Keridos Lektores!
Es por la primera vez en mi vida ke mis ojos vyeron un livro de gramer! Es por la primera vez de mi vida ke mis manos tomaron un livro de gramer ! Ya se ke no vos estaj kreyendo , ma es vedra.
Dizde unos kuantos dias, el Judeo-espanyol poseda un livro ma-ra-vi-yo-zo de "Tabelos de vebos".
Mi madre deziya por un eço ke no se realizava fasilmente, esçava un grito de sulajamento i diziya: 'Oh! Ucula!! ' Ke palavra es, lo custo ke no se. De ande vyene, ke deforamsyon es, no se. Ma pensi estos d'alkavo anyos ke sera la deforasyon de la palavra turka 'ucunda', ke agora estomos empleyando munço 'sonuçta', al lugar de 'sonuç olarak'. Esta palavra de 'sonuçta', yo ize un statisitik mental, esta empleyado sovre todo por la manseves. Mizmo a mi, ke so una ennamorada del Turko, me se va la boka a dizir 'sonuç olalrak' a lugar de sonuçta'.
Enfin. Desaremos por aki, tomaremos por aya, porke Maltilda se va aravyar kon mi. Eya va dizir: 'Kualo es este dezmodro ! Si ya empesates a avlar del livro miyo, deke no kontuneas!. ' Tyene razon. Es del guste. Porke despues de agora, mas no puedemos dizir, 'Komo ke me ambeze el judezmo, no tenemos ni un livro de gramer ! '. E bien agora ya tenemos. Puedeser ke ya teniyamos, sera ke yo no vide. Koza ke me mandan, lo aresivo kon guste, lo abolto, lo espulgo,... i eskrivo envista. Deke eskrivo ?
Eskrivo para ke todos se gozen de esta publikasyon. Para ke sepan todos, ke un livro, o una revista, o un CD, ..es le ko es.., ke se sepa ke de agora en delantre egziste tala ovra, tal produkto, sudado por tal autor. I agora voz esta anonsando este livro de gramer, i es el primer ke me paso al ojo i a la mano, el livro de gramer de Matilda Koen-Sarano ke es :
Tabelas de verbos en Judeo-Espanyol (Ladino) Este livro es un livro de estudyo de la gramer 'ladino'.
El servira a un nivel mas o menos alto. Es publikado en Yerushalayim, en 1999, por Hamaatik Press, Jerusalem.
Antes de empesar a la gramer, Matilda eskrivyo ainsi : <>I' A mis elevos ke me demandaron de aprontarles esas tabelas' A parte la ovra, I la kaça, ila empajinasyon i la dekorasyon, toda la prezantasyon es eça por Matilda eya mizmo.
Voz eskrivere el 'Kontenido' del livro :
Entroduksion en Judeo-espanyol i en ebreo.
Tabelas de verbos regolares
Primera, Sigunda, Tresera konjugasion
Tabelos de verbos irregolares
Primera, Sigunda, Tresera konjugasion
Indeks de los verbos en Judeo-espanyol (ladino)
Indels de los verbos en ebreo
El livro areyeva 142 ojas, kon una vista maraviyoza, ariento i afuera. Esto todo por 25 dolares, inkluzo la posta aerea.