr la cariera de este hombre valutozo.
Medio siglo de una vida enteramente consagrada al Servicio Publico
i alas Ovras i Instituciones Judias alas cualas fue atado el nombre
de Joseph Niego no es cosa poca i merese ser conosido i
publicado mas anchamente, sovretodo en este anio de la commemoracion
delos quinientos anios dela expulsion de Espana.
Mos acodraremos siempre de render omaje a moestros ombres
ilustres para ke sus nombres no caygan en el desierto del olvido.
Portanto cualo vemos en semejantes cavzos? Vemos disgraciadamente
ke moestros corelijionarios los mas ilustres son bien presto olvidados
dela memoria del publico. En todos cavzos
tenemos, mosotros Sefaradim, el dover de siempre mantener alto la
memoria de todos los moestros ke se ilustraron durante sus vidas.
Il el cuadro bastante chico de este articolo aprovaremos de definir
i acodrar su vida enteramente consagrada alos interesos del Judaïsmo
medio-oriental, de este Judaïsmo ke lo pasionava
tanto i por el cual se dio de alma i de corazon durante toda su
vida.
No es exajerado de dizir ke su vida devria servir de ejempio para
las moevas jeneraciones ke son emprenadas del mismo
ideal afin de travar ensaniamientos preciosos, lecciones de concensia
i sovre todo la nocion del dover bien complido. Paralelmente asu ovra de
educasion i de construccion sociala por la consolidacion delas Valores
Judias por las cualas se batio toda su vida i por las
cualas izo tanto esforsos i sacrificios in cualidad de tecnicien, Joseph
Niego el Organisator, ato su nombre, entre otras cosas, ala transplantacion
dela Bene-Brith en el Oriente, principalmente alo ke era entonses
la Palestina, donde el rayonamiento i el disvelupamiento son en grande
partida el resultado de sus esforsos i tambien al saver avlar i convincer.
Los empesijos de su cariera al seno de la Bene-Brith se confonden,
se mesclan con la fondasion del orden. Es ansi ke nasio, precisamente el
8 de Mayo 1911 en, entonses Constantinopole, el Orden de la Bene-Brith,
Grand Lodja del Districto del oriente náøáXI, in la
casa misma de Joseph Niego, en
precensia del delegado del Comite Executivo del Orden, S. Bergel ke
vino especialmente de Berlin para esta ceremonia.
En el Oriente existian 7 (siete) Lodjas del orden ke se topavan en diversos payses como la Bulgaria, el Ejito ila Palestina. En el corso desu viaje, el delegado parvino a constituyr 11 (onze) moevas Lodjas de sorte kel Districto del Oriente nasio i empeso a lavorar con 18 (deceocho) Lodjas alas cualas se ajuntaron mas tadre otras numerozas Lodjas, totalizando ansi (34) trenta i cuatro de eyas. Su cudio permanente por los echos de su Lodja le permetio de suvir muy presto alas mas grandes foncsiones al seno de la Bene-Brith. Es ansi ke el fue elijido Presidente de este mismo Districto de Oriente náøáXI desde su fondasion, de 1911 asta 1933. Durante 22 anios (vente des) consecutivos i activos el pronuncio numerozos discorsos ke le permetieron de afirmarse entanto ke orator.
Naturalmente no es posible de dar aki la reproducsion de estosdiscorsos i alocuciones, por falta de logar, pero ay ke apuntarsolamente ke cada ves ke el se adresava al publico, alosdelegados dela Bene-Brith o de l'Alliance Israelite Universelleera para avlar de pas, de concordia, de entendemiento no solo entre mosotros los Judios, pero tambien i sovre todo verso los ajenos. Era ombre de dialogo i de pas.
Joseph Niego nasio en lo ke era entonses Adrinople en 1860. En esta sivdad del Emperio otoman, el frecuento las escolas de l'Alliance Israelite Universelle delas primeras clasas. Estudios ke el mantuvo i poursuivio en Constantinople, mas precisamente in galata.
Su chikes i su adolesencia se pasaron in una atmosfera tranquila pero con una emosion ke iya pujando achakes de la efervesencia i la curiosita.
Efervesencia? Era la epoca del renacimiento delas ideas sionistas i
el progreso dela cultura ebraïca i del Judaïsmo
in jeneral i todo lo ke avia al deredor azia ke los mansevos eran
muy interesados i curiosos a todo lo ke venia de lexterior. Sovretodo
la curiosita era la vitrina del mundo al cual no podian aynda entrar. estavan
ala boushkita dela cultura occidentala i principalmente la cultura francesa.
En su sivdad, i principalmente al seno de su familia, ande la cultura
era siempre en honor, el joven Joseph Niego, ambierto de saver i de ambezarse,
no aspero muncho tiempo para echarse ala
conquista de esta moeva cultura tan deseyada.
