Y resivimos los souvenires del doctor Mayer Yoel, famoso genicologo de Selnik. El murio en esta sivdad, en 1943 en el campo de consentrasion « Baron Hirsch » . Su inieto, moestro amigo Marcel Yoël, mos mando « Los Souvenires » del papu ke foeren publicados en 1938, en caracteres rashi, en el kotidiano de la maniana, Axion.
La mas parte de los "dadores de palmas" eran engajados entre los estoudiantes. Ouno de los mas demandados era Sam Levi porque creo que no habia otro como el, en Paris entero, para dar palmadas, hazer doubarna y estrouyir el moundo.
Todas las vezes dounque que habia piessa moueva, ya vinia Shmuel a darme haber. Y acquea notche ni si me daban cien francos non ramplassaba a ningounos.
Y anssina los anios de estoudio en Paris passaron como ouna hermoza conseja : ni mos consentimos.
En meldando de nuevo, oy domaniana mi ultimo articolo, me se areboulvio douna toda mi manseves de estudiante. Que hermoza epoca ! couanto la vida era, alora, tranquila y descouidada. Nos mantieniamos con nada, biviamos del ayire. Y portanto eramos los mansivicos los mas ventourozos de la tierra.
Yo estaba estoudiando la mediqueria : Shmuel Levi el dirito ; toumimos, enjountos, ouna oudeca al hotel "Sen- Marsel", situado ala calle de mezmo nombre. Me accodro, como si era oy, la sounriza maternala de la patrona couando mos ivo a ver la camaretta. Camaretta es ouna manera de dizir. Se trataba de oun quielerico ande cabiyan, jousto jousto dos cariyolicas. El passage entre las dos camicas era tanto estretcho que para no tjaqueamos la maniana, mos mitiamos de accodro quien se ia alevantar emprimero.
Lo que se da se toma. Esta oudeca de noma negra ma que a mosotros mos parisia oun paradizo porque eramos mosotros patrones, y no tiniamos mas enriba la cavessa los consejos y los gritos de senior padre, esta oudeca de nora negra, digo, mos costaba 12 francos de quiera al mez.
Comiamos tambien ala economia. Gracia al Dio que en Tessaloniki ya estabamos embezados a ounflarmos de panizico solo "quelaze la boutiqua doulce y el toulito de oro", Ouna bouena miranda con oun metalik de "frit" (pataticas fritas que, a Paris, son vendidas prontas en las quiyouskes, como venden en nouestra civdad las castanias toradas) oun pocco de agua por enriba, para amojarmos el garon y mas que haber !
El hovardalik entero era en el vistir. Que mos vierash a Shmuel y a mi con acquel bonjour asta el ginoyo, acquel chapeo chilindro bien relouziente, acqueya jacca alta alta, y la barvica, come dize la romansa " empesando a despountar !"
Natouralmente que no mos despegamos el ouno del otro. Ande ia Hanna, ia plata, y anssina es que los souvenires mios no se poueden despartir de acqueyos del ijo de Han Saadi (1837-1920)
Nos itchimos bravamente en la pelea. Shmuel sobre todo, no se pouedia dourmir la notche si en tal no se habia aferado el dia con algoun anti-draifousar. Couantas vezes tournimos a mouestro quielirico de 12 francos el mez con el oun ojo preto, la nariz deshatchada y ouna bouena babota al meoyo !
Paris se enflamo al pounto. La capitala (que digo, la Fraçia entera) se devizo en dos campos : Los drayfouzares y los anti-drayfouzares. De la tadre que ya se alborotaba todo. Los nacionalistas empesaban a hazer cortejos gritando : "Mort au juif". Los democrates organizaban contra-manisfestaciones. Nosotros dos (Houla con Satoula) no mancabamos de tomar parte a la manisfestaciones y de etcharmos de moushos en las bagaras.
Yo era acquel tiempo ouno de los assitientes del famozo professor Gautier, al Hishpital de la facoultad de mediqueria. Habia huvido oun concoursso y entre moutchos habia salido yo. El professor Gautier me quieria moutcho bien. El me yamaba " Le Tourk" ou bien "Yoel" y me confiaba los etchos los mas delicados. Courtos, yo tenia ouna posicion previlijiada.
