" …es ke abajaron los anjeles i kortaron los pies i las manos, i su grito se sintyo asta el fin del mundo… asta agora la komida del kulebro no era komo resto de animalyas, sola mente komo la persona, ke kome delikadas . Ma agora se maldijo ke su komida sea tiera… "
'am Lo'ez, Bereshit 2 :25-3 :15)
Mientres ke esto komiendo los bimuelikos
Penso en el kulevro de Ganeden. Grito
El kuanto le kortaron los anjeles los
Pies i las manos, ama lo peor era de no
Komer mas las delikadas sino
Solamente tierra.
Mientres ke esto komiendo los bimuelikos
Penso en kulevro
Prove de el, no konosia las komidas
Savrozas i pastozas
Ke nunka no las
Paladeara :
Bimuelikos, borekas, bulemas, boyos
Bogatchas, fritadas, guevos haminados
Shuripiko de roza, dulse de bembriyo
Sutlach kon kanela, kalavassika kon kezo
Prasafuchi, Tishpishti
Si el pudiera entender ke se lo
Maldira ansina, por seguro no la avria
Sombayido a Hava, no la avria
Guluzoneado a ke koma eya el fruto
Entre todas las kriansas aya al tiempo
No avia mas aguda ke el kulevro
Kon su agudez se ennaltesia
I se glorifikava, por seguro a
El, los ojos se le avrieron
No asemejava ni a Hava, ni a Adam ha-rishon
Eyos desovedesientes
Ma ainda inocentes
Ma el kulevro, sierto ke bien i mal
Ya savia, i le gustava de azer mal
(Ay ken dize ke era el Satan tepdil)
Altanto ke le gustava el azer mal
Le gustava el komer delikadas
Alora meresio esta maldision tan apropiada
Yo esto adjideando de el, aun kon todo
Mientres ke los bimuelikos esto komiendo
Rebecca Scherer