El muvimiento del sionismo mundial kon toda su fortaleza y vigor empeso en el mundo djudio despues del primer "Kongreso Sionisto" en el anio 1897 en la siudad de Basel en Suissa, kongreso presidada por Herzl.
Entre los delegados ker partisiparon en este kongreso uvo tambien unos kuantos reprezentantes de los Djudios del Imperio Otomano. Tuvimos unos kuantos historiadores sefaradis en esta epoka y entre eyos puedemos notar Moïse Fresco, Salamon Rosanes (1864-1938), Avraam Galante (1873-1961). estos Djudios espanioles no metieron la mano en este sujeto delikado ke era el muvimiento sionisto. "Fraguas una patria djudia en Palestina", teritorio el kual apartenia al Imperio Otomano. Solamente el Prof. Galante muestro grande amigo y konsejero en 1933 eskrivyo un livriko sovre el titolo "Abdulhamid II et le Sionisme". En este livro mos konto muestro profesor ke Herzl vino tres vezes a Estanbol y se enkontro, kon el padishah Abdulhamid el segundo (1876-1909).
De este enkontro ke tuvo no salio nada de positivo por el Sionismo. Malgrado esto la Simyenta del Sionismo, de la renesensya judia kayo en siertas tieras fertiles del Imperio Otomano. Uvo muvimientos de la juventud djudia en siertos lugares del Imperio.
Mansevo Djudios y en vezes kon uniformas pasavan por las kayes de Saloniko,
Andrinopla (Edirne) y Konstantinopla (Estanbol). Yo mezmo me akodro en
al anio 1920 (era aedado de kuatro anios) en las kayes de Ortakeuz (donde
morimos solo un anio) pasavan makabistos kon uniformas, kon trompetas y
kon la bandiera sionista a sus kavesera.
En la Republika Turka kitaron leyes muy radikalas en los primeros anios. Una de estas era : un muvimiento ke el sentro de el no es en Turkiya, es defendido ke tenga atadijos en Turkiya. Y por esto el komunismo y el sionismo fue y es fin muestros dias prohibido en Turkiya. Los komunistos Turkos de muestros diys lavoran en Turkiya arientro de los partidas sosialistas.
El Sionismo no puediya danyar a la Turkiya porke el buto del Sionismo
era de fondar un Estado Djudio en Palestina y Palestina no estava mas debasho
la Turkiya despues de 1918. Malgrado esta verdad los Turkos fueron siempre
kontra el muvimiento de la renesensia Djudia. En todo modo de okasiones
la prensa turka atakava al muvimiento sionisto y a los Djudios de Turkiya
los kualos sempatizavan y kon ardor por el Sionismo. Un poko mas dare aki
siertos detalios.
En los anios 1932 siertos mansevos de Balat pensavan el menester de formar un muvimiento por enkorajar y espertara los Djudios, por aribivir la senteya ke ya egzistiya en eyos. Ala kavesera de este grupo de Djudios se topavan los amigos, los havenim sigun se yamavan Sabetay Dinar, Mois Madjar, Reuven Armal y el eskritos de estas linyas Eli Shaul. Todo se aziya en sekreto, mezmo no ay de avizar a muestros parientes de lo ke se pasava. Porke sigun ya lo kontimos el Muvimiento Sionisto era prohibido en Turkiya. Despues de munchas avlas los kuatro haverim desidieron de fondar un muvimiento lokal en Balat y su nombre fe "Neemane Tsion" (los amorozos, los senseros, los amistozos de Sion). La data djusta de la fondasion del Neemane Tsion en Balat fue el 1934.
Los primeros miembros de este muvimiento klandestino eran todos moradores de Balat. Todos estudiaron en el "Gan Yeladim Ahrida" de Balat. Malgrado ke la yamavan el gan yeladim, era una eskola primera de sinko klasas. Se estudiava aki el franses, el turko y el hebreo. Todos konosimos aki al Profesor de hebreo Shimon Asayas buen profesor de hebreo, y muy sionisto.
Kedimos todos debasho su enfluensa. Entre otros ensenyadores ke tuvimos aki me akodro la Guiveret Koen y la sinyora de Morhayim.
El buto del Meemane Tsion empresipio era de ambezar el hebreo, un poko la historia Djudia, un poko el Sionismo y un poko de todo lo ke se pasava en Palestina.
Despues de dos a tres anios de aktividad en Balat en Neemane Tsion se empreso a espandir en Galata en la Kula (Kule dibi) y al deredos del Kal delos Frankos. Estos lungares ke kontimos se inchiyan de moradores de Djudios los kualos abandonavan Balat, Haskeuy, Sirkedji y se aresentavan en esta partida de Estanbol.
