Un 16 de Oktubre, 4 anyos atrás, en Kissalon, Yerushalayim, tuve la onor de toparme prezente en un esmoviente akto para onorar la memoria de los djudios de la isla de Rodes i Kos ,disparesidos kon munchos otros, en la negra noche del Olokasto.
En este omenaje, se rehusho a la inaugurasion de una Foresta por las Komunidades disparesidas de Rodes i Kos. Esta seremonia se retadro anyos i munchos dimos apoyo i kolaboramos en este proyekto.
Kuando meldi la ovra "Gli Ebrei A Rodi"- "Storia de un'antica comunita annientata dal nazisti" un magnifiko teksto kon ancha informasion sovre la Komunidad Djudia de Rodes,del kualo es autora la Profesora Esther Fintz Menascé i konosimos sus proyektos de fraguar una foresta onorando las memorias de las viktimas de la Komunidad djudia de la isla de Rodes,me konsensie,ke este era el mijor kamino para la difuzion de la historia i doloroza trajedia de esta komunidad. Meldando el livro de esta autora, galadronado en Italia kon el premio «Acqui Storia», kedi impresionada , i tomi la desizion de azer todo lo ke avia de menester kon el buto de dar difuzion i azer konoser esta valutoza ovra .
Endjuntos kon esto,senti un arankamyento de alma, i se me rebivieron los rekodros de la chikes, onde toda la famiya materna vinien de la Isla de Rodes , siempre se akodravan de la ermozura de la isla i el modo de bida de la Komunidad Rodeslí..
Malorozamente, en muestras kazas arivo la tristura en saviendo el negro destino de esta Komunidad i de toda muestra famiya ke bivia en Rodes , i ke disparesieron endjuntos kon todos los djudios en la segunda gera mondiala.
De lo ke meldi en este magnifiko teksto onde la Profesora Esther Fintz Menascé, lavoro mas de diez anyos sovresale la historia i dokumentasion .
La ermozura de la "Isla de las Rozas...",de su historia de siglos en la ruchiguoza Komunidad Djudia, , de los testimonios ke ofresieron tantas gravuras i photografias kon las bodas, la kalor de las famiyas, las festividades, la kila Chalom, el fruchiguozo Kolejio Rabiniko, i la kalor de la vida de los inosentes ke no podian nunka imajinar lo ke les asperava, kedi esmovida i kon una grande tristura en el korason, por esta Komunidad eksterminada sin piadad .
Me kedo en la memoria mas de todo el rekodro de las "buchukitas" Giulia i Fortunata Capeluto : reflektadas en las photos estas dos kriaturas deportadas, almikas sin pekado, ke son un simbol de tanto mal sovre la tiera, de este mal ke arivo al mundo, komo no se tiene visto embasho la kapa del sielo...
Por esto,kije toparme prezente a las oras de la inaugurasion de esta foresta i del omenaje por mor de los poveretos djudios de Rodes i Kos. Por fin, rehushi a viajar por mor de konoser la isla de Rodes,i kumplir un esfuenyo vinien de la chikes.
No kreigo pozivle eksprezar la mesklatina de sentimientos en kaminando i sintiendo la kayades de las kalejas sin un djudio...I kuaji no podia kreyer ke estava kaminando en la isla ke tanto me avlaron mi famiya , i onde los presenzias, las bozes, los murmuyos de la djudria, eran agora soltanto un rekodro trokado en medio del silensio de las kalejas sin djudios...
Por esto, arivando al fin la data tanto esperada de la inaugurasion de la Foresta en Yerushalayim, el dia 15 mos topimos prezentes emprimero a la prezentasion del livro de Esther Fintz Menascé, en el templo Italiano de Yerushalayim,kon la autora, el Embashador Minervini i munchos prezentes, i onde se meldaron poezias i se sintieron kantes de Nora Menasce, ermana de Esther i autora de eskritos i poezia de grande tristura i dolor por las viktimas de la trajedia.
A la demanyana siguiente, salimos los musafires de la Sede del Keren Kayemet Leisrael, en otobuses i arivimos en medio de unos ermozos kaminos de Yerushalayim a la Foresta onde se topaban tantos arvoles por mor de onorar las memorias, asigun los uzos i kostumbres de mozotros, djudios... Antes de prinsipiar la seremonia, se aserko uno de los prezentes i me demando, en avlando, mi alkunya; Kuando le dishe "Codron",el me disho ke era de esa famiya ; I ansi konosi ke el era el ijo de muestra kara Laure Codron, la sola presona de muestra famiya ke kedo kon vida, despues de Auschwitz...
Me senti ondamente esmovida, dunke la historia de Laure Codrón kedo guadrada en mi memoria de kriatura ,i siempre me demandi, i no topi la repuesta, deke una banda de la muestra famiya, topo ese negro destino , enmientres mozotros mos salvimos en la Amerika ; Me akodri porke esa feryda i esa dolor, guadri siempre kon mi...
I agora el ijo de Laure se topava delantre de mi . Lo abrasi esmovida, i es difisil eksprezar kon palavras los sentimientos ; Yine esto es lo ke se kijo en este enkontro:toparmos los unos kon los otros, i ansi unos i otros se demandavan entre si, se miraban, se konosian... En serka de mozotros, una mujer aedada ke avia pasado por los kampos de eksterminio se echo embasho yorando i abrasandose a una piedra-omenaje de sta seremonia, i no pudieron kitarla de ayi, tanta era la dolor i sus yoros...
En medio de esta klima,dio enkomienso la seremonia: asentados en siyas embasho el sol briyante ,enturados del vedre i de arvoles ,unas diezenas de presonas de toda edad i venidos de munchos puntos ; parientes, famiyas, amigos i los ke kijeron toparse prezentes ,sintieron las palavras esmovidas, los rekodros i los meldados i Orasiones de muestra Santa Ley .
Despues de munchas difikultades se avia kumplido el esfuenyo de la Foresta. :Esther Fintz Menasce, los karos Yulidei i Ysahar Avzaradel, i los munchos ke avian lavorado anchamente por este proyekto, mizmo ke no todos estavan prezentes este dia, avian rehushido al rekodro i las memorias... Akompanyada de mi ijo, tuve la onor de plantar un arvole :unos kuantos de mozotros plantimos arvoles kon el ondo sentimiento i demandando pas para las almas de muestros kerydos en una seremonia ke nunka ulvidaremos.
¿Ke otra koza mas podemos azer? Rekodrar ,arebivir las memorias, vijitar la Foresta , dizir una Orasion por sus almas...
Arvoles ke son memoria entre memorias...
Arvoles i Foresta a la memoria de los djudios de Rodes i Kos... Kon el dezeo i kon la esperansa de despertar ,puede ser, la konsensia de la Umanidad...