Ma vino el etcho Drayfous y se bozeo todo. El professor Gautier era anti-drayfouzar. Y los estudiantes le havian raportado mi activita en favor del capitan innotjente. Sintiendo lo que me hizo.
Si mis amigos dela "Action" quieren demandar algouna cosa de los cielos, que no sea ouna bolssa de liras. Que demanden mas mijor que el Dio los accontente a ser journalistas a Paris. Ayi es que las gazetas ganan a pouniados. Porque no es el mal de Tessaloniki ande ouna gazeta la meldan entre cinco. En Paris cinco mienbros hay en ouna famiya, cinco journales mercan. El moussiyou tiene el souyo, la madama el souyo y los fijos a parte y no se le haze al marido de etchar ouna ojada sovre la gazetta dela moujer.
Naturalmente que sigoun la oja que melda cada ouno ona yore tiene y sous opiniones. De manera que ves en la mizma famiya el ouno blu, el otro correlado y el de tres zourzouvi. Que tiene esto con el etcho Draifous ? Tiene moutcho. Es para que entendash a que pounto de passion se havia arrivado en Francia couando despoues dela condanacion del capiten djidio, patladeo ensoupeto la bomba de zola, sou famozo articolo "J'accuse".
Los journales se divizaron en dos campos, los ounos soustouviendo que el protcheso devia ser revizado, porque el conssilio de guerra se havia sigouramente yerado ; los otros coualificando de trayishidores y de vendidos a acquellos que proclaman la innotchenssa de Drayfous.
La popoulassion se devizo eya tambien. Que digo, asta en las famiyas que desbrotcharon discoussiones agras, pleyitos agoudos los coualos, conformamente al temperamento cayente de los parizinos davan lougar moutchas vezes y a dadas y reskouniyos.
Yo mezmo assisti a ouna shena encreyirle. La patrona del hotel era anti-drayfouzarda, mientres que sou marido estaba en favor de Drayfous . Oun dia, los dos se aferaron de pleyto. Y la balaboustra no saviendo coualo responder alos argoumentos del marido, que, que le grite ? Allez-vous en , sale juif ! Se entien que el marido el faquir no tinia ni media gotra de sangre djoudia en sous venas y que no mancaba Alhad de la clissa.
Y no creyias que era tchico mal en acquellas oras apretadas, de ser conossidos por yeoudihas en esta grande capitala bouyendo como oun cazan.
La tadre apena se hazia escouro, ya empessaban a exitarsen las moutchidoumbres y a salir los courtijos gritando "Mort aux Juifs" ' a mouerte los djidios" o "Juifs a la Seine" (Al rio los djidios).
Con la exitacion que habia, como nada que si ouno de mosostros cayia en manos de estos fanaticos, te lo testereaban ala mar por passar la ora. Por ventoura que no salia oun cortejo contra Drayfous, que ya se formaba al pounto ouno contra. Y ayide la bagara ! gritos, ensoultos, pouniadas, cozes ma no mas de esto !
Porque ya teshtereaban los cavalleros de la policia y, coushtereando con las espadas desvayenadas, te alimpiaban en manco de nada, la platea la mas rouyidoza.
El djoudayizmo, a esta catolica, se le assemejaba por italiano. Ma sou marido tomaba nouestra defenssa : -"Laisse, laisse enfin tranquille" dizia " Turc ou Italien, il paye le mois au jour fixe". Esto bastaba para que se saradearan marido y moujer. Naturalmente que despoues de haver provocado el playto, mozotros mos mitiamos en la calle, no sea que mos vinieran y a mozotros ounas couantas dela balabaya manotas.
El professor Gautier era de eyos, Oun dia, iniyervado por ouna discussion sovre el etcho de Draifous, el havia enterpilado de ouna manera agrenta a oun estoudiante djidio français, oun sierto Shlomo, este ultimo respoundio. El professor se agreo mas moutcho y le disho que saliera afouera. Shlomo se adresso al pounto ala assosaciyon de estoudiantes, groupando 40.000 mienbros, la couala sin tadrar organizo ouna manifestacion, izo passes y, courtos, obtouvo satisfaccion del professor, despoues de 2 dia de enteroupsiyon delos coursos.
