Era naturalmente nessessario enkontrar komo los prinsipios de la Ley Judaika antigua eran aplikados al sistema legal moderno. Esta ley estava y esta bazada en la Torah ke, endemas de la Ley Eskrita, tenia tambien los prinsipios orales dechados por nuestros Rabis atraves de la Istoria y ke son la baza de la Ley Talmudika.
Se izieron seryas investigasiones para saver si el konsepto del " Copyright " era konosido en la antigua Judeya y kuales eran sus primeros presptos.
Se pensa abitualmente ke los primeros prinsipios de la Ley del " Copyright " surjieron orijinalmente kon la invension de la imprimeria, dando proteksion a los impresores y no parese ke uvo ningun prinsipio de " Copyright " antes de akeya data.
No se save si Roma, Atena o sivilizasiones anteriores tenian algun konsepto paresido kon los konseptos del " Copyright ".
Bien visto, se podria dezir ke el fundamiento del " Copyright " puede ser visto en el 8° Mandamiento del Dekalogo en el dizierto, la sosiedad era ainda demanziado primitiva para preokuparse kon deretchos inkorporeos, defforma ke la Ley Judia no podia bazar ningun prinsipio de " Copyright " sobre este mandamiento.
El primer konsepto atribuido ke enkontramos en la Ley Judia antigua aparese en Yirmiya. En el Livro de Yirmiya, kapitulo 23, Versikulo, 30 podemos meldar lo seguinte : " Esto kontra los profetas ke rovan mis palavras y kada uno a sus y vizinos " (" Lahem, inneni al anneviyim neum adochem, megannenneve " devarav iche meet rééu ").
Era de fakto komun ke algunos falsos profetas al oyir las profesias de Yirmiya en la " plasa alta ", ivan al " merkad bacho " divulgar las mismas profesias komo si fuesen de su propia vizion, y esto era visto komo rovo de palavras.
En baza a esta sentensia se desvelopo una regla importante en la Ley Judia al tiempo de la destruksion del segundo Templo de Yeruchalayim por Tito, en el anio 70 de la era aktual.
Vivia en Yeruchalayim uno de los mas savios Djudios, el Rabino Yohannan, ijo de Zakay, este mismo ke Elie Wiesel nos deskrive kon imensa ternura en su livro " Celebration Talmudique ". Preokupado kon el futuro de Israel, de su puevlo y de sus Leyes, sin Yeruchalayim y sin un Templo, penso ke solamente se podia kontinuar komo Entidad espiritual.
Empeso entonses a rekojer un grande numero de pensamientos imortantes de la tradision del Judaismo. Este proseso kontinuo asta ke fueron klasifikados en la " Michna ", y uno de los pensamientos dela " Michna " dize presizamente : " la persona ke repite palavras en nombre de ken las dicho, trae salvasion al mundo ". Esta misma sentensia viene nuevamente en Livro de " Pirke Avot (Etika de los Padres) en el kapitulo 6, versikulo 6.
Es importante notar ke se trata siempre de la defensa del autor y no de imprimidor.
El prinsipio de " repetir una koza en nombre de ken la dicho o la eskrivo, era konsiderado mas importante en vida del autor, porke una vez dezaparesido, el muerto ya no podia perdonar el fakto de no aver mensionado su nombre.
Este y mas prinsipios sovre " Copyright " fueron kitados de la imensa literatura rabinika en el siglo 19 y prinsipios del siglo 20, y desvelopados por las organizasiones evropeas del " Copyright ".
Para terminar vale la pena notar ke la Ley antigua Judaika empeso kon el lado moral del prinsipo, defendien solamente el deretcho espiritual del autor.
Los deretchos pekuniarios se desveloparon mas tadre, kuando los deretchos pekuniarios se desveloparon mas tadre, kuando los deretchos morales se enkontraron kara a kara kon la vida materialistika, y kuando estos mismos deretchos pekuniarios ayegaron a ser protejidos en konsekuensia de la defensa de los deretchos morales del autor.
Es kostrumbre dezirse ke un Rabi puede enkontrar en la Biblia la fuente de kualker koza debacho del sol, y en el kampo del " Copyright " o de otros prisipios morales, un investigador puede enkontrarlos en este Livro universal ke es la baza de la moral para el mundo sivilizado : la Biblia.