SUPERSTISIONES I UZOS N°1
Gad Nassi
SOVRE LA TRADISYON MAJIKA DE LOS DJUDIOS OTOMANOS
En este artikolo, va mos a dar syertos apersidos sovre las superstisyones i uzos de los djudyos otomanos, en aprovando de
integrar los sovre sus sujetos.
Munchos de eyos fueron rekojidos por Avram Galante. Otros apartienen a las komunitades romaniotas del Imperyo. El
artikolo de Danon, mos fue muy provechozo para anchear muestra konosenyo en este sujeto, ansi ke lo ke mos fue
komunikado por personas ke grandesyeron kon estos superstisiones i uzos. Todas estas kreyensyas son meskladas entre eyas i
azen parte de la tradision majika komuna a todas las komunitades djudiyas del Imperio Otomano.
Este estudio komo otros estudios publikados sovre este sujeto, no refleta todos los aspektos de estas kreyensyas i munchas de
eyas son vuadas a despareser kompletamente de la memoria kolektiva.
Preferimas de klasifiar a estos en dos kategorias. En la primera kategoria arekojimos akeyos ke eran pratikados por kada uno
i ke achakes de sus praktisidad no nesesitavan una intervansion partikulara. La segunda kategoria kontiene rituales mas
kompleksos, ke eran pratikadados por personas versadas en este domeno.
Kontra la Aynara
Se enkolga a la entrada de la kaza o de un magazen, una nalcha (fyerro de kavayo), alakuala se ata un ajo i alhandras blus,
la kuna se meneya kon un kuedro blu,
se mete alhandras de kolor blu al chapeyo o al vistido de una kreatura..(1)
Se diziya "ajo a tus ojos", porke se kreyiya ke el ajo teniya un poder majiko,
se diziya "mashallah", byervo en Turko ke kere dizir ke el Dyo guadra,
se eskupia o se aziya komo si se eskupia,
se metiya un klavo, en la aldikera.(2)
Si una persona alavava a una persona, kalia araskar el kulo. Al lugar de uzar a este byervo, se diziya "araskar el koshuegro". (3)
El kazamiento
Durante la seremonia del kazamiento, el kazado mete su pie sovre el pie de la kazada, entanto ke ekspresion de la submision de su mujer. Si la kazada se empresa i mete su pye al pye del marido, esto eksprime ke eya dominara en la vida konjugala,
kuando una ija prove se iva kazar, le emprestavan djoyas antes de ir se al mikve. La kazada se metia estas djoyas durante los ocho dias, despues de la boda,
en la vijita ke se uzava azer el primer dia de shabat, despues de la boda, se azia regalo de objetos chikos de plata. El muve kazado rekojia a estos objetos sovre un plato en kaminando lo en el entorno de la sala. Esto signifikava ke mismo si esta eskrito en los syelos ke el kazado devra demandar sadaka un dia, ke este akto sea konsiderado komo si este ordeno fue akumplido.(4)
Durante la semana ke suivava la seremonia de la hupa, los mueves kazados no salian de sus kaza. En esta perioda eran vijitadas en el dia por konosidos i kantadoras, konformamente a la kreyensya ke si estan syempre solos pueden ser tokados por fuersas danyozas.
