Malgrado el progresso de la sensia, mozotros non podemos provar sientifikamente ke el moundo non konta ke solo sinko mil setensientos i sesenta i oun anio de idad. Los geologos, ke estoudiaron l'evolusion de las krostas de la tierra, dizen ke la tierra konta sintenas de miliones de anios. Los doktores de la ley, admetten ke antes de este moundo,ouvieron otros moundos ke lo pressedieron. Por segouro, la tierra en la kuala bivimos, konosio bouleversamientos katastrofikos de vasta envergoura, di natoura a ebranlar las bazas de la tierra i la gente pensaron ke era la fin del moundo – komo vemos eskritos en la Torah ke a la destrouission de Sodom i Guemora, las ijas de Lot kreyeron ke era la fin del moundo i ke eyos eran las oultimas mojeres i el padre, el oultimo ombre sovre la tierra. I por assigourar l'espèce oumana komitieron l'inceste kon sous padre Lot, dospues de averlo emboratchado. El kalendario jodio si baza sovre las datas i las idades de la kreassion disde los anios ki bivio Adam i de sou projenitoura asta la proklamassion de la Lei en el Monte de Sinai, ke touvo logar el sesh de sivan del anio 2448 de la kreassion del moundo (komo lo sentimos a la lektoura de la Ketouba de la Ley en dia de Chavouot i asta la moerte de Moche Rabbeno (Zihrono livraha ke sou nombradia mou sea de bendission).
Reveniendo sovre la opinion de los geologos, meldando ouna oja de oun journal, ambezi ke oun groupo de ombres versados en la medessina, toparon en sous bouchkitas ke el ombre es kompoesto de sintenas de miles de particules. Ke esta diskouvierta, (felisitada por el Presidente de los Estados Ounidos de Amerika, Sinior Clinton) va permeter de melezinar hazinouras ke asta agora paressian impossible ser melezinadas, entre eyas el diabète, el cancer, l'hémophilie i otras hazinouras eredadas de padre a ijou.
Mozotros rendemos lores al D. ke da kon tanta generosidad la hohma, la bina i el daat (la sensia, l'intelligensia i el saver) a gente ke se devouan por el bien de la houmanidad. Qual es el
avantagio ke los geologos trayen a el ien estar del ombre? Agora estos oultimos dizen de ir vijitar el Tibet, ke kreyen ke las mountanias de este païs bien lechos, van determinar ainda mas l'origin i la idad de la tierra. Es ke el Monte Arrarat ou el Monte del Sinai, evokados en la Torah por egsempio, foeron kreados mas tadre ke los montes del Tibet?
Karos lektores, Rosh Achana, iamado Yom Azikaron, foè institouido por akodrarmos ke el moundo foe kreado por volontad de Dio. Ke solo El lo governa i deside de sou evolussion. Ke las leyes divinas imposadas al sol, a la louna i a los astros estan ay a ovedesser en el silensio a la volontad de D. i ke el ombre, kon todo sou saver i intelligensia non tiene el poder de trokar sous evolussiones. El D. decha al ombre la libertad de bochkar i deskovrir los sekretos de la natoura; a observar sous evolussionis i sous trajektorias, ma non tiene, ni terna el poder de trokar sous movimientos. Malorosamente, el ombre esta korompiendo la natoura par sous ambisiones egsajeradas. Estamos viendo al ojo noudo, a la T.V., tonas de pechkados moertos en la mar i en las rivieras. L'ambision del ombre inkonsiente es tala, ke rendieron las vakas «lokas», bochkando a render karnivor las bestias ke son herbivor. De ouna vanda, vemos el devouamiento del ombre por salvar las almas, de otra vanda, por dezeo inassouvivle de la rikeza, sta intossigando la natoura, por konseguenza, la vida del ombre.
La fiesta de Roch Achana, komo el dia de Kippour, mos invita a orasionar, por kourar moestra konsensia i tiner konfiensa en D, moestro Kreador. La orasion mos da la fuersa de bevir, mezmo en las oras de moestra pena, i konsolassion a moestras lagrimas. La orasion sovretodo en los dias de Roch Achana i Kippour, sierve, a la ves, los interessos de la saloud poublika, porke moestro esprito, en estos dias, se intche de grandes i soublimes ideas, ke vienen temperar l'excès de moestras passiones i ambissiones i mos permete de merar los otros kon ojos bienveilentes i amor. La orasion etcha kon fervor es ouna source (oun manadero) di energia ke egsalta la alma. Para mi, personalmente, topi en la orasion oun refougio divino. Topo ke el ombre non puede sentir la pas i non podra kontribouir al bien poubliko, ke en la mezoura onde las leyes de la konsensia inspiran i komandan muestros esforsos. Inkombe a kada ouno menear i koltivar el kampo de moestra alma. La vertoud es el resoultado de los esforsos personales.
Elevaremos en este Roch Achana, moestras orasiones kon korasson limpio,l' imno a la gloria del D. Kreador del sielo i de la tierra. Sea sou buena volontad de agradessermos i djousgarmos komo oun padre kerensiozo kon sous ijos i eskrevirmos en el livro de saloud i de vidas allegres en la serenidad,la pas en Israël i en el moundo. Al Sinior Moïse Rahmani, Redaktor de Los Muestros, a sou mouy kerida famiya i ansi ke a todos los lektores, les augouro ke la mueva aniada le seya abondate de louz i de favores divinas. Amen. Tizkou lechanim rabot.