Eya kanta, eya tanye, eya cudja
Esto es Judith Cohen, tan humble, tan sempatika, i tan kerensiyoza.
Estuvimos encuntos en el Kongreso de Queen Mary Universty. Judith Cohen es una artista de nasimiento , porke la persona no puede ser artista despues de aver nasido. La persona se traye los donos de la tripa de la madre.
Vedra ke judith es sien por sien una grande virtuoz, kompozitris, kon todo lo bueno ke voz vyene al tino.
El d'alkavo dia del Kongreso, eya estuvo el 'numero uno' de la fiesta organizada en la onor del Prof. Samuel Armistead de la Universite de California, una fiesta propozada por Hillary Pomeray, la organizatrisa de este Kongreso i en mizmo tyempo ansenyante en Queen Mary University and Wetsfield College.Kon Judith la fiesta emprovizada del d'alkavo dia, tuva una grande reushita.
Judith kito otro un CD intitulado 'On my way I met… ' o bien 'Enriva de mi kamino enkontri…' Unos kuantos titolos de kantikas son : 'Dans mon chemin j'ai rencontré, Ya se ve el rabinu/El doktor, U komshi svatba ima, le retour du mari, Primavera en Salonika, C'est dans la Nouvelle France, Der Gitarre,… 32 kantes, donde las lingas kantadas son : el Espanyol, el Cudezmo, el Yidish, el Gredjo, el Bosniak, la lingua de Alexandrie, el Marokano, el Quebecois, el Bulgaro, el Portugez, el Turko, el Ingles, el Arabo, diferentes dialektos de Espanya, i de los Balkanes, i mas otras linguas i dialektas. Todo el mundo la konose i eya es envitada por las kuatro partes.
Este CD gano el 'Premio Marcel Blouin', ke es el Premio de la Mijor Emisyon Müzikal.
Judith es eksper en la 'Muzik Medieval i Tradisyonal'. Es Doktor en etnomüzikoloji. El repertuar de Judith es bazado en las tradisyones ke eya envestiga ay anyos. Eya prezenta los kantes kon personalidad, kon dinamizmo, todo lo ke se embezo en los peuvlos, en los grupos etnikos, en los grandes sentros urbanos. Eya enterpreta kansiones de la müzik sefaradi de Turkiya, de Arabia, de Gresia, etc… i de las zones kripto-cudias de la Espanya i del Portugal.
Judith Cohen es la fondadora de Gerineldo, una asosiasyon Sefaradi-Marokana i dirija munços grupos muzikales komo 'Nova Tradicija', 'NaCarenza'. Suija Tamar Ilana Cohen Admas nasida en 1986 kanta kon Judith i estudya bale i violon.
Siendo prezidente desde 1993 del Canadian Society for Musical Traditions, eya ensenya en la Universitad de Toronto, i tyene Doktorados i masters de munças üniversites de USA i del Kanada. Tyene diversas publikasyones ke se estudyan en las eskolas. Eya gano munças burses i tyene premios numerozos.
Sus gravasyones son : Primavera en Salonica, Dized ay!, Trobadores, Dans mon chemin j'ai rencontre etc. i mas discos i un video kon Gerineldo.
Judith Cohen es una coya para el mundo Cudyo.