Entre los primeros miembros del Neemane Tsion me akodro los haverim Rafael Behar, Nisim Rodrig, Ilusha Koen, Yitshak Shalom, Jak Rodrig, su ermana Sra Rodrig, Siyon y su ermana Ester Koen, Kutiel, Fins, Eva Nasi, Hayim Koen, Izak Belifante, Marko Koen, su amiga Ortans ...
Munchos de estos haverim suvyeron a Israel. Ma el kontakto kon eyos
mos se rompio. Yo me sientere orozo si uno de eyos melda muestra eskrita
y mos aze saver de su buen estar.
Destemodo los haverim del Neemane Tsion mos pujavan. Munchos de eyos fuyiyan kon todos los remedios a Palestina. Mozatros el Neemane Tsion les ayudavamos un poko en paras y un poko en bushkarles abrigos para morar, ropas para vistir kolchas y mantas y kolchones por durmir las noches.
Los anyos pasan presto. Los haverim del Neemane Tsiyon pujavan de dia en diya. Vino el tiempo ke muestros padres, tiyos, amigos, jenerozos Djudios se empesaron a enteresar a las aktividades del Neemane Tsion. Muestros grandes amigos en Estanbol komo Brod Henri Soriano, Karako el Vidrero y otros siertos Djudios rikos, entelijentes y de buna veluntad tomaron en sus manos a ayudar de todas las maneras a embiyar alos Djudios ke keriyan partir a Palestina. La guerra segunda mondial ya se aserkava. La propaganda nazista se espandia en la Evropa entera y munchos Djudios de Turkiya y los ke fuyiyan de la Evropa keriyan entrar a Palestina.
Estos rikos Djudios ke kontimos kon la ayuda de miembros del Neemane Tsion y del grupo de Ehaluts arkilavan chikos vaporikos, maonas, motores denoche los entravan a los kandidados por el viaje. Envezes mezmo en dediya. Se deziya viaje para Izmir. Y de Izmir no era tan difisil para fuyir de noche de la mar Ege y en dos, tres o kuatro diyas "el Kargo bivo" arivava a Palestina en pasando entre las islas Gregas. Me akodro ke el "Demir Hisar" un chiko vapor ke era un kargo por trasportar vakas y kodreros unos kuantos anios trasnporto Djudios de Turkiya a Palestina.
Lomas eran Djudios de Turkiya, ma tambien de Romania, Bulgaria y mezmo de Polonia. De Polonia mos veniyan jovenes y jovenas kon chismes y palos largos. Eyos eran Betares del partido de Jabatinski. Los haverim del Neemane Tsiyon y del Ehaluto los avresentavan en kazas de djudios y en hoteles de segunda y tresera kategoriya y kuando visniya la ora kon el, mezmo sistem kon chikos motores partian a Plaestina.
De los "Betar" es de Estanbol Albert Razon y un sinyor. Maya se okupavan tambien para organizar a pueder embiarlos a Palestina. A este modo de imigrasion se yamo en la historia del sionismo "Aliya Bet".
Otro kamino para embiyar a los Djudios a Palestina era de pasarlos a los kandidados al Levanon y a la Siriya. En estos dos paizes ya aviya Arabos "amigos" de Djudios ke kolaboravan kon la ajensia Djudia y los aziyan entrar a Palestina.
Entre los haverim ke pasaron klandestinamente las frontieras de Turkiya,
Levanon y Siriya me akodro solo dos nombres y estos son Yitshak Salom del
Neemane Tsiyon de Estanbol y Hayim Saban de Izmir. Los ke se aferavan en
las frontieras trovaron muncho, preziones y haftonas ...
La primera y la mas importante era de la ardor de los Djudios de Turkiya de kerer partisipar al muvimiento de renesensia del puevlo Djudio en su tiera antika y historika Palestina. La sigunda razon fue ke el antisemitismo pujava en Turkiya kon grande proporsiones. Despues de los trajikos evenimientos kontra los Djudios en la Trakia en 1934, uvo la mobilisasion de las 20 klasas en el anio 1941 (mobilisasion solo de los non muzulmanos). Mobilisasion de los aedados de 20 a kuarenta anios. Los mobilizados fueron metidos leshos de las grande sivdades en kampos serrados. Turkiya no aviya entrado en la gerra y esta mobilisasion fue sin razon.
En el anio 1942 en Turkiya fue el Varlik Vergisi (la taksa de las rikezas) de triste memoria. Esta taksa fue aplikada en jeneral para los non muzulmanos y el buto era a destruyir ekonomikamente a los non muzulmanos en el pais.