Andrinople era una chica sivdad provinciala del Emperio Otomano donde existia i se sintia una vida judia intense. Avia munchas yeshivot, escolas judias i numerozas bibliothecas ricamente garnidas. Por disgrasia estas ultimas fueron destruydas i desparisieron en los dos fuegos ke tuvieron logar in esta sivdad munchos munchos anios atras.
Estos mos da una idea i el testimonio dela favor ke gozavan los estudios judios i todo lo ke tokava al judaïsmo en jeneral. El progreso i la emancipasion eran la mas grande preocupacion ke animava ala manseveria judia de esta epoka, estos mansevos ke lentamente se estavan moviendo para salir de unaas huvis intelectualas bastante pisgadas.
Es, dunque, a traves una atmosfera de aviertura, de progreso i de boushkita
ke se pasaron la chikes i la adolecensia de Joseph Niego. Huerfano muy
chico, el no tenia ni guida ni preceptor para ocuparse de el a tal punto
ke el pensava a un momento dado, destinarse seriosamente ala cariera rabinica
como lo se avia demandado su tio el Grand Rabino Raphael Behmoiras. Entremientes
desbrocho la guera entre los Rusos i los Turcos e in seguito a esta situacion
en el anio 1876 unas cuantas familias judias de Andrinople se refujiaron
in Constantinople de espanto ke las consecuencias de guera no vengan astas
eyos. Gracias alos Cielos esto no acontesio. Kedo con su familia dos (2)
anios en
Constantinople ade pursuivio sus estudios en las escolas de l'Alliance
Israelite Universelle. Considerando ke podia ambezarse mas mucho, i con
esta sekia de saver ke lo estava embarasando muncho, el demando a su familia
de permeterle de viajar en Paris para amejorar sus estudios. Es ansi ke
el fue aricivido en l'Ecole Normale Orientale ande estudios 3 1/2 i susnotas
demostraron ke el era unos delos mejores elevos de estaInstitucion.
La Direcsion de l'Alliance, preocupada para topar i formar unelemento
valable para el posto muy importante de futuro Directordel establicimiento
agricolo de Mikveh Israel in Palestina,decidio de embiar al joven Niego
en una otra escola de estudiosagricolos superior ke es l'Ecole Nationale
d'Agriculture de Montepellier, in el buto de darle la formasion necesaria
para poder tomar en mano la Direcsion de Mikveh Israel. Dospoes de otros
3 1/2 anios in esta Institucion el salio con el diploma de "Ingénieur
Agronome". De vista el fue mandado a Palestina i desbarco in Jaffa al empesijo
del mes de Mayo 1886. Es, dunque, ala edad de 26 anios ke Joseph Niego
tomo en mano la direcsion de
la primera Colonia agricola judia in el Pays - Mikveh Israel.
Cada uno de mozotros se puede imajinar las dificultades de cada dia
en una tiera donde no avia nada e isolada, se poede dizir, delos puntos
abitables los mas sercanos i ademas con condiciones
climaticas muy penibles.
Es en estas condiciones de lavoro ke Joseph Niego parvino a azer de
Mikbeh Israel, de una tiera abandonada i desolada, la perla delas instalaciones
judias in Palestina. Detodas las partes del
Pays vinian a demandarle consejos, i esto ala grande satisfacsion de
sus dirijentes, filantropos i otros bankieris ke codiavan e se preocupavan
de Mikveh. El estuvo ala caveera dela Colonia
agricola durante 18 anios, i dospoes de este largo tiempo el demando
de dechar su posto por rasones de familia.
El fue nominado, dospoes de Mikveh, ala Direcsion dela Jewish Colonisation
Association donde se mantuvo durante otros 20 anios. A notar ke cuando
el era aynda director de Mikveh tuvo el
particular onor de recivir dos ilustres personajes ke el uno ena, Theodore
Herzl i el otro el Emperador de Alemagna Guillaume II ke vinieron a vijitar
la instalacion. Naturalemente ke esto fue por
el la consegracion de su cariera. Dospoes de sus servicios in la Jewish
Colonisation Association, el torno a Turquia i una institucion formada
por la Bene-Brith lo acolio i le dio la responsabilidad de lo ke era
yamado : La Caisse des Petits Prêts de Constantinople,
i estuvo otros 10 anios in estas foncsiones.
Para concluir este articolo podemos afirmar ke J. Niego fue un ombre de bien, enteramente devouado alos interesos desus ermanos i del Judaïsmo en todas las formas ke el pudo ayudar.
El deseyo ke afirmamos aki es ke los benefetos ke asembro alo largo
de su camino, los enseniamentos ke dio a tantas jeneraciones, la satisfacsion
del dover bien complido, mos de el
sentimiento ke todos estos sacrificios no fueron echos in baldes i
ke su nombre sera gravado en la istoria delos Judios de Turquia i kedara
como un simbolo de orgolio para todos los Sefaradim para
siempre i ke se reperkute de jeneracion in jeneracion.