El sigundo titolo del livro de Helene Gutkowsky es : Los Sefaradies del Mediterraneo – Su Historia – Su Cultura 1880-1950 – Testimonios'.
Un livro muevo emprimado en Argentina a penas en 1999, esta tenyendo un grande sukseso dizde su aparisyon.
Helene Gutkowsky prezento su livro en la 'Feria del livro de Buenos Aires' el 27 avril de este anyo.
Helene dize : ' … es una envestigasyon ke empeso kon un grupo de 63 personas de komunidades diferentes, kaji trenta komunidades de 12 payizes…'. Helene se propoza a partir de estas 63 personas, a reformar la vida de los Sefarades del Bassin Mediterraneen. Eyas se reunisaron dizde 5 anyos, al ritmo de una vez a la semana. Syempre se pase asi, ke una palavra, una muzika, un refrano… espierta andelos oyentes una seria de suvenires, de sintidos ke les parsivan pervidos por syempre. Estas seanses se azen en juedo-espanyol, i kada uno avla la lingua de sus avuelos asigun la oyeron en sus çikes. Se demanda a los partisipantes demandas diferentes i kada uno va kontando de lo suyo. Ansi es ke a la fin de tanto arekojimiento Gutkowski se metyo a eskrivir en rekonstruizando el pasado.
En la kapa tan briyoza, ay las fotos de : Puerto de Rodas, Anna Sides y sus hermanos, E. Israel 1916. Ketuba Tradicional (Tetouan). Objetos tipicos (Tanger). Puerta de la Reina (Tetouan). En este livro 'Erase una vez… SEFARAD', Helene empesa kon 'Palavras Previas' onde konta komo i komo se formo este livro. Eya mete tambien el tablo de 'Criterios de Transcription y llaves de Pronunciacion'. I despues uno a uno, eya va dando los nombres i una çika biografia de los partisipantes. I tenemos un 'Prefac io' de Haim- Vidal Sephiha, para aklarar mas el livro, kon la 'Presentacion de Dr. Jose Menasce, Presidente Honorario de CIDICSEF'. Son 15, Kapitulos, un livro de 450 ojas . Tenemos Rodas, Judios de la Italya, Komunidades de los Balkanes, de la Bulgaria, de isla de la Mar Egeo, Chios, la Gresia, Las tierras del Sultan, tenemos Judios de la Siria i del Liban, Eretz Israel, Semerkand, el arshipel filipino, el Egipto, del Maroc a Castilla. Esto son capitulos del livro de Helene Gutkowski.
El livro esta ilutrado de fotos ke todos tenemos en musestras kazas, i ke no damos emportansa, vedra fotos muy enteresantes. Ay tambien munços desenes eço de mano .
No mirej ke esto dizyendo 'livro', lo custo es ke es mas ke un livro ke tenemos entre las manos, es un 'album'. Si, si, es album el livro de Helene. Es un album de vida, es una avantür de muestras vidas de Cudios, de Sefarades, ke las bivimos sin apersivirmos, komo ke este modo de ser.
Syendo eya Eshkenaz i mantenyendo dizde anyos en Buenos-Aires un Atelier de Memoria, Helene enkontra un dia una mujer Sefarad ke dize tener munço de kontar. I es otro punto de kuriozitad ke una Eskenaz aga lo ke mozos Sefarades deviyamos de azer, bien ke ay aunkon todo ken lo izo i lo esta azyendo
Helene Gutkowsky es una sosiolog. Vedra ke este livro sera su spesializasyon. Ma yo penso ke esta ovra no kave ni en una tez de doktora. Esta ovra es monuman, en ke rama ?
En rama de sosoloji, etnoloji, historia, jeografi, antropoloji, filozofi, literatura, spikoloji, lingua, lingustik (ke me sirvera a mi para mi tez de doktora por egzempo), i mas tanta sensia i arte ke agora me vyene al tino i no me vyene al tino. Es un livro paridero ke un montonal de elevos, de profesöres, de bushkadores lo van a tener debasho los ojos, syempre en medyo de sus mezas. Vedra ke no es un livro de maldar i meter a la bibliotek. Ay tanto detalyo diaryo ke mos fuyo sel ojo, ke vamos a dezir ke Helene es una endivina ( !). Eya empleya dos manera de eskrivir i ansi entendemos en vista ken es el ke konta, es eya o bien es el enformante. Vedra no ay konfüzyon. De sorte ke es un livro no solo enteresante, ma tambien muy agrevle a meldar. Todo ya esta pronto para el lektor, la grafia, las fotos, los desenes. Es un livro bivo-bivo ke tenej en las manos. I es por esto ke vos kishe ke es un album de vida, un album de mi vida, de tu vida, de la vida de mi mama, de mi papa, de mis granmama i granpapa, … es la vida, la vidas de mozotros todos, mozotros los Sefarades.
Para Helene Gutkowsky no ay limito. A la mueva edisyon ke penso sera en serka, o ke ya se empeso a reemprimar, Helene sera ke va tener ganas de acustar otras munças sivilizasyones, empesando de la Trakya asta la Turkiya entera. Este livro es un çek avierto. Ayindo se puede enrikeser asta ke no vaj a pueder alevantarlo kon las dos manos. Akel tyempo Helene va ir para un sigundo volume digo yo.
No ay menester de presizar ke este livro/album es un gozo. Afilu sin avrirlo, envista ya vej ke 'koza grande' es. Las kaças de un briyo i unas ilustrasyones maraviyozas ke en vista voz yevan al kontenido, kon un papel eskstra es lo ke aharva al ojo envista. Todo esta net ariento, sus desenes, sus fotos, todo. No vemos falta. Es una album ke no se enkontra kada dia.
'Erase una vez SEFARAD', son 230 fotos. Desenes ay en 456 ojas, i el livro es de 450 ojas en total. Se puede demandar : lon çek banker al nombre de Helene Gutkowski embiyado a : Madame Claudia Chambon –SOGI – 33, rue Orfila – Paris XX – France.
I este livro deve ser un livro de ensenyamiento i de estudyo al nivel de los lises i de las universitades del mundo entero, sovre todo ande se estudya 'Humanities'.
ERASE… se puede demandar de :
Editorial Lumen – 1999
Viamonte 1674 (codigo 1055)
Buenos Aires – Arjantin
Tel : 4373-1414 (linas rotativas)
Fax : 54 – 114375 – 0453
Ke bueno ke izites este livro para mozotros todo el mundo, kerida Hélène !