Los ke no pudian pagas esta taksa egzorbitante los embiyavan a los kampos de konsentrasion en Anatolia. El kampo Ashkale fue muy triste para los Djudios y kajikeno aviya Djudio ke no fue tokado por el Varlik Vergisi de una manera o de otra. Estos tres Golpes ke tuvimos mozotros Djudios de Turkiya fueron muy trsites en muestra historia y por siguro ke enfortesieron el Neemane Tsion y el grupo de Ehaluts, y la kansikuensa de estas angusias fue la pujita de los ilegados ke fueron organizados y partiyan a Palestina (Aliya Bet). Aviya menester de organizar la Aliya Klandestina a Palestina. Primo porke la Ingletera no deshava a ke los Djudios entraran libremente a Palestina, y segundo la Turkiya no deshava a los Djudios a ke partieran direktamente a Palestina.
El eskritor de estas linyas eskapo sus estudios en el Universita de Estanbol en el anio 1941 y en el mezmo anio empeso su servisio militar en Ankara y mas tadre en Anatolia serka las frontieras de la Union Sovietika y de Iran.
En todo tres anios por siguro ke no se puido okupar por el Neemane Tsion.
En 1945 me enstali en Izmir y aya konosi a Diana la ke iva devinir mi esposa. Izmir komo Estanbol sufrio muncho de las angusias de las mizerias de akeyos tiempos. Las datas 1941 y 1942 son inolvidables paras los Djudios de Turkiya. El antisemitismo pujava visto ke las armadas nazistas estavan en las frontieras de Turkiya. La Bulgariya y la Gresia vizinas de la Turkiya ya eran okupadas por los Alemanes. La prensa Turka a lo menos una partida eskriviyan artikolos kontra los Djudios. Entre estos el Milli Inkilap de Cevat Rifat, Omer Riza Dogrul, Biskuvitchi y siertos mas. En Palestina pletos entra Djudios y Arabos, pletos entre Djudios y Ingletera kontinuava. Los Djudios de Estanbol desharon el Espanto y pensaron ke ya vino la ora a responder a los antisemitas de Turkiya ke pujavan en el anio 1947 en la mez ma mezura ke pujavan los pletos en Palestina entre Djudios, Arabos i Inglezes los mandatores de Palestina. En el mezmo anio tres periodikos semanales dioa luz en Estanbol. Y s nombres eran : Shalom (de Avram Leon), Shabat (de Mose Benbasat), Atikva (de Sabetay Leon).
Los patrones de estos semanales eran jovenes Djudios de Estanbol todos sionistos y partizanes del Neemane Tsion. Estas gazetas aparesian en forma de kuatro ojas solo la primera pajina en Turko y las otras en ³á
El eskritor de estas linyas, fue el primer ke respondia a los antisemitas de fama enternasional komo Djevat Rifat y Omer Riza Dogrul.
Kon artikolos de fondo en las primeras ojas de los ditos periodikos.
En Izmir el eskritor de estas linyas Eli Shaul kolaboro kon los grandes de esta ermoza sivdad, los buenos y poderodos Djudios en keriendo ayudar a los Djudios, ambezarles un poko la valor del sionismo y prepararlos a la Aliya a Palestina y mas tadre al Estado Djudio Israel. Pueda kontar aki siertos nombres los kualos izyeron todo lo ke se puediya azer por ayudar a los Djudios de Izmir, ayudar a los ke keriyan partir al Estado Djudio muevamente fondado y estos de kontavan kon miles ... Estos son los preciozos Djudios ke konosi en Izmir los ke izyeroy muncho por el Judaismo y por el sionismo, por el Estado Djudio. Yakup Sagol (Jacob Saül), Sn. Gomel, Yako Bensinyor, Salamon Gargir, Eliezer Levi, Jak Albagli, Leon Esperansa y entre estos se puede kontar el sinyador de estas linyas Eli Shaul. Tengo siertos dokumentos ke los guadro bien.
El anio 1950 fue el tiempo ke deviya partir para Israel. Aviya tomado el avizo en esta kesion de mi tiyo el Prof. Mishon Ventura de Estanbol (1).
Entre los anios 1848-1952 komo 40 mil Djudios de Turkiya suvieron a Israel. Por siguro ke el Neemane Tsion tuvo una grande parte en la organizasion de esta presioza aliya, presioza para los Turkanos eyos mezmos y precioza para el estado de Israel. En lo ke bivi en Izmir en los anios 1946-1950 losanios de Alkavo ke los pasi en mi pais ke nasi Turkiya, tuve una korespondensia fruktuoza kon mi grande amigo y mi konsejero el Prof. Galante. Tambien estuve en korespondensia kon el ministerio de los echos etranjeros de Israel.
Mis okupasiones en Israel por el Sionismo, el Judaismo, historia y folklor
de los Djudios de Turkiya kontinuan fin estas dias.
(1) mirer por otras la oja.