Vos va kontar la konseja ke mi madre Ester Romano Kohen me kontava kuando era chika. Quando tenia 4-5 anios y bivia serka de la Kula en Estambol, mi mama me kontava esta konseja , kada dia la mezma konseja y me dava a komer lentejaz kon kuchara en la boka. Ansi eran las madres del mil novesyentos i sinkuentas, las madres i padres djudios d'altiempo eran muy amables y keridos. Bivieron por los ijos y ijas i sekrifisyaron todos sus vidas y sus bienes para alevantarlos. Me desharon este regalo, ma no se si pude pasaj a mis ijas medio de lo ke mis padres me dieron. Attributo esta konseja a Ester Romano Kohen ke nasio en Anvers en 1910 i murio en Londre en 1995. Su Vida empeso en la eropa i eskapo en la Eropa solo par hasard ma bivyo en Estambol toda su vida i era una verdadera Djudia Sefaradia en todo sensio.
Djoha bivia en un pais ke el Rey era muy malo y kaprisioso. Un dia el rey salevanto de la siedra y diso: Yo kero saver ke es la mijor komida del mundo. Ken meda la mijor repuesta le va dar todo lo bueno, ma si la repuesta no me plaze loz va echarlos al zindan. Kada uno estava en espanto ma no avia qualo azer. Yamo a Zevulun, Zevulun disho: la mijor komida es avaz sekas kon aroz. "Echalo al Zindan, grito el rey". Duspues vino Salamon: La mijor komida es prasa kon koftes". "Al zindan " dyo orden el rey. Vino Menahem: La mijor komida es el peskado de gaya". Al Zinda dio orden el Rey. Otros disheron, kalavasucho, borrekas, albondigas, guevos haminados...i todos hueron mandados al Zindan. A la fin vino el torno de Djoha. El ya estava muerto de espanto, i hue a ver a su padre prove ke era un kimurdji. Le demando "Papa ke va azer? Si no supe la repusta El Rey me va echarme al zindan, kualo es la repusta? El padre de Djoha le dicho: Ijo, la mijor komida d'el mundo es el ambre. Si soz arto nada no te plaze mesi tienes ambre, mizmo el pan seko tiene savor". Ansi Djoha se fue al rey i le disho la repuesta. Al rey le plazio la repuesta tanto ke los tomo a Djoha i a su padre al saray i les dio todas las rikezsas fista la fin!
Esta konseja se alargave o akurtava dependiende sur la grandeza del plato ke yo devia de komer! Siempre vinia a la fin, akordanse kon el morso de alkavo sur mi plato..