Avian un Rav kon una Rubisa, ke tenian dos buçukas. Un viernes de Rosh Hashana el Rav se fue al Banyo, i la Rubisa estava en kaza, aprontando la meza. I las dos buçukas estavan cugando en la kaye.
Paso un otomobil, ke les dio kon fuersa a las dos buçukitas i las desho embasho. La Rubisa las tomo a las dos çikas, las emburujo i las metyo en la kama, i empeso a pensar komo se lo va dezir al Rav.
Kuando vino el Rav, demando por las ijikas, i eya le disho ke estan durmiendo. Eya le disho : 'Asente, Sinyor Rav, le va demandar una koza : Avian dos vizinos, ke eran komo ermanos. El uno resivyo una karta, diziendo ke el padre muryo en otra sivdad, i ke el deve de partir para azerle la honor.
El tenia una gaynika. Le disho al vizino :
-Tomala, miramela asta ke torno ! I el amigo le disho :
- Kon grande plazer! Vate en buena ora!
- El se fue, la gaynika kedo ande el vizino. El la estuvo mirando. Le dava la komidika… la aguika… La gayna empeso a engodrarse…
El vizino merko un gayiko. La gayna empeso a parir guevizikos. De los guevos salieron gaynikas. El ke partio, paso los siete i le diseron: 'Aze i el mes'… El kijo aresentarla a la madre ke iva kedar sola. Paso un buen karar de tiempo. Kuado torno a kaza, fue ande el vizino, le demando la gaynika, ke se la de, ke es suya.
El otro le disho :
-No! Tanto tiempo no estuvites! Yo le di a komer, le di agua, la engrandesi, ke akontesyo agora ke la demandas atras?! I los dos amigos empesaron a peleyar.
-I el, Sinyor Rav, le demando la Rubisa, ke dize? Esta gayna a ken apartiene? Al ke la deso u al ke la tuvo?
Dosho el Rav :
-El ke la tuvo la miro kon su buen korason. El ke la desho no se la deso por siempre. Le disho 'miramela asta ke torno'.
-Sinyor Rav, le disho la mujer, 'el Dio mos desho emprestimo dos poyikas, i agora vino mo las tomo'.
Este kuento es kontado por Rashel Perera, 1987, I arekojido en Yerushalayim por Beki Bardavid.