En marso 2000, muestro amigo, el profesor Haïm -Vidal Sephiha, sovre-biviente de Auschwitz, abolto en este lugar de sus afriisiones para una emision de radio. De retorno a Paris, solo supo dizir su ansya kuando vido ke muestra lingua no aparesiya en ninguna de las 20 lajas komemorativas
En septembre 2000, Haïm - Vidal fonda kon unos kuantos amigos, la asosiasion internasional " Djudeo-Espanyol en Auschwitz " para obtener una laja suplementaria, i arrekoje los primeros apoyos.
Asta oy, la kampanya adjunto mas de 4.600 firmas de 48 payizes i el apoyo de 70 organizasiones nasionales de 11 payizes. Las tres organizasiones djudiyas yamadas "chadir" de la Arjentina, de la Beljika i de Fransia ansina komo la American Sephardi Federation trucheron sus apoyo.
Sin el ayudo de numerozos amigos del mundo entero, militantes djudios, leaders komunitarios, anonimos, medias, esta kampanya no uviera logrado estas dimensiones i akel impakto internasional. A todos eyos van aki muestras grasias mas entranyavles.
En muestro sitio internet (www.sepharadshoah.org) arrekojimos mas de 60 pajinas eskritas de komentarios, a korruto, muy ezmovientes. Evelyne L.H.- Fransia, por enshemplo , mos eskrivio estos biervezikos : Con mi corazon y mi alma. Evelynica. Mandaremos un rekolio d'akeyos komentarios a varias enstitusiones. Entre eyas, al Muzeo Djudio de Selanik i al Ministerio franses de la Defensa -DPMA.
Dezde estonses, el Konsejo Internasional de Auschwitz tuvo la hohma i la sezudeza de rekonsiderar sus desiziones anteriores i restablesio muestra lingua en sus derechos. Rekodremos aki el rolo pozitivo djugado por el Direktor del muzeo de Auschwitz, el Sinyor Wroblewski.. Ansina, el 23 de septembre 2002, fue finalmente instalada una laja en djudeo-espanyol.
La seremoniya de inogurasion tendra lugar el lunes 24 de marso venidero. Munchas personalidades estaran prezentes. Los consules jenerales de Fransia i de los Estados Unidos estaran a muestros lados. Tambien damos las grasias al Sinyor Haham Daniel Farhi i a la Sinyora Flory Jagoda por sus partisipasion.
Toparesh los detalyos en el avizo adjunto en este numero para garantizar las
rezervasiones. Sepash, por fin, ke i los Amerikanos estan aparejando un viaje
grasias a la enerjiya de Shelomo Alfassa de la Foundation for the Advancement
of Sephardic Studies and Culture. Al vermos el 24 de marso.
Michel Azaria
Vice-président, JEAA (Paris, France)
P.S. Kada uno i uno komporendera ke tala aksion global no puede yevarse sin
kontribusiones finansiarias puvlikas i privadas. Dezde agora, vos damos las
grasias por adjuntarvos en la medida des vuestras posivilidades.