Ma la youri yo, apenas tournimos ala escola, me yamo el professor al coual le havian raportado que, mientres el
movimiento, yo havia sido ouno delos mas cayentes doubaradjis.
- Jöel, me disho, tou que sos ?
- Yo se tourco, senior, le respondi.
- Tourco, bien, ma tou relijion couala es ?
Mi fiyereza de djidio me souvio alora entre macshos y cara no me quize mas esconder.
- Senior professor, le dishe, yo se djidio, ma lo que se ?
- Sos libero de ser djidio. Ma y yo se libero de no calarlos mas, desde que arebouelvieron todo en Françia por
modo de este Drayfous.
Y me dio la espalda
Apenas sali de la universita courri ande Sam Levi a contarle loque me havia acontisido.
-Y a shmouelico etcho que le vino
Esta notche mezmo, me disho Sam levi, hay sedouta del commitato dela alliansa vamos.
Yo, la verdad, que no quieria, me tchequimeava de ir a destourbar personlitas tanto emportantes por ouna
question mia sovre todo que en acqueyos momentos, con el etcho Drayfous y la onda de antisemitizmo, que
havia en Françia, devian de tener otros gatos de escaldar, ma mi amigo ensistiyo.
- Todo loque acontesse alos djidios enteressa ala alliansa, me disho, vamos.
- Me tchiqueneo.
- Ensoupeto. Yo salgo ala barva del rey.
Courtos, por zorla me yevo al local dela alliansa.
El commitado estaba en yena sidouta. Mandimos ouna cartica expozando el fato en courtos. Poccos pountos
despoues saliyo. Shevalsid el mesmo, que era acquel tiempo presidente, y mos sintio con moutcha atansion. El se
enteresso particularmente a mi cavzo.
Vamos a descoutir tou question, me declaro, y veemos que passos hay a hazer por salvar la consideracion que se le deve a oun estoudiante djidio. Creyo entanto que el Professor Gautier non quijo dezirte loque sintites. Es oun honesto intelectoual, oun pocco passionado por los evenimientos, ma al fondo no tiene aborission por los djidios. Etanto tou no vas soufrir nada de este etcho. Si pouedes piyedre despoues de este incidente, tou posto de assistente ala facolta, no te afortouneyes. Me vos a occoupar y personalmente para que obtengas oun posto semejante, y mezmo mijor, al hishpital Rotschild.
Y sicomo yo no savia como rengrasiyarlo por sou bouendad, el bouen Shevalsid adjousto :
- Es lo manco que pouedemos hazer por el djoudayizmo tessalinikiyote que se esta despertando el tambien
- A la civilizacion. Couando vas a tornar en tou civdad, diles a todos que los djidios somos todos ermanos, y
que los fouertes cividaran por los flacos, los ricos por los proves. La alliansa vos quiere ajudar de todas las
formas.
Me havlo con ouna boz tanto cayente y tanto sintchera el presidente dela alliansa que no se ni yo como, las
lagrimas me viniyeron alos ojos y antes de irme, le aferi la mano para bezarsela.
- Loque hago, me disho, no es por ti, es por la solidarita djudia.
Sali de la alliansa bouliversado y de acquel dia divine y quedi oun ferviyente partizante de esta organizacion
e la solidarita djudia en el mundo.
No se qual es agora el rijo del hishpital Rotshild, siendo el fue djidado a la potentissima organizacion de la assistenciya publica del estado français la qouala todo en deshandole ouna grande autonomia lo douvo entanto sottometer alas reglas generalas de todas las otras enstitusiones hospitaliyaras de Paris.
Ma al tiempo moi, el hishpital Rotshild tenia ouna grande differenciya con todos los otros. Ayi el hazino no solo que no pagava oun soldo, si no que davam a el ouna tchica souma cada dia sin contar y oun montante el dia que salia.
Por ser exactos, cada hazino recivia oun franco el dia de mas, los entereses de la donaciones que eron etchos en el corriyente de mes ala ovra, eran despartidos, a partes igouales, entre todos los enfermos. à suivre