Un dia de fiesta vidi a mi nono maskar una zetuna i me demandi komo puede maskar a su eda, mientres ke yo... mas djoven... no arivo.
Le dishi: "Papu, ke haber?" Me disho. "Sssh..." Entendi ke no keria meter al korriente a dingunos de los ke se estava pasando.
"Ma. papu, kualo se esta pasando?" le demadi yo otra vez.
"Sssh... aspera un poko !" me disho el.
Yo era ashufri i no pudia estar repozado, sin saver la razon. Kuando paso un poko de tiempo me aserki al lado de el i le dishi: "Papu, kuala es la razon ke me demandates de estar kayado?" Me dize: "Tengo muevos dientes!" "Pardon?" "Me salieron muevos dientes!" "Komo? Dientes no salin muevos!" "Si!" disho el, "Dame el dedo..." Le di el dedo, i el me lo izo pasar sovre sus inzias, i yo vidi ke en efekto avia puntas (no kero dizir dientes), ke pudian yamarsen dientizikos.
Me disho: " Albertiko, kayadiko, e?" Le dishi: "Papu, deke?" " Ayin ara!" me disho.
Le dishi: "Te espantas ke te van a echar ojo" "No," me disho. "ma kedaremos ansina." Le dishi: "Mozotros tenemos l'abitud ke kuando una kriatura kita muevos dientes azemos fiesta i echamos bombones." "Si," disho el, "kuando es un muevo nasido, ma yo ya pasi el tiempo..." "No, papu, tenemos ke fiestar..." ke dishi vo.
"Vamos a ver mas tadre" me disho el.
Sto mirando ke sta pasando el tiempo, i una noche me dechidi i le dishi :
"Papu, agora lo vamos azer mas avierto. Vamos a yamar al vizindado, vamos a tomar un kafe, un shokola, un bombon... vamos a dizir por kualo es." Disho el: "No... si... Si es ke stas ensistiendo..." Dishimos a los vizinos ke el papu tinia muevos dientes i ke kiriamos fiestar este evinimiento, i lo fiestimos kon eyos.