En el ochen dia, el muevo kazado salia por la primera ves de su kaza para merkar peshkados bivos ke se metian en una payla
grande yeno de agua en medio de la kamareta. En mizmo tyempo trayiya un regalo a la novia. La novia se vistiya una de sus
muevas vistidas i saltava tres vezes sovre la payla. En kada ves despues ke saltava, resivia bendisyones: "ke te bendizes kon
munchos ijos, komo los peshkados de la mar i bivaras munchos anios kon tu marido i tus ijos fina la vejes i shiva". Este dia
se yamava "el dia de los peshkados". (5, 6)
El Amor Matrimonyalo
Si un marido no kere byen a su mujer:
la mujer toma la kamiza de su marido, la ekspoza a las ondas de la mar i la aze vistir a su marido,
la mujer eskrive el nombre de su marido sovre tres ojas de mirta, ke las meskla al vino del Shabat i lo aze bever a su marido, (esta prosedura era aplikada i kuando la mujer no keriya byen a su marido),
la mujer aze bever a su marido el kaldo del lavado,
la mujer da a komer al marido un gato, preparado kon la arina tomada de tres mujeres amadas por sus maridos,
la mujer toma la leche de una mujer ke esta alechando una ija, la meskla a la leche ke da a bever a su marido.(1)
Se prepara bumuelikos kon la leche de una mujer ke enlecha a sus kreaturas, mesklado kon la leche de una de sus ijas ke esta enlechando. Estos bumuelikos se venden a un kuple angajado o kazado, para adulsar sus atadijos.(2)
Si un marido no esta en la kaza:
se eskrive al marido una letra, kon tinta mesklada kon la leche de una mujer ke enleche a su ija(1).
Si un marido no uza de estar en la kaza:
la mujer enklava klavos allado de su kama(1).
Si una mujer no kere atirar los supsones de su marido i kere ser libera en sus aktos:
plasa su kamiza al kuerpo de un azno i la aze vistir a su marido(1).
Si una mujer kere provokar el haiso de una mujer kontra su marido:
se toma un pedaso de lodo de un prizyon ke se meskla kon gudrura. Esto se induiza a la puerta de esta mujer.(1)
Para Tener Kreyaturas
se toma un guevo de una ganya preta ke se koze en una kaldera mueva. Este guevo se korta en dos kon un kaveyo. La mujer kome la metad del guevo en la privada i la segunda metad la echa al burako de la privada,
se degoya un gayo i sus guevos se komen por el marido i la mujer,
la mujer ke no tyene kreaturas, frega su tripa a la tripa de una mujer prenyada,
la mujer kome el pedasiko de karne ke se korta en el brit de un rezin nasido,
la mujer englute un etrog chiko,
todo el kuerpo de la mujer se enduiza kon guevo,
pedasikos de tres guevos rayados se dan a komer al marido. (1)
Asigun una kreyensya populare, se kreyiya ke los arvoles se ambrasavan i se akuplavan la noche de Tubishvat. Se enkolgava a este okazion entre dos arvoles una ropa mojada de agua de pozo kon asukar i agua rozada. Ala demaniana, la agua de esta ropa se dava a bever a la mujer,
el kuple se iva alas ruinas de las murayas antiguas de la sivdad, en el kuartye yamado Mevlevihane(7). El kuple se tomava angaje, el braso siedro de la mujer en el braso derecho del marido i pasavan por las syete puertas de estas ruinas. Una mujer vieja las akompaniava en prekantando bendisiones kada ves ke se pasava de estas puertas. Despues se iva bever ala fuente publika, ke su agua era konsiderada provechoza para la paridura. Este uzo, ke se repetava otras dos vezes, era konsidrado entanto ke un paseo, alkual partisipavan los miembros de la famiya i onde se trayiya komidas,
se aparejava una beveraje de guevos bivos de una gayina preta, de raki i de almastigo, ke se dava a bever al marido i ala mujer.(8)
Para Empidir el Avorto
Una mujer ke nunka avorto, frega a su tripa el pedaso de una kamiza, ke se embroja al entorno de la tripa de la mujer, ke se merikiya de avortar,
se enkolga una kadena a la tripa de la mujer. Un ijiko dize "asigun ke esto serrando esta kadena, ke este ijiko sea serrado" i serra la kadena.(1)
Se tomava una kuedra de pishtan, ke lakuala se entornava syete vezes la tomba de un rabino konosido. Esta kuedra se pasava a la tripa de una mujer prinyada, ke la yevava fina la paridura. Esta kuedra se yamava "detenedor".(8)
Si las Kreaturas se Mueren en Chika Edad
Kuando, una de estas kreaturas ariva a la edad de syete anyos, si es un ijiko lo embiyan a meldar - kere dizir a la eskola, i
dan a komer burmuelikos kon miel a sus kamarades de la eskola. En este okazyon, kaveyos ke se kortaron de su kavesa, se
embiyan a la tomba del Rabino Meir Baal haNes en Tiberya. Estos kaveyos se echan al lampadero de esta tomba ke se
ensyende en el 14, del mes Iyar. Si esta kreatura es una ijika, lo visten kon djoyas i la embiyan a tomar un banyo.(1)
Una mujer ke no kere ke sus kreaturas se mueren mas, mete una mansana a su kavesa, kuando esta paryiendo(9).
