Y resivimos los souvenires del doctor Mayer Yoel, famoso genicologo de Selnik. El murio en esta sivdad, en 1943 en el campo de consentrasion « Baron Hirsch » . Su inieto, moestro amigo Marcel Yoël, mos mando « Los Souvenires » del papu ke foeren publicados en 1938, en caracteres rashi, en el kotidiano de la maniana, Axion.
Racias tambien que el meoyo del Tessalonikiote es como la tierra bien arregador las ideas engeniozas le cressen de souyo en este terreno fertil.
Avia cerca de la universita, oun café ande se assentaban los estudiantes. Yo me rendi ayi, con el espanto en el alma. Por encontrar algounos de los mouestros. Los topi adjountados, al fondo de la sala con ouna patcha enriba la otra, caji desparessidos y, van djugando eksheri, los otros coudoureandosen, de parte a parte, para passarla ora Aharon Cazes y Elia Faragi que ya estaban por pountos para tomar el diplom de dotor (oy son todos dos medicos afamados), parisian ser los capitanes de esta tchica banda, de la coualo hazian parte, entre otras, el dotor joseph Zadok, tanto contado al dia de oy a Paris, el dotor Bourla (el mouestro) y si me accodro bien, Senior Leon Gattegno – si, si el Presidente de la comounita.
La mas parte de estos siniores estaban estudiando farmatchistas. Dire por ser djusto, que malgrado que yo esra oun mouevo conquerente, ellos me recivieron como oun ermano y me conortaron de todas las maneras. Ellos me demandaron deque tenia esta catadoura y couando les confizi mis inquietoudes : No espantes, bouvico, me disho Faragi, no comen degoyado ala universita. Denfrente paresse secana, ma couando vas a entrar adientro, te se hazer todo douz… Ish'Allah ! – Solo que no sos aparesido, disho el dotor Bourla, y se estan mostrando moutcho severos en question de idad. - Ya tengo tisquieri escrito de vente anios.
Ala fin es Aharon Cazes que me dio oun consejo de sehel. – Siente me disho, maniana demamniana te vas a presentar serviz serviz para eserivirte, y si hizieron algouna remarca por coualo no tienes ayinda ni moustatchos, no piedras tou sevizlik. Diles : "Efendis, esto no es baza, siendo en mi familla somos quiyoses de padre a ijo… aladimi , " El consejo foue adoptado ala ounanimita y sovre esto, en siniyo de entouziamo, se metieron todos enjountos a cantar la cantiga que me aquisheaba ;
No me mires tchikitico Barbinan Tengo ijos al tcharshi
Al otro dia, yo me presente al Dar- Oul-Houmous, ande de fato, me demandaron por los moustatchos, Ma yo respondi come me habia consejado Cazes ; esta repouesta touvo oun effeto que me esperaba. Al secretario le salto la riza y, es en alimpiandose las lagrimas con la ouna mano (de tanto reir) que con la otra me firmo la carta de estudiante.
Ya vos conti yo con que sar, por modo de estos erremos moustatchos que non quierian aijinda salir, yo poude entrar al Dar-Oul-Houmoun. Ma mas moutcho foue la pena, y sintiendo por coualo.
Con la esperansa que el diplom mos ia dar oun avansso sovre los farmatchistas empiricos, mos itchimos de moushos en el estoudio, de tanto mas que courrian rouyidos coualmente para avrir farmacia, se ia quierer touvido oun permisso special.
Y como de fato que salio oun bouen dia el friman relatico. Ja entindites que mos boulimos todos dela alegria, en pensando que apena iomos a tomar el diplom iamos a topar el etcho pronto.
Ma enssoupeto mos cayo la estrea. Empessimos a ver en los dedeores dela universita, moutchas gatchas conossidas, eran los farartchistas de Tessaloniki, que habian teshterado todos en boulouik.
Para que vinieron ? Nos demandimos nos.
-Ami, no me esta dando bouena espina ! disho Senior Leon Gattegno.
Tenia razon, pocos dias despoues, embezimos que los siniores farmatchitstas habian venido para dar examen.
Ma que examenes detchito, caforeaba el doctor Bourla. Acqui no saben ni escrivir por entero. Ma acquel tiempo, no era assoloutamente menesterrozo de saber meldar para passar examen de universita, bastaba… tener ouna boulissica de liras.
Las cosas no tadraron a aclararsen, y es que Mavroyanis Pasha, medico atitrado del Soultan, tenia oun souvrinico, Teodoraki Bey, que les etchaba ouestras a todos los avantouriaros de Tourkia y de Europa adjountados con 150 liras tourkas, y si hazias moutcho bazar, solo 100, el soupozaba que ya passates briantes examenes y te assoltaba, bien firmado y con todas las voulas meneterozas, oun permi de farmatchista.
Des esta manera que mozotros estabanos poudriendo nouestros pantalones regalados sobre los banco dela universita, ounos 25 benadames de Tessaloniki, ya ya vinierron ya estoudiaren y ya tomaron tisquieri.
