Mozoz la yamavamos " Mamuazel". Mi madre se akodrava ke kuando yo tenia doz anios en 1951 y ke avlava unos kuantos biervos, salia a la poerta y la yamava "emamazel!" para ke venga a vijitarmoz. Bert Behar bivia en el mismo appartamento en el kat de arriva kon su ermana Dora la sodra, en Melek appartiman, Kiblelizade sok. Sishane, Istanbul. Este grande y viejo appartamento de 6 kates y dodje kiraciz dainda egziste. Ma los moradores de este epatamento son desparesidos a kuatro puntas de Estambol, y mizmo del mundo. Bert Behar era una mujer ke no kazo y ke lavorava komo profesora de Fransez en La Bene Berit, La escola de judios del mismo kartie en Sishane, Istanbul. Sishane, La kula, Tozkoparan, Kasimpasa eran todos kartiez yenos de judios en esta epoka. Mi padre, yo y mi ermana todos moz huimos a esta eskola. Y Bert Behar hue la professora de Fransez. Yo me akodro de los momentos unikos de la chikes ke eya tuvo un grande impacto. Mamuazel vinia a vijitarmos kada tadre a tomar el kafe kon la mama y el papa.Vinia kon la robe de chambre ekose y las pantuflas en el pie, se assentava en el minder allaldo de mi y me kontava konsejas en fransez . Yo era tan chika ke no me mizmo akodro ke savia fransez ma por una nisim del Dio me aparese ke entendia estas konsajas. Estava assentada allado de eya, y oyiya a las konsejas kon grande plazer. Envezes me akodro ke untava el biskocho duro en su kafe. Mamuazel me kontava la istoria de "le petit chaperon rouge", "La belle et la bête", "Le chat Bote" y muncos mas estoryas klasikes , ma me kontava tambien estorias de la bible. Komo Noah arekojio a las behemas, komo Moshe Rabeynu salio de Ejipto, Avram y Sara ke tuvyeron un ijo a los noventa, de mallahines, y de neses, y de kozas buenas ke affita al a gente y ke ke ermozo es el mundo. Yo me akodro ke los vizindados y amigos judios vinian en la kaleja y empesavan a yamar u chuflar parake salgamoz a la ventena.
Komo al tiempo no kada uno tenia telefon, la gente vinian, y yamavan por las ventanas, si saliamoz a la ventana vinian para vijitar. Ansi Mamuazel tenia una amiga kerida ke vinia y echava gritos : BERT, BERT, BERT! Todos saviamos ansi lo ke se estava pasando en kada vizino. En vezes en quando soltavamos un sepet(panier), atado en la punta de una kuedra, kon yave ou kon otra koza porke no keriyamoz abasar las eskaleras. En loz enveranos Mamuazel se iva a Yalova y se esteva en el otel por unas kuantas semanas para tomar banyos ke son buenos para romatismoz. La famiya entera moz ivamoz a vijitarla en Yalova. Aya moz assentavamoz en restoranes y kafes entre las ortansas y asiamos sohbet. Duspues Mamuazel tornava a su appartamento ke partaja kon su ermana bivda, Dora la sodra. Dora la sodra era siempre triste no avlava kon dingunos y era muy inyervoza. Mamuazel tenia kargo de eya. En este appartamento de 2 kamaretas kada una estava en su kamareta. Anyos paso y yo tenia 13-14 anios kuando Mamuazel se izo mi profeora de Fransez en el Lycee ke lo yamavamos Bene Brit. Mis parientes, kargados kon los problemes de kada dia ya no tenian mas pasensia de ver vizinos kada dia y de tener vijitas, Mamuazel estava okupada kon su vida y los mas de judios ya avian epesados a pasarsen a kartiez mas ermozos de Estambol. En classa Mademoiselle Behar tenia una reputasion muy differente. Eya era severe y travava las orejas de los estudiantes para los disiplinarlos. Era muy difisil de pasar su classa y todos los elevos se espantavan de la mirada ke echava! Kada dia teniamoz de resitar poesias en frente de la klassa. Quarenta ijos y ijas en pies en frente de la klasa repetavamoz la misma poema : "La peste -un mal ki repand la terreur, mal que le ciel dans sa furreur" Esta poesia en su intensidad representava la ligua Fransez y el espanto ke teniamoz de la profesora.. Ma en mizmo tienpo eramos guerkitos y aziamos toda possible para kitar a Mademoiselle Behar loka. Lenyos ke kayiyan , korer para ke no moz pilishke ou ke moz trave las orejas y azer pizmas. Mademoiselle Behar kontinuo a lavorar munchos mas anyos, despues ke yo me fui a Kolej Amerikano en Estambol. En 1975 kuando bivia en Sisli la via empleyando en el charshi. Oyi ke tuvo una larga vida y estuvo en l'asile de viellard" antes ke moz decho la buena vida. Yo se por siguro ke los judios de Estambol, se akodran de Madmoiselle Behar, esta Mujer ke bivio kon onor y servio su komunitad. Esta mujer ke partajo toda su rikesa entelektual kon mi y kon la generasyos del los Judios de su epoka..
Roza Kohen Drohobyczer