Ainda antes del anyo 1910 bivian en Mexico unos pokos sefardis. En akeyos anyos el paiz estava envuelto en luchas internas sangrientes i la situasion ekonomioka, de mizmo ke la politika, estava poko menos ke katastrofika.
Para los djudios, de mizmo ke para munchos evropeos, Mexico era un paiz del kual esperavan pasar despues a Estados Unidos, ma algunos de los ke no pidieron azer esto divieron kedar ayi i, malgrado las difikultades naturales devidas a la diferensia de lengua i kostumbres, poho a paoko, kon mucho esforso i lavoro esyos reusheron a integrarsen i se kedaron definitavamente en el paiz.
Uno de eyos fue el Sr. Isaac Capon ke viniendo de Gresia se establesio en esta tierre i despues de munchos esforsos logro una pozision ekonomika bastante buena para empesar a preokuparse de sus ermanos de relijion.
Segun el uzo en la diaspora, los pionieros, una vez ke areglaron pensaron tanto a la vida komo a la muerte : para la vida un lugar de orasion i para la muerte, un terreno konsakrado onde puedan repozar eternamente ; i entra la caza de orasion i el simeterio, la supervivensia komo seres umanos. En 1912 Isaac Capon i un choko numero de amigos djudios desidieron de estableser la primera institusion djudia en Mexico i basho el nombre de " Alinsa Monte Sinaï " pozaron las bazas de la komunidad. Kon los esforsos de este choko grupo se fraguo el primer simeterio djudio ke por munchos anyos i sin distinksion por la orijin de sus miembros , dio servisio a sus difuntos.
Komo sefaradis kale entender aki, en el senso estrikto de la palavra, a los desendientes de los ekpulsados ke kontinuaron a prezervar sus atadijos kon la kultura espanyola por medio de la lengua (djudeo-espanyol o ladino), por el romansero, desde la kuna asta la tomba, por el gizado i todas las kostumbres ke se enrayigaron en la memoria de los sefaradis i ke aun en muestros dias, kedan komo trezoros de muestra erensia.
Es djustamente en baza a esta memoria, a este atadijo indisoluble, ke en 1924 es fondata, kon el Sr. Capon a la kavesera, la institusion ke kon el nombre de " La Fratenidad " reunio a toda la komunidad djudia sefaradi de la sivdad. Poko a poko sus aktividades se anchearon i se formaron grupos diversos komo " Damas de la Buena Voluntad " (transformado mas tadre en " Bikur Holim ") i " Gemilut hasadim ". Las orasiones se azen sigun el rito sefaradi i en todos los aspektos de la vida komunitaria se trara de mantener la tradision ke veniendo de Espanya i pasando por los paizes balkanikos, yego a Mexico.
De 1937 en adelantre la aktividad de la komunidad estuvo estrechamente atada al movimiento sionista. Se fondo la Organizasion Sionista Sefaradi ke sovresalio por sus aktividades sionistas i kulturales ansi ke por su kolaborasion kon las diversas institusiones sionistas. Sus dirijentes komo Victor Mitrani, Isaac Moscona i Victor Tacher fueron alavados por las mas altas autoridades del sionismo. OY mizmo esta organizasion, renovada kon lideres kada vez mas dinamikos, kontinua en sus esforsos en favor de Medinat Israel.
El verdadero progreso en lo ke toka las institusiones tuvo lugar a partir de 1940. De muevo aparese el nombre del Sr. Isaac Capon komo el promotor de la konstksion de la sinagoga i 2 anyos despues se inaugura el kal " Rabi Yeuda Alevi " ke aun en muestros dias es una verdareda djoya, tanto en su arkitktura komo en su kontenida, para el orgolio de la komunidad. 54 anyos despues de su fondasion el kal Kodosh Yeuda Alevi kontinua a ser el sentro relijiozo de los sefardis de Mexico i las muevas jenerasiones mantienen kon gratitud i orgolio la erensia ke revisieron de los fundadores de "La Fraternidad ".
En esta mizma dekada de los 40, a la konstruksion del kal se adjusto la del simeterio, esta vez ekskluzivamente para los sefaradis i ya separado de la aliensa Monte Sinaï para la kontinuidad del djudaizmo sefaradi. Para esto era nesesario ke los chikos fueran a muestra propia eskola.
Basho la prezidensia del Sr. Leon Alazraki i kon los esforsos del Sr Victor Babani ke fue enkargado kon la formasion del Komite Konstruktor de la eskola se logro, despues de grandes esforsos, la konstruksion del ."Colegio Hebreo Sefaradi". Esta era la djoya ke faltava en la korona de muestra komunidad i desde su konstruksion se edukaron ayi la mayor parte de los ke son las muevas jenerasiones de la komunidad. De esta eskola salieron munchos ke yegaron a ser profesionales en todos los ramos de la sensia i kultura.
En el kolejio ke tiene aktualmente unos 750 elevos ay tambien klasas de ebreo i de komputasion i se da una atension espesiala a la ensenyansa de la vida djudia i del sefaradismo. Sus direktoras aktualas, las Sras Esther Mundlak i Amelie Esquenazi, ke estudiaron eyas mizmas en el kolejio. realizan por medio del Merkaz Sefarad un lavoro muy intensivo i efikas para asigurar la kontinuidad de la erensia sefaradi.
La komunidad sefaradi de Mexico konta un numero aproksimado de 5000 almas. Gran parte de sus miembros ya son nasidos en Mexico i sus lideres estudiaron en sus mavoria en el Colegio Sefaradi. Se kontinua a mantener la tradision relijioza i las orasiones se kantan sigun el uzo sefaradi de Turkia, Gresia i Bulgaria. Esta es, en fin, una komunidad dinamika ke tiene tambien su propio sentro de reuniones sosiales. La interrelasion kon las otras komunidades es respektuoza i fraternal i en lo ke respekta el movimiento sionista se puede afirmar ke la Organizasion Sionista Sefaradi es un verdadero enshemplo de dedikasion apasionada a la kavza del Estado de Israel.
Literario tambien la aktividad es bastante En el aspekto jurnalistiko l fruchiguoza. Se publika una revista bi-mensual, "Emet". i ademas, distingidos jurnalistas i eskritores sefaradis se djuntan a intelektuales de otras komunidades i kolaboran aktivamente en publikasiones komo la revista "Foro" i el periodiko "Kesher".
En el Kal, el Kolejio i el Sentro Sosial estan bien
enrayigadas las rayizes del sefaradismo i en todas las aktividades de la
Komunidad se reflekta la erensia resivida de muestros antepasados. Las
orasiones, las reuniones sosiales, toda la vida komunitaria esta empapada
kon los uzos sefaradis i el djudeo-espanyol es uzado munchas vezes adientro
de la eskola o en el kuadro de la vida familial. En rezumen, lo "sefaradi"
esta prezente en esta komunidad siempre i de manera permanente.