El poder de la liras era como vesh, mouy grande ! Esto, como se entiende, etcho el descorage en nouestra parea. A coualo boueno continouar a estoudiar, couando no iamos a tener a nouestro retorno ningoun avantaje sobre los farmatchistas de nora negra que no sabian por entero meldar ouna ritcheta ?
La mas parte de mis companieros de estoudios se alevantaron y se foueron.
El dotor Bourla abandono la farmacia por la mediqueria.
Senior Leon Yattegno se torno en Tessaloniki y se consacro al ensenyamiyento.
Y jo , yo penssi y arepenssi, ya habia hetcho dos anios de estoudios, me mancaba oun anio solo. Me parissio oun pecado de deshar todo por medio, sobre todo que me habia tanto assarado para entrar ala escola.
Que se tope el papel ! Me dishe. Y maniana alah quieron !
Oun anio espoues, yo tornaba en Tessaloniki con el diplom ala faldouquera.
No vos vo alecoudear moutcho con el racolio de mi retorno a Tessaloniki, mi dezoulizion de ver que el diplom no me daba ningoun avantaje, visto que todo estaba como de primas, y los fachistas empiricos eran patrones de la civdad : ni tambien vos vo a contar de largo como con Betzalel habiendo examinado con mi la situacion, sitenciaron, despoues de pensar oun pocco, que no debia piedrer mi tiempo.
Vate a Paris a continuar tous estoudios, me disho. farmatchista no abasta, hazte dotor.
Ya vos dishe que couando los Levis detjidian ouna cosa no habia quien se la quitaba de la cabessa.
Pretchizamente, Sam Levi estabia en Paris estoudiando el derito. Betzalel le escribio ouna bouena lettra, rogandole de hazer todas las formalitas para hazerme entrar ala facultad de mediqueria. Shmouel Levi, que foue de siempre el plazentero de la parentera, se mitio a la obra y bin-bat me aparejo todo. Y oun dia de medianos de Soucot en lo que estabamos asentados en ouna de los pranssos dela Houpa de Betzalel, tac tac ala pouerta, vino oun empiegado de la posta : - Telegrafo de Paris ! Con la agile que o quije abrir, el telegrafome se arasgo y grande foue mi entouziazmo de meldar : "Parte immediatamente, très-urgent"
Para ma mal, alos shastres a la Tourka y habia empessado a no passarles mas la boya. De mas en mas " Los de djente" (y es entre ellos que mi padre tenia sous clientes) se empesaron a vistir a la Franca mezmo adiendro de caza, moutchos ya habian abandonado no solo los antaris ma y las djoubas, si como no habian salido ayinda las pijamas, en moutchas casas, los hombres se desnoudaban y se mitian ouna camiza blanca con recamos correlados al garon. Courtos mi familla no estaba mas briando como antes, y no le sovraba mas para mandarme, como a Istambol, las 5 liras el mez.
Que lavoro ? Lo que vas a topar. No por exampio, ayi les journales se venden de souyo. Apena vas a salir la tadre, vas a tomar sincouenta deos y los vas a vender en manco de nada.
Mijor que me etcharan contaros de agoua por enrriba y que no sintierra estos consejos de Han Saadi, Yo que me estaba enshashando entero de mis vistidos ala franca, y de mi diplom de universita, vender journales ? Me desvatcheaba de todo ; hila esta vergouensa no, anssina. -Vergouensa es de arrovier ! me grito Han Saadi. Metele al tremo y vate. Y el Dio…
Indeme Para Marsilia …
Boueno hize que lo escoutchi Ouna semana despues yo desbarcaba a Marsilia de oun vapor messajeria y, con la cavessa tomada de la doubarasina yo etchaba ouna mirada espantada sovre la moutchidombre del imenso porto. Ma ensoupito sinti oun grito afalagoudor y conortador - Meir… - Era la boz de Shmuel Levi. El habia venido asta Marsilia para recivirme. - Y anssi emissi mi segounda vida de estudiante ma si como hestaresh couriozos si vendi journales en calles de Paris, vos dire que no touve, gracias al Dio, semejante menester. Los mios se quitaron, como se dize, el pan de la bocca y me estouvieron mandando cada mez, sin falta, las poccas diezenas de francos con las coualas oun modesto estudiante se pouedia, antes de la guerra, mantenerse a Paris.
Or sigoun el uso de los hoshpitales, los dotores enternos tenian nobit de notche a torno de rolo. Ma a los françezes, como que so les quedara adientro del hoshpital la notche, couando Paris di queparisia que se estaba quemando de la louzes y de los reboumbrores.
- Dis donc, Meir, me dizia Moranj, ouno de mis colegas, counato te de y me ramplasas esta notche ? - Dix franc - Ca va. Y tomate tou la redoma de vino mia. Vos dire no era presio fix. A los mas proveticos les tomaba manco, a los riccos les quitaba el ojo. Y anssina diez francos ouna notche, siete la otra, me enzeniaba mis 40-50 francos la semana, quiere dezir ounos dies napoleones al mez.
De sorta que, mientres que los bravos dotouricos françizes se ian a divertir a los teatros, el tessaloniquiote lazdrador estaba mitiendo ounes couantos deventes en oun quienar para el dia malo.
Mayer Yoel (fin 3ème partie)