Para Saver el Sekso de una Futura Kreatura
Durante el akuplamiento, el marido echa alas eskondidas un poko de sal a la kavesa de su mujer. El jenero, maskulino o
feminino, del primer byervo ke la mujer kita de su boka, desida del sekso de la kreatura.(10)
Se metia la bolsa de la safra de una gayina a una mujer prinyada. Si esta bolsa se eklatava kuando la kemavan, esto era
sinio ke va naser un ijiko.
Si la bolsa se kemava sin azer bruido, esto era siman ke va naser ija,
una mujer prinyada uzada dizir durante mueve mezes, kada dia de Viernes, el nombre ke se iva yamar su ijo. Ansi, se
kreyiya ke iva parir ijo.(8)
Sovre la Prinyada
Si una mujer prinyada pasa delantre de un restorante turko i dezea gostar una komida, enkasha su endekso a la komida i
chupa el orikularyo. Esto era rekomandado para satisfezar el dezeo de la prinyada i observar el defenso de komer el taref,
si una prinyada manko a su dezeo de azer una vijita achakes de una paridura antes de su tyempo, se le embiya todo lo ke le
ivan servir la en esta vijita,
una mujer en el tyempo de la paridura, no da ni sal, ni asukar i ni lumbre.(1)
Kuando una mujer kedava prinyada, se avrian en su kaza todas las puertas, armarios i kashones,
se metia una roza mojada al umbrigo de la prinyada. Si esta roza se avriya, esto era siman ke el tyempo de parir ya aviya
arivado.(8)
Para Fasilitar la Paridura
Si despues de nueve mezes, una mujer no ariva a parir:
avre el diya de viernes tres chorros, kada uno konsekutivamente i los desha avyerto. Otras personas deven de serar los,
se deplia un vistimiento i se dize "sedaka de los syelos". Despues, se echa al ke esta paryendo, todo lo supozado arekojido
en este vistimyento,
se mete un aniyo de diamante a la pacha de la mujer i se dize "ansi ke este aniyo esta briyando, ke i la paridura briyara",
el marido aharva kon una vita la tripa de la mujer i dize "ansi ke yo te kargi i el Dyo te deskargara a ti",
tres mujeren ke alechan ijikas, se yaman kon adjele, para ke echan gotas de sus leche a una chanaka, ke se da a bever a la
mujer ke esta paryendo, despues estas mujeres kale ke pishin salgan de la kaza,
se traye a la sinagoga azete de oliva, ke se yama "azete de Eliyau haNavi",
se arevata tres avas sekas del bakkal ke se dan a komer al ke esta paryendo,
a traverso de la tripa de la mujer ke esta paryendo se pasa un ilo i kon una punta de este ilo se toka el Sefer Tora en la
sinagoga,
el marido se inche la boka de agua i la da a bever a la boka de la mujer.(1)
Kuando una mujer esta paryendo, se avren todas las kadenas de la kaza(2).
Si el marido no esta en kaza:
se lava la yaka de un vistido del marido o se moja una letra del marido.
Sus agua se da a bever a la mujer ke esta paryendo.(1)
El pedaso de ropa ke entorna un Sefer Tora se pasa al kuerpo de la ke esta pariendo(11).
Para ke la Parida Tenga Leche
Se mete en basho una plata de komida, ke una partida se da a komer a un gato i la mosa kome lo ke keda en el plato i dize
"leche para mi ijiko".
