Me engrandesi en Estambol ma agora bivo en los Etados Unidos. Ma las personajes las mas enteresantes ke me akodro son la gente ke rankonti en mi cikes. Djamila , la "femme de menage" ou komo mi madre dizia enJudio, "La mosa" me tiene deshado una dulse/amarga empressyon ke me akodro kada ves ke siento Julio Iglesias kantar "y todo a media luz.
En los anios de 1950-55 biviamos en un chiko appartemento en Sishane serka de la kula en Estambol. Eramos enturados kon vizinos y amigos judios y muslumanos. Las famiyas judias, mezmo si no eran rikos employevan mosoz para alimpiar las kazas. Las mas de mosaz eran mujeres mansevas y proves muslumanes ke vinian del kazal. Ma teniamos una ke ere Judia: Djamila. Quando yo tenia 5-6 Anios, ami me paresia ke Djamila tenia ochenta! Oy penso ke pudeser Djamila tenia kuarenta ou sinquenta anios ma paresia muy vieja porke eya tenia kaveyoz grizos, boka sin dientes, era flaka y paresiya hazina . Djamilla lavorava muy presto y era konosida por toda la kehila Judia porke era muy onesta y no rovava de las kazas. El solo problem era ke tenia un borrachon por marido y ijo ke era haragan por kargo. Djamilla tenia la kara de una brucha. Kon la eskova en la mano, la nariz kroshe kon una barruga en la punta, los kaveyos grizos mal penyados y la figura flaka, un sigaro appegado enkolgando en el musho, y un fishu atado sovre la kavesa, las kalsas godras kayendo sovre sus pachas flakas, un fostan aremendado y charukas ke las arastava en korriendo. Ma kuando avriya la boka, Djamilla era la maz dulse y modesta personaje ke tengo konosido. Me akodro ke refuzava de assentar a komer kon mozotros, y disia : "dande se vido ke la mosa se va assentar al pranso kon los panyos". Para mi madre, ke era una jenerasyon mas moderna y manseva de Djamilla la viejizika, estas ideas de maltratar a mosoz kon arebasho, no eran mas populer. Djamilla lavoro en estas kondisyones toda su vida y un dia oyimos ke moz desho la buena vida.
Oy me akodro de Djamilla porke kuando aziya su lavoro de alimpiar las kazas del la gente kon grande entusiasmo, kantava esta kantika kon una boz ronka de los sigarios ke fumava: "Y toda media luz, a media luz loz doz, a media luz los bezos, a media luz loz doz"..
Yo me olvidava del marido borrachon y me imaginava de Djamilla la dulse, vieja bruha, kon su boka sin dientes, baylando en los brasos de un mansevo alto y ermozo ke la tratava kon respekto, y los dos se bolavan baylando kon alegria, "y toda a media luz". No se si esta kantika la sustenio a Djamilla en su vida dura para olvidar sus estrecheyoz de kada dia, ma kada vez ke yo oygo la kantika me akodro de Djamilla, penso a sus esuenyos y la kantika me traye est akodro de la chikes y so oroza por unos kuantos puntos.