I YO SO UN RESFUYIDO

El mundo avla i se amanziya de los resfuyidos palestinyanos. Estos estan arrinkonados en kampos ande , muntchas vezes, somportan las umilyasyones i los arrebachamyentos de los payizes akojedores : Libano ; Siriya, Edjipto, Jordanya. Por egzemplo el Koweit ke , kon la Gerra del Golfo, ekspulso pichin todos sus moradores palestinyanos. Ama egzisten resfuyidos al destino de los kualos dinguna pesona se entereso. : los resfuyidos djudyos de los payizes arabos . Dezde el Marroko fasta el Yemen, serka de un milyon de Djudyos fueron etchados, por las buenas o por las malas ,de sus kazas. Esto empeso en 1948 i kontinuo en 1956 i 1967. Yo ago parte de la sigunda ola. Byenes despojados, konfiskados, sometidos al arbitraryo,semos, i lo repeto, serka de un milyon, i dinguno, eksepto muestras famiyas i Israel, se syente tokado por muestro goral. Ni la ONU ke se enflama unilateralmente , ni la Evropa muy parsyala i dadera de lisyones, ni los medyas ke muy poko paresen objektivos ! Verdra es ke los Arabos tyenen petrolyo . … Yo so un resfuyido des los payizes arabos i muestro goral no esmovyo a dinguno. Israel, malgrado sus difikultades, en lugar de aparkarlos en kampos ; integro muntchos de eyos i kontinua absorbyendo otros Djudyos salidos de los payizes del Este, otrun milyon. Otros estados, komo la Beljika, la Fransia, l'Italia se izyeron tyerra akojedora de muntchos resfuyidos , entre los kualos, Djudyos fuyidos de Edjipto. Mi estorya es muy banal. Nasi edjipsyano en 1944. Mi padre, nasido en El Cairo en 1908 era otomano komo su padre.Estonses Edjipto no era un estado independyente. En 1922, kuando se dezmorono el Imperyo otomano, el governo edjipsyano pregono una ley ke dava la nasyonalidad edjisyana a toda persona nasida en el Imperyo i ke morava a esta data en Edjipto. Mi nono, nasido en Damas, benefisyo desta ley i fue naturalizado edjipsyano ansi ke sus ijos. En 1948, imitando al rejimen nazi de Vichy, el governo edjisyano, destituyo, en la indiferensya jenerala, a todos los Djudyos naturalizados despues de 1922 A los kuarenta anyos mi padre vino a ser apatrida. Syendo italyana, su madre ( mi bisnona muryo en Rodes, izla italyana estonses syendo ke la okupavan los de la peninsula),despues de un alay de peripesyas tambyen mozotros mos izimos italyanos. No me akodro de kualsiker ayudo internasyonal, finansyeryo o moral. No tengo el mas chiko rekodro de protestasyones, ni kon la punta de la eluenga , ni de una Evropa pronta a ezmoverse, ni de la ONU. De Ningunos. Solo mos ayudaron los payizes ke mos akojyeron i Israel . Me adjideo de los resfuyidos palestinyanos. Los estados arabos no uvyeron podido integrarlos en lugar de azer de eyos un levdo de odyo i de aborrisyon ? Yo so un resfuyido. Mos tomaron la kaza, los frutos de la lavor de mi padre i del suyo, arrovados, muestras tumbas ezbibladas, muestros kales i kalizikos vandalizados i profanados, mi colección de pules arrankada. Ama ya abolti la oja , unika solusyon , i no guadri ni aborrisyon ni amargura kontra los ke me ekspulsaron. Yo so un resfuyido , ama no les ambezi a mis ijos a etchar bombas , ni a etchar kokteles molotov o pyedras.

Moïse Rahmani
traducido por el Prof Haim Vidal Sephiha

P.S. Del milyon de Djudyos ke biviyan en los payizes arabos solo sovran diez mil, envezes sometidos al arbitraryo, las mas vezes tolerados i menospresyados.

Retour au sommaire