En kavzo ke no ay un gato en la kaza, se puede uzar i de un perro,
se enkolga en el pozo un biskocho envelopado de un handrajo ke se desha mojar una noche entera. La mujer lo kome al
amaneser del diya i dize "leche, leche",
se va a un fuente kon syete chorross i se kome almendras kon myel.
Una persona demanda a la mujer "kualo estas komyendo?" i la mujer responde "leche i myel". La persona dize "leche
para tu kreatura, ke la engrandeses en abondensya". Despues de esto los chorros se dechan avyertos i se van de ayi,
se topa en la guerta una yerva kon tres ojas igualas. Sovre estas ojas se mete asukar, ke se kome en asentando sovre las
pyernas i se dize "leche, leche",
se mete a la payla de banyo una vaza kon agua, biskochos, almendras i asukar. La mujer enkasha en este vazo sus tetas i
dize "esto bevyondo mi leche",
las espinas de un peshkado atadas a un ilo se echan a la mar i se dize "leche, leche".(1)
Se da a bever a la parida una bevyente preparado de almendras i de asukar(2).
El Azlaha i Bereket
Si se da lumbre al vizino, se guadra un pedaso de braza para ke kede en kaza. Porke la braza reprezenta el bereket,
si se troka kaza de morar, kale trayer a la kaza mueva los restos de lo ke se eskovyo en la kaza vyeja kon un kuchiyo preto.
Porke estos reprezentan el bereket,
si se empresta un guevo, kale dar atras un otro guevo. Porke el guevo konsiderado entanto ke un objekto bivo, reprezentava
i el bereket. De mismo, no se deviya de arovar un guevo,
en las semanas ke presedan la Rosh haShana, no se dava a la djente ni arina i ni guevo por la misma razon,
despuer de ondar los al resto del vino de la avdala, los dedos se enshaguan a la aldukera,
se mete en la aldikera ojas de una planta, bendizida durante la avdala.(1)
Sovre las Kreaturas
Si se pasa sovre una kreatura, se kreye ke la kreatura no kresera. Se deviya de pasar otruna ves para evitar esto,
de mismo no kaliya pasar a una kreatura por la ventana para dar la a una persona en pasando la por la ventana,
si una kreatura no esta kaminando, sus pyezes se atavan i la yevavan a la sinagoga para dizir "da la pyezes para ke puede
kaminar" o "komo yo kamini i tu kaminaras". Si ainda no puediya kaminar, lo yevavan al lugar ke nasyo i se vaziya sovre la
kreatura un kantaro de agua, se tomava dos kuchiyos i se diziya "aki esto kortando tu espanto",
si una kreatura era komedor, lo metiyan a un orno i se diziya "asigun ke este orno es arto, de mismo ke sea tu tripa". (1)
Si amostravan un espejo a una kreatura, se kreyiya ke sus dyentes no pujaran,
si una kreatura ke no tyene ainda dyentes, se kita a la kaye la noche, kale meter un pedaso de pan a lo ke se viste,
si una kreatura sin dyentes se traiya a una kaza por la primera vez, le davan dos guevos para evitar ke los ratones no vengan
a esta kaza,
kuando el primer dyente de una kreatura empesava a pujar, su madre o uno de sus paryentes metia un grano de trigo en la
palma de su mano i se diziya "komo este trigo se avre i ke tus dyentes salgan",
kuando el primer dyente aparesiya, esto se selebrava en komiendo avena. Porke las avenas se avren kuando se kozen,
la persona ke apersevia por la primera ves a este dyente, kalia ke dara un regalo a la kreatura.(2)
Durante las tres primeras noches ke suivavan el nasimiento de una kreatura, se metia pan, sal i moneda chika sovre una
meza kon una lampa. Ala tresera noche se metia sovre una meza chika allado de la kavesa de la kreatura, un espejo i un gato
aparejado por una ijika ke sus jenitores biven. Debasho de la kavesal de la kreatura, se metian objetos de plato i djoyas para
los spiritos supozados ke vijitaran la kreatura. De mismo, se metia una lampa sovre la meza, para ke estos vijitadores topan el
kamino de la kuna.(20)
Para Ambezar a Meldar i no Ulvidar
Se gole una kandela ke se enkasho al resto del vino de avdala, despues ke fue amatada i se mete a embezar a meldar,
se kome pedasikos de pan kemados,
se kome los pedasikos del aryento de kanos, ke eran uzados en el tyempo entanto ke pendola,
no se dava azitunas a komer a los ijikos, porke se kreyiya ke la azituna aze ulvidar.(1)
Enemistad i Pleto
No se asenta al lugar de ande un otro se alevanto, sin ke este lugar se yelo,
no se pasa un shavon direktamente de mano en mano, kale pozar el shavon a la espalda de la mano,
no se pasa la tijera de mano en mano,
no kale deshar la tijera avierta,
no kale jugar kon las yaves,
no kale deshar el kalsado a la rovez. (1)
Si ay un pleto, en kavzo si sos behor o behora, puedes provokar ke este pleto kontinua en araskando te el kovdo(12).
El savon, la tijera i el kuchiyo no se pasan de mano en mano. Kale apozar los. Si se pasaron, kale dizir "pu, pu" komo si se
esta eskupiendo,
las charukas kale ke se deshen una allado de la otra de una manera korekta, sino sale pleto.(3)
Los Mesajeros de la Maldisyon
Si la punta de la oreja esta kolorada,
si se araska la oreja,
si dos personas se estan mirando a las manos,
si un armario keda avierto.(1)
Moneda
Si la mano derecha se esta araskando, se va dar moneda,
si la mano siedra se esta araskando, se va resivir moneda,
si un sirkolo se desina en una tasa de kafe, se va resivir moneda.(1)
Los Mesajeros de Novedades Buenas
Si se sarnuda (tres vezes) el diya de Shabat a la tadre,
si un perro urina a la puerta de la kaza (esto es en mismo tyempo mesajero va ver vijita),
si un papiyon vola la noche en el entorno de una lampa.(1)
Los Mesajeros de Tener Vijita
Kuando se traye arimas de ramos para kemar el orno, si una de estas arimas se keda en pyes despues ke kayo en basho,
si un kuchiyo se keda sovre su espalda (esto es mismo tyempo mesajero ke un myembro de la famiya partira en viyaje),
kuando se masa la arina, si el gomo petiya, este pan va ser komido por un ajeno ke vijitara la kaza i komera el pan
preparado kon este gomo,
si se araska el sursilyo, se va ver una persona, nunka renkontrada.(1)
Para ke se Retorna a Kaza
Si se kere ke un myembro de la famiya bivyendo en una otra sivdad retorna a kaza, se echa al pozo la punta de su taka
atado a un kuedro i se yama su nombre,
de mizmo se embiyan para ke las syente, flores de su guerta.(1)
Para ke un Vijitador Vayga
Se echa sal a su espalda, kuando esta asentado,
se meneya la kuedra del pozo,
se mete una eskova detras de la puerta,
se enduisa gudrura a la puerta.(1)
FIESTAS
Roshashana
No se estrena en Roshashana kalsados, charukas i kalsas, porke kale estrenar empesando de la kavesa i no de los
piezes(12).
Kipur
Noche de Kipur, se mira a la azete en una chanaka allado de la luz, antes de ir al kal. Si la persona ve su facha de una
manera klara, asigun se ve en un espejo, esto es siman ke bueno i todo va ser livyano i klaro durante el anyo.(9)
Purim
Kontraramente a la ley, durante una pransa de Purim, se podia komer karne antes komidas de leche, se dizia en mismo
tyempo "baruh Aman, aruh Mordehay" al lugar de "baruh Mordehay, aruh Aman". Este uzo era bazado sovre la
kreyensya ke esta pransa kaliya ke sea tan oroza, ke estos uzos eran permitidos.(4)
Pesah
El alkavo dia de Pesah se echava herbras freskas en la kaza i se dizia "anio vedre, ke no se seke" (13).
Gad Nassi
à suivre
Retour au sommaire
- Copyright © 2001: Moïse Rahmani -